أمرق

امرق
معاك سيف بسمتك
حيلتك مراكب قسمتك
امرق وما تخلى بى وراك
كل اسرار مرقتك
زينتك حروفك ودهشتك
متلفحك حلمك وصبرك وقدرتك
كل الخلوق الرادتك
راجين معاك صوت الفتك
وكل امواج ضحكتك
ما تتلفت
ما تشوف وراك
الدنيا ما بتلقاها ابدا تشبهك
فتش معاك
كل الديون الفوقها اسرار غربتك
اكسى البنيات والغنويات
الحان مسيرتك وكربتك
ما تتلفت
ضعفك قفاك
ما تتلفت
سيرك بهاك
بى ياتو ايد ترسم ملامح قدرتك
وحلمك على باب الصبر
بى ياتو صوت
تصرخ
وصرخة فكرتك تهزم متاريس الذين تبرجو
وتحولو
وتكومو
فى كل شبر من عناوينك حصار
داسو الحقيقة
والحديقة والصور
دسو الازاهر والمطر
يا انت يا هذا الذى مرقة احساسيك برق
وامطار
رعودك نظرتك
ما بحملوك
ولا بحملو الصوت البيمرق من نداك ومرقتك
يا قوتك
يا قوة شموسك وصحوتك
يا غنوتك
وكتين تصابح قدرتك
ما تتلفت
ابدا وراك
ضعفك قفاك
القاعد لها
حزنك سكونك
مجاور ظنونك
تلاوز
وعاوز
تعرف البخونك
القاعد لها
امرق
صوتك مارق قبلك
انت النصيح
وصوت فصيح
ما بهزمك
صوت الصفيح
لانك مريح
معاك الريح
امرق وصيح
على القال بهزمك
سكونك بخونك
سكوتك قبيح
امرق
وما تعاين قفاك
شموسك تضوى المدينة
وتحميك ضراك
وكل الخلوق البتمرق وراك
تكورك معاك
وتحميك ضراك
وكل المراكب بتنعش مساك
صباحك معاك
عيونك معاك
وضحكك بيهزم صراخ الغبينة المدينة السؤال
امرق
وغنى وتعال
حيبقى المحال

رطبت قلبي
وحلقي
(أمرق)
رطبتهما تماماً
حتى خلتني بأيامِ النزق
وأني بعد
غراً
لا يرى إلا لؤلؤ الدروبِ
ولا تصادفه حُفر...


كتر خيرك والله يا شاب
وعمل متقن...


تحياتي، محبتي واحترامي

وانت ايضا رطبت لى اماكن فى الحضور نحتاجها كثيرا


نحن نمرق حيانا من بعض حاجاتنا

ومن بعض امنياتنا

ومن بعض اماكننا

نمرق دون ضجيج احيانا
واحيانا نصرخ فى وجوه العهر والوجوه المزيفة والثاقبون حضورنا بابر اعتقاداتهم


شكرا توقيعك الانيق

كثيرا ما يعطينى توقيع واحد كل البوصلة والاتجاه الصحيح