Post: #1
Title: خمِّس لي معاك .. ومحل ما مشيت بريحة سجارتك بَبْراك.! ووب برضو تقولوا في فتوي ###
Author: زهير عثمان حمد
Date: 03-02-2014, 10:51 PM
Parent: #0
خمِّس لي معاك دي جكسوية من جكس الاحياء الراقيةأنعل أبو كدا يا خي أخوكم كان قاشر وماشي حفلة عرس في المعمورة متعطر كمان يعني ريتحي حلوة مع أنو درجات الحرارة بدات تترتفع تاني ركبت مع مع الود خالد دا كارثة بس عندو قروب عسل بس من الاجناس والقبايل والاعمار يا خي ديل شدة ما ناس بهجة دقوا الزار في الساحة الخضرة ولا في زول جاب خبر العالم هنا دايشه شديد المهم قلت الليله البرنامج مجاملة أجتماعية وولابد أكون من أهل الانضباط والالتزام بالسلوك السليم عشان ما تقوم تشاتر وتقع في المحظور أنت أصلك زول مفضوح !!!
وصلنا بت الحفلة الوف من الغيد الحسان وطبعا أخوكم لما يكون في حضرة الجمال بيكون أنسان تاني منتهي الرقة والانسجام ويوزع في الابتسامات ساي
كأن العريس قام خالد لم الجكس وجاب العشا عشان نكون ناس رقيص وهجيج قمت بعد العشا ولعت سجارة لزوم المزاج العالي وتاكيد لموقع أبو الزهراء الاجتماعي الرهيب وأخدت جانب كدا بس جات السمحة بت الاصوال بالجد الوش قمروالشعر مدفق كدا للضهر وكمان النهايات وكل الابعاد منتهي الروعة قلبي الليله بس الصبر
وصرخت فيني ( ليه كداأنت أناني ولا السجارة واحدة يا خي خمس لي معاك ومحل ما مشيت بريحة سجارك ببراك أخوكم في اللحظة دي ما مات وحي تاني وب انا سجارة سجارة شنو يا خي السجارة وسيداالسجارة وكل البلد دي تحت تصرف سعادتكم أنا متين كان عندي جكس بحب الدخان تعالي انشالله نتبخر بيها بس أشوف عيونكم ديل بحصلي نوع اليقين أنو السودان بلد جميل وفيهو أنسانة زيك كدا
قمت سألتها ياعسل عبارة خمس لي معاك دي فنانة زيك كدا ضحكت ولما ضحكت أنا قلبي وقف مت خلاص وبصوت رهيب يكسر الحجر قالت (أنت ما سمعت الاغنية دي
أخوك بكل بهدله وعوارة بالجد ماسمعتها كفايةأسمعك أنتي !!
ياجماعة البت عسل والله الليل الطويل دا بس بقي ساعة طردت كل الهموم والأحزان بضحكته الرهيبة وابتسامات المتواصلة ومع أنو الاحزان حقتنا ما بتنهي مهما حاولت الصبر مستحيل دي بتديك الضحك المتواصل ولابتسامة الجميلة ياخي في وشها هلال !!!!
بس قعدوا الجماعة يعينوا لي بأستغراب متين أتعرف علي الجكسوية بقي كمان أحكي نكتوا القديمة ديك وبدون انقطاع !
أنشالله الليله أبيت هنا وأصلو الحفلة ما تنتهي ولا الناس يمشوا أي حته أنت أنشالله تكون في وشي العمر كلوا يا أحلي جكسوية مدخنة في رقيص الرقبة كمان معلمة
كدا أبو الزهراء ح يغادر الدنيا قريب جدا وب وب أنا!!!!
|
Post: #2
Title: Re: خمِّس لي معاك .. ومحل ما مشيت بريحة سجارتك بَبْراك.! ووب برضو تقولوا في فتوي ###
Author: cantona_1
Date: 03-03-2014, 01:35 AM
الحبيب أبو الزهور بعد السلام
دي بسموها صدمة حضارية.. بركة الحكاية ما كانت Bottle Night كان لحقت أمات طه.
أرعى بقيدك وما تتشوبر تقوم تقع من علِ وزي ما عارف مامون حميدة ما خلى ليهو إستبالية تعالجك بجّان.
تحياتي
كبـّاشي الصـّـافي
.
|
Post: #3
Title: Re: خمِّس لي معاك .. ومحل ما مشيت بريحة سجارتك بَبْراك.! ووب برضو تقولوا في فتوي ###
Author: عزالدين عباس الفحل
Date: 03-03-2014, 09:26 AM
Parent: #2
زهير عثمان حمد
...
أبو الزهور ،
صاحبي ،
صدق حُلم جميل ،
بس تاني نوم بدري ،
عشان تشوف الحور العين ،
أحلام سعيدة ،
تسلم الغالي ،
،،،،،،
...
عزالدين عباس الفحل
ابوظبي
...
|
|