Post: #1
Title: اخير تتغابى من تتشابى .... يوجد اعتذار
Author: الجنيد حمد
Date: 03-14-2014, 04:22 PM
Parent: #0
مرات الزول بجليها وهي واقفة
|
Post: #2
Title: Re: اخير تتغابى من تتشابى .... يوجد اعتذار
Author: الجنيد حمد
Date: 03-14-2014, 04:23 PM
Parent: #1
التحية للشعب السوداني بجميع مكوناته
والسودان ياهو البجمعنا
وتحية خاصة لقبيلة الرشايدة في شرق السودان
|
Post: #3
Title: Re: اخير تتغابى من تتشابى .... يوجد اعتذار
Author: الجنيد حمد
Date: 03-14-2014, 04:50 PM
حسب طبيعة الشغل بلاقي كمية من الناس
وشلاقة مني بسأل من وين انت
سيرلانكا = التاميل
الهند = كيرلا = مدراس = حيدراباد
باكستان = كراتشي = لاهور
... الخ
اي دولة بتذكر اسم اقرب مدينة وبعمل ابو العريف والشغلانة ماشة مية مية
والزول المننا قطع شك بتكون بتعرف زول من حتتو او هو بعرف زول منكم والامور ماشة برضو
بس زي ما قال بيت الشعر (لكل حصان عترة)
اهلنا الرشايدة لفت العمة بتاعتهم زي لفة اهلنا اليمانية
قبل اسبوع جاني واحد سلم السلام بتاعنا (لبعة لبعتين في الكتف وقعد وطوالي خشى يمين
كيف البلد والحرب ووووووو
قلت اليمني ده حيواصل كده ويقول لي السودان بقى اتنين اخير ابدر ليه
شنقت السفة وحتيت الباقي وزحيت الوريقة القدامي وكفيت يد الجلابية (دلالة على العلم والمعرفة وكده)
وقلت ليه هسي اليمن ده حيرجع زي اول والجنوبيين ما برضو بحقارة واستصغار الشماليين
وانفريت زيادة جبت ليك الحراك الجنوبي وتفجيرات آبين وعيييك كل اخبار البي بي سي رصيتا
وبعداك للشعور بالانتصار وكتلت الدش لليماني ده سالتو انت من وين في اليمن ...
انا لله
ياريت ما سالت (بس تقول شنو شلاقة وعدم بصيرة)
قال لي من وين انت في السودان
طريقة السؤال مع صريجة السن خلتني افكر شوية كده ما كتير
وزولي ما اداني فرصة
واصل ردم ردم السرور انت ما بتعرف السودانيين هسي السوداني من الناس دي كلها ما واضح
نحنا بنعتز بسودانيتنا اي صح اصولنا وملامحنا اقرب للعرب بس سودانيتنا دي ما بنرضى (فوقا) ( تب)
وديك يا لجرسة معليش يا ابن العم والله ما قصدي والعفو
المهم الزول طلع طيب وطايبني
وقال لي وهو مارق السودان ده فيهو كل الناس بس ما برضوا تقولهم غير سودانيين
في سري قلت ليه تعال النت وشوف الناس الهنا ديل عليّ الايمان اي زول شايف روحو اعلى من السودانوية دي
.........
الليلة اتدبلت الحنة ومعذرة لاخونا فيصل الرشيدي
نواصل
|
Post: #4
Title: Re: اخير تتغابى من تتشابى .... يوجد اعتذار
Author: الجنيد حمد
Date: 03-14-2014, 05:17 PM
Parent: #3
كتابت البوست ده اعتذار عن هفوة غير مقصودة وتاكيد على انو قدر ما تقول بتعرف السودانيين تطلع (كيشة)
الدنيا كتاحة ومطرة اصلو البلد دي كل فصول السنة بتجيك في (فرت) ساعة
المهم مع (عريك ) العيون (وفرطقة) الجلابية وملاواة في البابة وكتاحة زي كتاحة الفنقة الوراء الجديد الثورة ديك
قبال ما اتمهل شوية (جوني) شباب من ( السودان الشقيق ) وقعدنا نورجع (الليلة فلان اتسيك وانا قربت اخدا في قبولي بس العشرة مرقتني)
الطلبة ... الهلال .. الدرهم عمل كم .. الاستثناء ..... الخ
السلام عليكم
مرحب اتفضل
عندي شوية استفسارات
اتفضل
حكى الموضوع
وقبل الاستشارة كالعادة الشلاقة جاتني وطوالي خشيت شمال
من وين في اليمن يالحبيب
عاين فيني كدي سمح وسأل الشباب المعاي هسي انا من وين في اليمن .؟؟؟
غايتو الضرب كان جماعي
فيصل من جهة وناسي من جهة ياخ الرشايدة ديل لكنتهم زيها ولكنت الشكرية والبطانة عموم
ياخ الدم السوداني ده ما واضح
من محاسن السؤال والتشوبر ده طلعت بعزومة عشاء مع اهلنا الرشايدة وقبل ما نتوادع
كبيت الجرسة معليش والله ما قصدي ...
وتاني التوبة
ويحيا السودان
|
Post: #5
Title: Re: اخير تتغابى من تتشابى .... يوجد اعتذار
Author: ناصر حسين محمد
Date: 03-14-2014, 05:44 PM
Parent: #4
ههههههههههههههههه
عليك جنس شلاقة
بركة الماكبسك " بنية "
قلت كبيت ليه حنك البي بي سي وهو فاتح خشمو يعاين وانت اتنفخت
وتووووووووس نفسك
|
|