الكاتب الصحفى إدريس عبدالمتعال الشيخ ومواضيع رياضية يومية من المشاهد الرياضية

ادريس عبد المتعال الشيخ
زاويتي اليوم بصحيفة المشاهد الرياضية وتوتوسبورت الالكترونية

التغطية مستمرة

ستة و(يك) ..
* التغطية مستمرة
* الهلالاب ديل ناس صعبين خلاص
* الجزيرة بت عمهم ( لزم )
* (الجزيرة) القناة ما الولاية .. ماتشتتوا افكارنا من البداية تلحقونا الصفوة
* الزول لو وقف شماعة في مواصلات ( الثورة ) ناس قناة الجزيرة ديل يقولوا ليك
الوضع مقلق والاحداث متلاحقة ويمسكوا الموضوع ( ماربيلا )
* اسماء اللبان ذاتا يشرحوها ليكم كمان
* قلنا ليكم الجزيرة دي بت عمهم (لزم)
* الهلالاب ديل مابسيبوكم يتابعوكم كدا زي (الضل)
* لوما (اتنحيتوا) مابخلوكم
* ديل اهلي اسالوني منهم
* يحلكم منهم الحلا (بلة) من كمبالا سيتي
* ياناس الهلال الموضوع دا اقفلوه خلاص
* شوفوا ليكم حاجة تانية غيره
* قالوا ليكم العزاء انتهي بانتهاء مراسم ( الدفن)
* واقفين لسه جنب (المقبرة) عندكم شنو تاني؟
* عارفنكم اصحاب واجب ومابتقصروا مع جيرانكم ..
* ربنا يجبر الكسر .. والفقد (واحد)
* واحد شنو يازول (اتنين) صفر
* اعذروهم ياجماعة عدم الموضوع بسوي اكتر من كدا
* الايام دي قاعدين ساي لاشغلة لامشغلة (تمهيدي) ماعندهم
* الاتحاد الافريقي عفاهم من (الالزامية) دي
* التمهيدي دا عليكم الله فرقو من الخدمة الالزامية شنو؟؟
* (الكاف) استخرج ليهم اعفاء وصنفهم (جيم)
* ماتسرحوا ساي بنشرح ليكم الكلام دا وبنفهمكم
* (الكاف) دا للمرة الاخيرة قلنا مقصود بيهو الاتحاد الافريقي
* ماقلتوا ناس بطولات خارجية
الكاف مابتعرفوه
* زمن بطولاتكم دي ما اظنو اسسوه الكاف
* الزمن داك البطولات في افريقبا بنظموها ناس اللجان الشعبية
* المهم كدا وضحنا ليكم (الكاف)
* اما التصنيف ( ج ) دا اسالوا منه ناس الجيش
* مامشكلة الجيش الرواندي مابعيد منكم جاركم طوالي في نفس (التمهيدي)
* لو اتدربتوا كويس في (المعسكر) كان عرفتوا ال (ج) دي مقصود بيها شنو
* عديتوها فسح وتبديل فنايل
* المهم ال(ج) دي معناها
(غير لائق) للمشاركة
* ابسط ليكم الموضوع انتوا اصلكم مابتفهموا الا بالالماني
* كلامي دا يعني ناس الاتحاد الافريقي(الكاف) قالوا انه الهلال دا غير لائق للمشاركة(ج) في الدور التمهيدي
* (افتكر انو) المعني وضح كدا
* عشان كدا قلت ليكم اعذروهم الهلالاب ديل (مستبعدين) و (محرومين)
* ناس حاقدين بس
* انتوا لو اجريتو اتصالاتكم او رسلتو (ايميل) لي (قرن شطة) بديكم تفاصيل الموضوع دا كلها
* بس اعملوا حسابكم موظف الاتحاد العام مايقوم يمسح (الايميل)
* الزول دا بقرا الايميل وبمسحو طوالي
* غايتو انا حسب الاخبار السمعتها ناس الهلال ديل الاتحاد الافريقي حرمهم من المشاركة معاكم قالوا
(كبار سن)
* والكبار ديل مالهم ومال التمهيدي
* فهمتوا القصة ولا ( اكمبل) ليكم الشرح بكرة

تسديدات اخيرة
* حقق الهلال المطلوب من مباراته امام النسور وظفر بالثلاث نقاط وهذا هم المهم
* صحيح ان اداء الهلال في هذه المباراة لم يكن مرضيا ومقنعا
* رغم ذلك فان هنالك كثير من الملامح المميزة بدات تظهر علي اداء الفرقة الزرقاء من خلال هذه المباراة
*هي المباراة الدورية الثانية للهلال الذي يحتاج لمزيدا من الوقت والمباريات والتجارب وسيرتفع مستوي الاداء تدريجيا وصولا لمايرضي طموحات وامنيات الاهلة
* لاتستعجلوا اصدار الاحكام علي المستوي الادائي للهلال وعلي مدربه التونسي نصر الدين النابي
* لاتقلقوا ياجماهير الهلال القادم باذن الله افضل واجمل
* واحد من (بتوعين التمهيدي) ديل كتب في صفحتو علي فيس بووك
( اكتبوها علي لساني المريخ سينتصر في مباراة الاياب اليوم بالستة)
* يا اخوي انت خيالك دا كم (قيقا)؟؟
* انتوا ماشين يوغندا تلعبوا
( ليدو) وللاشنو؟
* مامعناها انتوا قبل كدا اتهزمتوا من الوحدات ستة و(يك) تقوم تسرح للدرجة دي
* الجماعة ديل مافي حاجة مغطسة حجرهم غير زيادة (المحلبية) دي ..
* هيرمان .. كلاكيت تاني مرة ..صور
* في حضرة (هلالك) يطيب الجلوس