يا ناس هولندا رايكم شنو ندعم ناس امريكا ونمشي نعتصم امام المحكمة الدولية للقبض علي عمر البشير؟؟؟

السفاح ده لازم يقبضو يا اخوانا , حقيقة الموضوع طول ولو ما اتحركنا ولفتنا نظر العالم
تاني وتالت ينكون نحن زاتنا بنساعد في عدم قبضو . رأيكم شنو نتصل بكل مراسلي القنوات
العربية والاجنبية لنقل الخبر الي جميع قنوات العالم . عمومآ بناشد كل من الاخوة :-

الفنان عمر دفع الله .
محمد طة الملك .
محمد جمال الدين .
محمد ادم .
محمد مهاجر .
اسعاد محمدين .
وجميع شباب وشابات هولندا بالمنبر . وبمختلف المنظمات الانسانية .
الموضوع يكون فقط تنسيق مع شباب التغيير وبعض قوي المعارضة والاحزاب .
اها رأيكم شنو ؟

وانا على اكتف ليكم طبال سيدو ود الباوقة كتيفة كاااربة وارسلو ليكم فى قفة ب الدى اتش ال

ود الصائم سلام يغشاك ...

اسمعني اسه ود الباوقة ما لازمنا بس اللازمنا يقبضو لي السفاح ده الكرهنا العيشة .
يا ود الصائم ما عندك لي زول يعمل نشيد ود اللمين ده خلفية للبوست لو سمحت ؟

يا ناس هولندا الاوفياء للوطن الرجاء التفكير والرد بسرعة ,, لانه حقيقة البحصل لي اهلنا في جبال النوبة
ودارفور وجميع مناطق الحرب ده عاااااااااااااار علينا ةنحن ساكتين !!!!!!!!!!!!!

التحية لك كنداكتنا منى عمسيب ومساك الله بالخير والسعادة
ايتها القدامية ضد الهوس الدينى والسلفيين الوهابيين.
لابد التحرك فى كل الدول من اجل الضغط على صناع القرار ودور المناضلين مهم خاصة فى هولاندا حتى يتم القبض على المجرم عمر وزبانيته .

مظاهرة ضخمة أمام سفارة السودان بواشنطون - 4 مارس تحت شعار Albashir Watch

الأخ الفاضل \ فقيري ..

تحياتنا ليك وللوطن .

تخيل يا فقيري الموضوع ده في قمة الاهمية بذات في ظروف زي دي ناس الطائرات تنسف فيهم المقعدانا شنو؟
عمومآ نحاول نحصل مظاهرات واشنطن او بعدهم بي شوية نتحرك نحن لكن اوي نشوف رأي الزعماء ديل .
مشكور اخي فقيري علي المرور المضيف .

الأخت: منى عمسيب
تَحِيَّاتي

إذا تمكَّنتِ مِن إقناعِ شبابِ هولندا بالقيامِ بأيِّ حِراكٍ سِياسيٍ في أيام العَمَلِ الرَّسميَّة، وليسَ عُطلةِ نهايةِ الأسبوعِ، فيُشرفني أن أكونَ مُشاركًا لكم في ذلك.

مودتي

اخي العزيز \ هشام

تحياتي وتقديري ...

ويشرفنا جدآ تكون معانا وبحاول المستحيل ... عشان تشاركنا .

ودمت لنا اخي .

Quote: يا اخوانا , حقيقة الموضوع طول ولو ما اتحركنا ولفتنا نظر العالم تاني وتالت ينكون نحن زاتنا بنساعد في عدم قبضو .

التحية لكي الأخت الفاضلة
مني عمسيب
وإنتي تقومي بهذا الإقتراح المهم من أجل ضحايا حكومة المؤتمر الوطني
ونتمني من الإخوة في هولندا قيام بللازم
تحياتي ودمتي بخير

الأخت منى

فكرت في الأمر كثيرا

فيما يخص سفرنا كمجموعة من الجارة كندا


فقط المرجو من منظمي أي فعالية الإتصال قبل زمن لإتاحة الفرصة لمن يريد المشاركة

المسألة تحتاج عدة أسابيع

إعلان فكرة المشاركة وتحديد الراغبين وتحديد طريقة السفر جماعيا
وتنفيذ ذلك ماليا ولوجستيا إلى جانب تدبير الغياب عن الشغل للعاملين بنظام الورديات (بالساعة)،

الباقر

الأخ المحترم \ الباقر عثمان ..

تحياتي ,, ومشكور علي المداخلة ,

Quote: فكرت في الأمر كثيرا فيما يخص سفرنا كمجموعة من الجارة كندا

الأخ باقر انا في هولندا قريبة لي لاهاي الطالبة السفاح عمر البشير , لما اتكلمت بعني الخروج
من هولندا الي لاهاي قبلنا ما بقصد السفر لي امريكا وزي ما قلت انت ما عندنا في اللحظة دي امكانيات
سفر ولا زمن لللسفر , لكن المشاركة من بعد برضو بتدي مفعول ايجابي , وتسلم يا اخ الباقر ومشكور علي
مرورك المشرف . ولي قدام .

الأخت منى

عموما هي فكرة جيدة

أن تتزامن حملة فعاليات موحدة تطالب بمحاكمة البشير على جرائمه ضد أهلنا في أنحاء السودان المختلفة


نرجو أن ينتبه لذلك التنسيق من يبادر بتنظيم حملات قادمة


الباقر

يا شباب هولندا والدول المجاورة . فرنسا , بلجيكا . المانيا .

ادونا رأيكم . التظاهر امام محكمة العدل الدولية في لاهاي دعمآ

لي اخوتنا الوطنيين بواشنطن . والمجدد للاحراااااااااااااار .

الحداث مو سواااااااااااااااااااااااااااي
وانت مصيرك تجي لاهااااااااااااي ز


من أجل اهلنا بجبال النوبة .


من أهل اهلنا بدرافوووووور بلدنا .



من اجل من تشردوا .



تنظيم تظاهرات متتالية .

تحياتي يا قريبة الفنانة القديرة فايزة عمسيب
نتمنى زوال الانقاذ اليوم قبل بكرة والله يزيل الكابوس الجاثم على صدر الشعب

المظاهرات الحقيقية والوقفات الحقيقية هناك مع شهداء سبتمبر
هناك حيث البنمبان الحقيقي بدلا من العطورات الباريسية والاناقة وبرنامج بتاع ترفيه للاسرة لما تسموه اعتصام
لما تحسي انه الادرينالين يتصاعد في دمك لدرجة ان يصاب البعض بالغيبوبة
كنت حاضرا في اجازتي الاخيرة لمظاهرات سبتمبر ومشيت لفواتح لناس ماتوا في الاحداث
ريحة الكفرات المحروقة و منظر ناس ابو طيرة وهم بيضربوا في الناس
و الخوف والتخطيط من شباب لم يبلغوا العشرين
لم يجدوا من يسندهم من المعارضة الكرتونية
ولم تتبنى جهة التخطيط لهم ولم يتقدموا الصفوف امام هؤلاء الشباب


المهم ان كنت تظني انك برأتي زمتك في اعتصامك امام المحكمة الدولية فانت تكذبين على نفسك والشعب
البعض بيجهز في اللوحات المناهضة للنظام التي سيقوم المناضلين لاخذها له حتى ياخذ صك البراءة
من يريد اسقاط النظام فهناك في السودان وخلوكم من الامور التي تطيل عمر النظام وتنفيس لغضب الناس ضد الحكومة بامر تتمنى الحكومة ان نكثر منه ...بس خارج السودان
امريكا او الدول الاوربية لو عاوزين يقبضوا على البشير فما اسهل الامر
البشير شغال سفر افريقيا وعربيا وما سمعنا طيارة اعترضت طريقه يمشي وجي
زمان واحنا صغار كنا بنسمع عن تدخل القوات الامريكية واسرها لرئيس دولة من داخل قصره

ما تقوموا به نزهة ليس الا وتغيير روتين
ما صعب تقطعي تذكرة انت او غيرك للسودان و ممكن تطلعي مظاهرة لوحدك هناك
ده المعترك الحقيقي .....

طبعا حيجوك البطلعوني كوز او امنجي او على افضل حال مثبط
بس هو رائي

طول عمر الانقاذ ليس من قوتها ولكن من ضعف المعارضة و عدم معرفة ميدان النزال

ابشروا بطول عمر يا لصوص الانقاذ وشكله البشير حيموت وهو نايم في سريره

الأخ الفاضل \ عبد السلام

تحياتي ...

Quote: كنت حاضرا في اجازتي

يعني انت بره برضو !!؟ الحمد لله المشرد زينا .
بعدين اللغة الغريبة دي شنو العطور الباريسية والترفيه لغة حقيقة صادمة ! لو داير تنتقدني باموضوعية من غير
شخصنة مرحب لكن دي لغة ما عهدتها في رجل جاي يدافع عن شهداء بعدين انت كنت هناك في اجازة ممكن توريني
عملت شنو بالظبط غير شفت اللساتك المحروقة ودم الشهداء !؟ وبامانة ومنتظرة ردك !

Quote: طبعا حيجوك البطلعوني كوز او امنجي او على افضل حال مثبط بس هو رائي

لا ما يجيك اي زول وعلي مسؤولتي يا عبد السلام .. وانا ذاتي ما بقول عنك اي شئ
بس رد لي انت عملت شنو في الاجازة لما شفت دم الشهداء ؟

Quote: ادونا رأيكم . التظاهر امام محكمة العدل الدولية في لاهاي دعمآ

التحية لكي مجددآ
الأخت الفاضلة
مني عمسيب
مظاهرة أمام المحكمة الجنائية الدولية في لاهاي يتطلب علي ناس هولندا الدور الأكبر.
التنسيق مع ناس المحكمة للمظاهرة
و التصديق للمظاهرة
وتاريخ المظاهرة
ثم إعلان تاريخ المظاهرة مبكرآ
بعد ذلك يتم التنسيق مع الذين يريدون المشاركة من خارج هولندا وخاصة دول الأوربية نسبة لقرب المسافة.
ونتمني التوفيق
تحياتي

الأخ العزيز \ محمد نور

تحياتي ... وشكري ..

مظاهرة أمام المحكمة الجنائية الدولية في لاهاي يتطلب علي ناس هولندا الدور الأكبر.
التنسيق مع ناس المحكمة للمظاهرة
و التصديق للمظاهرة
وتاريخ المظاهرة
ثم إعلان تاريخ المظاهرة مبكرآ

دايرة اوضح ليك اخي محمد البوست مجرد اقتراح بس بصيغة ما سيكون . لكن الاجراءات الكاتبة
دي كلها في ايادي الأخوة والاساتذة الناشدتهم ديل يعني هم البقوموا بكل التفاصيل والطقوس عشان
كده انا بس منتظره منهم الرد لكن باين عليهم مشغولين عشان ما شايفة ليهم حس الليامات المهم ننتظرهم
لكن بعدك الموضوع ده حا ينجح ان شاء الله وفكرة مناداتي لي ناس الدول المجاورة مجرد تنبيه لبداية دعوة .
مشكور يا ابو حميد وما عدمناك . ولي قدام ..

الأخ الفاضل \ مصعب شرف الدين .

لك التحية .. ومشكور علي الانتقاد المتواصل .

Quote: Musab Sharf Aldin هههههههههههههه هههههههههههه والله والله العظيم يامني عمسيب ناس الانقاذ ديل,,, الرعب الخشت فيكم مابتمرق باخوي واخووووووك ههههههههههههه ياااااااااااخي انتو 24 سنه تقعدو تلوكو وتصوتوا وتنططو ووواااك واك واك نضمممممممممممم ساااااااااااااااااي ,, شابكننا وطن ونعمل مظاهره ضخمه وشنو ماعارف وشنو منظمات وشنو شنو ,انتي هسي يامني لو سئلتك غير النضم الكتيييييييييييير عندك شنو ؟ وكلو يوم جايا تكتبي ود الباوقه فعل وود علان عمل والزول داك كوز وفلان داك امنجي ,, انتي يامني عمسيب بتكتلي وقتك بالطريقه دي ولا شنو ولا ماعندكم برنامج غير الونسات بس اي والله كلامكم كلوو ونسات الا من بعض المعارضين الحقيقين وهم معروفييين في المنبر ,, ماتجو تجوطو لينا راسنا ب ناس الانقاذ عملو وناس الانقاذ فعلو وظلمونا وشردونا ,,, انتي قدمتي شنو وعملتي شنو كمعارضه ,, جد سؤال مهم عشان زاتو نفهم انتو معارضه شنو ,, غايتو انا بوستاتك الزي نوع دا بعتبره ونسه ساااي ,,,

ملاحظة ليك يا اخي مصعب بانتقادك لي البصورة دائمة من غير كلل ولا ملل ! وبالمناسبة ما زعلانة عادي . لكن بس عشان
ما يكون انتقاد غير مفيد وريني مقترحاتك شنو؟ وانت اسه بتعمل شنو ضد الناس ديل من البطالب بيهو مننا ؟ انا بعمل في اضعف
الايمان لاني خارج بلدي ونفسي ارجع وبؤمن بشئ خير من اللاشئ ) الانت بتشوفها ولا حاجة دي . ويا رجل ما في مشكلة لو ما عندك
لي رد وبشكرك علي متابعتك واهتمامك بابوستاتي الخلقت منك ناقد بصورة دائمة . ولي قدام .

يا صديقي محمد ادم هذه هي دعوتي لكم الرجاء الرد .

Quote: يا صديقي محمد ادم هذه هي دعوتي لكم الرجاء الرد

العزيزة الفاضلة بت عمسيب،

تحياتي وسلامي ،

أولاً شكراً عالياً علي هذه المبادرة.
ثانياً أعتذر منك أشد الإعتذار في عدم إطلاعي علي هذا الإقتراح المهم، ليس عمداً ولكن لإنصرافات الحياة اليومي.
إتحاد أبناء دارفور بهولندا يشرفه أن يكون جزءاً من هذا الفعالية - مرحباً بالمشاركة - وداعماً لفكرة التنسيق الجماعي..

يقيني أنك تستطعين أن تقومي بدور المنسق لنجاح هذا الحشد.
keep a head

ولي قدام

م. آدم

Quote: السفاح ده لازم يقبضو يا اخوانا , حقيقة الموضوع طول ولو ما اتحركنا ولفتنا نظر العالم تاني وتالت ينكون نحن زاتنا بنساعد في عدم قبضو . رأيكم شنو نتصل بكل مراسلي القنوات العربية والاجنبية لنقل الخبر الي جميع قنوات العالم . عمومآ بناشد كل من الاخوة

فهل من يلبي النداء

محمد نور ... سلام يا صديق ويا رفيق .

Quote: فهل من يلبي النداء

ونحن في الانتظار . وبعد شوية احتمال للانعاش .

Quote: ونحن في الانتظار .

سلامات
مني
ومعكي ننتظر

Quote: السفاح ده لازم يقبضو يا اخوانا , حقيقة الموضوع طول ولو ما اتحركنا ولفتنا نظر العالم تاني وتالت ينكون نحن زاتنا بنساعد في عدم قبضو . رأيكم شنو نتصل بكل مراسلي القنوات العربية والاجنبية لنقل الخبر الي جميع قنوات العالم . عمومآ بناشد كل من الاخوة

المناشدة لكل سوداني متضرر من حكومة المؤتمر الوطني
يا ناس هولندا حركو الموضوع

استاذتنا امرينا من مكة ندعم الاقتراح الجميل

والله إنتو ألذ ناس.. هههههههه

أها جمعتي كم مُناضِل يا بِت عمسيب.. إنتي أمشي لاهاي وأكتبي [حضرت ولم أجدكُم] ههههههه

أنا بفكِر بِصورة جادة جِدًا مِن فِترة إنو ناس الداخِل يِقاوموا أي مُدعي نِضال بِالخارِج ما لم يثْبِت أهلِيتو.. يعني مثلاً لامِن كان في سودان عُمر البشير كان وضعو شنو، مُناضِل ولا مُسْتكين؟ هسع وضعو النِضالي شنو، الكي بورد ده ولا في شيتًا غيرو؟

الباقِر الذي في كندا، عاوِز يِشارِك في مُظاهرة مُقْترحه في لاهاي.. ايه ده.. ايه الهنا ده.. يا أخ الباقِر المُظاهرة ضِد البشير حقو تعتبِرا زي صلاة الغائِب، زول مات ليك في شنقلي طوباية، تصلي عليهو عادي وإنت في كنديك ديك.. قال جاي قال.. وبعد سطرين قال، حقو تكلِمونا قبل إسبوعين، وسرد ليهو كِمية مِن المُتطلبات لغاية ما تِتحقق يِكون عُمر البشير مات وجا زولاً تاني ههههه

شوفو المُداخلات حلاتا.. كُلها [يا رائِعة] [يا كنداكة] [يا مُناضلة] [العزيزة الغالية]
الناس ديل خلي بالك ما كتبو خِطابات مُعطرة أيام الصِبا، جايين يِكملوها بِجاي هههههه

الوهم الداخِل البشرِية دي مِن 3 جِهات على الأقل:
(1) صنفو روحُم مُناضلين.
(2) مفتكِرين إنو الهطل البكتبوهو بِجاي نِضال.
(3) مفتكِرين إنو البكْتِبوهو بِحدِث فرق.. البنكتِب هِنا بتقراهو الخُرطوم ومدني وإحتِمال سِنار، الفي الأطراف الواطين الجمرة شوقُمْ لِموية الشراب خليهو نت!


الإنقاذ ما قوية.. المُعارضة الداخلِية مُتوالِية، والخارجِية مِن أسباب تواليها ههههه، معقول 25 سنة بتكتِبو وبتأكِدو [أن الصُبح لآتٍ آت]، صبحكُم ده يا كافي البلا بِتين عاد؟!

ناس الداخِل لازِم يِشوفو طريقة يتبرو بيها مِن وهم الخارِج ديل





ــــــــــــــــــــــــــــــ
بِت إبراهيم وأولادا قاعدين حداي.. بس راعونا في الشتايِم.. يعني إذا كان لابُد منها.. إسْتنظفو لينا حاجة تُناسِب وضعي الحالي.. الله لا كسبكم

Quote: يا ناس هولندا رايكم شنو ندعم ناس امريكا ونمشي نعتصم امام المحكمة الدولية للقبض علي عمر البشير؟؟؟

هههههه معليش والله ما قادِر أفوت ههههه الله يلعن شيطانكم زول هبب ليكِ ماف غير هشام آدم وبِشرط كمان [إذا.. لو] ههههه

أنا رأي إنو تنْتقلي بِنِضالِك لِلخُطة (ب)
يا بِت عمسيب إنتِ قايلا النِضال ومُقارعة الإنقاذ ده شنو؟ يعني فهمِك إنتِ والبشرِية المُتجدِعه في نواحي العالم الأول، لِلنِضال شنو؟
تخلِصو السعي في مناكبها وترجعو البيت وتقيِلو وتقومو بالصلاة على النبي وتناضلو بِإقْتِراحات وكِتابات فطيرة مِتِل ها العمود، والله والله والله ماف شيتًا مُقَوي الإنقاذ إلاكُم، ناس وهم، نافخين روحمْ وعاوزين يِعيدو تدوير شخصِياتُمْ الكانت واهية ومُنْزوِية وقابِعة ومُنْدسه في سودان البشير، والواحِد أول ما يِفِك حِزام الطيارة في مطار مِن مطارات العالم الأول، تلقاهو نفخ أففففف ايه البرد ده، حاجة تقرِف، مِتِل كوستاوي الفاتِح لِلبرد عمود (1) هههههه حليل زمن أكان القشف يا كوستاوي بِحميك الضِحِك ههههه الود خلاص يعني زهجان لا خلاس، وزيِك يا منى عمسيب الفاتحه ليكِ عمود بِتْأوه أشواق لِلسودان (2)، عليكِ النبي.. الرسول، الظاهِر أوراق اللجوء إسْتلمْتيها خلاص ههههه غايتو خُلْعه أوروبا وأمريكا وكندا ماااا بتمرُق منكم بأخوي وأخوك هههههه







(1)
إنعل أبو الجليد...كرهنا الحياة!
http://www.sudaneseonline.com/board/460/msg/1395061924.html
ـــــــــــــــــــــــــ
(2)
******خرمة الشوووووووووق للوطن ****** .
http://www.sudaneseonline.com/board/460/msg/1389726947.html

Quote: هههههه حليل زمن أكان القشف يا كوستاوي بِحميك الضِحِك ههههه الود خلاص يعني زهجان لا خلاس

ياللخو شققت جضومنا اليابسة بفعل الجليد

ذكرتنا سقطنا الناشف داك ونحن ماشين المدرسة

لكن شن جاب لى جاب - انت بس قول خير وجهز التأشيرة وليك على استلمك من المطار وارجعك المطار

عشان تشوف براك جنس البرد النحن فيهو !!!

اختى منى مرحب بيك مع ناس امريكا !!!

لكن ما عرفنا ناس امريكا عملوا شنو من أجل قبض البشير يستحق الدعم ؟؟؟

وحاتك مظاهراتهم ما تفوت ليها بالكتييييييييييييييييييير عشرين نفر وشغالة ليها عشرييييييييييين سنة ولا حياة لمن تنادى

وأسد الله البضرع ( على حد قول ودالباوقة ) شبع فسحة وقالوا حتى الصين وصل ليها

ولا انتو لسه مصدقين انو المحكمة الجنائية من أجل القبض على البشير !!!!!!

اصحوا معانا - المحكمة الجنائية ماهى الا وسيلة ضغط ادت هدفها بفصل الجنوب ويمكن أن تثار وترفع مرة اخرى اذا كان هناك اقليم آخر ينوى الانفصال

لكن حكاية البشير يدخل ابوزعبل دى مجرد حلم وهروب من مجابهة النظام فى الميادين الحقيقية للنزال (او كما قال ود عمنا حسن فرح )

تحياتى

عزام العنصري \ سلام يغشاك ...

اسمعني انت مالك ومال النضال ؟ انت خليك في عنصرتك دي وبعدين ياخي نحن بره وانتوا برضو بره ما تنسوا
ونفس الكيبورد عندنا وعندكم .... يا عزام نحن مرقنا انجزنا ما لم ولن يمكن انجازه في السودان بعدين خلعة شنو يا عزام
يا كافي البلاء ما بتعرف مراعاة شعور الاخرين يعني عنصرية وعدم مراعاة شعور !؟ مافي اي شئ بخلعنا واقسم ليك بالله
لي اسه دي ما شفت احلي من العاصمة الخرطوم بابشتنتها دي ! بعدين حتت ما قدرت الم ناس دي جيبتها من وين ؟ الناس هنا
مشغولة بالدراسة فعلآ دي فترة امتحانات نص السنة انا ذاتي اسه نازلة امتحانات عشان استعد لي دراسات عليا والحمد لله
دي من حسنت الخروج من السودان قدرنا نطور نفسنا عشان لما نرجع السودان نرجع نحن مسلحين باسلحة تعليمية .. نفيد بيها
وطنا . وبرضو في كمية من الشباب شغالين مع المنظمات واسه هم في مناطق عمليات وزي ما شايف الحروبات ! ويا عزام لو
سمحت ما تقلل من شأن اضعف ايمانا وقدرتنا وشئ خير من اللاشئ . وان شاء الله في القريب العاجل حا تلقانا في لاهاي . ومشكور
ووصتي ليك سيب العنصرية عشان ننعم باسلام . ولي قدام .

سلام يغشك يا ود حماد ,,, ومشكور علي المرور .

اصحوا معانا - المحكمة الجنائية ماهى الا وسيلة ضغط ادت هدفها بفصل
الجنوب ويمكن أن تثار وترفع مرة اخرى اذا كان هناك اقليم آخر ينوى الانفصال

اها صحينا معاكم ....ورونا انت وعزام دايرين تعملوا شنو لي وطنكم ؟
ويعني انت فصل الجنوب ما بهمك شديد عشان كده عندك رأي حتي لو طلعوا خمسة
انفار ؟ ياخي التظاهرات دي ممكن تكون فرض كفاية وحاجة رمزية ولو بالقليل لانها
مجرد رسالة انتباه . وبعد ده بتمني انك تكون طلعت معاهم . ومشكور اخي ولي قدام .

Quote: ويعني انت فصل الجنوب ما بهمك شديد عشان كده عندك رأي حتي لو طلعوا خمسة انفار

الأخت منى ابداً فصل الجنوب تب ما عاجبنى

لكن عندى راى نوع الناس العايزاهم يتظاهروا ديل هم زات نفسهم ساعدوا فى فصل الجنوب

وبى نوع دعوتك للتظاهر دى برضو حا تساعدوا فى فصل أجزاء أخرى

بعدين حكاية عملت شنو للوطن دى قاصدة بيها شنو ؟؟؟

لو قصدك مظاهرات طلعنا فيها لكن قطع شك لو شفتيها كنتى بتكونى واقفة فى الجانب الآخر من الرصيف

كثير من هذه المظاهرات وكثير من هؤلاء المتظاهرين ماهم الا تجار بقضية الوطن

نقف تحية لكل من تظاهر فى شوارع الخرطوم وغيرها من المدن ولا نراهن ابداً على المتظاهرين امام البيت الأبيض أو الأمم المتحدة

فهذه القلاع لا تأبه لقضية السودان ولا تعيرها اهتمام بل هى زات نفسها من فاقمت فى القضية مثلها مثل بعض المتنوضلين الاسفيريين الذين يهدمون الوطن وهم يحسبون انهم يحسنون عملا

تحياتى - عزام اخوى شديد ولضيض اخليهو يتحدث عن نفسو !!!!