هل هذا المنبر لاعضاء خالدين!!!!!!!

كتب العزيز ombadda

Quote: على مدى سنوات كان المنبر هو اول ما يجذبنى عند الدخول للانترنت، وكنت لا اجد صعوبة فى المتابعة فهنااك اسماء محفورة وكل عضو نكاد نعرف اتجاهه وميوله واهتماماته. ايام الاستفتاء لفصل الجنوب يكفى ان تجد اسم العضو jini لتدخل لتقرا قراءة مستقبلية لمآلات فصل الجنوب (وصدقت قراءه jini بصورة مذهلة، فها هو الجنوب دولة ضعيفة بها حروب قبلية والشمال اقتصاديا منهار واضعف بكثير من قبل انفصال الجنوب). مثال واحد فقط من اعضاء مميزين. ومع هذا الانهمار المتتالى للاعضاء الجدد صارت المتابعة مستحيلة او تحتاج لسنين قادمات للتعود ولمعرفة كتابات هؤلاء الاعضاء. مثلا عودو دة منو وشايت وين واهتماماته شنو فى الكتابة. وكذلك مجيدو. عودو ومجيدو اخترناهم عشوائيا بس. لا اعتراض على عضوية جديدة بس ما فيضان مرة واحدة كدة. والزعل مرفوع

صراحة لم افهم اعتراضك علي شنو ؟ علي فيضان العضوية الجديدة ولا علي عدم القدرة علي المتابعة؟ اذا كان علي العضوية الجديدة فدا شئ طبيعي والا لما كنت انت هنا الان فهو موقع شامل لكل الناس والا لجعله بكري حصري لفئة بعينها اما كون ان المتابعة صارت بالنسبة لك مستحيلة فانت ليس مجبر او ملزم بمتابعة كل البوستات التي تفتح والتحري عن كاتبها وميوله واهتماماته فانت كما كتبت لديك اسماء محفورة ومميزة لديك وليس بالضرورة ماتجده انت مميز ان اجده انا مميز

من يدريك احتمال بعد كم سنة يجي واحد يكتب انو عاطف او اي واحد من الاعضاء الجدد صار اسم معروف او محفور وكتب موضوع مميز عن التداعيات المستقبلية لانفصال الشرق او الغرب او الشمال

بعدين افرض انو الاعضاء المميزين او القدامي ديل كلهم خلو المنبر دا لسبب ولاخر هل معناها انو المنبر دا حايقيف خلاص او انو الناس المميزين خلاص انتهو انت عارف شئ جميل انو يكون jini كاتب مميز بس الاجمل انو يكون في جنيات مميزين

انت عارف انا متابع قديم جدا في المنبر دا رغم انو عضويتي جديدة وهناك العديد من الاقلام المميزة بس اكتر زول عندي مميز يحيي قباني رغم انو عضويتو ليها سنة تقريبا او اكتر

بعدين فيضان العضوية الجديدة انت شايف يكونو كيف يعني في السنة بكري يقبل 5 اشخاص فقط مثلا ولا 3 ؟ بالعكس فيضان العضوية الجديدة شئ صحي ومفيد للمنبر يعكس رغبة الناس في الانضمام لهذا الموقع والاستفادة من الاشياء الجميلة الموجودة فيهو واثراء الموقع بتجارب وافكار جديدة تضيف لما هم موجود اصلا .

اطمئن ياصديقي ستجد في كل دفعة جديدة jini وستجد صلاح غريبة ايضا

دمت بود

لا
فالتجديد سنه الحياه
وكلامك عين الصواب

العزيز doma

التجديد سنة الحياة

إتخيل انو كرة القدم وقفت علي يبليه وماردنوا ولم يكن هناك ميسي ولارونالدو ولا رونالدينهو ولا زيدان

هل كان سيكون لها نفس الزخم لااعتقد

شاكر مرورك

هناك من يخلدون أسماءهم بعطاءهم المبدع وسلوكهم المترع الجمال
ومدى مايبذلونه من اجل بلدهم ومجتمعهم

اما من هم دون ذلك فلهم العذر ياصديقى فإنهم تعودوا على روتين معين لن يخرجوا عنه بسهوله

احترامى

Quote: هناك من يخلدون أسماءهم بعطاءهم المبدع وسلوكهم المترع الجمال ومدى مايبذلونه من اجل بلدهم ومجتمعهم اما من هم دون ذلك فلهم العذر ياصديقى فإنهم تعودوا على روتين معين لن يخرجوا عنه بسهوله

كلام جميل

وذلك لا يمنع ان يكون هناك مثلهم حتي وان كانو جدد

عاطف احمد عثمان

حللت اهلا ونزلت سهلا

في حوش بكري الوطن

والوطن كبير شايل الجميع المميز والغير مميز

تسلم ياحسين وشكرا علي الترحيب الانيق

Quote: والوطن كبير شايل الجميع المميز والغير مميز

والله انت جيت من الأخر واختصرت الكلام الكتير الكتبتو انا فوق

تسلم علي المرور

الاخ عاطف ....

السلام عليكم ....

لا تكترث كثيرا بما يكتبه عنكم السناير ...
واكتب ما يمليه عليك ضميرك ..
وسوف تكون من الخالدين ان شاء الله ..

تحياتي ....

مجيدو وعليكم السلام والرحمة

انا لا اتكلم عن نفسي انا اتكلم عن الاستمرارية والمميز والجيد في كل الدفعات موجودوليس محصور في فئة دون غيرها


وتقبل خالص دعواتي

تحياتي عاطف
وضيوفه
أكتب بمسؤولية وإلتزام دون تهاتر , أبعد عن البوستات الموجهة والملغومة , ولو دقست وخشيت شوف ليك طريقة امرق منها دون خسائر
أكتب حين يدك تاكلك ولا تكتب مجاملة
وبعد داك تأكد ستكون راضيا عن نفسك
سلام اود دفعتي
مجيدو و ملهم
كيفكم يا صحاب

تحياتي عاطف
وضيوفه
أكتب بمسؤولية وإلتزام دون تهاتر , أبعد عن البوستات الموجهة والملغومة , ولو دقست وخشيت شوف ليك طريقة امرق منها دون خسائر
أكتب حين يدك تاكلك ولا تكتب مجاملة
وبعد داك تأكد ستكون راضيا عن نفسك
سلام اود دفعتي
مجيدو و ملهم
كيفكم يا صحاب

عبد الحفيظ شكرا علي النصائح الغالية وربنا يقدرنا انو نطبقا قدر الامكان

وسلامي لك ولكل اولاد دفعتك مجيدو وملهم كردفان

انتو دفعت كم ؟

Quote: تحياتي عاطف وضيوفه أكتب بمسؤولية وإلتزام دون تهاتر , أبعد عن البوستات الموجهة والملغومة , ولو دقست وخشيت شوف ليك طريقة امرق منها دون خسائر أكتب حين يدك تاكلك ولا تكتب مجاملة وبعد داك تأكد ستكون راضيا عن نفسك سلام اود دفعتي مجيدو و ملهم كيفكم يا صحاب

أخي عاطف دعني ارحب بك رغم أني لم أتقدمك هنا إلا بكم يوم بس

وعبرك دعني أحي الأستاذ/ عبدالحفيظ ابوسن والذي خط هنا نصائح
اغلى من الدهب بكتيييييييييير في زمن ياعاطف قل فيه الناصح

أخي عاطف وأنا رجل صاحب باع كبيييير في مواقع غير كثيرة
صدقني معظم الموات الذي نالته تلك المواقع كان بسبب عنصرية
الرأي ...والتصنيف الجائر ...أقلام مميزة ..أقلام فذه كاتب لا مثيل له
في النهاية النتيجة كانت شنو ياعاطف ؟؟
الناس الكانو بيحاولو يكتبوا ويقدموا ماعندهم للغير ويكتسبوا الخبرة
وجدوا أنفسهم مضطرين للإنزواء أمام القامات المعلن عنها صبحاً ومساء
وفي المقابل القامات المعلن هنها ومصنفة بأنها وأنها وأنها اصبحت لا تكتب
وإنما تقرأ فقط الإطراءات ...كل >لك قاد إلى موت كثير من المواقعة للأسف
بسب التصنيف الجائر .

لك التحية أخي عاطف وعض بالنواجذ على نصيحة الاستاذ/عبدالحفيظ أبوسن

لك المودة والتقدير

اخ معتصم شكرا علي ترحيبك وسعيد بمرورك

ويبدو انك صاحب تجربة وخبرة في مواقع كتيرة واتمني النصح والارشاد لانو دي اول تجربة انضم لموقع دعك عن موقع كبير كهذا

صراحة الاخ امبدة استفذني بكلامه وحاولت اان ارد عليه قدر الامكان وابين انو اذا كان القديم جيد ومميز لايعني ان الجديد كلهو سئ

نصيحة ابوسن دي سنعض عليه بالنواجز كما قلت

شرفني انيق حرفك معتصم وتسلم يادفعة

سلام
والحق يقال
ام بدة لم أر منه جنوحا سابقا للاستفزاز او التجريح , ولا أظنه يقصد التقليل من عضو بل مجرد خاطرة مرت به حسب ظني
مجيدو وعودو من الكتاب الجادين حقيقة
ظني ان ام بدة داعب ففلت العيار
كنت جديدا ومن الذين شجعوني ام بدة دون سابق معرفة
وليس كل عضو جديد هو جديد علي الكتابة , او علي السايبر

والله اكثر مايستفز كلمة احلال وابدال تقول انحنا في فريق كورة ههههههه

بنسامحو ياعبد الحفيظ بس من اجل الكلمات الطيبات القولتها في حقو



يديك العافية

كتب ombadda أيضآ

Quote: الاعضاء ديل عاشرناهم 12 سنة، والواحد عرف صاحب القضية والقابض على الجمر من صاحب الشعارات الخاوية. علشان كدة المتابعة للجماعة ديل ما من كتاباتهم الانشائية المنمقة، ولا بسبب الشعارات البراقة التى ترفعها انت. وانما بالمصداقية ورؤاهم الثاقبة للمواضيع. واله. دف اصلا ما انت. واصلا ما عندى اهتمام علشان أسمع اجابات مباشرة

وكتب الزميل عاطف احمد عثمان

Quote: فانت ليس مجبر او ملزم بمتابعة كل البوستات التي تفتح والتحري عن كاتبها وميوله واهتماماته

شكرآ
عاطف احمد عثمان
ولك التحية

Quote: اطمئن ياصديقي ستجد في كل دفعة جديدة jini وستجد صلاح غريبة ايضا دمت بود

خيراً قلت وأصبت
الكتابة لم تقف على اللذين نالوا العضوية مبكراً
وصراحة وجدت في أناس عضوية جديدة كلما هو مفيد ومثمر
وكل زمان يجود بأهله

مرحب بيك خالد

وكلامك عين العقل انو الكتابة او التميز ليس لمن اشترك مبكرا في الموقع او متاخرا وانما بمضمون مايكتب

(والكتابة والتميز لمن صدق وليس لمن سبق)

اسعدني مرورك خالد

ودمت بصحة انت ومن تحب

شكراِ ياعودو

سلام للجميع ..

د. أمبدة قلم جميل جدا ومتوازن ..
ولقد مررت على بوست آخر حول ذات الموضوع .. وأوضحت رأيي ان د. أمبده أخطأ في الاشارة ولكن ...
أتمنى الا يتم تضخيم المسألة ...
كلنا نخطيء كثيرا في هذا المنبر .. وكلكم سترتكبون أخطاء هنا وهناك وقد ركبتم معنا في هذا السرج الجميل المسمى سودانيزاونلاين ..
بعضكم سيتميز وقد يفوت الكبار والقدرو .. وبعضكم سيضيف الكثير الايجابي .. وبعضكم سيكون خصما على كل المعاني الجميلة التى تمثل جوهر هذا المكان ...

وبالمناسبة ..
وبعد مضي 5 او 6 سنوات ..
سيكون لبعضكم رأي سلبي جدا في اسلوب الكوته الذي يعتمده بكري ..
حيث يتفاجأ الناس بين يوم وليلة بوجود عدد كبير من العضوية تغير خريطة الذي اعتادوه في الصفحة الاولى للمنبر ..

هذا الشد والجذب يمثل بحد ذاته واحدة من الآليات التي ينتظم من خلالها الاعضاء الجدد في سراط المنبر المستقيم والأعوج على حد السواء ..

مرحبا بكم اعزائي/عزيزاتي
وستجمعكم مع د. امبدة العديد من المشاهد الجميلة باذن الله .. لا سيما تلك التي يلتقطها بكاميرته اثناء تجواله في الخرطوم ..
واغفروا لي دخلتي هذي الشمال :)

Quote: انت عارف انا متابع قديم جدا في المنبر دا رغم انو عضويتي جديدة وهناك العديد من الاقلام المميزة بس اكتر زول عندي مميز يحيي قباني رغم انو عضويتو ليها سنة تقريبا او اكتر

انا ذاتي بقول كده يا عاطف .... ههه

اجمل ما يمكن ان يحدث لك ان تدخل لتقرأ شي و تجد كلام جميل في حقك ...

كتر خيرك يا جميل ...

حقيقة موضوع الاعضاء القدامي و السناير ما عنده اي قيمه او وزن ..

لانو كلنا بنقرا من زمان ... و حكاية 12 سنة و غيره حقيقة نظرة ضيقه جدا للتصنيف ...

الحكايه ماها اقدميه ... لانو في ناس من زمان متفرجه ليس الا ...

انا شخصيا بتمني كل الناس ترجع و تكتب ... وما عارف الحاميها شنو ؟

استاذ يحي قباني شخصيا

الف مليون مرحب نور بوستنا وشارع بوستنا لو كلمتنا كنافرشنا البوست ورود

اها كيف معاك عارفك محب للفن الجميل

كلامي ماجميل الجميل انو في زول جميل زيك كدا معانا في المنبر دا

لانك جد كنت إضافة مميزة للمنبر لانك صاحب سرد قصصي رائع والواحد ببيت ويقيل في بوستاتك الخفيفة والظريفة

صراحة اعجبتني سلسلة حكايات جدي التاريخ وخاصة الجزء المتعلق بالجامعة والخلط واتمني ان تتحفنا بالمزيد

بعدين كلمة خلط دي الي الان مستعملة من وين اصلها ؟


اسعدني مرورك جدا

وتقبل تحياتي،،،،،

ود المشرف مرحب بيك حبابك

ومشكور علي الكلام الرصين دا صراحة اجبني هذا السطر

Quote: هذا الشد والجذب يمثل بحد ذاته واحدة من الآليات التي ينتظم من خلالها الاعضاء الجدد في سراط المنبر المستقيم والأعوج على حد السواء ..

لاتدري عندما تكون جديد ليس في المنبر فحسب بل في كل مكان او عمل او بلد وتجد من يرحب بك او يهتم بك مقدار السعادة والامان الذي يسري فيك عكس الذي تحس منه بانك شخص غير مرحب به او غير مرغوب فيه فقط لانك جديد

صراحة ام بدة اكثر شئ يحسب عليه انه مال الي الشخصنة فلان دا مين واهتماماته شنو وشايت وين وهذا ماضر بمنطقه لو ركز علي منح العضوية الجديدة لعدد كبير من الاشخاص في نفس الوقت لوجدنا له بعض العذر

كما انه افترض كل القديم مميز والجديد غير مميز وغير معروف قبل ان يقراء له .

اما نظام الكوته دا ممكن الناس تقترح طرق او حلول لكي تتفادي هذه المعضلة اذا دت الضرورة

وإنشاء الله نجتمع بك وب ام بدة في هذا الحوش الكبير

لك كامل احترامي،،،

ااي زول من الناس الجداد او القدام من القاهو موضوعه ونغماتو السناير والقدامي بجلي بوستاته عادي تاني .. بصراحة دا حنك ابيض من البيض وتعصب في غير موضعه

مرحب بيك اساسي

ورايك علي العين والراس

تسلم ياحبيب