Post: #1
Title: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-13-2014, 09:01 PM
Parent: #0
مودتي
الرحال
|
Post: #2
Title: Re: جلد عريس في ليلة فرحه بسبب رقيصه سلو مع عروسه
Author: Mahjob Abdalla
Date: 02-13-2014, 09:05 PM
Parent: #1
ده ياتو رقيص؟
|
Post: #3
Title: Re: جلد عريس في ليلة فرحه بسبب رقيصه سلو مع عروسه
Author: Hisham Amin
Date: 02-13-2014, 09:06 PM
Parent: #1
يستاهل
انا مع جلد كل عريس وجلد كل عروس تخرج او يخرج عن نطاق
العادات والتقاليد المجتمعية المعروفة.
عاداتنا المجتمعية تميزنا عن باق المجتمعات وليس التقليد الأعمى
|
Post: #4
Title: Re: جلد عريس في ليلة فرحه بسبب رقيصه سلو مع عروسه
Author: الصادق اسماعيل
Date: 02-13-2014, 09:18 PM
Parent: #3
يا جماعة ما تستعجلوا يمكن العريس جعلي والناس حبت تحافظ على التقاليد
|
Post: #5
Title: Re: جلد عريس في ليلة فرحه بسبب رقيصه سلو مع عروسه
Author: Siddig Elghali
Date: 02-13-2014, 09:25 PM
Parent: #4
الصادق اسماعيل
"يا جماعة ما تستعجلوا يمكن العريس جعلي والناس حبت تحافظ على التقاليد"
صادق يا الصادق ؟ هههههههه
|
Post: #6
Title: Re: جلد عريس في ليلة فرحه بسبب رقيصه سلو مع عروسه
Author: Mahjob Abdalla
Date: 02-13-2014, 09:39 PM
Parent: #5
| Quote: يا جماعة ما تستعجلوا يمكن العريس جعلي والناس حبت تحافظ على التقاليد |
بكون مولود في الصحافة
|
Post: #7
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-13-2014, 10:19 PM
Parent: #6
رقيص سلولي فيه من حاجات تانية حمياني
مودتي
الرحال
|
Post: #8
Title: Re: جلد عريس في ليلة فرحه بسبب رقيصه سلو مع عروسه
Author: Mahjob Abdalla
Date: 02-13-2014, 10:26 PM
Parent: #7
يعني
Slow Dance?
تخيل انا قريتو حاجة تانية خالص بالعربي و ظننته من الاشياء الجديدة البتحصل في البلد.
|
Post: #9
Title: Re: جلد عريس في ليلة فرحه بسبب رقيصه سلو مع عروسه
Author: أحمد التجانى حمودى
Date: 02-14-2014, 03:25 AM
مزيدا من المعلومات حول مسألة دقة العريس
العرس كان في صالة جديدة في شمبات الزراعة
اسمها سمبلة (الملكة) ..
والقصة ما ال slow براه الجاب الدق
وانا قلبي حاسي من امبارح !!!!!
قالوا العريس كان فعلا بسلم علي العروس
إستغفر الله العظيم ...إستغفر الله العظيم ....
في خشمها ....
ومش كدا وبس ...
يقوم ياكلها الكيكة في خشمها ....
معالق مافي في الصالة يا أخوانا
صفوا النية ....
والعروس
القاهر
الممسوخة
الدنية
تمعط في الكيكة
وتلحس في الكريمة بلسانها ...
مما آثار حفيظة نفوس النسابة ....
وعينك ما تشوف الا النور
|
Post: #10
Title: Re: جلد عريس في ليلة فرحه بسبب رقيصه سلو مع عروسه
Author: حسين عبد المجيد
Date: 02-14-2014, 07:10 AM
Parent: #9
Quote: يستاهل
انا مع جلد كل عريس وجلد كل عروس تخرج او يخرج عن نطاق
العادات والتقاليد المجتمعية المعروفة.
عاداتنا المجتمعية تميزنا عن باق المجتمعات وليس التقليد الأعمى |
التميز ... نحن السودانيون زينا ما في
اسف يا هشام لا عندنا تميز ول يحزنون
ترسيخ المفاهيم الزي دي جات من اللواكة المتوارثة وصدقناها
ربما يكون الماضي اسوأ من الحاضر في مثل هذه المناسبات
|
Post: #11
Title: Re: جلد عريس في ليلة فرحه بسبب رقيصه سلو مع عروسه
Author: محمد الكامل عبد الحليم
Date: 02-14-2014, 10:02 AM
Parent: #10
تحية
المشهد الذي حدث ويحدث واستدعي الضرب يعبر عن حالة الاستلاب التي يعبر عنها المجتمع حديثا ابتداءا بصالة الافراح مرورا بحالة الslow التي اقتضت التدخل من قوات اهل العكاز ليحدث الهرج والمرج رجعا وترديدا لزمان السوط السوط يا جنا السوط الأحر من الموت.
ستختزن ذاكرة العريس هذه العلقة الساخنة عسي غيره يرعوي ويثوب من حالة لا تشبه العراقي والسروال ...ولا العديلة البضاء...
|
Post: #12
Title: Re: جلد عريس في ليلة فرحه بسبب رقيصه سلو مع عروسه
Author: Hisham Amin
Date: 02-14-2014, 10:21 AM
Parent: #10
اخى الفاضل
كل مجتمعات العالم. وليس المجتمع السودانًى فقط
تميزها عاداتها وتقاليدها والكل يسعى الى المحافظة عليها
الا نحن. ... نفلسف ونسعى الى جلب ما لا ينفعنا ولا يتماشا معنا
|
Post: #13
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-14-2014, 06:47 PM
Parent: #12
| Quote: المشهد الذي حدث ويحدث واستدعي الضرب يعبر عن حالة الاستلاب التي يعبر عنها المجتمع حديثا ابتداءا بصالة الافراح مرورا بحالة الslow |
استلاب بس بصالة الافراح وكمان التوابع من الكوكتيل المحتوي على قطعة بيتزا وهوت دوق
مودتي
الرحال
|
Post: #14
Title: Re: جلد عريس في ليلة فرحه بسبب رقيصه سلو مع عروسه
Author: عبدالحفيظ ابوسن
Date: 02-14-2014, 07:25 PM
Parent: #13
والله مساخر
والله مهازل
بوس عديل كده قدام الناس ?
ياخ غايتو نحن ناس خلا ساكت , حرم ام عيالك قدام الناس في العنقريب ما تقعد جمبك لو رعفت
|
Post: #15
Title: Re: جلد عريس في ليلة فرحه بسبب رقيصه سلو مع عروسه
Author: احمد حمودى
Date: 02-14-2014, 08:23 PM
Parent: #14
| Quote: حرم ام عيالك قدام الناس في العنقريب ما تقعد جمبك لو رعفت |
ود ابن سن فاتح بوست بهناك فى يوم الحب وادينا التحية ومن الذى منه تجى بى جاى تطبزا ياخى دا احباط عديل
|
Post: #16
Title: Re: جلد عريس في ليلة فرحه بسبب رقيصه سلو مع عروسه
Author: عبدالحفيظ ابوسن
Date: 02-14-2014, 08:37 PM
Parent: #15
حمودي ده مازي داك ,,, يعني لو ماحضنتها قدام الناس ما بكون بحبها
عندي ود عمي مسخوت جاهو واحد قال ليهو ياخي داير افك خطيبتي دي ,, ليه ,, قال ليهو يوم واحد ما قالت لي بحبك
قال ليهو
كويس والله , هسه مرتي دي بتها عروسها ويوم واحد ما قالت لي بحبك النمشي نطلقها
|
Post: #18
Title: Re: جلد عريس في ليلة فرحه بسبب رقيصه سلو مع عروسه
Author: منتصر عبد الباسط
Date: 02-14-2014, 08:54 PM
Parent: #16
|
Post: #17
Title: Re: جلد عريس في ليلة فرحه بسبب رقيصه سلو مع عروسه
Author: Siddig Elghali
Date: 02-14-2014, 08:44 PM
Parent: #15
السيد/ يوسف بشاري
يقول:
"Yousif Bashari · الأكثر تعليقا · Stratford Career Institute
الصادق والصادق .. فى ذمتكم هل رأيتم ( جعلى ) بيرقص سلو ... ؟ أحسن خليكم فى حالكم ومافى داعى للكلام الفارغ دا والأساءة للقبائل والتهكم عليها ..وإنتوا عارفين إنو أصلكم ( تشادى ) فمافى داعى وأنتم أصبحتم سودانيين بالميلاد فيجب إحترام أكبر قبائل السودان وأشجعها ..!"
يا السيد/ يوسف بشاري هل نسيت رقصة سولو العملها المك نمر للدفتردار وفي ذمتك هل سمعت في تاريخ السودان أن زعيم قبلي قتل غدرا معزوميه وهرب تاركا قبيلته ، طيب اذا كنا تشاديين فلماذا تتحدثون في بأن جيش الخليفة أغتص نساءكم وحرر السودان من سيدكم المستعمر الإنجليزي والله لو كنت جعلي لما أفتخرت بالهارب المك نمر وراجع التاريخ ماذا أعد المك نمر لضيوفه ومن ثم غدر بهم ، والغدر دائما صفة الجبناء والدليل هروبه بعد فعلته .
|
Post: #19
Title: Re: جلد عريس في ليلة فرحه بسبب رقيصه سلو مع عروسه
Author: منتصر عبد الباسط
Date: 02-14-2014, 08:57 PM
Parent: #17
هناك حالة من الإستلاب الثقافي تعاني منها فئات ليست قليلة من مجتمعنا
خاصة في زفة العروسين مرة مصرية وأخرى غربية وهكذا
وين تراثنا الذي ينبغي أن نحافظ عليه ونورثه للأجيال
حتى لا نصير مجتمع لا أصل له.
العز والفخر يكون بإرثنا وثقافتنا وليس بتقليد الآخرين في ثقافتهم
أمور تدعو للحزن على ما وصل له حالنا من الإنحطاط
الذي لا يعتز بثقافته وتراثه يعتبر عامي وجاهل .
ولو كان يحمل شهادة دكتورا ...وزي ما قالو القلم ما بزيل بلم
|
Post: #20
Title: Re: جلد عريس في ليلة فرحه بسبب رقيصه سلو مع عروسه
Author: dardiri satti
Date: 02-14-2014, 10:41 PM
Parent: #19
تخيل انا قريتو حاجة تانية خالص بالعربي و ظننته من الاشياء الجديدة البتحصل
محجوووووووووووووووووووووووب!!!!
بااااااااالغت في دي !!!!
تحياتي
|
Post: #21
Title: Re: جلد عريس في ليلة فرحه بسبب رقيصه سلو مع عروسه
Author: dardiri satti
Date: 02-14-2014, 10:55 PM
Parent: #20
| Quote: خاصة في زفة العروسين مرة مصرية وأخرى غربية وهكذا |
الراحل العظيم محمد وردي قال في ذلك إنه
فضيحة
فضيحة فعلاً وتعبير عن حالة استلاب
ودا بيحدث في لحظات الردة الاجتماعية
نحن نعيش لحظة من لحظات الانحطاط الوطني
ما هذا التناقض ؟؟
مادم إنهم زفوه بالزفة المصرية ،
فما المانع من الslow??
الslow?? ؛ وليس كما قرأها الأخ محجوب!!!!؟؟؟
تحياتي
|
Post: #22
Title: Re: جلد عريس في ليلة فرحه بسبب رقيصه سلو مع عروسه
Author: نادر الفضلى
Date: 02-14-2014, 10:59 PM
Parent: #20
وبتهم ما دوقها ليه؟ ما فطموها قدام الناس .. هى وراجلها أعداء؟
والخازوق يكون سبيشل ركويست من العروس ..... مقتبسة من ياتو مسلسل مدبلج ؟
العريس بالغ .. وأوعى الشهود الجنبو سمعوه بكب فى الررومانسيات .. بحبك وما عارف إيه .. والكلام وصل للقوات الخاصة!
تصور كيف يكون الحال .. لو ما جيتا جاف .. وأهل الكشيرة ديل ما أهلى .. وا أسفاى وما مأساتى وازلى
|
Post: #23
Title: Re: جلد عريس في ليلة فرحه بسبب رقيصه سلو مع عروسه
Author: munswor almophtah
Date: 02-15-2014, 00:09 AM
Parent: #22
غايتو يا بلدنا ربنا يحفظك أولا العريس شرفان وصبرا يبل اللابرى
وينهى الحفله دى ما عنده على الرغم من أن ذات المجتمع كان يشاهد من
الشبابيك والطاقات كل أحداث اليوم الأول والناس تحجز بالحجر زى صف الرغيف
هسع المواطن دا حلالو لكن دقس إن شاء الله يبقى راجل ويحافظ على زوجته
بعيدا عن أثر الدقه وليقل معتذرا لمن دقوهو والله معاكم حق لكن كسرتو
ضلعتى عشان يعفون عنه ياخ زمان يقولولك القيله بعد تلاته يوم وعنصر
التشويق والإثاره والأجاويد وحق البنات ياخ هسع كف لا حق بنات ولا يحزنون
ومن عشا الفقر داك يمشى محل ماش ما تشوفوه لا من يفلس وعينو تقع يا
أخوانا عرسو بالتى هى أحسن ولوكوا الصبر
|
Post: #24
Title: Re: جلد عريس في ليلة فرحه بسبب رقيصه سلو مع عروسه
Author: محمد فضل الله المكى
Date: 02-15-2014, 04:45 AM
Parent: #23
الدنية
تمعط في الكيكة
وتلحس في الكريمة بلسانها (Quate)
دحين الشي دا يا ود التجاني من الخشم للخشم؟؟ !!
هيع .... اخوان فاطنه عفيت منهم .
|
Post: #25
Title: Re: جلد عريس في ليلة فرحه بسبب رقيصه سلو مع عروسه
Author: حسين عبد المجيد
Date: 02-15-2014, 05:23 AM
Parent: #24
المنظر دا عادي وبتكرر في غالب الافراح لاكن الجديد فيهو دك و جلد العريس
الحكاية ما في السلولي واكل التورتة ولحس الكريمة عادي جدا وبتتكرر قاعدة
الحكاية يمكن غاظت الزول الباعوهو وعرسو غيرو وكان حاضر وما قدر يتحمل المنظر شئ احضان وشئ بوس وشئ لحس كريمة
|
Post: #56
Title: Re: جلد عريس في ليلة فرحه بسبب رقيصه سلو مع عروسه
Author: عبد الله شم
Date: 02-17-2014, 04:44 PM
Parent: #4
كمان شوف العرة دي بقول في شنو
| Quote: يا جماعة ما تستعجلوا يمكن العريس جعلي والناس حبت تحافظ على التقاليد |
وشوف كمال الباطل التاني والهنجكة حقتو دي
بس لمن يتعصر بكورك يا بكري بكري الحقني
اصبر لي يا باطل
| Quote: صادق يا الصادق ؟ هههههههه |
|
Post: #26
Title: Re: جلد عريس في ليلة فرحه بسبب رقيصه سلو مع عروسه
Author: محمد حيدر المشرف
Date: 02-15-2014, 06:26 AM
Parent: #1
سؤال لحماة العادات والتقاليد المميزة للشعب السوداني ..
ما رأيك دام ظلكم في رقيص العروس بنسخته القديمة في مقابل رقيص الاسلو ؟!!
|
Post: #27
Title: Re: جلد عريس في ليلة فرحه بسبب رقيصه سلو مع عروسه
Author: محمد الكامل عبد الحليم
Date: 02-15-2014, 06:51 AM
Parent: #26
تحية
يا اخانا المشرف هناك فرق ..المجتمع حين يري أمرا خادشا للحياء في زمان و وقت معلوم ذلك ما يعبر عنه وجدانه ... والا لما لجأ اهل أو بعض اهل العروس الي ما ذهبوا اليه..
ان تضع قبلة علي الجبين ليس كمن تضعها في موضعها الخاص..وامام حشد من الناس في الفضاء السوداني طبعا .
وانت سيد التمييز وسيد الذوق...
مع الاحترام
|
Post: #28
Title: Re: جلد عريس في ليلة فرحه بسبب رقيصه سلو مع عروسه
Author: بريمة محمد
Date: 02-15-2014, 07:06 AM
Parent: #27
عفيت من ناس شمبات ..
ناس شمبات على اليمين ضكرانين خلاص .. زمان كنا طلبة في كلية الزراعة لدينا زميل في الكلية جاب ليهو واحدة من بنات دولة مجاورة ومشى بها البحر ..
ناس شمبات مسكوه دقوا دق العيش .. وجابوه هو وزولته في عربية دفار إلى عميد الكلية .. والذى وعد بتأديبه، حينها أخلوا المكان.
العميد قال ليهو بعد ما أنفض الشمباتاويون، ما دقوك كويس ..!
بريمة
|
Post: #29
Title: Re: جلد عريس في ليلة فرحه بسبب رقيصه سلو مع عروسه
Author: محمد حيدر المشرف
Date: 02-15-2014, 07:19 AM
Parent: #27
محمد الكامل كيف الحال ..
نحن ازاء مشهدين ..
الاول مشهد لرقيص عروس (فنقل في ستينات القرن الماضي) وبكامل طقوسه من قطع رحط واقوان وانقسام الناس لمشجعي العروس ومشجعي العريس الخ ..
والثاني مشهد لى زفة في العام 2014 تنتهي برقصة "سلوو" بين العريس والعروس وهما في طريقمها لل" كوشه" ..
خذ هذان المشهدان بدون مبالغات هنا وهناك ..لا قُبل هنا ولا ازياء متطرفة وخليعة هناك ..
ثم خذ معيار العادات والتقاليد وحاكم المشهد الأخير ..
في ناس يا محمد بكذبوا علينا باسم الدين كثيرا ..
الواحد يجيك في مشهد زي ده ويقعد يستصرخ اخلاق الناس وعاداتهم وتقاليدهم ..
ولما نجي نطبق ذات العادات والتقاليد سيصف الناس بالجاهلية ومفارقة الدين ..
انا والله حبيت اوضح انو المعيار البنحاكم بيهو مفروض يكون واضح جدا ..
لا اكثر ولا اقل ..
عشان ما زول يتاجر بالتباس المعاني في اذهان الناس ..
مودتي الفائقة ..
وتحياتنا يا اشرف الرحال ياخي وشكرا على البوست
|
Post: #30
Title: Re: جلد عريس في ليلة فرحه بسبب رقيصه سلو مع عروسه
Author: حسين عبد المجيد
Date: 02-15-2014, 07:25 AM
Parent: #29
Quote: انا والله حبيت اوضح انو المعيار البنحاكم بيهو مفروض يكون واضح جدا ..
لا اكثر ولا اقل ..
عشان ما زول يتاجر بالتباس المعاني في اذهان الناس .. |
كان تعفيبي الاول بنفس الفهم دا
|
Post: #31
Title: Re: جلد عريس في ليلة فرحه بسبب رقيصه سلو مع عروسه
Author: عبدالحفيظ ابوسن
Date: 02-15-2014, 07:44 AM
Parent: #30
مرحبا ودالمشرف وحبابك
تعرف رقيص العروس كطقس تراثي , خضع لما يخضع له التراث من تطور او اندثار او مايسمي بالنفي الديالكتيكي , وهو سلوك ملك للناس دون تدخل سلطة او وعظ
بدأ مختلطا , ويتماشي مع الرقص السائد ويختلف عنه في اللبس العاري , ثم منع منه الرجال إلا العريس فقط , ثم انزوي لداخل البيوت بعد ان كان خارجها , ثم صار بعد ان ينفض سامر الحفل الليلي
والآن يخضع لرأي العروسين
رقيص العروس بشكله السابق انتهي ومحاكمته بقيم اليوم فيه كثير من التجني ,, فقديما كانت لا تلبس الفتاة سوي الرحط كأسكيرت والمعروف ان الرحط عبارة عن سيور من الجلد فقط , ويكون من سرتها حتي اعلاه عاريا
انا كشخص عادي ضد ما حدث فهو مصنفا عندي استعمار ثقافي دون هتاف او ديماجوجية
مع اكيد الود يا صاحب
|
Post: #34
Title: Re: جلد عريس في ليلة فرحه بسبب رقيصه سلو مع عروسه
Author: محمد حيدر المشرف
Date: 02-15-2014, 11:16 AM
Parent: #31
لاسفل ..
|
Post: #32
Title: Re: جلد عريس في ليلة فرحه بسبب رقيصه سلو مع عروسه
Author: محمد الكامل عبد الحليم
Date: 02-15-2014, 07:48 AM
Parent: #30
تحية
اتفق معك اخي المشرف فيما يتعلق باشهار سيف يعبرعن ذهنية لا تعرف الحياد او الراي الاخر مثل الذي اشرت لكننا اما مشهد وثقافة مجتمعية لا تصتصحب بالضرورة الدين في سياقها التحليلي انما ترتبط بحيثيات التعايش والتعامل مع الاخرين وفق منظومة ثقافية معينة في زمن ووقت او مناسبة معينة.
يعني ما ظهر جليا انه خادش للحياء تعامل معه بعض الناس بما يعوض الحياء المخدوش..
لا اخفي حزني ببداية حياة زوجية مقترنة بالسوط او العكاز او العلقة الساخنة.
للمتداخلين احترامي الكيدكيد
|
Post: #33
Title: Re: جلد عريس في ليلة فرحه بسبب رقيصه سلو مع عروسه
Author: حمد اسماعيل
Date: 02-15-2014, 08:33 AM
Parent: #32
الحاصل الآن انه قطع الرحط بيعملوه جوه البيت أو الصاله مافى رجال طبعا زمان كان وزير العريس هو البكون حاضر لاكين انا خايف بعد شويه العريس ذاتو ما يحضر قطع الرحط
بعدين من الجرتق الفيهو العريس ببخ عروسته باللبن لغاية قطع الرحط مصور الفيديو بتكون بت ما راجل
بعدين اهل العروس بكونو واقفين فى خشم الباب كان صاله ولا صيوان
انا خايف شويه كده يصورو ليك الفيدو بتاع الحاجات دى كلها حتى تستلم العروس
|
Post: #35
Title: Re: جلد عريس في ليلة فرحه بسبب رقيصه سلو مع عروسه
Author: محمد حيدر المشرف
Date: 02-15-2014, 11:26 AM
Parent: #33
ابا سن يا صديقي العزيز ..
أعجبتني الاشارة لقانون النفي الدياكتيكي وهناك الكثير من الملاحظات الممكنة جدا عليه ولكن فلنبقى في اطاره ..
اولا كانت هناك وما زالت تدخلات سلطوية/دينية سافرة جدا وتملك ادواتها ومن ثم فاعليتها وبصورة قاهرة في المجتمع, عملت على خلق مرجعيات مختلفه (وهابية في جوهرها) للسلوك الاجتماعي السوداني وتجلياته المختلفة في مظاهر اجتماعية عديدة .. تم ذلك ولسخرية الاقدار تحت دعاوى "التاصيل", تصور !!
النفي الدياكتيكي يفترض مناخات حقيقية للاشياء دونما تدخلات سافرة من السلطة .. ذلك انه يخاطب طبيعة الاشياء يا عزيزي .. وفي الواقع فان الامر في جوهره ليس نفيا محضا وانما عمليات تشذيب مستمر للسلوك او الظاهرة الاجتماعية بمرجعيات أخلاقية بالضرورة تضمن بقاء الجوهر الايجابي للظاهرة خلال عملية التطور المجتمعي ..
هذا لم يحدث بهذه الصورة .. تعرض المجتمع السوداني لزلزال سلطوي حاول هدم السيرورات الماشة في المجتمع السودان واستبدالها بسيرورات جديدة وبمرجعيات مختلفة والتفاف كبير جدا على التاريخ السوداني ..
لذلك ترافقت المراحل التي ذكرتها .. وأعني مراحل انكماش ظاهرة رقيص العروس .. مع الكورس التاريخي للسلطة الدينية الحاكمة في السودان .. ذات الكورس الذي دعا احدهم واعتقد انه الطيب مصطفى عمل ستارة اسلامية على ساقين الممثلات المصريات في المسلسلات التلفزيونية .. تصور انو منع بث مشاهد لسيقان الأيائل والغزلان كما أتذكر للايحائية الجنسية العالية والكامنة فيها كما يراها !!.. في أجواء كهذه يكون من الطبيعي ان تدخل الأسر سيقان بناتهم تحت الركبة لبيت الطاعة الدينية وتسدل عليهم النقاب.. اليس كذلك ؟!!
الحشمة حالة نفسية مرتبطة بالوعي السائد كما تعلم .. كان التوب السوداني عنوانا لها .. وكان الفستان الواسع الذي يغطي الركبة وبمصاحبة الطرحه عنوانا آخر لها.. بل وكان ما دون ذلك مسموحا به في داخل الحيشان والبيوت في نطاق العائلة الكبيرة والممتدة .. وهكذا - وعلى القياس او التداعي - كان رقيص العروس ابرازا لمفاتن مستورة أخلاقيا في مجتمع تطورت اكوادو الاجتماعية تطورا طبيعيا على مر التأريخ لتستوعب هذه الجمالية الفائقة في مناسبات العرس والفرح ..
باستجلاب السلطة لمرجعية الوهابيين فارق الوعي السوداني مرجعاياته وتشكلت عندنا المفاهيم بصورة مختلفة بحيث تبدو العباءة السوداء الآن مظهرا يثير اطمئنان "الرجل" فينا لحشمة وعفة مجتمعه .. يطمئن ويزهو كمان وهو يعلم تمام العلم سهولة خلع العباءة في أقرب ملف جنسي بأسرع ما تخلع الأخلاق بكثير.. ذلك لا يهم .. ففي الحجاب والعباءة طمأنينة ذكورية راهنة بفعل الوعي السائد .. بفعل التأصيل .. شفت المفارقات ؟!!
الجنس ظل هاجسا وما زال للمجتمعات الذكورية .. فما بالك بمجتمعات محشوة لى ود عينها بالهراء السلطوي وهذا الاستلاب الديني ؟!!
كيف العريس يرقص اسلوووو مع بتنا قدامنا ؟!
يا للفضيحة ؟!!!!
مودتي التي تعلم ..
|
Post: #37
Title: Re: جلد عريس في ليلة فرحه بسبب رقيصه سلو مع عروسه
Author: الرفاعي عبدالعاطي حجر
Date: 02-15-2014, 11:44 AM
Parent: #35
الحمد لله يعني ما ضربوه ناس رابطة كسلا , تمام ههههههههههه
عزيز اشرف الرحال تحياتي ,,,
اهو لسه في ناس غيورين وبخير يرقص اسلو ليه ؟؟؟ ما يرقص
كمبلا واللا أي رقصة او عرضة اسلو عديل كده . لو صبر شوية كان رقص
اسلو في الغرفة واستمتع كمان اسلو لي لحد ما يبان له صاحب .
....................................................................حجر.
|
Post: #42
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-15-2014, 09:29 PM
Parent: #37
Quote: الحمد لله يعني ما ضربوه ناس رابطة كسلا , تمام ههههههههههه
عزيز اشرف الرحال تحياتي ,,,
اهو لسه في ناس غيورين وبخير يرقص اسلو ليه ؟؟؟ ما يرقص
كمبلا واللا أي رقصة او عرضة اسلو عديل كده . لو صبر شوية كان رقص
اسلو في الغرفة واستمتع كمان اسلو لي لحد ما يبان له صاحب .
....................................................................حجر. |
الضرب عليها حراااااام لموتها لحين تعديل امر الجالية
والله يا حجر يظهر المشكلة ما في الاسلو دانس يظهر الحكاية اعمق من كده
انا شخصيا رقصت الرقصة دي في زمن الشباب وفي الخرطوم في عهد الديمقراطية التي سرقها الكيزان
آخر اجازة لي في السودان حضرت 4 مناسبات عادي وفي اربعة قاعات الاسلو مدور صاح والتورتة بالشوكة تأكله ويأكلها وكمان فستان الزفاف عاري وفي الظهر العروس مكتوب اسم العريس
لكن عريسنا دا يظهر عمل حاجة غير مالوفة
مودتي
الرحــال
|
Post: #36
Title: Re: جلد عريس في ليلة فرحه بسبب رقيصه سلو مع عروسه
Author: محمد حيدر المشرف
Date: 02-15-2014, 11:43 AM
Parent: #32
نعم يا عزيزي الكامل ..
هذه بداية مؤسفة جدا للحياة الزوجية .. وأشعر ازاءها بالكثير من الأسى ..
تقول:
Quote: انما ترتبط بحيثيات التعايش والتعامل مع الاخرين وفق منظومة ثقافية معينة في زمن ووقت او مناسبة معينة.
|
فلنوضح امرا جوهريا هنا ..
انا لست اتفق أو أختلف مع سلوك العريس .. او أتفق او أختلف مع ظاهرة الاسلووو دانس ..
انا أتكلم عن الزيف الكامن في خطاب الذين يتشدقون بالعادات والتقاليد وهم يمثلون ذات الاتجاه الفكري الذي زلزل الكثير من القيم الايجابية في عاداتنا وتقاليدنا ..
اقبل تماما ان يأتي احدهم لينتقد هذه الظاهرة من مرجعيته الوهابية ولكن ..
ما يجينا من مدخل العادات والتقاليد ليكرس ذات الالتفاف الكبير الذي قامت به سلطة الهوس والديني في السودان باستجلاب نسخة مزورة لاصالتنا الانسانية "السودانوية" ودمغ مجتمعاتنا بها .. بحيث تصبح عادات وتقاليد المجتمعات الوهابية هي عين عاداتنا وتقاليدنا .. وبذلك يتحقق الاندغام الذي نادى به صاحب الوثبة :)
صلة المسألة بموضوع رقيص العروس صلة تداعي وقياس كما ذكرا لابي سن ..
اظهار مفاتن وقيمة جمالية مستورة أخلاقيا ليس فيها ما يعيب أخلاقيا هناك ..
كان من الممكن جدا ان تتطور بصورة طبيعية لرقصة مشتركة فيها الكثير من الحميمية وتجسيد ممكن جدا للسكينة والمودة "سلوووو" ..
اقول كان من الممكن جدا وفق مرجعية العادات والتقاليد ..
من الممكن ؟!!!
لست أدري !!
مودتي
|
Post: #38
Title: Re: جلد عريس في ليلة فرحه بسبب رقيصه سلو مع عروسه
Author: عبدالحفيظ ابوسن
Date: 02-15-2014, 11:56 AM
Parent: #36
ود المشرف يا صاحب
اتفق معك ولو لاحظت قلت في ردي اعلاه دون تدخل سلطوي او نحو ذلك
هل خطر بذهننا ان ما يحدث من انفصام سلوكي عن التراث هو مقاومة مشوهة لما تحاول السلطة فرضه من تزكية المجتمع كما يقولون
هو رفض ورفض دون وعي
لحركة المجتمع في سيرورتها قانونا عنيدا , قانونا اجتماعيا صارما ,, ينمو المجتمع وفق شروط محددة محاولة التدخل ستنتج مسخا مشوها وهجينا لا اب له
يحدث يوميا تكسير للتراث بغباء سياسي وضيق افق ونظرة آحادية منكفئة علي ذاتها , لا تري ابعد من ارنية انفها
كما كنت اكرر بدأ تشويهنا منذ ان صار العساكر يصادرون سكين الضراع والعصاة ويتفرسون في الوجوة ويطالبوننا ان نحمل قسيمة عقدنا في حلنا وترحالنا
تعرف يا صاحب ثمن التوب يقارب المليون فأضطرت النساء للبس العباية
اكيد المحبة
|
Post: #39
Title: Re: جلد عريس في ليلة فرحه بسبب رقيصه سلو مع عروسه
Author: عثمان الأمام
Date: 02-15-2014, 12:11 PM
Parent: #38
ما أظن السبب رقيص الأسلو لأنو تقريبا" بقى عادة شبه ثابتة فى الأعراس التى تقام فى الصالات مع الزفة الغربية أو العربية وتقسيم التورته
البتباكو على العادات والتقاليد مافى مشكلة خليكم فى رقيص العروس وقطع الرحط وخلو ديل فى الأسلو مع إنو مافى أى مقارنة بين الأتنين
من ناحية المظهر والرجولة المدعاة!!
|
Post: #40
Title: Re: جلد عريس في ليلة فرحه بسبب رقيصه سلو مع عروسه
Author: محمد حيدر المشرف
Date: 02-15-2014, 12:13 PM
Parent: #38
| Quote: عرف يا صاحب ثمن التوب يقارب المليون فأضطرت النساء للبس العباية |
تدمير الاقتصاد السوداني يتجلى بصور عديدة في حياة الناس وفي سلوكهم ..
بحيث عدنا هنا لا نصنع ما نلبس من نسيج بلادنا .. وبالتالي ترتدي النساء عباءات سوداء مستوردة لاسعارها الزهيدة ..
..
موش كان في نشيد يدعو اهل السودان ان يلبسوا مما يصنعوا ؟!!
لو استجبنا لهذه الدعوة لانطلقنا عرايا في شوارع الخرطوم ( وش ضاحك او حزين .. وااااحد)
|
Post: #41
Title: Re: جلد عريس في ليلة فرحه بسبب رقيصه سلو مع عروسه
Author: عبداللطيف شريف على
Date: 02-15-2014, 12:45 PM
Parent: #38
ايام انا كنت عريس ذكريات ...
تبقى فى الوجدان (:كسلا اشرقت بها شمس وجدى فهى بالحق جنة الاشراق...)
العريس ده ذكرياته مهببه والتسوى بايدك يغلب اجاويدك .....
هههههههههههههههههههههههههه
بداية غير موفقه لعلاقة نسب كانت مرجوه ...
|
Post: #43
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-15-2014, 09:39 PM
Parent: #41
| Quote: يا جماعة ما تستعجلوا يمكن العريس جعلي والناس حبت تحافظ على التقاليد |
الاخ/ الصادق اسماعيل ،،، تحياتي
الناس ديل منو ؟؟
مودتي
الرحــال
|
Post: #44
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-15-2014, 09:43 PM
Parent: #43
| Quote: صادق يا الصادق ؟ هههههههه |
الاخ/ صديق الغالي ،، تحياتي
هل المحافظة على تقاليد البلد وعاداتها حصريا على الجعليين ؟؟
مودتي
الرحــال
|
Post: #45
Title: Re: جلد عريس في ليلة فرحه بسبب رقيصه سلو مع عروسه
Author: منتصر عبد الباسط
Date: 02-15-2014, 09:59 PM
Parent: #44
Quote: الواحد يجيك في مشهد زي ده ويقعد يستصرخ اخلاق الناس وعاداتهم وتقاليدهم ..
ولما نجي نطبق ذات العادات والتقاليد سيصف الناس بالجاهلية ومفارقة الدين ..
|
يا أخوي ما تلخبت علينا الأوراق
كل واحد بي دربو
من حق أي إنسان ينتقد من الوجه الذي يراه
هناك من ينتقد من منطلق التمسك بثوابت ثقافتنا
وهناك من ينتقد من منطلق ثوابت الدين
وأنا في إعتقادي لا تعارض وفي ذات الحال لا تطابق
ولا عيب على هذا ولا ذاك..
يجوز لنا ونحن متمسكون بثقافتنا أن نسقط بعض العادات
إن رأينا تركها لتعارضها مع الدين أو غيره كل حسب ما يراه
نأخذ وندع كما نشاء من تراثنا وعاداتنا ونطور على أساسها ولا مشاحة .
ولكن العيب هو الأخذ من ثقافة الآخرين على حساب ثقافتنا.
|
Post: #46
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-16-2014, 07:03 AM
Parent: #45
Quote:
مما آثار حفيظة نفوس النسابة ....
وعينك ما تشوف الا النور |
تصل لمرحلة يجلد امام الماعزيم حتى لو المشهد اثار حفيظتهم
اليس هنالك طريقة اخرى غير ان يجلد ويضرب ويهان امام الحضور
وبعدين الحاجات دي الان اصبحت يدو فيها تمارين قبل ليلة الفرح وبفلوس كمان
غايتو شخصيا انا معترض على جلد العريس
مودتي
الرحال
|
Post: #47
Title: Re: جلد عريس في ليلة فرحه بسبب رقيصه سلو مع عروسه
Author: Saifelyazal Elmaki
Date: 02-16-2014, 08:18 AM
Parent: #46
حبيبنا الرحال سلامات ياخي
Quote: تصل لمرحلة يجلد امام الماعزيم حتى لو المشهد اثار حفيظتهم
اليس هنالك طريقة اخرى غير ان يجلد ويضرب ويهان امام الحضور
وبعدين الحاجات دي الان اصبحت يدو فيها تمارين قبل ليلة الفرح وبفلوس كمان
غايتو شخصيا انا معترض على جلد العريس
|
يا اشرف يا خوي السودان ده فيهو عادات وتقاليد في ناس لس متمسكة بيها
حكاية كورس و دروس خصوصية دي ما بتنفع في ناس ما بتحملوا منظر الاسلو دانس
ياخي في قبائل سمعت في قبائل البني عامر لو سألت واحد من زوجتو ولا امو ولا اختو كيف احوالا
بطعنك عدييييييييييل الناس مفروض تحترم عادات وتقاليد بعض سلوك الخرطوم بختلف من الاقاليم
التنظير الكتير ما منو فائدة
|
Post: #48
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-16-2014, 08:58 AM
Parent: #47
Quote:
ياخي في قبائل سمعت في قبائل البني عامر لو سألت واحد من زوجتو ولا امو ولا اختو كيف احوالا
بطعنك عدييييييييييل الناس مفروض تحترم عادات وتقاليد بعض سلوك الخرطوم بختلف من الاقاليم
التنظير الكتير ما منو فائدة |
يا سيف يا اخوي الحادثة دي في الخرطوم كرش الفيل لو كانت في كسلا مسقط راسي كانت مقبولة والله لكن الخرطوم دي عرفت السلو دانس قبل البيتزا والهوت دوق
هنالك قبائل في مناطقها محافظة على عاداتها وتقاليدها ولكن في المدن الكبيرة طغت المدنية واحتكاكات الثقافات على هذا الارث
انظر الان لنمط الحياة المجتمع مقارنة بالماضي تجد ان هنالك حواجز كثيرة اتهدت حتى على مستوى المجتمعات الريفية
شكل النظام القبلي برضو ما زي زمان والان السجل المدني وشهادة الميلاد لازم تذكر اسم امك بالطريقة دي اكيد كل يوم سيموت ضابط تحري
عكســـة :- التنظير جزء من الموروث والعادات والتقاليد في البلد دي
مودتي
الرحــال
|
Post: #49
Title: Re: جلد عريس في ليلة فرحه بسبب رقيصه سلو مع عروسه
Author: محمد أبوالعزائم أبوالريش
Date: 02-16-2014, 09:04 AM
Parent: #48
Quote: انا شخصيا رقصت الرقصة دي في زمن الشباب وفي الخرطوم في عهد الديمقراطية التي سرقها الكيزان
آخر اجازة لي في السودان حضرت 4 مناسبات عادي وفي اربعة قاعات الاسلو مدور صاح والتورتة بالشوكة تأكله ويأكلها وكمان فستان الزفاف عاري وفي الظهر العروس مكتوب اسم العريس
لكن عريسنا دا يظهر عمل حاجة غير مالوفة |
يا الرحال ياخوي، حاجة ما مألوفة شنو ....... النفوس الوسـخانة ..... النفوس هي الما مألوفة.
|
Post: #50
Title: Re: جلد عريس في ليلة فرحه بسبب رقيصه سلو مع عروسه
Author: محمد حيدر المشرف
Date: 02-16-2014, 10:45 AM
Parent: #1
Quote: يا أخوي ما تلخبت علينا الأوراق
كل واحد بي دربو
من حق أي إنسان ينتقد من الوجه الذي يراه
هناك من ينتقد من منطلق التمسك بثوابت ثقافتنا
وهناك من ينتقد من منطلق ثوابت الدين
|
يا اخوي مافي عوجه تب ..
وكلامك ده انا موافق عليهو تماما ...
واوردتو في كلامي أكتر من مرة كمان ..
شكرا جزيلا على اية حال ..
|
Post: #51
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-16-2014, 11:18 AM
Parent: #50
| Quote: بداية غير موفقه لعلاقة نسب كانت مرجوه .. |
عبد اللطيف شريف ،،، تحياتي
نعم وكان بالامكان تصرف افضل من كده بكثير ما حصل مهما كان يعتبر نوع من الهمجية والبربرية وسوء التصرف وكان ممكن معالجة الامر في بدايته لحظة ما بدأت الامور تسير عكس اتجاه هؤلاء النسابة
مودتي
الرحــال
|
Post: #52
Title: Re: جلد عريس في ليلة فرحه بسبب رقيصه سلو مع عروسه
Author: محمد جمعه الخير
Date: 02-16-2014, 11:25 AM
Parent: #50
حقيقة ان الزفة والكوشة والفنان يتفق عليها الزوجان قبل فترة طويلة والبعض يصل لدرجة ادراج صور الخطوبة والتخرج ولحظات جميلة اخري .
طيب البخلي اخوان العروس يجلدو العريس وما يضبحو العروس شنو ( اذا كان عار وحاجة غلط مفروض يشوفو بتهم الراضية دي ) .
في النهاية اتركوها فانها نتنة .
الرحال ماشفتك شمت في طيران مريخنا
|
Post: #53
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-16-2014, 01:12 PM
Parent: #52
Quote:
حقيقة ان الزفة والكوشة والفنان يتفق عليها الزوجان قبل فترة طويلة والبعض يصل لدرجة ادراج صور الخطوبة والتخرج ولحظات جميلة اخري .
|
اوووووووووووو الصفوة العالمي عزيزنا محمد جمعة ،،، تحياتي
والله اوردت كلامك ده في احدى التعقيبات ان ما يجري في القاعة ليلة الفرح هو اصلا متفق عليه سابقا وممكن يكونوا اخذوا تدريب عليه
Quote:
الرحال ماشفتك شمت في طيران مريخنا |
جلد الميت حراااااااااام 
مودتي
الرحال
|
Post: #54
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-17-2014, 07:17 AM
Parent: #53
Quote: والله مساخر
والله مهازل
بوس عديل كده قدام الناس ?
ياخ غايتو نحن ناس خلا ساكت , حرم ام عيالك قدام الناس في العنقريب ما تقعد جمبك لو رعفت |
عبدالحفيظ اب سن ،، تحياتي
المسخرة والمهزلة يوميا نشاهدها تمشي في شوارع الخرطوم وفي حدائقها ومنتزهاتها كل الناس اتنين اتنين في مشهد اقرب لمشهد العريس الذس جلد بحلاله عكس هؤلاء المتجدعين بالحرام لا رقيب عليهم و لا سائل وصل لمرحلة انو الشئ ده اصبح عادي ، ان كان هذا هو الحال الشارع العام فكيف لمثل هذه المناظر التي توحي الى ان هنالك بوس نازل لا محال
| Quote: ياخ غايتو نحن ناس خلا ساكت , حرم ام عيالك قدام الناس في العنقريب ما تقعد جمبك لو رعفت |
التغيرات يا ود اب سن طرأت حتى على مجتمعات ناس الخلا وما كان سابقا يعتبر خط احمر اصبح الان خطا اخضر بفعل تكنلوجيا التي دخلت البيوت غصبا عن هذه المجتمعات المحافظة
زمان حبوبتي الله يرحمها ويغفر لها ويحسن مثواها من شدة احترام زوج بنتها لا تأكل معه وكمان بنتها لا تكشف راسها امام زوجها هسي عليك الله يا ود اب سن الحبوبات البدخلن الواتساب والعندهن حساب في الفيس بوك يعملن عمل حبوباتهن وامهاتهن زمان
مرة في احدى مسوحاتنا في بداية التسعينيات مررنا على قرية وعند الساعة الثامنة مساءا اصبحت شوارعها خالية تماما تعرف ليه ؟؟؟ عشان المسلسل المصري ، زي ده ما بتدخل نمط سلوكي آخر على هذه المجتمعات
مودتي
الرحــال
|
Post: #55
Title: Re: جلد عريس في ليلة فرحه بسبب رقيصه سلو مع عروسه
Author: أشرف الرحال
Date: 02-17-2014, 01:07 PM
Parent: #54
| Quote: يا الرحال ياخوي، حاجة ما مألوفة شنو ....... النفوس الوسـخانة ..... النفوس هي الما مألوفة |
الاستاذ/ابو العزائم ،،، تحياتي
صدقت ، صدقت ، صدقت
مودتي
الرحـــال
|
|