Post: #1
Title: لكل من يعتقد بان نهر النيل تعيش في رفاهية !!!!!!
Author: usama Babiker
Date: 03-10-2014, 01:12 PM
شكرا دكتور اسعد على هذا الفيديو .... تم التصوير بريفي ودحامد محافظة المتمة ....
|
Post: #2
Title: Re: لكل من يعتقد بان نهر النيل تعيش في رفاهية !!!!!!
Author: usama Babiker
Date: 03-10-2014, 01:19 PM
Parent: #1
ياريت واحد حريف ينزل الفيديو ...
|
Post: #3
Title: Re: لكل من يعتقد بان نهر النيل تعيش في رفاهية !!!!!!
Author: خالد علي محجوب المنسي
Date: 03-10-2014, 01:20 PM
Parent: #1
أتمنى كل التشدقين حاملي نار الفتن وكراهية أهل
النيل أن يشوفوا حديث أهل النيل
لكما أنت وصاحب الفيديو الشكر على هذه المادة أخي اسامة
|
Post: #4
Title: Re: لكل من يعتقد بان نهر النيل تعيش في رفاهية !!!!!!
Author: usama Babiker
Date: 03-10-2014, 01:44 PM
Parent: #3
تعال ياحسين عبد المجيد اديني رايك في الجعليين الحاكمين الناس من الاستقلال وما لاقيين ياكلو ديل ؟؟؟؟
|
Post: #5
Title: Re: لكل من يعتقد بان نهر النيل تعيش في رفاهية !!!!!!
Author: usama Babiker
Date: 03-10-2014, 01:52 PM
Parent: #4
|
Post: #6
Title: Re: لكل من يعتقد بان نهر النيل تعيش في رفاهية !!!!!!
Author: ناصر حسين محمد
Date: 03-10-2014, 02:54 PM
Parent: #5
صديقي أسامة
انا اعمل بفقه " دي بطينة ودي بعجينة "
يتهمون الشمال بالسيطرة
وانا اعتقد انو ده ابتزتز ذكي للغاية من بقية اطراف السودان وجاب " حقو " تنمية في تلك الاطراف المبتزة
وتدهور شامل في الشمال
وقسما عظما يا اسامة صديقي يمني موجود في السودان قريب 20 سنة
ويعرف ان الزبير له الرحمة من الشمال ومن منطقتنا " الغدار "
حدثت وفاة واضطر هذا اليمني للذهاب اليها
وأول مارجع اتصل علي
مستغرب انو دي منطقة نائب الرئيس " مع العلم انو لف السودان غربو وشرقوا وجنوبوا "
قال لي والله دي اسواء مناطق السودان ..!!!
دي كوم الكوم التاني
المبتزين ديل والبقولوا انهم مهمشين نقول ليهم " التسوي قريت بالقرض تلقاهو في جلدها "
الانقاذ والحركة الاسلامية قامت على أكتاف ابناء الغرب
هم من حمل السيخ ضد اخوانهم في الجامعات وهم من حمل السلاح بفهم " الجهاد "
وهم من امتطو الفارهات ..!!
وبعدين اي ملاحظ يستطيع ان يرى ان اغلب الموظفين في كل الدولة هم تلك المناطق المبتزة ..
وياصديقي اسامة هذا حوار طرشان
واعمل مثلي " دي بطينة ودي بعجينة "
|
Post: #7
Title: Re: لكل من يعتقد بان نهر النيل تعيش في رفاهية !!!!!!
Author: usama Babiker
Date: 03-10-2014, 04:22 PM
Parent: #6
|
Post: #8
Title: Re: لكل من يعتقد بان نهر النيل تعيش في رفاهية !!!!!!
Author: nazar hussien
Date: 03-11-2014, 06:07 AM
Parent: #7
يا اسامة الجماعة ديل جابو كلام رفاهية ولاية نهر النيل من كم سنة خلت في هذا المنبر
ومع ان المثل بقول : البقولو ليه سمين يقول يامين....
تحديتهم بأن يبادلوني جروف علي النيل باي من الكراكير المهمشة
ايا كان اتجاهها...وطقة بي طقة....
يا رجل نحن من الله خلقنا ما جاتنا حكومة...وحا أضطر اعيد كلامي
الزمان داك تاني:
أتحدي اي حكومة منذ الاستقلال لاحدي اللحظة دي او زول في حكومة او بيعرف معلومة عن زول في حكومة
يجي هنا دا ويقول لي بني لينا مدرسة او شفخانة او مستشفي او طريق او نادي او وصل لينا موية او كهرباء
او دفع لينا مليم احمر او اغاثنا (غير ريجان زمان.....رسل لي كل بيت ربع عيش )
التحدي دا....ماشي لغاية... اتحدي اي جهة رسمة او زول يجي يقول ادانا تقاوي كان كويسة كان فاسدة....جاز بنزين ...اي دعم لزراعة او رعي
بني اي مشروع تنموي صغيروني او سوق....
وبالمقابل....زكاة انعامنا وزراعتنا ...بشيلوها نجيضة من سنة كم وتمانين.....
(بل اتحدي اي مسئول حكومي يقول زارنا ساكت) مع اننا في منطقة شمال غرب شندي ومع النيل طوالي)
قال رفاهية قال:
ناسنا بيأكلو ويشربوا ويقروا بي ضراعهم ساااكت...
الحكومة دي الا يمشوا ليها لي جواز سفر
|
Post: #9
Title: Re: لكل من يعتقد بان نهر النيل تعيش في رفاهية !!!!!!
Author: عبد الوهاب المليك
Date: 03-11-2014, 06:26 AM
Parent: #7
شكراً يا أسامة على هذا البوست
وأهلنا قالوا الجواب من عنوانو .. وصوت وابور اللستر ظاهر ومعظم مزارعي ولاية نهر النيل بستخدموا وابورات اللستر .. وأبراج الكهرباء ماره فوق رؤوسهم شرقاً وغرباً وجنوباً وهي تمد لسانها لمزارع نهر سلام يا المنجل المركوز على ضهر البلد تقيات
جركانة الديزل وصلت 100 جنيه والآن 70 جنيه
قطع الغيار حدث ولا حرج خاصة البوابورات الصينية
رضينا بالهم والهم ما راضي بينا تقولوا عايشين في رفاهية ؟؟
يا مثبت العقل والدين ..
|
Post: #10
Title: Re: لكل من يعتقد بان نهر النيل تعيش في رفاهية !!!!!!
Author: nazar hussien
Date: 03-12-2014, 01:29 PM
Parent: #9
تعالوا هنا دا ورونا الرفاهية دي وين؟؟؟
|
Post: #11
Title: Re: لكل من يعتقد بان نهر النيل تعيش في رفاهية !!!!!!
Author: usama Babiker
Date: 03-12-2014, 01:41 PM
Parent: #10
| Quote: تعالوا هنا دا ورونا الرفاهية دي وين؟؟؟ |
عارف يانزار التهميش لو بقى بالخدمات نحن في نهر النيل ودحامد نبعد من امدرمان 80 كيلو وعندنا شارع اسمو شارع النيل شغالين فيه من 1990 م وحتي الان لم يصل ... مع انه رسوم هذا الشارع اقتطعت من المزارعين وما شفنا شئ ... كثير من الشباب تركوا الزراعة وذهبوا الى المجهول الذهب ... وتقول لي عايشين في رفاهية !!!!!
|
Post: #12
Title: Re: لكل من يعتقد بان نهر النيل تعيش في رفاهية !!!!!!
Author: othman mohmmadien
Date: 03-12-2014, 01:57 PM
Parent: #10
كل أهلنا في جميع مناحي السودان ... وأطرافه يعيشون فقرا مدقعاً ... الفقر ما عيب ..
القرى في الشمالية وولاية نهر النيل دفنتها الرمال وهجرها اهلها ...
الفقر ما عيب ...العيب الفقر المصنوع والمتسبب فيه من يحكم مسيرة هذا البلد ... وينهب ثروات أغنى الدول ويخلق أزماته ويؤجج حروبه ...
العيب في نظرة الناس الواعية لبعضها البعض .. وعدم قبولها لبعضها البعض ...
العيب في التعصب، والنظرة الدونية للغير، أو على الأقل استغلال " سيادة الذات" أو "فوقية الذات"؛ لتمارس أفضلية حضور النسب على حساب الكفاءة، ومستوى الوعي. ...
مشكلتنا التي نواجهها الآن وسوف تحرق هذا الوطن أو أي تجمع بشري فيه .. هو أننا لم نغير مفهوم الاعتقاد بأننا الأفضل ... كل الناس في جميع مناحي الوطن هم الأفضل بل تجد أهل قرية مجاورة لقرية أخرى ينظرون اليهم بدونية ... الأزمة أننا لا نؤسس في نفوس الأطفال والصغار؛ المبدأ الأهم والقائم على إاحترام الإنسان أياً كان "أصله وفصله" من دون أن نقلل من شأنه، أو نحكم عليه من نسبه، أو منطقته، أو مستوى دخله، ... وإنما من "تقوى الله"، واحترامه لك (لا يغشك أو يظلمك أو يكذب عليك)، إلى جانب التأكيد على أن الوطن للجميع (حباً وتضحية)، ومقدار كل واحد منّا بعطائه وليس بشيء آخر.
مطالبون بتأسيس ذلك وتصفية النفوس ... بالطبع هنا لا أعني جهة بعينها .... جميع السودانيون لا يقبلون بالآخر ويستصغرونه ... غرابه .. جلابه ... ود بحر ... عربي جزيرة ... حلبي ... عبد ... فارة ... قرقور .... كردافي ... ود مونج ... أدروب ... ريحة صناحه ... العبد رأسه .... خادم ... أم قرقد .... وهلم جرا من الصفات العنصرية التي تصبغ في الآخر في حين أنهم جميعا أخوة وكلهم لآدم وآدم من تراب ..
لا تتأثروا بالآراء التي تدفعكم لتبرير بأنكم تعيشون في رفاهية وجلهم يعلم ذلك ... لا تنجروا وراء أفكارا خربة صدئة لن تفيدنا جميعا ... وعلينا أن نعترف بأخطائنا كبشر ... وبسلوكنا العنصري أجمع ...ونحيي الأنفس بدل زهقها ... والله يهدئ من يشاء الى صراط مستقيم ..
مع وافر الاحترام ...
والسلا م عليكم ورحمة الله
التعديل : لتصحيح الأخطاء الاملائية دون قصد ..
|
Post: #13
Title: Re: لكل من يعتقد بان نهر النيل تعيش في رفاهية !!!!!!
Author: nazar hussien
Date: 03-12-2014, 02:28 PM
Parent: #12
| Quote: وعندنا شارع اسمو شارع النيل شغالين فيه من 1990 م وحتي الان لم يصل |
24 سنة ما كتيرة يا اسامة
نحن زي شارعكم دا بعد
24 سنة تاني ناسنا في
الحلم ما بحلموا بيه...
ولا اجعص ست ودع ممكن تحمدهم بيه
|
Post: #14
Title: Re: لكل من يعتقد بان نهر النيل تعيش في رفاهية !!!!!!
Author: عبدالعزيز الفاضلابى
Date: 03-12-2014, 08:53 PM
Parent: #13
اللي بيفتكر نهر النيل عايشة في رفاهية الـ يجي يعيش فيها
مافي زول حايشو الاراضي حدادي مدادي والكسرة بنبذلها ليهو لغاية مايلقي شغل.
قصرنا معاكن؟
|
Post: #15
Title: Re: لكل من يعتقد بان نهر النيل تعيش في رفاهية !!!!!!
Author: بدرالدين بابكر مصطفى
Date: 03-13-2014, 06:07 AM
Parent: #14
ابتزاز لا أكثر ولا أقل
المشكلة إنو النغمة دي بقت سائدة في المنبر
تعتقدوا إنهم ما عارفين ؟؟؟
المشكلة إنو ناس نهر النيل ديل لو لقوا نص البلقوهو ناس الأقاليم التانية
كان حياتهم اتغيرت تغيير جذري
شوف كمية المبالغ الصرفوها في تعمير دارفور وكردفان والجنوب
والنتيجة هي مزيد من الحروب ومزيد من القتل
يكبوا فيها قروش تقيلة ويجوا ناس النهب المسلح ينهبوها وينبرموا في الغابة
بقت علينا قصة (مظلوم دفعوك الدية وجايينك يكوسوا التار)
|
Post: #16
Title: Re: لكل من يعتقد بان نهر النيل تعيش في رفاهية !!!!!!
Author: عبد الله شم
Date: 03-13-2014, 08:08 AM
Parent: #15
| Quote: مظلوم دفعوك الدية وجايينك يكوسوا التار |
|
Post: #17
Title: Re: لكل من يعتقد بان نهر النيل تعيش في رفاهية !!!!!!
Author: عبد الله شم
Date: 03-23-2014, 04:55 PM
Parent: #4
|
|