مواطنين زواجل

والزاجل هو الذي يعرف مقصده ووظيفته
ويعرف مرماه فيرمي دون أن يخيب سهمه
وهو عند الفرس قائد العسكر
عسكر محاربة الغموض ودس الكلام فى الكلام
عسكر الحقيقة البسيطة
عسكر الوضوح والصراحة المفضية للهدف دون تزويغ أو تزويق

هؤلاء المواطنين يمكن أن أكون أنا وأنت وآخرين...

فتكلم بما في نفسك دون أن تأبه للبديع والمحسنات والبلاغة..
فكرة للفضفضة إن لم تكن لشئ أسمى
فالفضفضة في حد ذاتها أصبح لها كليات وتخصصات وأخصائيين بل وممارستها أصبحت مكلفة حد العوز وأحيانا قد تودي بصاحبها الى السجن أو القتل!

ياسودان
فيك ملايين المواطنين
وحفنة من الساسة
والساسة في قرارة أنفسهم وغرارتها يظنون أنهم صنف آخر فوق التصنيف الوطني..

السياسي عندنا هو ذاك الشخص الذي يعرف مايصلح ملايين المواطنين ومايضرهم ويستطيع أن يجرد الوطن من معناه البسيط ويجعل مصلحة الوطن هي العليا..
السياسي يستطيع أن يصنف المواطنين لدرجات من الممتاز مرورا بالجيد وحتى المواطن الطالح..

دا كلو كلام..
والمواطن عندو كلام..
لو ادوه الحرية يقولوا زي ماعايز ودون أن يخشى الضحكات المكتومة ممكن يكون أقوى وأفيد كلام يسمعه الناس..
لكن لو أجبروه ضمنيا لتفادي السخرية أن يسوره بالبديع والمحسنات سيكتفي ببناء سور مخلع بداخله أرضا بلقع..

طيب كويس..
وطن..
شنو يعني؟
أرض..
أرض لافه ومتلفحا بسماء
لافة عشان تمسي وتصبح..
ولافة عشان تنقلنا من سنة لعام ومن عام لسنة
وناس راكبين فوق ضهرا وماشين لحدي ماتحين لحظة الوداع
الواحد يسافر فيها يقول مع السلامة وفيها مايقدر على قولتا..

الناس في سفرهم عايزين ياكلوا ويشربوا ويستمتعوافى أمن وأمان..
يقوموا يقعدوا ويعملوا عقد بيناتن وعهد على هذه المعيشة والبتعدى العهد والعقد يبقى خاين..
موش خاين للوطن.. لا
خاين للمواطنين الاتفق معهم..
يقوموا الناس يجتمعوا على عدد من الناس من ضمنهم يتولوا أمر قيادتهم وخدمتهم
بناءا على بنود العقد وحفاظا على ذاك العهد..
الناس ديل زاتن مطالبين بالالتزام بما التزم به الجميع..

بعد شوية الناس شبعت وروت واطمأنت, قامت فكرت في حاجات تانية
العلاج
التعليم
التوظيف..
وسموا الناس القبيل ديلاك بالحكومة..
والحكومة عشان تأدي عملها تتقسم
وعشان تتقسم العقد القبيل يتطور
ويسموه أي حاجة..
طيب سموه دستور
على بركة الله
وعشان نكون كلنا متساوين
سوينا جهة تحكم بيناتنا
سموها القضاء
وعشان نعرف الحكومة بتسوي في شنو
سوينا الصحافة
تجيب لينا فعايل وكلام الحكومة زي ماهو
لازيادة لا نقصان..

الكلام دا صعب؟
ماصعب ولامعقد ولا عايز درجات علمية عشان يتفهم..
الدرجات العلمية دي بقت ضرورة عشان تفك شفرة الساسة البتعاملوا بيها مع بعض دون أن يفهمها كل الناس..
والساسة عملوا شفرة عشان ياخدوا راحتن فيما يفعلون بالمواطن..

طيب نمشي خطوة لقدام...

لو البلد فيها 30 مليون مثلا
بالكتير بالكتير يكون فيهم مليون ساسة ومتسيسين وتابعين للساسة
الباقين ناس زيي وزيك
مواطنين
عايزين يعيشوا
ويتعالجوا
ويتعلموا
ويتوظفوا
لي جنا جناهم..

ال29 مليون ديل بهمهم في الحكومة قدرتها على انجاز هذه المتطلبات..
الحكومة تلقاها من المليون بتاع الجماعة السوبر مواطنين اتصفت على ألف مثلا..
باقي المليون يتوزعوا
واحدين مع الحكومة
وواحدين ضدها
الحكومة لو جات بالتراضي
أمرها بكون ساهل مع الناس الضدها
ولو جات بنط الحيط
أمرها بكون صعب بلحيل مع الضدها

الضدها طبعا بيعرفوا كل شيئ
العايزنوا ال29 مليون والماعايزنوا
والبنفع مع ال29 مليون والمابنفع معاهم
وكمان بيعرفوا الشفرة فى الكلام البتخلي ال29 مليون راسن يلف ويدوشوا
واحتمال يطرشوا عووووع من الدوخة..
والحكومة زاتا بتعرف المشفر ومغطى..

الجماعة ديل السوبر مواطنين من الجهتين بيخلقوا تشويش يخلي ال29 مليون ماشين دايخين وناسين هم عايزين شنو..
وفي النهاية يستسلموا ويدوهم ايديهن ويقودوهن ناس السوبر الى حيث يريدون..
أها السوبر ديل عايزين مصلحة ال29 مليون؟
الله أعلم
لكن الواقع بقول لا
عايزين الحاجة البفتكروا أنها مصلحة ال29 مليون..
في ال29 مليون فى ناس قريعتي راحت زيى كدا وزيك
وفي الشيوخ والعمد والطرق الصوفية والصحفيين والمتعلمين
السوبر عندهم لكل واحد صرفة يستميلوه بيها
وكلوا زول يستميلوه حسب عدد الأنفار الببيعن للسوبر..

دا كلو كلام ضرب مثل في الشي الحاصل..

لكن كدي تعال للواقع

فلان من الساسة زعلان من الحكومة
اتفق مع فلان وقالوا نقاوم الحكومة بالقوة
جروا وجونا ناس نحنا وانتو
ونحنا اتحمشنا وشلنا السلاح وحاربنا
الحكومة ردمتنا وفقدنا كل حاجة
والحكومة فترت
وقالت تراضي الساسة السايقننا قبيل
الحكومة عندها طريقين
يا إما الحل يكون أساسه تعويض المواطنين الدمرتن
أو تعويض الساسة مافقدوه
طبعا تعويض المواطنين مكلف
وإرضاء الساسة أقل تكلفة ومباشر في اسكات السلاح
والساسة زاتن عايزين الحل البرضيهن

فيجتمعوا تحت تحت وكل زول يدوه نصيبوا
والكلام دا يدهنوه بانجازات اعلامية يحملها السياسي الكان زعلان للمواطن الخربان..
والمواطن يرضى والحاري أخير من المتعشي!!

قول كدا الدنيا دي انقلبت والساسة ذابوا فوق صفيح ساخن وذابت معاهم كل الحاجات العندها أسماء فخيمة( الدستور, البرلمان, الشفافية...)
وفضلوا المواطنين الزيي وزيك
وماعندهم طريقة غير يمشوا أمورن لاسيما أن العالم حولهم هو هو..
قعدنا قلنا نبدا
فجأة ظهروا نفرين من الجماعة الساسة الزمان أتاريهم كانوا برة البلد ولم يشملهم ماأصاب غيرهم,
الاتنين ديل واحد كان حكومة والتاني معارضة
وقالوا كدا استلمونا
الدستور دا أهم حاجة
واحد قال اسلامي
التاني قال علماني
نحنا قلنا ياناس كدي اقيفوا شوية
اكان اسلامي أو علماني الفرق شنو؟
الشي دا نحنا عايزنوا عقد بيناتنا
قول مثلا العدل بين الناس, شنو الاختلاف فيه بين علماني واسلامي ومسيحي؟
عندنا محصول عايزين نقسموا حسب مجهود كل مواطن
ومن نصيب كل مواطن ناخد نسبة نقضي بيها احتياجاتنا العامة
قول مثلا اسلامي
الاسلام ماقال الأقربون أولى بالمعروف
أها عاد بتقول اسلامي وتقطع صلة الدم والرحم وتطرد ناس الجنوب وتكتل ناس الغرب
وتحاحي لمصر والسعودية وقطر وإيران؟

قول مثلا سياستنا الخارجية عايزا تستمد من الشريعة الاسلامية
الشريعة بتقول صلة الرحم
فبين تشاد وافريقيا الوسطى ودارفور في صلة رحم
وبين الشرق واثيوبيا وارتريا في صلة رحم
وبين مصر والنوبة في صلة رحم
وبيننا وبين الجنوب في نسب ودم وعيش وملح وتاريخ

قول سياسة خارجية مبنية على المصالح
عندك تنزانيا وبورندي ويوغندا ديل قاعدين على منبع الموية
وبغادي اثيوبيا قاعدة على منبع تاني
بدل نعمل معاهم اتحاد النيل
نجري تحت كرعين مصر لحدي مابقينا عندهم تابعين لمصر بدون راي مستقل بنا؟

حتى مصر دي الطمعانا في أرضنا ومتغالطين فيها
نحنا ديل كمواطنين عندنا راي في حلها

نقول كدا نقعد مع المصريين بعد ماتكون عندنا علاقات متينة مع يوغندا واثيوبيا..
تعالوا يا مصريين
بدل نقعد نتغالط في حلايب وتبعيتها إدارية أو أرضية لمين
خلونا نجي دغري
نحنا حلايب عندنا فيها ناس وتراث وتاريخ وانتوا جارين وراها عشان ثروتها..
مافي مشكلة انتو اخوانا وبرضكم محتاجين
خلونا نرجع لورا
ونمشي السد العالي
ونشوف التراث والتاريخ والأرض الضحينا بيها من أجل عيونكم وشعبنا الشردناه
وأي حاجة ينتجها السد العالي من هنا وغادي تنقسم بيناتنا حسب مساهمتنا,
الفات ما ساعلنكم منو
وكمان حلايب تعالوا نترك أهلها فيها بجنسية مزدوجة وأي ثروة تطلع منها بتقاسما بالنص..
وبعد دا عدانا العيب لو قلتوا لا ووقفنا ضد مصالحكم في مياه النيل!
وبس..

تعال يازول الحكومة القلتا جيت من بره وعايز تدوشنا تاني بالشعارات الاسلامية..
وقول انت زول صادق ومازي ناسك الهلكوا
طيب يامؤمن
اسرائيل دي لو احتلت كل فلسطين ومعاها القدس انت كسودان بتضرر بشنو؟
ماتفهمني غلط
جاييك في النضم
آي اسرائيل ظالمة ومغتصبة لأرض الغير بدون حق
ونحنا سياستنا ثااابتة ضد الظلم والظالم
يعني اسرائيل مابنديها وش
وبرضو ما بنحاربا عشان ربنا أدانا رخصة إذا كنا ضعيفين نستنكر بقلبنا
ونحنا سركنه مننا كمان بنمشي شوية ونستنكر بلسانا
بس مابنؤدي شعبنا الى التهلكة
ونباري ناس هنية ومشعل
عشان نروع ناس بورتسودان والكلاكلة
ومع كدا مرحب بكل فلسطيني
نديهم نسبة من المقاعد في جامعاتنا بعد مانوفر البكفينا ويزيد
ولو جعلنا بلدنا بلد اغتراب جاذب نديهم حق دخول استثنائي
ومانعمل أيتها نوع من العلاقات مع اسرائيل..

سمعنا أنكم بتتكلموا عن الامبريالية انت وزول العلمانية دا
نحنا الكلام الكبار مابنعرفوا
لكن بنعرف أن هذا العالم فيه كبار وصغار
والكبار عنهم مصالح
ونحنا عندنا مصالح فى الكبار
وبكدا بندي الكبار مصالحن وبناخد منهم مصالحنا
لا ضرر ولا ضرار يامتعلم يابتاع المشروع الحضاري.

شوف مثلا عندك إيران والسعودية
نعم دول قوية
والسعودية موفرا لينا وظائف لملايين وكذلك دول الخليج
لكن في نفس الوقت أكثر حاجة بتصدرها لينا السعودية فكر أسسه محمد بن عبد الوهاب..
وإيران بتصدر لينا فكر شيعي

وديل زي النار والغاز ونحنا بندخلهم بلدنا وبنفتح النار على الغاز دون أن يكون عندنا دفاع مدني فكري قوي يطفئ هذين الفكرين.

طول عمركم انتو الاتنين علماني واسلامي بتتحدثوا عن الوجدان العربي والاسلامي..
مافي مشكلة وجدان وجدان..
لكن الطفل وبفطرتو السليمة بيعرف كيف ينزلق من رحم أمه وقبل مايقطعوا الحبل السري بتلهم ثدي أمه ويتغذي, غذاء ومناعة طبيعية..
وبعدييين لما يبدا يميز الوجوه يشوف وجه أبوه واخوانو والناس التانين..

الرحم والأرض أفريقيا
والثدي النيل وأفرعه من فكتوريا وتانا وحتى ملتقاه عند فم العاصمة.

نحنا متصالحين مع العري الجسدي
ومسيطرين على الغرايز
ولابسين ثوب العفة قبل مانلبس ثوب الكتان..

المحتاجين يلبسوا الكتان قبل العفة هم الناس الذين ركبتهم غريزتهم في فلوات جرداء!

( مواطنين ) في عنوان بوستك دا موقعها شنو فى الإعراب ..:)
زواجل عرفناها ..

يا آمنة

أنا اهتميت بموقعها من الافارقة ماموقعها من الاعراب :)

*

*

مسالة انو مواطن ينتظر حفنة السياسيين ينجدوهو - دي اس البلاء
المواطن هو من يصنع الساسة الفراعين، وهو من يصنع الوثبة
كتير مر علي (مواطنين) ميتينهم طالع، والساسة مدخلنهم في وزة، وجاري وراء عربية مسؤول، ... ما يفلقوا بى طوبة؟!
هسا (المواطنين) ديل لو قالو: ما دايرييين معاكم ... طالبة: ما ما شين المدارس، اطباء: ما ماشين الشغل، سواقين: ما مدورين عرباتنا!!
المواطن وهم ساي !

ما دايرين ... ما دايرين

ياأيمن
هذا ذكي العود

ياذكي العود بالمطرقة الصماء والفأس تشظى
وبــنيــران لهــا الــف لسان قـــد تلـــظى
ضع على ضوئك في الناس اصطباراَ ومآثر
مثلما ضوع في الاهوال صبراَ آل ياسر

مرحب قرحطب
ود محكر الديوان
ثابت يا ابقلب تقابة للنيران