Post: #1
Title: قوانين تحمى المُغفلين .
Author: shaheen shaheen
Date: 01-29-2014, 06:48 PM
ايها النسر , هل اعود كما عدت
ام السفح قد امات شعورى ؟ .
عمر ابو ريشة
|
Post: #2
Title: Re: قوانين تحمى المُغفلين .
Author: shaheen shaheen
Date: 01-30-2014, 04:27 AM
Parent: #1
1
هذا الكلام , كلام غير مفهوم
ملعونة هذى الصحية مع صوت الاذان
الصيحة طالعة كما الفحيح
المُلك لله .. الرزق اصلاً شحيح
معقولة وشك زى قفاك ؟
مقلوبة
بـ الهوبة .. انعدلتا على الصراط المستقيم
يا تقول عديل
او تنخرس
هل انتا يا دكر البنات
وقت الهبوب ما بتنكسر ؟
شن مرقتك والناس نيام ؟
لـ مرقدك اعمل تمام
هذا زمانك يا مهازل
هذا زمان الانبطاح
فـ أترك نطاح الحيطة , يفتكروك عوير
لا فيك رِيالة .. لا سمعنا منك صوت ظُراط
فك تكة السروال
وتكتك
فـ القوانين فى التكية , برضو مُحتاجة لذكاء !
داقش , تجد .. ولكل مُحتهدِ مصيبة .. او نصيب .. او وقعة فى البير الغريق
تمبل السلطان , ومخصى القصر , المحظية , والقـوادة ام سِنة دهب
ديل اصدقاء
فـ اترك سلاحك عند باب القصر .. واربط حصانك , فى خشم باب العدو
ثم انصرف .. بعد الصلاة
هذا زمان الاصدقاء
كن مطمئن
اوعك تئن
اصطحب مرأتك , ومرضك , والعيال
نحو الهلاك
بعد التجشأ , والتمخط , والتبرز , والتسوك , والسعال
والبسملة
يبقى السؤال
يا لاوى بوزك مُشمئز او مُنقهر .. او مُنقرف
هل انتا يا دكر البنات
وقت الهبوب ما بتنكسر ؟ .
شاهين
|
Post: #3
Title: Re: قوانين تحمى المُغفلين .
Author: shaheen shaheen
Date: 01-30-2014, 05:13 AM
Parent: #2
2
هترشة
سلامُ عليكم
سلامُ علينا
سلامُ عليهم
منكم الينا .. ومنا اليهم
وحرباً تقيف
فـ يأتى الرغيف
وشفع حـ تلعب .. كيشة وحريف
رصاصكم بيلسع فى ضرع الخريف
وعايزين نعيش
نُحبُ الحياة .. نُحبُ النساء .. نُحبُ العطور
فلا تجعلونا زوادة قبور
نُحبُ الغداء .. نُحبُ العشاء .. نُحبُ الفطور
سلامُ .. وضوح .. كوعُ وبوعُ
سلام الحقوق
حق الحياة وحق المعاش .. وحق السعوط
ويوم الخميسِ رقيص فى طهور
نُحبُ الخمور
نُحبُ الصلاة .. نُحبُ الزكاة .. نَحب الرسول
فلا تجعلونا زوادة قبور
سلامُ .. وضوح .. كوعُ وبوعُ
نَحب البحبوا سماية الوضوع
حروبهم حريق
نُحبُ الحياة
نَحب الهجيج
لان الهجيج , رفيق فى الطريق .
شاهين
|
Post: #4
Title: Re: قوانين تحمى المُغفلين .
Author: shaheen shaheen
Date: 02-17-2014, 02:39 PM
Parent: #3
3
عندك مُجلات ميكي ؟
الى سميحة التى هزمها الزمن والكهولة والطوفان
اكبر منى بــ سنتين
انا كنتا فى خامسة ابتدائى
وانتى فى سادسة ابتدائى
عايدة السنة
وظهرتى كــ الشيطانة يا شيطانة
فى نص الطريق
بين بيت ابوى والمدرسة
- يا حلبى يا ود يا سمح , عندك مجلات ميكى ؟ .
اندهشتا من السؤال
مشروع مثقف من زمان !
....................
....................
وبدات علاقتنا المريبة
اديها ( ميكى )
اخد ( سمير )
تدينى ( ميكى )
تاخد ( سمير )
وبدات جوابات الغرام
بين المجلات فى الظهور
وبدأ اللهيب
وانا مندهش
تحضنى فى نص الطريق
وانا مندهش
وتبوسنى فى الخشم الصغير
وانا مندهش
وتخت ايديا على صدرها الناهد صغير
- اضغط هنا .
واضغط هناك وانا مندهش
وتفح فحيح
- اوعك تكلم زول .
مشروع مثقف من زمان !
...................
...................
ايام تشيل .. ايام تخت
ايام تسر .. ايام تضر
فى الاربعين
وهى اكبر منى بـ سنتين
لقيتا فى حفلة عرس
اتغيرت واتبهدلت
وسمعتا قالوا اطلقت
واخوها مات
شقت زحام الحفلة جات
مدت ايديها فى صوت حزين
- يا حلبى يا ود يا سمح عندك مجلات ميكى ؟ .
بين الضحك
نزلت دموع
وبكت
بكت شديد
وحضنتها
يا ( ميكى ) عيد ليها الصبا
يا ( ميكى ) عيد ليها الصبا
يا ( ميكى ) عيد ليها الصبا
خليها ترجع بت صغيرة
مليانة بــ قلة ادب , بــ شيطنة
يا ( ميكى ) وحياة الرسول
ما تخلى اقدام السنين
تطلع عليها وتهرسا
يا ( ميكى ) أأأأأأأأأأأأأأأأأأأأأخ .
شاهين
|
|