الزغرودة وبعض خستكات / بوست هايـــــــــــــف

العنوان صحيح

بوست هايـــــــــــــف ولكنها محاولات جادة لخروجي [ ارجو التركيز علي يا المتكلم !] من الضجر ومقاتلة روح الكآبة

زماااان كانو لامن يدوك بنج كامل بمنعوك الاكل والشراب , لامن تطلع هوا يا فوق يا تحت ,يقولو ليك لامن تتحرك المعدة والمصارين , بكونن مبنجات معاك وضاربات النوم
اها منع الاكل والشراب ديل متعبات وبالذات الشراب , في بلد تصل درجة حرارتو غليان الاعصاب , ومستشفيات تولد مرواحو ان وجدت السموم , وان وجدت المراوح تغيب الكهربا

عمك كبير العايلة دخلوهو عملية , وما شا الله تبارك الله , عملية بنج كامل ومافضل زول ما جا , الناس جو مخصوص يحضرو عملية فلان وهو زول ماقاعد يقصر , كراعو واصلة
ونحمد الله العملية نجحت وعمك البنج فك منو , والهضربة راحت
اها الجو سخن سخانة جد , وعمك عطش ولسانو نشف ومرق من حلقو , وقنب يهاتي داير الموية , الدكتور شرح لأهلو قصة ما يخرج من دبر و خشم
وصبحو راجينو
والناس داخله مارقه
اها الحاج ما قال شئ
النسوان خاشات مارقات والرجال بالشبابيك
وعمك اخلاقو ضايقة
ادوني موية ان شا الله النموت هسه
واولادو هاجرينو ما يقوم يلفح ليهو موية
والجو مكهرب بي هرجي عمك ,, والعنبر كلو قرون قرون
السباتات زول قاعد فيها مافي , الناس عيدان
أكان اسمعو ليك صوت زغرودة طويلة من جمب س سرير عمك ,, ولحقتها تاني واحدة
الناس انخلعت واندبكو علي الباب والبعيد عنا الشباك
اها ان شا الله اخير
ايويوووو خير تب
ابوي زرطـــــــــــــ

هههههههههه

دا زول ما مؤدب .. ولا نقول شنو!!


الله يجازي محنك يا ابو سن

شكيتكن لي حيا لا نام لا اكل الطعام...
غايتو،،،اها،،،بركه النكتبت السلامه
اها،،،نضحك بش.

مرحبا يا محمود
وحبابك
ههههههه
عدم ادبو شنو ياخ
الدكتور زاتو قال ليهم إلا يزرط , ده كلام دكاتره فوق قول تاني
عمك جرسة ومالزم الصبر
ات ما شفت الناس الكبار ديل لامن يتضايقو ,, ما بفرزو زول
عمك الدكاترة والممرضين يتضايرو منو , لو شاف فيهم واحد بلعن ابوهو وابو اهلو

Quote: اها ان شا الله اخير ايويوووو خير تب ابوي زرطـــــــــــــ

ههههههههههههههههههههههه

الله يسعد صباحك يا سمح ،،،، وعقبال ضرطة وضرطتين وناس حالا زين ،،، يمين ضرطة عمك دي كفيلة بالفرح هسي يجيبوا ليك مولود تكون هامي من حق السماية والرباية ،، يا حليل الزمن دااااااااااااك

مودة يا صاحب

عزيز يا صاحب
اضحك ياخ ههههه
لكن اضحك وتفكر
كدي عاين هسه كم زول قاعد يبشر ويزغرد لي زرطة ,,, واريتها زرطة ساي ,, زرطة بي رايشها
هههههه
فسوة مدنقر

حباب ود دفع الله
ازيك يا زول يا عديل
تعرف
صنع الله ابراهيم الكاتب المصري المبدع وصاحب الموقف الشهير مع مبارك , عندو كتاب اسمو
تلك الرائحة
وهو كاتب سياسي في الرواية والقصة دون هتافية , ودون ان تحس بمرمي السياسة دون تفكير
عنوان كتابة يعني به الزرطة
تواضعت الناس علي قول ذلك حين يشمون تلك الرائحة المنتنة
افففف الريحة دي من وين
كامل الود والمحبة التي تعرف ولا تعرف

ههههه
ليها حق تزغرد
ضيق ابوها جعلها لا تنظر لهذا الفعل من منظوره الاجتماعي ,, بل تلاشت قيمته تلك وبقي مايدل علي ان الامور ظبطت
فمرات بنحتاج لتلك الفعلة رغم عيبها السوداني , ولو جات بنزغرد ليها تب
العيب الزغرودة لامن تجي الزرطة كفعل مصاحب للرمرمة والسفح واللفح ,, العيب علي الزغراد ما الزارط ,,, فهو شعبان ورويان

هههههههه
اسعد الله اوقاتك ياودابسن
زي مابتسعدنا بي بوستاتك
الحلوة دي ربنا يديك الصحة
والعافية ..
الغريبة ياحبيب انا عملت عملية
الاسبوع القبل الفات لكن ماكان
معاي امراة تزغرد لي ههههههه
وبيني وبينك ماعارف الموضوع دا
حصل ولامحصل هههههه
تسلم

لايك يا جميل

مرحبا سليمان
وحبابك
كفارة ليك وباب الجرح فاتح ,,
انت متأكد بنج كامل ? لو كامل بتكون عملتها تب بدون شك
قالو لو اترعت [ تجشأت ] كفاية ,, والناس بعتبرو التجشؤ واطلاق الريح واحد , خروج هواء من البطن ,, فيقوم يسألك احد المتفيقهين
لماذا يبطل خروج الريح الوضؤ والصلاة ولا يبطلها التجشؤ رغم انهما واحد خروج هواء من البطن
كامل الود بتمنيات العلاج

بدر يا صاحب
ربنا يجبر بي خاطرك

ليست مجاملة أو جبر خاطر بقدر ما هي إعجاب بأسلوبك
وبوستاتك ذات الروح الخفيفة

فما قادر أفوت ليكم حاجة إنت وعزيز


تحياتي مثنى وثلاث ورباع

عمي مسخوت سختة شديدة
مرة راكبين عربية شلة كبيرة , ضكور واناتي ,, وكلنا اهل , وهو عم وخال وجد جميع الركاب بي السواق
اها قامو جابو سيرة زول
عمي نط وقال
الزول ده عندنا معاهو علاقة جنسية
الناس صنت ,, نعمنهم كلهم متعلمين وعارفين التعبير ده ما كويس
اها هو فهم الصنة دي نكران معلومتو
علي بالطلاق انا زاتي عندي معاهو علاقة جنسية ,وهو زاتو مابقدر يغالط
نط واحد بعد ما اتشدع
لكن يا عمي علاقة جنسية كيف قول كلام غير ده
لا طلق عندي معاهو علاقة جنسية
هو وذكر قييلتو و نحن زاتنا وذكر قبيلتو
ونحن الاتنين جنسنا واحد
ههههه
فصارت مثلا يطلق للمداعبة

ناس البلاغة قالو مايمنع معرفة المراد بالكلام قسمين
تعقيد لفظي
وتعقيد معنوي
وهن معروفات للجميع
وعمي فك الدرب علا جا راجع
اها بالرجع زولنا ده شنو

واحدن لينا كدة عامل بصير ,,, ومتخصص في مرض واحد وهو امبروفي [ ابوعديلات او البف بالانجليزي ]
اها عندو كلو المرض امبروفي
فيسألك
اها بتجيك حمي بالليل
لا ما عندي حمي
بس أياهو امبروفي
ولا بتجيك
بس اياهو كتلتو كتلة اياهو امبروفي
بتطرش ?
مره مره
بس امبروفي
لا ما بطرش
يس ياهو امبروفي
اياهو ماعندك سكة
والعلاج ساهل
الرسول صلي الله عليه وسلم قال كية من نار ,,, هي يا شيخنا اطري العسل ياخ
مرة كوي ليهو واحد جوه خشمو تحت الضرس قرب يكتلو
وبرضو
امبروفي

من النفاج
مرحبا جيمي يا صاحب
قالو الزول ماشي يطلع اوراق ثبوتية
اسمك
حسن فتحي قلوط
الضابط قال ليهو
اسمك ده شين غيرو
جا بكرة
اها اسمك
علي فتحي قلوط
هههههه
خلي الريحة شوف في كم غلط ويوجهو الناس عليهو ويخلو الغلط ويغيرو الصاح