Post: #1
Title: فرار الخواجه في المتره *
Author: مها عبدالمنعم
Date: 03-09-2014, 06:02 AM
Parent: #0
اليوم داك مابعرف شنو خلاني اقيف بس وقفت الوكت نص النهار والسماء اغبش شويه اظن اثر من غيم اول امس لسه لاصق في الفراغ بين السماء والواطه الانا واقفه فيها دي ..زي سمعت كلام انو المترة حقة الخواجه فيها جداد ولبن رخيص والناس يوماتي شايلين جرادلهم بع العشاء ببيع الرطل بجنيه كل زول بشتري بتمن الرطل الواحد تلاته بقي مافي زول بشتري من اللباني الا الكسلان من جرة كراعو المتره ...عنده جداد يديك ليهو مضبوح بس تنتف ريشو وكمان ورخيص برضو
ماحصل شفت الجداد بضبحو كيف بس اشتريت الديك بعد عزلتو قلت دا بكون فيهو زي اتنين كيلو ماكن كدي مابشبه جداد بت الشيخ المضبلن داك ..وانا ماشه ورا ديكي الخواجه بضبحو ويديني ليهو دمو يقطر ..في نص المتره عاملو وتد شجرة زي حقة عليش الجزار القدام بيتم بكسر فيه الضبايح بس ما بعرف اتشاغلت بشنو بس رفعة راسي القي الراجل الاشول ماسك رقبة الديك بطريقه عجيبه اي اي باصبعين بس ورفع ليك الفرار دا فوووووق وفوووووووو جا في نص رقبة الديك طارت هناك ومد لي الديك غلبني امد يدي اتناولو ...
*فاس
|
Post: #2
Title: Re: فرار الخواجه في المتره *
Author: مها عبدالمنعم
Date: 03-15-2014, 01:50 PM
Parent: #1
رغم انو المتره فعليا م كانت حقة الخواجه بالعكس الواطه القامت فيها اتكتلو فيهو اولاد الشيخ اللتنين كانت ورثة جدهم من زمن قديم بس لمن مشو تسجيلات الاراضي في 29 لقو عيدان المتره محولات علي اسم واحد فيهن بس ما اتعرف العكننه جات من وين
وبعد حصلت فيها العكه الاولي زي عملو مجلس راضو فيهو الاتنين والمتره الحاكم قام اجره منهم كل سنه تجيهن خمة قروش بس بقدرة قادر الحاكم العجيب الغريب الشغال قسيم في تركة الناس كتب عقد الايجار الاخراني باسم الخواجه لستين سنه سنه تطقش سنه هسي ليهم زي خمسه وعشرين سنه اولاد اولادم جارين يثبتو انو المتره البقي اسمه مترة الخواجه حقة ابواتهم
اول التبادي الناس مسكو نفسهم من الخواجه في الاخر بيعو سمح ورخيص بس بكتل الجداده بفرد ضربه علي رقبته تطير هنااااك
|
Post: #3
Title: Re: فرار الخواجه في المتره *
Author: مها عبدالمنعم
Date: 03-15-2014, 02:01 PM
Parent: #1
الفرار دا شكلو زاتو غريب حديد كلو وفي نفس الوكت خفيف وسريع النسوان بحكن قالن الخواجه ما بضرب بس برفع يده وياشر علي الشي تلقي الفرار براه قام كبر كان راس ديك كان شجرة فحم
وقالن بالليل بنوم الفرار يقوم يحوم حولين المتره لمن تسمع معاه صوت نفس زي الزول الجاري وكم مره الولاد يعملو كمين يمكن الخواجه معاه يشوفو الفرار بسطع في الضلمه والخواجه نائم في عنقريبه
|
Post: #4
Title: Re: فرار الخواجه في المتره *
Author: مها عبدالمنعم
Date: 03-16-2014, 08:15 AM
Parent: #3
العنقريب زاتو لمن يقربو ما كان بلقو شي ..المهم الخواجه كان فصيح يناطق حاجه الروضه الما بتتغالط في نضم ابدا ..قالو الراجل مرات يطلع الجبل ويقعد كم يوم والمتره ماشي حاله والحاكم تلقي حايم العصريات بعراقي السمني بس السلام يرفعوبطرف نخرتو رغم انو سبحان الله الارض الفيها المتره حقة ناس !
بت احمد ولده عيان حد م جرت علي دكاتره ما طاب اخيرا قالو الولد ياخدو ليهو صوره ملونه والشي الا بمليون لمو ناس الحله قدر قدرتن بس ماحصلو الا تلت المبلغ ..سمعت الحاكم بجي العصريات مترة الخواجه يوماتي تلفح توبه تمشي ترجاه قدام باب المتره بس يجي سايق براه ماينزل القزاز يشوف خبره شنو !!
|
Post: #5
Title: Re: فرار الخواجه في المتره *
Author: عبدالحفيظ ابوسن
Date: 03-16-2014, 08:25 AM
Parent: #4
المترة او المجباية
ناسكم ديل تاكلين في البحر يعني
اها متابعة
مها ازيك
|
Post: #7
Title: Re: فرار الخواجه في المتره *
Author: مها عبدالمنعم
Date: 03-16-2014, 09:34 AM
Parent: #5
سلامات عبد الحفيظ
المتره وفي اقوال الحواشه :)
|
Post: #8
Title: Re: فرار الخواجه في المتره *
Author: مها عبدالمنعم
Date: 03-16-2014, 09:47 AM
Parent: #4
بت احمد زاته ود الشيخ جدها ابو امها يعني حتي هي عندها عود عودين ...انشدهت في مرض ولده بعد جلسات العلاج وشعر راسو راح قالت بتدور تزور الشيخ الصابونابي سمعت ايده لاحقه ...مشت زارت واتبركت وبركت الشافع بس الحال في حالو الشافع مافي شي بقعد في بطنه جو زي ما مشو وحان وكت الجلسه التانيه الدكتور قال لازم بد يشيل المراره !
اليوم داك الحله فد نفر فضل فيها ماهو في حتي الخواجه من ضمن الناس جا ...كانت المره الاولي اليشوفو زول حايم بلا فرار !
والناس في رجا الشافع يمرق طيب ...راحت روحو ومعاها دمعة امو الوارثه عود عودين في مترة الخواجه
|
Post: #9
Title: Re: فرار الخواجه في المتره *
Author: مها عبدالمنعم
Date: 03-16-2014, 09:52 AM
Parent: #4
بت احمد الناس قبل تشيل الجنازه قالت يدفن محل مات وبدور حقي في مترة الخواجه قبل ابكي ولدي
واحدين قايلين المره عقله فات مع روح ولده بس ما كترت ودمعها علي وشيها ما نشف لمن جو الرجال من الدفن وبقو راجعين الحله نادت الخواجه هوي يا خواجه ...بدور حقي في ورث المتره والحاكم ما يخت كراعو في حقي من هنا ولقدام وكان ختاها بكسره ليهو كش !
|
Post: #35
Title: Re: فرار الخواجه في المتره *
Author: مجاهد محمد الهادي
Date: 03-28-2014, 12:07 PM
Parent: #4
| Quote: بس اشتريت الديك بعد عزلتو قلت دا بكون فيهو زي اتنين كيلو ماكن كدي مابشبه جداد بت الشيخ المضبلن داك |
كتاباتك جميلة وبنكهة زمن جميل كم أحببناه ولا زلنا نطراه بالخير
شكرا على هذا الحكي السمح جدا
|
Post: #36
Title: Re: فرار الخواجه في المتره *
Author: مها عبدالمنعم
Date: 03-30-2014, 07:45 AM
Parent: #35
سلامات مجاهد
شكرا كتير
|
Post: #6
Title: Re: فرار الخواجه في المتره *
Author: مها عبدالمنعم
Date: 03-16-2014, 08:28 AM
Parent: #3
الخواجه زاتو لمن سال من الولد وقالو ليهو الدكتور قال شنو دفع مية جنيه وسكت بهزة من راسو ما مفهومه شنو مهناها المهم انو شويه زي اظهر تعاطف ...بعد كم اسبوع والولد لونو بدا يقلب لاسود كدا واحد من ولاد الحله سك الصوره مجان والدكتور مجان وفعلا القريشات لملمتن ودخلتن في التذاكر والصرف علي الولد
اها واسبوعين تمام جات اكيدة مرض الشافع ورم في المعده ولازم يرقد في الذره فورا ياخد جرعات الكيماوي ....الدكتور قال للولد المرافق انتو مريضكم دا كان اسبوع ما بقي كويس ما بغير الدكتور !
يا دكتور ديل الناس العايشه البعملو دا نحن عشان نصل عندك قعدنا تلاته شهور نلم في قروش قرش قرش بس خليها علي الله
|
Post: #10
Title: Re: فرار الخواجه في المتره *
Author: مها عبدالمنعم
Date: 03-16-2014, 10:00 AM
Parent: #1
البكي زي شغل الناس في يوم الدافنه بس كتر الحديث في كلام ام الشافع ...كان بقولو الشافع رغم انو ولد مدرسه زي عمره تمانيه سنوات او اقل شويه بس في قناعه كانت عند الناس سبب قوة الخواجه في فرارو والسبب المره تقيف في وشي جيتو بلاه يوم العمليه ...بعد البكي بتلاته ايام بتذكر الحاكم زي قالو جا زي عادتو الحله وما كذبت ام الشافع خبر لفحت توبه ولقت لها عود مركوز في طرف الحوش شالتو وقامت ...الناس تبعوها في البدوره ترجع وفي المشي خبار ساي وفي كمان البدور يفش الغبينه الجايه من المتره ...واول م وقفت في باب المتره وقف بينه العسكري قال جابوه حارس بعد وصل خبر كلامه للخواجه
|
Post: #11
Title: Re: فرار الخواجه في المتره *
Author: مها عبدالمنعم
Date: 03-16-2014, 10:15 AM
Parent: #1
في مداخلات بكتبه ما بتظهر طوالي شنو ممكن يكون السبب
|
Post: #12
Title: Re: فرار الخواجه في المتره *
Author: مها عبدالمنعم
Date: 03-16-2014, 10:32 AM
Parent: #1
ا؟؟؟؟
|
Post: #13
Title: Re: فرار الخواجه في المتره *
Author: محمد مجيدو
Date: 03-16-2014, 11:20 AM
Parent: #1
مها .. سلام ..
المهم .. اكلتي الديك .. ولا الحصل شنوو ... ؟؟؟
تحياتي ,,
|
Post: #14
Title: Re: فرار الخواجه في المتره *
Author: مها عبدالمنعم
Date: 03-16-2014, 11:28 AM
Parent: #13
مجيدو ..مرحب
لا ياخ لسه ماده يدها تشيلو من الخواجه بعد خلعة كسر رقبتو :)
وتحياتي
|
Post: #15
Title: Re: فرار الخواجه في المتره *
Author: عبدالحفيظ ابوسن
Date: 03-16-2014, 12:29 PM
Parent: #14
مها ما تكلفتينا زي يوم داك
تعرفي المنتدي ده بقي زي الزول النايم ليهو في تكل , لو داير ينقلب علي صفحتو إلا يمرق يستعدل ويجي خاشي
قبل كده قلت الكلام ده قالو لي لا انت براك
هسه انا بكتب المداخله , وبطلع من المتصفح واخش تاني حتي اقدر اشوف مداخلتي واكتب
|
Post: #16
Title: Re: فرار الخواجه في المتره *
Author: مها عبدالمنعم
Date: 03-16-2014, 12:45 PM
Parent: #15
بحاول غايتو :) اشوف نهاية م بتشبه نهايات قصصي الفاتن كلو كلو مع اني حاسه لسه اني طالعه في بداية صعود الاحداث نحو القمه :)
طبعا قصة ما بشوف المداخلات جدا حيرتني بس فكره الزول يمرق ويدخل دي جديده بعمله تاني
وشكرا للتنبيه ليها
|
Post: #17
Title: Re: فرار الخواجه في المتره *
Author: عادل البراري
Date: 03-16-2014, 01:27 PM
Parent: #16
تحياتي استاذة مها
ابو سن الكمبيوتر بتاعه ضارب محصل كمبيوتر يعني شبهينا
جميل مها
متابعين بحرص شديد
كتر خيرك
|
Post: #18
Title: Re: فرار الخواجه في المتره *
Author: عبدالحفيظ ابوسن
Date: 03-16-2014, 01:37 PM
Parent: #17
هههههه
اريتو كان كمبيوتر يا براري موبايل نوكيا , داير ابيعو واشتري بدلو قلم حبر جاف
والله اكتب المداخله واقفل المتصفح وافتحو تاني حتي اقدر ارد ,, يعني الرد عنت شديد , ودي حركة جديدة في المنتدي ,
|
Post: #19
Title: Re: فرار الخواجه في المتره *
Author: عادل البراري
Date: 03-16-2014, 02:09 PM
Parent: #18
أمل الكامل الشفاء لاجهزتكم
اعتقد بان الوضع مازال معرج لدي مها
مره مع صاطور الخواجه ومره من اللابتوب
وإرتدادات الموقع الدفاعية
|
Post: #20
Title: Re: فرار الخواجه في المتره *
Author: مها عبدالمنعم
Date: 03-17-2014, 07:43 AM
Parent: #19
سلامات يا عادل
لسه في حردة اللابتوب :) حقي
ربنا يعين بس
|
Post: #21
Title: Re: فرار الخواجه في المتره *
Author: مها عبدالمنعم
Date: 03-26-2014, 07:31 AM
Parent: #20
العسكري ما ناضمه كلو كلو في الاول بس مسك في كلمة واحده ما بزيده
ممنوع
شنو ممنوع
الدخول
كيف يعني ممنوع نخش في حقنا !يا زوله اختي المحل انا دي اوامر بنفذه بس
والله ياخاله اخير ابعدي من هنا بلا كتر كلام
وبعصاها الشايلاه دفرت باب المتره العاملنو من اعواد الساعه العسكري يرفعه يرميها هناك واريتو ما جبد المره من توبه الساعه اليتنفض ود اسماعين وصرج يصقع العسكري لمن انهجم في رقبتو وبدت المكافته الصح صح
العسكري والخواجه وعمال المتره من جهة ورجال الحله من جهة تانيه
بعد ناس الحله دقو الرجال ومرقن العسكري كرعي جوه المتره كل زول مستغرب العسكري جري لجوه المتره مالو
واثناء وقوف الناس قبال المتره قبل الرجال يتفرتكو اذا بالعسكري يظهر تاني وطراخ صوت النار يمين بالله قالو العسكري قصد يكتل المره سبب الجمعه بس الرصاصه دقشت حاج محمد شيخ الخلوه ...وبدت المخابته من اول وجديد بين الناس
كر وفر
اخيرا قبضو العسكري وسبحان الله الولد ود حاج محمد دفرو رماه في الواطه ماقام علي حيلو
قالو بعد الناس فرتكت علي اهله لقوه ميت !
كتلتو دفرة الوليد جنس حيره
الناس ما لحقت نامت وكت سمعو النضم
|
Post: #22
Title: Re: فرار الخواجه في المتره *
Author: مها عبدالمنعم
Date: 03-26-2014, 07:47 AM
Parent: #21
صلاة الصبح ..اكدو موت العسكري شيخ محمد قال ياناس هوي والله العساكر ما بخلونا في حالنا كان صح مات من الدفره دحين اليقوم جمع من الناس خاتر ياخدو خاتر اهلو قبال نبقي في مقاله تانيه
.مرقتن من الجامع يلقو البلد متروسه عساكر ونجوم
اول زول قادوه جدعوه في عربية البوليس ام احمد قالو شنو جمعت الناس يوم امس وشايله عصايه ناويه معناه تكتل الحاكم مالقتو كتلت العسكري
سبحان الله كنا في حال اصبحنا بحال تاني
المتره حقتنا وندافع عن نفسنا ويقولو كتالين !
|
Post: #23
Title: Re: فرار الخواجه في المتره *
Author: مها عبدالمنعم
Date: 03-26-2014, 07:59 AM
Parent: #22
سبحان الله فرار الخواجه الشفنا منو العجب ابدا ما ظهر في القصه
ناس قالو كان ظهر كان حش رقاب الناس حش وواحدين قالو يمكن ما دار يدخل نفسو في الدم اكان سال
المهم نحن بعد داك اليوم بقينا متروسين عساكر يمنعو الفوته والمرقه من الحله والغريبه حتي الجماعه الماشين يراضو اهل العسكري حموهن يمرقو من طرف الحله !
|
Post: #24
Title: Re: فرار الخواجه في المتره *
Author: هشام كمال عبادي
Date: 03-26-2014, 08:20 AM
Parent: #23
كالعادة يا مها سرد ممتع جدا وتفاصيل دقيقة ..
ربنا يمتعك بالصحة والعافية ..
متابعين ..
|
Post: #28
Title: Re: فرار الخواجه في المتره *
Author: مها عبدالمنعم
Date: 03-26-2014, 03:26 PM
سلامات ياهشام كمال
تسلم ياسيدي
واحلي دعوه والله ربنا يمتعك بالصحه والعافيه انت كمان
|
Post: #25
Title: Re: فرار الخواجه في المتره *
Author: مها عبدالمنعم
Date: 03-26-2014, 08:32 AM
Parent: #23
الجداد واللبن الكنا بنشريهن بشوية قروش انقطعن من الحله ...يمين بالله الناس جاعت كان ما المويه قريبه كنا عطشنا وشوف عيني دي اللبن نص النهار يكبو في طرف الحله في مواعين المويه يشربنو البهائم راجع ...المتره حقتنا والناس واقفين الف احمر كان سكتو كم يوم ان سكتو
الحاكم معتبره رجاله يدخل يمرق التقول مال ابو وارثو من جدوده ...
ام احمد دي ختت يوم قالت دايره حقها في ورث امها !
والا حقرة ساي ...هسي العساكر ديل كان ناس الحله كترو قللو يمسحو بيوت الطين حقتنا دي ولا بتغلبن كلهن عشرين بيت كان جاهن سيل يرميهن فوق راس الناس
هم ما يتلم البهائم شردت حمو الصبيان يلحقوها ...
وبت جابر يوم ولادته جات يمين بالله الدايه دي حموها تدخل الا بعد اجاويد المره من المغرب دخلوها صلاة الصبح كان ما الله رايد لها نجاه كانت خترت .
|
Post: #26
Title: Re: فرار الخواجه في المتره *
Author: مها عبدالمنعم
Date: 03-26-2014, 08:53 AM
Parent: #25
في كرامة الوضوع الحله انجمعت غصب مافي زول كلم التاني علي عادة الناس البحضر الولاده يرجا الكرامه والنصيحه الناس قنعت منها بعد الداية اتاخرت والولاده اتعسرت بس الله سلم ...
اها كان سكتو في امر مر
وكان نضمو في خبرا تاني شن العمل
شيخ محمد قال يناضمو الحاكم يشيل العساكر
ولده قال يابوي هوي الفيهو نحن دا شن سببو ومين سببو ...هسي نحن قربنا للدورين لا مرقنا لا دخلنا دحين هلا هلا علي الجد والقوه ما بتنفعنا حاكم نحن غير عصينا ما عندنا
نعمل شنو سمح
والله ما بعرف بس نفك الحصار بكيفنا نمرق وندخل ونشوف الخوف دا من جوانا والا سببو الكوامر !
بعد باكر السبت ..نمرق السوق والنشوف بحمونا والا شن الخبر
لكن نقعد مكتفين ايد في ايد متل تلاميذ المدرسه دي ما بتحل عوجه
|
Post: #27
Title: Re: فرار الخواجه في المتره *
Author: عادل البراري
Date: 03-26-2014, 11:11 AM
Parent: #26
مازلنا كذلك متابعين
الوعد :-
مبتق شجر أخضر
الدنيا وش صباح
تب ما غافله الشرده
ماعون الزاد يباس
دحين فينا الطلعه والنزله
|
Post: #29
Title: Re: فرار الخواجه في المتره *
Author: مها عبدالمنعم
Date: 03-26-2014, 04:12 PM
Parent: #27
سلامات عادل
وما زالت محاولة اكمال النص تجري علي قدم واحده :)
|
Post: #30
Title: Re: فرار الخواجه في المتره *
Author: عادل البراري
Date: 03-26-2014, 06:55 PM
Parent: #29
| Quote: وما زالت محاولة اكمال النص تجري علي قدم واحده |
الشكية لله التاني راح وين اياك من السرير
|
Post: #31
Title: Re: فرار الخواجه في المتره *
Author: مها عبدالمنعم
Date: 03-26-2014, 07:25 PM
Parent: #30
يا عادل يا اخوي كراعي التانيه قاعده م انكسرت القصه
قصدت انو بكتب علي مهلتي فيها اشان كدا قلت علي قدم واحده بدلا عن قدم وساق
هسي الزول يخت الابتسامه الخدرا ديك كيف بعد نهاية الكلام
|
Post: #32
Title: Re: فرار الخواجه في المتره *
Author: عبدالعزيز عثمان
Date: 03-26-2014, 07:32 PM
Parent: #31
يالله يا مها ،،الناس جاعت،،والسعية هلكت،،،بالله بي حرفنتك وامتاعك شوفي مخرج،،،نحن متاوقين ترا,,,تحياتي يا رائعة..
|
Post: #33
Title: Re: فرار الخواجه في المتره *
Author: مها عبدالمنعم
Date: 03-26-2014, 07:45 PM
Parent: #32
سلامات عبد العزيز عثمان
اها مره مره تلقي نفسك تلف تدور ومافي شارع مرقه
والدرب ما واضح اشان القصه اتفتحت شديد بس ان شاء الله نلم في درب يوصله باب اخر نقطه .
وتسلم لمرورك
يا رائع
|
Post: #34
Title: Re: فرار الخواجه في المتره *
Author: مها عبدالمنعم
Date: 03-27-2014, 07:54 AM
Parent: #33
السبت دا النصيحه لله خفنا بس الرجال ما سمعو نضم مره في الحله وحاجه الروضه حتي هي حاسبه نفسها في الرجاله راجل من دقشا بدري سبقت الرجال في المرقه علي طرف الحله ...لامن جات عربية السوق الحله مرقت تتشرف من بعيد يمكن العساكر يقلو من قيمة الناس بس سبحان الله ما سالو في زول شي غريب لمن ما بمنعو الناس تمشي السوق حارسين المتره في شنو
القصه فيها فهما تاني غايتو ..مشو للمحامي ود حاج الطيب بت اعمو الياها مرميه في الحراسه من يوم العسكري مات ...لقوها ختوها في السجن قال كاتبين هي الكتلت وحرشت كان مرقت من الكتل ما بتمرق من الحريش ...بس لابد من جمع الحلال كلهن في شان الامر اكترو تخويف للناس من تكرار متل الافعال دي ..ودي الا يقومو به كبارات الحله يوم التلاتا الناس التجمع في طرف الحله من بره وانتو من جوه فيشان العساكر ما يسعالو زول
|
Post: #37
Title: Re: فرار الخواجه في المتره *
Author: عادل البراري
Date: 03-30-2014, 09:19 AM
Parent: #34
دحين يا مها
الحين قربنا نكمل كامل الشهر
كدي انتي ما حدثوك كل يوم بجي ناطي اشخت شخيت محل ما وقفتي
النبي ما تعدمي فينا الرحمة كملي عقاب المتره العيال كتلم الجوع بإنتظارنا
اها اقولك أبو سن أخوي الشهر دا حلف يمين مغلظ ما يمشي كوستي منتظره باقي المتره
دحين بنكوس يمين شمال في الاجاويد
|
Post: #38
Title: Re: فرار الخواجه في المتره *
Author: مها عبدالمنعم
Date: 03-31-2014, 07:53 AM
Parent: #34
قنعنا من مرقة المره وقعدنا راجين يوم المحكمه الشهاده لله العسكر ديل المغصه البتدخل قلوبن من كتل واحد فيهن بتجيب العداوه في الحله والناس يحبسوهن في الحظائر متل الجداد يمرق يطلق كرعينو مره مره ويكشو راجع القفص
الله راد انو الحلال جميع عندهن طرف في توب بت احمد كان الناس اتجمعت يوم المحكمه يمكن تمرق ....بعد الناس خبرو خبر حراسة المتره قالو مافي حل بمرق العسكر من الحله الا تعود واطاة المتره لناسه ..المحكمه خمسه وعشرين سنه ما مرقت زول بالعكس جاب الخواجه مكايده في الناس
يتلملو اهل المتره من السافل والصعيد يقعدو في مترتن لامن الله يريد حل لهذا الامر المر
اليوم الموعود الناس مرقت من جيهات البندر عصر فيشان يصلو ليل والليل ستار الخلق
دا كلو تم بتدبير ولد حاج التوم قال حقنا اخدو غصب يرجع غصب والليل فيشان مايلفت دخولن الحله نفر وما يحصل كتل ومدافره ماليها داع ..
|
Post: #39
Title: Re: فرار الخواجه في المتره *
Author: مني عمسيب
Date: 03-31-2014, 07:59 AM
Parent: #38
الحبيبة المها ... يسعدك صباحك .
اشتقته ليك ولي بستانك المعطر قلت اجي اسجل حضور .
ومتابعة خاصة .
ولي قدام .
|
Post: #40
Title: Re: فرار الخواجه في المتره *
Author: بدرالدين بابكر مصطفى
Date: 03-31-2014, 10:18 AM
Parent: #39
يا بتنا
شوف عيني السكر نقع
في انتظارك
|
Post: #42
Title: Re: فرار الخواجه في المتره *
Author: مها عبدالمنعم
Date: 03-31-2014, 02:50 PM
Parent: #40
سلامات يا عمنا بدر الدين
اها ان شاء الله نمرق قريب من مترة الخواجه دي
|
Post: #41
Title: Re: فرار الخواجه في المتره *
Author: مها عبدالمنعم
Date: 03-31-2014, 01:57 PM
Parent: #39
سلامات يا مني
تسلمي يا جميله
ان شاء الله نمرق من حفرة القصه دي :)
طولت شديد بس الله كريم
|
Post: #43
Title: Re: فرار الخواجه في المتره *
Author: مها عبدالمنعم
Date: 03-31-2014, 08:37 PM
Parent: #41
الناس ختو كراعن في الحله ليلا بدري قبال العشاء وعلي عادة العساكر بحوطو الحله تامن المتره الجماعه نزلو المتره ...الرجال زي سبعين راجل الابو عنده عودين والامو عندها عود ومسكو الواطه رقدو ليلن في امان الله زي ما نحن اتخيلنا ...اول ما شفنا شن الحصل بس ساعة الكوامر جرن كلهن عرفنا الجماعه وصلو نص الحله مرقت تشوف الحاصل ...لقينا كان عشرين كان اكتر كومر عساكر ومعاهم نجوم ورتب كبار كان ما اخاف الكضب ....الا جماعة الصعيد جو مستعدين للقعاد في المتره ود حاج احمد اكبر وارث فيها عنده خمسه فدادين وامو عندها عودين ونص ...ناغم العسكري بكلام كبار كبار
ياسيد انت بتعمل في عملك البتاكل منو عيش بس نحن في مالنا دحين كان في عندك البمرقنا ابرزو والا اخير تمرق من النضم
انتو هسي فهمكم شنو هنا في تهديد للامن
لا عندنا سلاح ولا حنجيب سلاح وقاعدين وسط اهلنا منو مهدد الامن ؟
يازول دا كلام كبير اخير تكتلو قبلو
انت قوم بواجبك ونحن حارسين حقنا وزي ما قالت بت احمد البخت كراعو هنا تاني بنكسره ليه
يا زول انت دار تتمرد علي الحاكم ؟
يا زول هوي اقصر الحديث حقنا دا ما بنمرق منو والخواجه بفرارو دا ما بمرق الا الحاكم يشوف كيف بقدر يخارج رقبتو من قلع حق الناس
|
Post: #44
Title: Re: فرار الخواجه في المتره *
Author: مها عبدالمنعم
Date: 03-31-2014, 08:58 PM
Parent: #43
الكلام ما تم ساعتين الا ويتنكت قالو ممثل الدائره سبحان الله يمين بالله ما شفنا الا عام انتخبنبو النسوان غشاهن قال بعمل في الحله مدرسة ثانوي بداخليته قالن خير اها باب رزق ينفتح ...بس دخل ومرق ما قعد اظن الكلام ما جا علي هوا الجماعه بعدين عرفنا غرضو في الخواجه يمرق معاه شديد والمترة المحكمه تحكم فيها
تلاته ايام والبلد من حدها لحدها ماعندها نضم الا خبر مسك ولاد الشيخ للخواجه في المتره ...الناس انشدهت في البتعمل فيهو وكترت القوائل ...ناس فرقان جو ينضمو في حق الخواجه والراجل غريب لامن نهاهن ود الشيخ الكبير ياناس نحن فرد كلمه مع الراجل ما بندورا منو وماهو سبب قعادنا
جينا دايرين حقنا ملكنا ملك حر من زمن بعيد
الحاكم سابق كان بتضرع يوماتي يجو كراعو شن قطعه !
بندور حقنا المعانا حبابو والمع الحاكم يشوف وين مكانو
والخواجه اب فرار تب عوجه ما بتجي دحين اليجي ممثل الحاكم يجيب ورق المتره الشالو بلا حق وشن الله كتر بلا الطين اليشوف ارضا تانيه يديها لاب فرار ...
|
Post: #47
Title: Re: فرار الخواجه في المتره *
Author: مها عبدالمنعم
Date: 03-31-2014, 09:20 PM
Parent: #44
الحاكم قطع كراعو بس ما قطع مراسيلو اخر نفر جا من طرفو قال هو قبلان يقعد في الواطة مع الناس بس الخواجه يمرق بلا اهلو يعتبرو مخطوف المشكله تكبر ...اغرب الغرائب الناس هدفن المتره وكل البجي بنضم في الخواجه فرد زول طرا حق الناس مافي ...والراجل قاعد ماكل شارب متونس بالحاصل ....دا غبن الناس اكتر وكت سبق العسكري ضرب الناس مافي زول قال شي واتعتر فقهتو الوقعه مسكو بت احمد المات ولده فيشان ما بدرت العلاج ...بعد قرب الدور يحل جا المحامي والقاضي الشرعي قالو بحلو الشغله ...النضم ما كتر المحامي سلم ولاد الشيخ ورق المتره وقال يمرق الخواجه معاهن ...الجماعه من طيبتن مرقو الراجل ومسكو ورقن بس في شي
العساكر زادو بعد الخواجه فات ما نقصو !
|
Post: #45
Title: Re: فرار الخواجه في المتره *
Author: عبدالعزيز عثمان
Date: 03-31-2014, 09:00 PM
Parent: #43
يامها يابتي دي حتة تفكينا فيها....
يمين بقيت امرق وادخل ذي سيد الرايحة...
يامها خسمتك بي جدي ان ما تميتيها
ورانا معايش حااااارة ،وفواتير مردمة
مالك بي مترتك دي دايرة ترفدينا...
|
Post: #46
Title: Re: فرار الخواجه في المتره *
Author: مها عبدالمنعم
Date: 03-31-2014, 09:06 PM
Parent: #45
انا زاتي قلت الليله يا كاتل يا مكتول :)
هي يامتموم او متموم وحيث انو دخلت فيها مفاوضات فشنو اييييك الله يستر :)
|
Post: #48
Title: Re: فرار الخواجه في المتره *
Author: مها عبدالمنعم
Date: 03-31-2014, 09:53 PM
Parent: #46
ت
م
ت
|
Post: #49
Title: Re: فرار الخواجه في المتره *
Author: عبدالعزيز عثمان
Date: 03-31-2014, 10:08 PM
Parent: #48
يازولة هووووووي،،،علي الايمان مانقبل جنس كلام ذي ده..
يمين الا كان تتميها،، اها قاعدين رفد رفد...
يازولة اكان خليتيها علينا اليومين ديل بي حراق الروح ده بنودر الجماعة كلهن....
يمين انا جدي فوقه السحب تبكي،والارض محروته والتيراب في المخالي،،ولا عساكر ولا درادر،،،فزيت كي لا افسد زرعه،،،خلي حرابتك...يمين تتميها...
|
Post: #50
Title: Re: فرار الخواجه في المتره *
Author: مها عبدالمنعم
Date: 03-31-2014, 10:19 PM
Parent: #49
ههههه ياعبد العزيز انا قلت اكييييد حتمرق مظاهرات للنهاية دي
اهااا
شن العمل
|
|