|
مسدار الوثبة.....
|
وثبة وثبتين والتالتة برة الدولة
والقافلين عليك خسرو الرهان والجولة
يسألك الكريم رب العباد المولى
حلقات المسلسل ام خطابك اولى
يا عمر البشير انا معترض ما راضي
ممكن انسى ليك كل الحصل في الماضي
الواجعني منك وفي سبيلو بقاضي
ياخسارة المسلسل زمنو راح في الفاضي
اتلاقوا الجميع كل عمة تضرب عمة
والناس ياعمر امالا كان في القمة
نسمع بالخطاب قلنا الحكاية مهمة
ده الجامعني ليه من العصر بالذمة
ياعمر البشير الدولة رسبت رسبة
واضحت للجهاز نص البلد منسبة
السبب القبيل الخلى الخلوق محتسبة
قنبلة الرئيس طلعة اشاعة ووثبة
ياعمر البشير حبل الصبر اتمطى
والسودان يسير بس الا زي البطة
منتظرين قرارك وقلنا زي الشطة
يو طلع القرار القصة طلعت نطة
ياعمر البشير الوثبة تب مرغوبة
نتمنى العمار لارضنا المحبوبة
في عز الخريف ما تشكر الراكوبة
لكن بالخطاب فعلاً قلبت الهوبة
ياعمر البشير هاك الكلام الواعي
البترول يطير سودانا ارضو زراعي
خليك للسلامة وللتقدم ساعي
لكن للخطاب صدقني مافيش داعي
ياعمر البشير ضيعت زمن الامة
قلنا لقيت علاج ممكن يزيل الحمى
عاملين للخطاب قوما وشمار وهلمة
قايلنوا اسكريم لكن طلع داردمة
نقلاً عن (ود المجذوب من الفيسبوك)
|
|
|
|
|
|