حدث في سفارة السودان بالرياض وكنت شاهداً عليه !

الشهر الماضي - نهاية اسبوع - يومها ذهبت للسفارة لاستخراج شهادة ميلاد لابني ،،،
وانا في الباحة الامامية لمبنى السفارة شاهدت أحدهم يخرج مسرعاً ويلحق به اثنين من موظفي السفارة ويتصايحان: اقيف يازول ... اقيف يا زول
لكنه لم يأبه وخرج مسرعاً حتى خارج السفارة ... الا انهما لاحقانه حتى خارجها واعاداه !
- يا زول انت بننادي فيك ما داير تقيف مالك؟!
- ما قلنا ليك اصبر ياخي ... ده شنو ده !!
.....
يا جماعة انا من الصباح راجيكم ... كل مره تقولو لي اصبر ! ... فترت ياخ .. من الساعة 9 انا هنا
يبدو من ملابسه انه يعمل في مهنة الرعي وهذا فعلاً ما اخبرني به لاحقاً
يشهد الله ان دموع الذلة والهوان كانت تنهمر من عينيه وهو يحاول مداراتها ،،، والرجل تعرفه من سيماه .. غلبه الاحساس بالاحتقار والاهانة والضعف والغضب
- ما حدث يا سادتي ان الموظفين قد ضيعوا جوازه واخذوا يماطلونه في التسليم منذ الصباح حتى الساعة الثالثة بعد الظهر !
والصدفة الغريبة انني كنت حاضراً عندما تصايح احدهم في احد المكاتب: دا ياهو دياهو ياخ ... واقع تحت التربيزة !
ووالله لا يكاد يختلف هذا السوداني عن الشخص الذي كرمته السفارة قبل يومين في شئ ،،، سوداني يشرف بلد

رغم ان الموظفين اضاعوا جوازه الا ان ردودهم كانت دائماً لائمة وزاجرة له كلما ذكرهم بانه ما يزال ينتظر
(ما تصبر ياخ ... شغالين ليك فوقوا ... امشي اقعد بره لما يجهز بناديك) ،،، حتى خرج غاضباً ،،، تخنقه عبرة هوانه على موظفي السفارة حتى اسالت دموعة

تحية

موظو السفارات في الخليج ومنها سفارة السودان بالرياض والقنصلية بجدة يتعاملون مع الناس مع افتقاد خاصية العلاقات العامة وابجدياتها...تقييمهم للناس يعتمد اولا علي الواسطة...المظهر..الوظيفة ..المزاج.

ابتعاث الموظف البدلوماسي او غيره يجب ان يخضع لتحميص وتدريب ...من النادر ملاحظة المهنية او ابجديات الذوق في التعامل ولا نقول الحرص علي الدقة والانجاز...مقروء ذلك مع الدور الهام الذي يلعبه المغترب كسفير حقيقي تتضاءل امامه السفارات واصحاب الكرافتات الفالصو.. والذقون الصفراء ايضا...

كيف يتم اختيار هؤلاء .....ناس شغالين ليك فوقو...

محمد الكامل عبد الحليم

Quote: كيف يتم اختيار هؤلاء

الموظف اياً كان: داخل او خارج السودان وبغض النظر عن طباعو واخلاقوا مفترض يكون عندو ضوابط واضحة ومحددة للتعامل مع الجمهور، ضوابط ارشادية في صفحة او صفحتين مفروض يكون حافظها صم قبل ما يباشر عملوا في أي وظيفة عامة

اذا كان فعلا اضاع موظفي السفارة جواز هذا المواطن .
وجب عليهم الاعتذار ومصارحته بالحقيقة ومواصلة البحث
بدلا من الزجر ولافتراضات و الوعود

سلامات
أيمن محمود
يا أخوي الراعي الأمين ذاتو كان مشي لناس السفارة السودانية ديل قبل الفيديو لأي غرض لتجديد جواز أو ليبلغ إنو ضاع كان ناس السفارة سمعو مليون كلمة فارغة وإتجاهلوه ذي زولك دا.
السفارات وقنصليات السودان بهينو ويذلو السودانيين المغتربين إذلال ما عادي. وبعد دا السوداني المغترب لامن يعود لسودان يطلعو عينو بضرائب بشيب الرأس.

صالح عبده

Quote: وجب عليهم الاعتذار ومصارحته بالحقيقة ومواصلة البحث

كان حا يكون اقل ضرراً وفيه احترام للمراجع

Quote: الا انهما لاحقانه حتى خارجها واعاداه !

والله فيهم خير برضو

عن تجربة شخصية وعدة مرات اصبحت مقتنعا ان بعض موظفي السفارة السودانية بالرياض عبارة عن فاقد تربوي قادم من حضيض المجتمع السوداني
السفارة بالرياض فيها عنجهيات وعنتريات تفوق حد الوصف
بها سخف وقلة ادب واحتقار للمراجعين بطريقة لن يصدقها الا من عايشها وكابدها
هل تصدقون خمسة وتسعين بالمائة وهم داخلون من باب السفارة يقرأون المعوذتين واوراد الاستغفار وتلك التي تدعو الي الصبر علي المكارة
الخمسة في المائة الباقين اما محاسيب المؤتمر الوطني او من لديهم علاقات بافراد السفارة او مراجعين لاول مرة لا يدرون ما ينتظرهم من استخفاف واستعلاء وسؤ معاملة

في وقت ما فرضت المعايش على بعض السودانيين الحضور للمملكة بجوازات تشادية،
تعدلت معظمها الان ،الا ان البعض ما زال، وللناس ظروف....
المهم سوداني شديد التهذيب جاء لاخذ تاشيرة دخول للسودان ، وله جواز تشادي...
غايتو الذلة اللقاها الراجل دا، من موظف السفارة، امر فوق طاقة احتمال اي انسان،
بداها الموظف بعبارات زي تبيعوا وطنكم يا خونة،
يرد السوداني : ياخ دا جواز وليس جنسية،
بكل سخف يواصل الموظف : حتى ولو، لا يعفيك من الخيانة، تشادي كمان ، يخس على كدة
وعلى هذا المنوال استمرت المهزلة، وتدخلنا نحن الحضور، وواصل الموظف الردح، مستغلا وضع السوداني الماشي لاهلو، وعاوز الامور تمشي بهدو....
.....................
اي معاملة في السفارة يتحفز الموظف على اذلالك باكرا، ثم يؤدي وظيفته باخر نفس وكل تكاسل،
وكأنك بتشحد فيهو ،
مع ان السودانيين هم الوحيدين الواقفين صفوف عشان يدفعوا فلوس، وبرضو هؤلاء الجماعة ما رضيانين...

=


وهل هناك من يتوقع من السفارات والقنصليات السودانية عموماً و"الإنقاذية" خصوصاً مهمة آخرى غير جباية الضرائب والأتاوات والتحقير والإهانات؟!

لا يوجد دولة في العالم تأخذ ضرائب لا تقدم مقابلها خدمات إلا "دولتنا الرسالية "الكافورية ".

شاهدنا سفراء الدول "الكافرة" يتابعون شأن رعاياهم الهندوس والمسلمين، و "النصاري" و البوذيين ويسألون عنهم، ويتفقدون أحوالهم تماماً كما كان (عمر بن الخطاب) يتنفذ تلك النعجة التي حدثونا أنها تعثرت في العراق.

فذلك الدبلوماسي "الكافر" لا يكف عن التدخل لحل أبسط مشكلة في أصغر شركة خليجية، لكننا لم نشهد أي دبلوماسي من أولئك المتأنقين التابعين لـ"أمير المؤمنين" (عمر) ينزل عن أبراجه العاجية في قلعته المحصنة ليشغل نفسه بشأن من شؤون مغترب، خاصة إن كان ذلك المغترب من الغُـبش الذي يرتدون الملابس البائسة و الأسمال البالية.

الحكومة نفضت يدها مسبقاً عن أبسط الالتزامات تجاه أمثال هذا المواطن، من تأمين له ، أو تعليم وعلاج لأبنائه في الداخل. وحتى من "نجح" في الهروب إلى الخارج فإن حكومتنا "الرشيدة" وممثلاياتها تلاحقه بكل صور القسوة والإزدراء.

السفارات في الخارج والدوائر الحكومية في الداخل يهمها ما يحمله جيب هذا المواطن، أكثر مما يهمها ما يـنـوء به كاهله من التزامات وأحمال، أو ما يطويه قلبه من هموم وأثقال تهد الجبال.

التونسي (محمد البوعزيزي) الذي لم يأبه به أحد، كان التجسيد المشابه لمأساة مواطننا هذا، فهو قد ووجه بالاستخفاف في كل الدوائر الحكومية والعدلية التي قصدها، وكانت قد سُدت أمامه – بسبب الفساد والمحسوبية- كل طرق الوصول إلى الوظائف، وفي بحثه عن لُقمة شريفة وعن فرصة للرزق الحلال صُفعت في وجهه كل الأبواب قبل أن تصفعه تلك الشرطية المفترية كموظفي سفاراتنا ليتهاوى نظام دكتاتور تونس.
و من حُسن الحظ، ربما ، إن كل الدكتاتوريين الأغبياء لا يملون من تكرار نفس الأخطاء.


التحية لكم ولضيوفكم أخي أيمن.
...
..
.

محمد ولدي عندما كان صغيرا ولا ينطق كل الحروف جيدا
سألي ذات مرة وانا خارج من البيت متجه للسفارة السودانية بالرياض
قال لي بابا ماش وين ؟
فقلت له ماش السفارة
فقال لي انا ماش معاك السفالة
فضحكت وقلت له صدقت حين اخطأت
ومن يومها وحتى الان نقول ماشين السفالة السودانية وقتها كان يزعل لانه يعتقد باننا نسخر منه
وعندما كبر ومشى السفارة بنفسه صار يردد الحقيقة السفالة السودانية
.
.
وزارة الصحة اصحوها تصحا تنقلب على صفحة
.
.
ايمن سلامات يا الحبيب
أها وطلعت الشهادة ول لسع باقي ؟ ههههههههههههه

أيمن محمود سلامات ياخ

رسلت جواز زوجتي للبعثة القنصلية في نيويورك لاضافة ابنتي على جواز امها المهم ردت علي موظفة ثقيلة ووضعتني في الانتظار لمدة طويلة جداوهي بتتكلم مع شخص اخر جنبها المهم اتململت وقلت ليهابعد مدة لتنبيها اني على الخط و بظرافة ياخ ان شاء الله ما اكون ازعجتك فردت علي (اي زعجتني) بمنتهى السخافة وقلة الادب.

الله يعينا من زي ديلا

Quote: دا ياهو دياهو ياخ ... واقع تحت التربيزة !

دا ياهو دياهو ياخ ... واقع تحت التربيزة !!!!!

بالله ؟؟؟ تحت التربيزة ؟؟؟؟؟

الزول دا كان عاوزنو
يدفع ليهم حاجة .....

أولاد صعاليك فاقد تربوي
وبس..............

يا قول ولد ود البوش
السفالة السودانية
في كل بقاع الأرض
وهم فعلا علي قول الزبير
فاقد تربوي
حتي المتعلم
أمي
في كل شي
شكرا أيمن علي عكس الصورة

ا
ل
م
ق
ل
و
ب
ةـ

للسفالة السودانية
ـــــــــــــــــ
الحليلة

Quote: عبارة عن فاقد تربوي قادم من حضيض المجتمع السوداني

ما هو تعريف الحضيض للمجتمع السوداني؟

_________
البحصل في الخدمة المدنية السودانية لا علاقة له بالتربية بل ذو علاقة متكاملة مع المحسوبية في كل شئ.
هذه الوظائف داخل السفارات هي لافراد اسر كما ان الوزارات صارت ملكية للاسرة فتجد الوزير يعين زوجته سكرتيرة او تزوجها لتصبح سكرتيرة و زوجة.
كذلك السفارات اصبحت ملكية لهم.

و لما تصل للوظائف الدنيا التي نحسبها ضمنيا للعامة تأتي المرحلة الثانية في سلم المحسوبية. من اي مكان في السودان او من قرية او من اي قبيلة و هكذا الي اسفل حضيض.
لا علاقة لشهادتك بأي شئ مما يحدث في السودان.

اخونا احمد السر حاكم
الله يطراه بالخير
قال السفارة السودانية زي تربيزة القمار كل ماتمشي يخرتوك ويفضو جيبك وتجي راجع وشك مكرضم زي الادوك بونية
الله يكون في عون المغترب السوداني

Quote: وانا في الباحة الامامية لمبنى السفارة شاهدت أحدهم يخرج مسرعاً ويلحق به اثنين من موظفي السفارة ويتصايحان: اقيف يازول ... اقيف يا زول لكنه لم يأبه وخرج مسرعاً حتى خارج السفارة ... الا انهما لاحقانه حتى خارجها واعاداه ! - يا زول انت بننادي فيك ما داير تقيف مالك؟! - ما قلنا ليك اصبر ياخي ... ده شنو ده !! ..... يا جماعة انا من الصباح راجيكم ... كل مره تقولو لي اصبر ! ... فترت ياخ .. من الساعة 9 انا هنا

والله كتيرة منهم وما قصروا يعني ما قالوا ليه الباب بفوت جمل ، المفروض يتم تحفيزهما بالموظف المثالي لهذا الشهر


مودتي

الرحال