Post: #1
Title: 355 كف وفي بيت جالوص !
Author: مها عبدالمنعم
Date: 01-29-2014, 03:36 PM
Parent: #0
اربعه شهور شنو اربعه شهور في كوبر ياخ وبس انهيت الدعوه في تلك القعده والباب كروكرو يخبط مشي فتح واسمع لك صوتو بدا يعلو شويه شويه لفحت توبي القي ليك عربيه بيضاء صالون لوحاته ملاكي واقفه يازول انت محمد الفاتح الفكي الفقير ؟
اي بس دا م انتو القاصدنو
كيف يعني
وسجمي ديل مودين الراجل وين خير خير مالو
يااختنا دا راجلك ؟
اي زين راجلي عمل شنو ؟
وانتو زاتكم منو يا راجل ادخل لجوه مسكتو من يدو الناس باين عليهن ناس شبك ساي الله يكفينا شرهم
يا زوله اصبري اسمعينا بس راجلك دا اسمو : محمد الفاتح الفكي الفقير ؟
اي ياهو
اها يا عسكري اتاكدت اقبض الراجل
هبيت قبضو رويحتك هسي يقبض منو
ومسكو الراجل انا اجر بناحيه وهم بناحيه لمن كتفو انخلع الولد الشاب فيهم قال لي ياخاله والله قصتو صعبه ادفعو القروش حتي يمرق وزي ضربتني كهرباء فكيت
قروش شنو ؟
راجلك دا دايرين منو 355الف يا زول 300 كف ان شاء الله متخمخمين كدي اشان 300 جنيه اقيفو بلا عسكري بدفع قريشات الايجار
ضربني الراجل كف صاموتي بكلامو 355الف يعني مليون !
يا راجل والله مو ياهو الراجل عنده عربية كارو بلقط رزقو يوماتي وماجر البيت الحيطو مايله دا من وين دايرين الكم قلتها دي
ووووووب عليك يا السره
يا ناس الحله هووووي الحقونا دار يكتلو الراجل ووووب ووب وب
احي يا قريشات الايجار نلمها جنيه جنيه ويمرق مطالب تلتمية كف وووب وووووووووووب
|
Post: #2
Title: Re: 355 كف وفي بيت جالوص !
Author: مها عبدالمنعم
Date: 01-29-2014, 04:18 PM
Parent: #1
انا داعيتو في حق التوب القال لي شيلي قبل اربعه شهور دفع منو شهرين والباقيات متاخرات... اها اتناقرنا زي عادتنا من اتناشر سنه ياهو حالنا العيشه حاله زي حال الحمار البجر العربيه المتكله قدام خشم الباب يوم الرزق باسط ويوم ضنك والبنيات ديل مو مقصر في عيشتن عاد شن نسوي ها دا الله وهادي حكمتو ومرات ندين حق العيش من الدكان لاخر النهار يجي محمل للبنات قدر قدرتو والبيت يمين بالله حيطو مايله ايجارو قديم زادوه ميه صبح ميتين خمسه وتسعين جنيه ...تلاجه متل الحريم م سعيت الا بت اختي شرته لي هديه قالت بتنفعنا وفي حالنا الراجل يمين بالله مسكين لامن يطلبو بقروش كان باعونا ما بنلمها ؟
اووب علي يأبو بناتي اريتني كان لساني انقطع قبال اداعيك يكون سو فيك شنو ؟ووين مبيتك
رجال الحله كل واحد بمرق يجبر المكسور بس المبلغ فوق طاقتنا لحدنا
الدنيا شنو فيها بس صبحت الواطه مشينا الحراسه لقيناه حبسوه قال لمن يتم الدفع !
يدفع شنو وكم نحن وكل عفيشاتنا كان باعونا في سوق البشر م بنتم الخمسين قال شنو يدفع !!!
|
Post: #3
Title: Re: 355 كف وفي بيت جالوص !
Author: مها عبدالمنعم
Date: 01-29-2014, 05:05 PM
Parent: #1
خامس يوم عدمنا الحيله والرجال لفو لامن ورمت لسناتن من شدة الدواره يجمعو وكل زول يضرب كف في كف وحايم شيطان بيناتن شغال يوسوس في الروؤس وين ودا المبلغ سايق ليهو كارو حمارو كيله مي شايله القصه شنو تكون !
المهم مشو لاسياد الدكان الا وراسن الف سيف اللا تدفع المية مليون فيشان يمرق
شلت كرعي من دقشا بدري رجيت الدكاكين نامن فتحن مصنقره قلت الصباح رباح قبال الرجال تاخدن زهجة السوق ومدافرة الناس يمين بالله شدة م راسي لف والمحل فاتح في شارع تام بتلاته جهات وصلت للراجل الكبير قالو سيد المحل الببيع بالقسط للحريم !
سمح هو ببيع بالقسط نحن شنو علاقتنا بدا تلفزيونا جابو من الدلاله بخراب القريشات يوم يشتغل ويوم يسكت بلا سبب البنات يضربنو ويضربنو ما يرضي يهز صوره ولا يكشكش صوت
..من تخش تحس انت ما زي الناس ديل ولا بتشبهن اساسا خلقتك في المرايه متل الشحات كفايه توريك انت منو قعدت اتضاير والراجل يشطح ينطح في الدكان سلمت
سلام عليك
وعليك السلام والرحمه ودخل يده في جيبو مد لي جنيه حديده وانا يعلم الله ماجيت شحده بس قلت كتر خيرك يا حاج علا ماني شحاده انا مرة ومن قلت اسمو الاول اتنفض فرد نفضه يا ناس هوي وكت عند الشيل تتضرعو وكت السداد ترسلو حريمكن ؟امرقي يا مره ادفعو ميه بعدين نتفاهم
مرقت كرعيني ماشات في الهوا روحي مشت من جسمي ودمعي يقول الله يسامحك وين لميت في الناس ديل والتلتميه وين مشت !
|
Post: #4
Title: Re: 355 كف وفي بيت جالوص !
Author: مها عبدالمنعم
Date: 01-29-2014, 05:21 PM
Parent: #3
وانا ماشه في شارع الله الواحد دا لا احره لا ادري اسمع العربيه من وراي كرووو ظنيت دقشتني ما حسيت الولد السايقه شافع صغير قدر عشرين نزل يا خاله اركبي نوديك الحوادث
يا ولدي شن الحوادث البمشيها انا وراسي اعوج
كيف راسك اعوج ابشري تب تتقنعي
بارك الله فيك العلي ما بتقدر عليهو
ومن وين عرفتي ما بقدر عليهو
وين ساكنه ؟
قريب قريب
اركبي النوصلك
ركبت مافيني مروة مشي تب وما ظنيت خبتة العربيه السبب !
الوليد ماقصر ان شاء تتم عافيتك
ياخاله مالك ؟
انا ياولدي حالي حال الزول مشي يملا المويه من بحر السراب جيت ايدي فاضيه
لامن تصل بتخبر براك شن الخبر
دخلت البيت وناغمت علي وليد الشيخ واحد من اللافين يجمعو في المبلغ بعد وراه شن همنا قال ابشرو عندي تب
رفعت عيني نسمع قولو شنو
انا مال ما عندي علا انا فلان الفلان المحامي ان شاء الله يمرق والاكيد قريب
اها كم المبلغ المجموع
سته ونص !
المبلغ قليل علا يمين بالله ما حصل فد مره مسكت فرد مليون اها ومرق غتس اسبوع ماشفناه ورمينا طوبتو
|
Post: #5
Title: Re: 355 كف وفي بيت جالوص !
Author: طلال جبير جابر
Date: 01-29-2014, 05:40 PM
Parent: #4
متابعين و روعة تفوق حد الاندهاش .....
|
Post: #6
Title: Re: 355 كف وفي بيت جالوص !
Author: Gafar Bashir
Date: 01-29-2014, 05:45 PM
Parent: #5
بالتاكيد متابعيين
بس في الاول اكتبي العنوان (قصة / حلم) عشان نفهم الحاصل شنو ... ما يطلع كلام جد ونحن متخلينها خيال علمي
|
Post: #9
Title: Re: 355 كف وفي بيت جالوص !
Author: مها عبدالمنعم
Date: 01-29-2014, 06:15 PM
سلامات ي
Gafar Bashir
كان كتبت قصه او كذا بختفي عنصر التشويق والاثاره
المفاجاه في النهايه
|
Post: #8
Title: Re: 355 كف وفي بيت جالوص !
Author: مها عبدالمنعم
Date: 01-29-2014, 06:11 PM
Parent: #5
سلامات ي
and#65219;and#65276;and#65245; and#65183;and#65170;and#65268;and#65198; and#65183;and#65166;and#65169;and#65198;
تسلم يا سيدي
|
Post: #16
Title: Re: 355 كف وفي بيت جالوص !
Author: طلال جبير جابر
Date: 01-30-2014, 10:53 AM
Parent: #8
| Quote: and#65219;and#65276;and#65245; and#65183;and#65170;and#65268;and#65198; and#65183;and#65166;and#65169;and#65198 |
غايتو الاكواد دي مرات كدا تمحنك ....
مزيدا من التشوق و ارتفعت درجة الترقب حتي وصلت الغليان ....
|
Post: #18
Title: Re: 355 كف وفي بيت جالوص !
Author: مها عبدالمنعم
Date: 01-30-2014, 11:13 AM
Parent: #16
سلامات طلال ليك العتبي
البت عامله فيها حريفه انسخ وارد بس راحت علي
مره حردت قصه بسبب النسخ دي :) انسخ وتجي عشكبه عنكبه فقلت يلا انتي زاتك اتبريت منك ياقصتي :)
|
Post: #7
Title: Re: 355 كف وفي بيت جالوص !
Author: مها عبدالمنعم
Date: 01-29-2014, 06:07 PM
Parent: #1
ياحاج الفقير الليل بلاك ما عنده لون اتلومت تب شن لماك بمتل هادول الناس لا في خلقنا بشبهونا لامن يشوفونا يظنونا من كتر الفقر بان علينا شحادين يمدونا الجنيه ! اتلومنا يوم قفلنا دار ابواتنا وسكنا في حق الناس بالقروش !
ياود امي الله يفك كربتك علا منو الرماك الرميه الما شبهك ..دي ..الحمار هد حيلي اكل ...والبنيات يهاتن بك لامن مابعرف البقولو والتور وكت يقع بتكترسكاكينو !
بت اعمك شيالة الحال مرقت ضمن المارقين بس ما نست تقول الفقر تبع ود اعمي من يومو الخت فيك حبل
شن البهدله والعيشه لا في مدينه زي الخلق لا الحله راضيه بقسمتك
ولا تشيل هم العيشه الله في ...والجور ماقصر ماخلونا ..وفي الشهر المرق دا عرفت الحساب قرش قرش ولوكت الصبر وبدور اقول ايوه قربت تمرق علا قسم بالله المبلغ كبير خلاس الشبك في هادول شنو
اكان مرقت نسوق البنوت ونمرق نرجع دار اهلنا ناكله بصله بملحه وساترنا باب بيتنا
|
Post: #10
Title: Re: 355 كف وفي بيت جالوص !
Author: مها عبدالمنعم
Date: 01-29-2014, 06:29 PM
Parent: #7
يمين من يوم انقبض الراجل الخبر انفر متل الهبوت وبقينا خبار المدينه قرابة الاسبوع والجميع مستغرب من سيد الكارو المديون 355البقول نشلوها منو
والبقول نصبو عليهو
والبقول كان يمد كرعينو قدر فرشو وسيد الكارو لنفسو ماعارف القروش متين شاله وكيف ...غايتو تمينا واحد وستين مليون والوليد الضربني ديك المره غتس غتس غتس ومرق فجاة قال ماكان عنده البقولو بس بعد لاقاه حاج الفقير مشي فتش وراء النضم الوصف الوصفوه مابشبه الحاج !
|
Post: #11
Title: Re: 355 كف وفي بيت جالوص !
Author: اميرة السيد
Date: 01-29-2014, 07:43 PM
Parent: #10
Quote: !سلام عليك
وعليك السلام والرحمه ودخل يده في جيبو مد لي جنيه حديده وانا يعلم الله ماجيت شحده بس قلت كتر خيرك يا حاج علا ماني شحاده انا مرة ومن قلت اسمو الاول اتنفض فرد نفضه يا ناس هوي وكت عند الشيل تتضرعو وكت السداد ترسلو حريمكن ؟امرقي يا مره ادفعو ميه بعدين نتفاهم
|
...........................
العزيزة مها
زي ما قال ليك طلال جبير:: روعة تفوق حد الاندهاش..
والله طولنا من الروائع والقصص والحكاوي التي تشدنا شدا وبدأها عبد العزيز في حكاية الشياطين والجن.. وهسع كمان ، الحمد لله، وجدنا رائعتك يا مها والتي تفوق حد الاندهاش...
والله الاقتباس الفوق ده من واقع الواقع وليس الخيال.. وانا ما متحركة من قدام الكمبيوتر إلا اشوف النهاية ...بس ما طولي علينا عشان الشفقة كاتلانا...
والله يديك العافية
|
Post: #12
Title: Re: 355 كف وفي بيت جالوص !
Author: مها عبدالمنعم
Date: 01-30-2014, 08:16 AM
Parent: #11
سلامات العزيزه اميره
تسلمي كتير ي سيدتي
طبعا عبدالعزيز ماشاء الله عليه قلم بسنونه يقودك من دهشه ومتعه لخوف يطير النوم من العيون الصراحه جدا بتعجبني حروفه
|
Post: #13
Title: Re: 355 كف وفي بيت جالوص !
Author: مها عبدالمنعم
Date: 01-30-2014, 09:47 AM
Parent: #1
سلامات سامي جعفر من نافذة الفيس
شكرا جدا للكلام الجميل السودان اكيد جميل في تفاصيلو المختلفه في كل شي
انسان
طبيعه
|
Post: #14
Title: Re: 355 كف وفي بيت جالوص !
Author: عبدالحفيظ ابوسن
Date: 01-30-2014, 09:59 AM
Parent: #13
سلام مها وضيوفها
بعيدا عن ايداع الحكي
واحد متابع حكايتو هنا في كوستي قبل سنوات , وخش السجن
حكي لي ونهايتها قال
كان عندو 5 مليون وبيت , خش في عربية بص مواصلات وشيك بي سنة , بعد سنتين ,, فقد البيت والقروش وخش السجن
|
Post: #15
Title: Re: 355 كف وفي بيت جالوص !
Author: عبدالحفيظ ابوسن
Date: 01-30-2014, 10:00 AM
Parent: #13
سلام مها وضيوفها
بعيدا عن ايداع الحكي
واحد متابع حكايتو هنا في كوستي قبل سنوات , وخش السجن
حكي لي ونهايتها قال
كان عندو 5 مليون وبيت , خش في عربية بص مواصلات وشيك بي سنة , بعد سنتين ,, فقد البيت والقروش وخش السجن
|
Post: #17
Title: Re: 355 كف وفي بيت جالوص !
Author: مها عبدالمنعم
Date: 01-30-2014, 11:09 AM
Parent: #15
سلامات عبدالحفيظ
فعلا كثير في ناس بتخش السجن بتجاره خسرانه والبنوك م بترحم ولا التجار بخلو حقهم ...
|
Post: #19
Title: Re: 355 كف وفي بيت جالوص !
Author: عبدالحفيظ ابوسن
Date: 01-30-2014, 11:17 AM
Parent: #17
لا يا مها
دي ماعندها علاقة بالبيع والشراء والتجار وكدة
ده بيع حديث وشغل 3 ورقات
يعني ممكن واحد يطالب ملايين الملايين ولا يكون شافها زاتو
ورق بس
|
Post: #20
Title: Re: 355 كف وفي بيت جالوص !
Author: مها عبدالمنعم
Date: 01-31-2014, 10:15 AM
Parent: #1
شدة م الدنيا ضاقت علي مشيت نبيع عيدان الطين الوارثاهن من ابوي ماجابن الا خمسه وعشرين والرجال في تلك الدواره وماخلو من دخل في قصة جمع المال بس في المحن تعرف معادن الناس في من بخش عليك دخلة خبار ساي وقلبو حبة الشفقه ما فيهو ومن يقيف في صفك الجنيه في جيبو مافي بس كافيه شفقتو في تلك الحال
قرب مبلغ المية مليون يتم بعد درنا وبعنا الفوقنا والعلينا حتي التلاجه والتلفزيون بعناهن يمين بالله م خليت الا كم عنقريب يرقدن فيهن البنوت وربك رب الخير ..قلت نقعد عاله علي الجيران والا نرجع نخلي الحاج في الحبس قلت النمرق ابيع نمصرف البيت مشيت شريت العيش غسلتو ووديتو الطاحونه جيت خمرت وتاني يوم قبال الديك عست كسرتي ومشيت علي السوق القريب اها الكسره اتباع نصها غايتو بس قلت هوي السره انكربي لامن يمرق حاج الفقير الله في
|
Post: #21
Title: Re: 355 كف وفي بيت جالوص !
Author: مها عبدالمنعم
Date: 01-31-2014, 10:33 AM
Parent: #20
قبال اتم الدور في السوق تم مبلغ الميه اها الخميس اخر اليوم ..وقالو الا الاحد حتي ندفع القريشات يمين بالله التقول اليوم متل الحول..اخيرا مرق حاج الفقير لقي لا حمار لا حديد فضل حتي هو بعناه وكل زول بدور يعرف وين مشت القريشات وكل معارفنا ضامن في لخبته في النضم بس القانون اخدو بلا جريره
ماقال غير الله في هسي ما كان تعملو متل العمايل دي فيشان المبلغ الكبير دا دام انو شهرين وتاني برجع الحبس ...في شبه اسمي يكون المعني بالاسم
ياحاج قول كلام معقول
يا السره بت اعمي كان في معقول كان يومك داك داعيتي وصادف ملك قال امين !
بس احمدي الله
شن قصدك
مافي قصد بس قلت ما في عقل في كل الحصل
في زول اسمو مشابه اسمي قطع شك والا كان ياني الكتبت الكمبيالات وين مشن !
يازوله قومي لفي باقي عفيشاتك النرجع علي اهلك داب شهور الصبر تمر كان باعونا ما بنجيب نص المبلغ ومابقولو السجن للرجال !
اها النعدعدتو ونجهزناخد لنا كم نفس من هادي الفسحات !
|
|