ياناس الفن والمغنى بالله رايكم شنو في الزول دا؟

ازيك يا بلة..
انا ما تبع ناس الفن والمغنى لكن الزول دا صوتو مريح جداً ومتمكن في عزف العود
شكراً على تسليط الضوء عليهو

الشاب ده كان مشارك في نجوم الغد بس صراحة حصلت ليه تغييرات وطور نفسه شديد .... ابداااااااااااااااااااااااااااااا ع ..

..

صوت جميل
واتمني ان يدعم نفسه بالدراسة لمزيد من التجويد

..

بله خلى نسانا اسمع اعطف على يا ريم دى
على ساجورى ده فنان كامل،،،

زولك يا د / بلة عارف بسوي في شنو ؟
ومن طلتو و من نقرشتو للعود دي يا بلة تقدر تتعشم في سماحة مستقبلو .
وبرضو نحن تبع ود الموج زول أم در الشواف .

الأخ بلة موسى
لك الود والتحايا الطيبات
ولك الشكر أن تكرمت وقدمت لنا هذا الصوت المبدع الطروب وإن كنت أنا لست
من أهل الفن الذين قصدتهم إلا أنني قد إستمعت وبإصغاء لهذا الفتى - على ساجورى
إستمعت للفيديو الأول والثاني وهالني وأعجبني النجاح الذي حققه الفتى في المرحلة
الأولى التي يمر بها كل من يولج دروب الفن الوعرة وهى مرحلة تقليد الآخرين التي
يستعرض فيها الفنان إمكانيات صوته وإمكانيات أدائه ... إلخ لنفسه وللآخرين معاً ..
ثم قلت في نفسي أن الفتى مؤهل تماماً للدخول في المرحلة الثانية وهى المرحلة الأكثر
صعوبة وتعقيداً لأنها تتطلب توفر عوامل ذات جزئين .. جزء يجب أن يكون عند الفنان
نفسه كالرغبة والقدرة والإرادة والإنفتاح على تجارب الآخرين .. إلخ والجزء الآخر يأتي
من خارج الفنان .. مثل الشاعر والملحن والناقد .. إلخ .. المرحلة الثانية التي هي الخروج
من تقليد الآخرين لإثبات الذات .. فإن اجتاز الفنان هاتين المرحلتين سهلت عليه المرحلة
الأخيرة وهي مرحلة الإنطلاق والثبات .. إنطلاق نحو التربع كقمة والثبات فيها بالابداع
المتجدد دوماً .. أيضاً فاجأني الفتى عندما استمعت للفيديو الثالث وعرفت أن العمل فيه من
لحنه وادائه ... فالفتى صغير في سنه .. واجتاز المرحلة الأولى وخرج منها في سهولة ويسر
.. بل بنجاح باهر نحو المرحلة الثانية .. وبدايته في المرحلة الثانية ناجحة بالدرجة التي تنشئ
معها تفاؤل وتوقع لنجاح باهر في مسيرته الفنية ليجتاز كافة المراحل وتؤكد أن الفتى بأقل تقدير
مؤهل للتربع على عرش الأغنية السودانية ويكون خير خلف لخير سلف .. ودي وتقديري ....

http://youtu.be/kQnbguaeb8s

Quote: انا ما تبع ناس الفن والمغنى لكن الزول دا صوتو مريح جداً ومتمكن في عزف العود

سلام يارشا
والكاشف أخوك كمان زيك :)
لكن عندي قاعدة حقتي براي (احتمال) : أي فنان مابعرف يغني بالعود ينظر في أمره..
وتانيا الزول دا أنا طربت شديد لأدائه..

Quote: بس صراحة حصلت ليه تغييرات وطور نفسه شديد

ودا الكلام المهم يا أسامة
لك التحايا والتشكرات

Quote: صوت جميل واتمني ان يدعم نفسه بالدراسة لمزيد من التجويد

نعم يامحمد وسنه وموهبته ستساعده على ذلك..
يا محمد الزول دا احجزوا ليه مكان في مكتبة الأغنية السودانية من هسع

شكرا يامحمد عوض السيد

Quote: بله خلى نسانا اسمع اعطف على يا ريم دى

صديق الموج
تحياتي

طبعا الحقيبة لايعلى عليها
واغنية اعطف علي ياريم مصنوعة بمهارة عالية

لكن ياموج نسانا حبيبنا أو المسافر حسب اسمها الحقيقي مكتوبة بإحساس عالي وفريد..
قصة من القصص الحية التي لازال أبطالها يمشون على الأرض..

حسب الباري كتبها بعد أن مزج الدموع بالدم ووضعهما فى دواية شجن شفافة
والمسافرة برت ريشة حسب الباري بالفراق والعذاب المامنظور
وتخيل أن هذا الألم ظل حيا كلما العين تلاقي العين في مناسبات يفرح لها الجميع وحسبو يدندن حليل الخوة الماقدر عشانا..

حسب الباري ياموج من السودانيين الذين تنطبع ملامحهم فى ذاكرتك من أول أن تلتقيهم ولاتعرف لذلك سببا..

باختصار ياموج
الأغنية دي عندي حاجة تانية أكبر من كلمات ولحن وهذا الساجوري جعلني اتخيل أن حسب الباري كان يغمس ريشته في قلبه ثم ينقلها للورق.

Quote: ومن طلتو و من نقرشتو للعود دي يا بلة تقدر تتعشم في سماحة مستقبلو .

عثمان موسى النيويوركي
تحياتي ياحبيب

نعم نعم ياعثمان بس يدكم معاه الزول دا عايز كلام حنين ومليان ونديان.

ياسلام يادكتور
رجعتنا الى ايام روقه .. كان الجمال يحفنا من كل جانب

سلام بابكر قدور

وشكرا كثيرا على المداخلة والكتابة الواعية والفاحصة..

استمعت للرابط
ولكن يابابكر أنا من أنصار عتيق
جاءنا في الثمانينات في جلسة استماع في كلية الصيدلة
قال شعراء هذا الزمن وكأنهم بقولوا للمحبوب بنساك زي مانسيتني
لكن نحن بندي المحبوب كل الحق أن يفعل بنا مايشاء وبرضو نظل نحبه ونجد له الاعذار
قال الشعراء الجدد خلقوا للمحبوب من الشبه أربعين ونحنا كان المحبوب عندنا الفريد في عصرو..

بصراحة بحب الفنان والشاعر لما يكتبوا ويغنوا بحنين وبكاء وأنين وتسامح..

طبعا الأداء خطير مافيه كلام!!

سلام يامنعم فور

الزول دا يامنعم الحقوه بالكلام السمح ومجيه.

سلام دكتور بلة

الفنان المبدع علي الضديق ساجوري من خريجي نجوم الغد وهو من الخمسة الأوائل في احدى الدورات ... فنان شامل رغم صغر سنه .. اختط لنفسه نهجا مميزا وانتشر اعلاميا بكثافة لأنه فنان جاد ويراهن الكثيرين على تجربته ..

جاء الى مكتبي في احدى الايام بصحبة صديق مشترك واسمعني صوته .. وكنت احسب انه لا يعزف العود كعادة انداده وعندما بدات اعزف له وهو يغني لاحظت أنه يتابع عفقات اصبعي بعناية فأوقفت الوصلة وناولته العود وقلت له انت تعزف عود فأعزف وغني بنفسك ..

وفعلا تناول العود وغنى أعطف علي يا ريم وايضا من قليبو الجافي وبعض من روائع التراث ..

وزقد كان مقررا بعد يومين ندوة في مركز الخاتم عدلان بحضور بكري أبو بكر ومبدعي سودانيز أون لاين فعرضت عليه الحضور برفقة الواعد وضاح أحمد وفعلا حضرا .. ورغم أنه كان مقررا ان أغني أنا بحسب أن الليلة تخص اعضاء سودانيز أون لاين الا انني اعتذرت عن الغناء وقدمت علي ساجوري ووضاح أحمد وسأتي بالفيديو بعد قليل ..

علي ساجوري يمتلك صوتا دافئا وجميلا ولكن وبصراحة شديدة وقع مبكرا في مصيدة عدم الالتزام الفني والتقيد بالمواعيد مما سبب لي احراجا كثيرا لدي عدة جهات قدمته لها ولكني أتمنى ان يتعافى سريعا من هذا الفخ ..

بالمناسبة كتب عنه ايضا عضو المنبر عمر الفاروق في احد البوستات عن اغنية الفطن الوسيم ..

and#1593;and#1604;and#1610; and#1575;and#1604;and#1589;and#1583;and#1610;and#1602; and#1608; and#1608;and#1590;and#1575;and#1581; and#1571;and#1581;and#1605;and#1583; and#1610;and#1585;and#1575;and#1601;and#1602;and#1607;and#1605; and#1593;and#1604;and#1609; and#1575;and#1604;and#1593;and#1608;and#1583; and#1588;and#1582;and#1589;and#1610; and#1575;and#1604;and#1590;and#1593;and#1610;and#1601; and#1601;and#1610; and#1604;and#1610;and#1604;and#1577; and#1587;and#1608;and#1583;and#1575;and#1606;and#1610;and#1586; and#1575;and#1608;and#1606; and#1604;and#1575;and#1610;and#1606; and#1576;and#1605;and#1585;and#1603;and#1586; and#1575;and#1604;and#1582;and#1575;and#1578;and#1605; and#1593;and#1583;and#1604;and#1575;and#1606; ..

and#1575;and#1604;and#1601;and#1610;and#1583;and#1610;and#1608; and#1605;and#1604;and#1603; and#1604;and#1571;and#1601;and#1604;and#1575;and#1605; and#1575;and#1604;and#1589;and#1583;and#1610;and#1602;and#1577; and#1606;and#1580;and#1604;and#1575;and#1569; and#1587;and#1610;and#1583; and#1575;and#1580;and#1605;and#1583; ..

الله يديك العافية ياناذر يافنان ياراقي

ياخي عليك الله الزول دا ابقى عليه عشرة

تحياتى مليون

دكتور بلة كيفك يا حبوب

ساجوري دا الفطن الوسيم برضو جننا جن وبصراحة الغنية دي بتمزج بيها غايتو ان شاء الله يواصل بالقوة دي واكيد بصل كل الامنيات ليهو بالتوفيق

Quote: صوتو مريح جداً

تحية

صوت مميز ومريح حبذا لوتعهده د بالرعاية اهل الاختصاص في الصوت لتطوير قدراته والوقوف علي ما يصلح له من مقامات(يتوهط) علي قواعدها صوته العذب الشجي .


شكرا يا دكتور بله علي الابتدار وتقديم هذا الفتي الواعد..

(طبعا الكلام يخص ناس الفن والمغني لكنا من المتذوقين)

خارج الدائرة نعرض
لكنه مميز جداً ويستحق لفت الانتباه


شاهدت/استمعت إليه في قناة أم درمان
ووقفت طويلاً في إحساسه، قدرته، صوته...الخ
ونالني ما نالكم


شكراً يا سمي



تحياتي واحترامي