داير لي عروس...المهم تعُوس

طول الليل بفتش والنهار بكُوووس ياناس
داير لي عروس

الله يجيبا لي، بنت تحن عليّ
بنت تكون مسكينة ما دبيبة حيّة
تخدمنى يا لا ما تقول أحيىّ
تطبخ، تكنس، تمسح ما أسمع شكية
داير بنت خدومة والمهم تعوس

طول الليل بفتش والنهار بكُوووس ياناس
داير لي عروس

عودها ماها مائل ورايقة بنت قبائل
ما بتعرف الواتساب ما بتشيل موبايل
ما بتباري الشُلة فاضية للمسائل

العرس بطمئن وبشرح النفوس
جيبوا لي عروس
جيبوا لي عروس

داير لي عروس

آها ده يعكس الحال في السودان.
ناس الجندر ما أظنكم واقفين مع شكرالله فى أغنية داير لي عروس

سلام يا سيف يا عريس

وربنا ان شاء الله يديك بت الحلال ..

Quote: الله يجيبا لي، بنت تحن عليّ بنت تكون مسكينة ما دبيبة حيّة تخدمنى يا لا ما تقول أحيىّ تطبخ، تكنس، تمسح ما أسمع شكية داير بنت خدومة والمهم تعوس

يا باو السيوف يا حبيب دي زوجه ولا ترمبيل !! غايتو دي الا كان زوجه اليه .

Quote: سلام يا سيف يا عريس وربنا ان شاء الله يديك بت الحلال ..

هههه غايتو أنا البوست ده فتحتوا بعد مشاورات مع الحكومة بتاعتى.

عشان كدا ما بقدر اتعدي الصلاحيات الممنوخة.

هههههههههههههههههههههههههه

لقيتك جب ان لكن يا سيف ..

عندكم مشكله في استقدام ربات المنازل في البلد التي تعيش فيها ولا شنو يا ابوالسيوف ..

التحيه ليك ولحرمكم المصون ..

وتعرف تمشى مسافات طويله
وتقطع الفيافى لى بلاد الحبش
وتزحف لحدى بلاد المجوس

سيف اليزل
لك التحيه ياصاحب...

Quote: وتعرف تمشى مسافات طويله وتقطع الفيافى لى بلاد الحبش وتزحف لحدى بلاد المجوس

أخونا ملهم حبابكم
هنا كولو واحد.

عندكم فى بلاد بره قصدك
اللخ كلو زى بعضو يعنى والا أييييييييه ياسيف ؟؟؟

غايتو انالاحظت انو اغنيه لاشنو كده لاخطوبه ...عرس بس
بتاعة بلال موسى عباره عن ارجوزه
ودى برضو بتندرج تحت الأغنيه الأرجوزه

زى الكان بيعملهم شكوكو واسماعيل ياسين
فى الأفلام العربى بتاعت زمان

كدى نرجع نسمع ونجى نتسامر معاك ياخ

Quote: عندكم مشكله في استقدام ربات المنازل في البلد التي تعيش فيها ولا شنو يا ابوالسيوف .

يا أسامة

اقول ليك حقيقة موجودة لكن هنا مافي لعب وإستهبال. تدفع ليها الحد الأدنى للأجر، يعنى نص ماهيتك تقريبا. ده غير الضرائب.
أخوك غايتو حريف في الحلة والطبيخ.

بنك الخرطوم جاهز لتمويل الزواج وبفائدة وقدرها 12 في المية

الصالات محددة لزوم الكوميشن وكده
عقد التسليف لازم يمضى عليهو العريس والعروس عشان بعدين مافي واحد فيهم ينط. وكان بشاهدة والديهم

العرس الجماعي خلو..حسع العرس بقي زيو زي أي بيسنس

Quote: أخوك غايتو حريف في الحلة والطبيخ.

اخيرا عرفت أضحك شويه ياسيف ..شكراً

Quote: اخيرا عرفت أضحك شويه ياسيف ..شكراً

هذا هو حال الدنيا يا ملهم. البركة فيكم
وحال البلد بتصلح. بإذن الله

تعرف يا سيف كلو بلد ليها ظروفها الخاصه

ومن الصعب ان تحصل كل الاشياء في وقت واحد ..

يعني مثلا في شرق اسيا العمال اليدويه رخيصه جدا ولكن معدل دخل الفرد قليل بالمقارنه عندكم ..

يعني لو ممكن الواحد يشتغل في السويد ويسكن جاكرتا عشان تتوفر كل الحاجات عشان كدا لابد من التنازلات وبالتاكيد حقك بتكون ماخدو مايه بالمايه لكن بشكل يختلف عن واحد عايش في مالي فلذلك يا ابو السيوف كلما الواحد لقي فرصه يسافر مع العيال للتغير ..

معليش يا سيف انت بتفتش في عروس ولا محاضره ..

شكرا يا حبيب..

ان داير عروس
ماتتعب تكوس
ان صفت النفوس
ولملمت الفلوس
لي ام العروس
وبس بشيش تسوس
من فتح الخشيم
لا كرسي الجلوس
تعليم الرقيص
تفصيل القميص
لمة يوم خميس
والعطر النفيس
اجعص زول جعيص
محمد بالنقيص
حايكنس واكوس
اغسل واعوس
مابت الحلال
شاغلاها الدروس
اولمة بنات
في مولا تعيس
وات ياسيف اخوي
تباخ المدام
لو قلت اي كلام
متخلف تعيس
تحيا المراة قول
لا شدت ملاح
لا كوي لا غسيل
وده الصح والعديل
يتساوي الجميع
احمد او بتول

Quote: ما بتعرف الواتساب ما بتشيل موبايل ما بتباري الشُلة فاضية للمسائل

دي صعبة شوية , لوول..
سلام يا سيف

إنت متأكد داير عروس

ولا..

داير عوّاسة؟


ولا يمكن أسهل ليك..

تتعلم العواسة

فأحسن الطباخين في العالم... رجال



الباقر موسى

Quote: إنت متأكد داير عروس ولا.. داير عوّاسة؟

عروووس، داير لي عروس

حسب المواصفات اعلاه، في ولا مافي؟

Quote: Quote: ما بتعرف الواتساب ما بتشيل موبايل ما بتباري الشُلة فاضية للمسائل

دي الغلبتني يا نجاة
العواسة والتبيخ، والمسح دا ما مشكلة، الواحد بحلها إن نشاء الله بعرق جبينو

الواتساب دا والموابيل دا يعملوا فيما شنو...؟؟

Quote: ان داير عروس ماتتعب تكوس ان صفت النفوس ولملمت الفلوس لي ام العروس وبس بشيش تسوس من فتح الخشيم لا كرسي الجلوس تعليم الرقيص تفصيل القميص لمة يوم خميس والعطر النفيس اجعص زول جعيص محمد بالنقيص حايكنس واكوس اغسل واعوس مابت الحلال شاغلاها الدروس اولمة بنات في مولا تعيس وات ياسيف اخوي تباخ المدام لو قلت اي كلام متخلف تعيس تحيا المراة قول لا شدت ملاح لا كوي لا غسيل وده الصح والعديل يتساوي الجميع احمد او بتول

أستاذنا الكبير عبدالعزيز عثمان
كلام حِكم ، كلام ملحن وجاهز

غايتو أشاع الفرح في البيت
كل التحيا

Quote: يعني لو ممكن الواحد يشتغل في السويد ويسكن جاكرتا عشان تتوفر كل الحاجات عشان كدا لابد من التنازلات وبالتاكيد حقك بتكون ماخدو مايه بالمايه لكن بشكل يختلف عن واحد عايش في مالي فلذلك يا ابو السيوف كلما الواحد لقي فرصه يسافر مع العيال للتغير .. معليش يا سيف انت بتفتش في عروس ولا محاضره .. شكرا يا حبيب..

يا اسامة انا والله بفتش للمحاضرة..عروس وين يا اخوي هناا ما مسوح ليك إلا بواحدة مسجلة..

وقعت في يدي ورقة علمية عن النساء السويديات البسافروا مع ازواجهم لماليزيا. طبعا الخدمة المنزلية متوفرة ورخيصة هناك وهن ما متعودات علي كده. قال ليك طوالي الراجل السويدي بيعمل فيها مجنون ويرجع السويد بالماليزية عشان الخدمة والراحات.

Quote: .الله يجيبا لي، بنت تحن عليّ بنت تكون مسكينة ما دبيبة حيّة تخدمنى يا لا ما تقول أحيىّ تطبخ، تكنس، تمسح ما أسمع شكية داير بنت خدومة والمهم تعوس

......................

عزيزي سيف اليزل

يبدو انك ما عاوز عروس لكن عاوز خدامة وتديها مرتب شهري.. وطبعا دي ساهلة شديد ... ممكن تفتش اعلانات الصحف وحتلقى الف واحدة عاوزة تشتغل بمرتب شهري وتطبخ وتكنس وتمسح وما حتسمع منها اي شكية...

وبعدين انت من زمن العواسة... !!! الرغيف أنواع واشكال ومصانع الكسرة منتشرة حتى في الأرياف....
والله يديك العافية

تحياتي ليك اخي العزيز سيف ... ولضيوفكم السمحين ,

ههههههههههههههههههه

قلت عروس في زمن ازمة العيش ,, والله يا سيف بنوت الزمن دي لا بعرف يعوسن
ولا حاجة . كدي في البداية نعمل لينا معاهد تأهيل للعواسة . يالله يا سيوف لي قدام .

ده داير عروس ولا جاريه؟.

الله يدينا ويديك

ابو السيوف سلامات ومشتاقين
والله ود حلال ووقعت لي في جرح
كنت ناوي افتح زي هكذا بوست لكن خائف من عوك عوك
اها لقيت لي شرك مكجوج وجاهز احاحي بس
والقديلو اديها تلة
القديلو عليك الله
.
.
شفتو ليكم مزارعي برا مرة ؟
.
.
عادل خياري مشتاقين واعمل حسابك يا زول

Quote: والله ود حلال ووقعت لي في جرح كنت ناوي افتح زي هكذا بوست لكن خائف من عوك عوك اها لقيت لي شرك مكجوج وجاهز احاحي بس والقديلو اديها تلة القديلو عليك الله

يا ودالبوش
شركك لسا ما قبض اا زول ولا شنو؟

سؤالك شفتو ليكم مزراعي برا مرة؟
غايتو كانت فهمتا سؤالك ده الإجابة نعم، وعلي قفا ما يشيل..

عليك الله يا ودالبوش خلي الناس تتنفس شوية. حسع بتكون تفشطا لينا عادل الخياري.

تحياتى

Quote: الله يدينا ويديك

دي دعوة قوية يا عادل.

والواحد قبل ما يجاوب علي مداخلتك دي إتلفت زي الحرامي.

ااااامين...




كان لقيت المداخلة معدلة، أعرف إنو الحكومة تدخلت لاتخاذ قرار حاسم ينهي عملية البحث والكواسة.

Quote: قلت عروس في زمن ازمة العيش ,, والله يا سيف بنوت الزمن دي لا بعرف يعوسن ولا حاجة . كدي في البداية نعمل لينا معاهد تأهيل للعواسة . يالله يا سيوف لي قدام .

بت عمسيب
التحية لبنات بلدي

والتحية لمن قدمن أرواحهن فدا للحرية

تسلمي يا منى..

Quote: يبدو انك ما عاوز عروس لكن عاوز خدامة وتديها مرتب شهري.. وطبعا دي ساهلة شديد ... ممكن تفتش اعلانات الصحف وحتلقى الف واحدة عاوزة تشتغل بمرتب شهري وتطبخ وتكنس وتمسح وما حتسمع منها اي شكية... وبعدين انت من زمن العواسة... !!! الرغيف أنواع واشكال ومصانع الكسرة منتشرة حتى في الأرياف.... والله يديك العافية

يا أميرة السيد
هو حسع الزمن ده حتى العروس الواحد ممكن يعلن عنها في إعلانات الصحف.

اديتنى فكرة جهنمية لكن.
امشي اشوف لي جريدة وأعلن فيها داير لي عروس حسب المواصفات اعلاه. أنا أهمّ شئ عند الواتساب والموابيل.

شكرا يا أميرة على الفكرة

الأخ سيف اليزل سعد عمر

لك التحية ،،
يبدو أنك أهديتني هذه الأغنية وأخيرا رسيت لي على عروس بمواصفات هذا الفنان والسودان مازال بخير بس كوس وكوس .

Quote: والسودان مازال بخير بس كوس وكوس

اخونا صديق الغالي انا فعلا مستغرب من كلمات الاغنية في الزمن دا و بالمواصفات دي.