عشرة آلاف صلاة ومية والسلام مطبوق..

عشرة آلاف صلاة ومية والسلام مطبوق لي النبي الجاهو باهي يحوق
ياناس في السحيرة ويا عشاقة مروق وبي حالي الطربتو وانشويت محروق
شاشيت ونويت نحو المدينة أسوق لو لويت كرعي كلهن بي دلوق
************************************
أتاني نديمي وقالي أيش بيك روق ما بالي أرك كالاسير موثوق؟
كيف يابس الشنان حالك كئيب مسروق ملقي علي التراب وتحن حنين النوق !
************************************
في رد الجواب قت ليهو صاح ملحوق أزمنت ناوي بالقيود مغلوق
الناس من صليح فاتوني يمشوا شروق وانا اقرب مكان يا أخي أموت بالشوق
************************************
من كترة غرامي وجرحي صار مبتوق روحي إلي ثنيات الوداع بتوق
في تلك الاماكن زيك لها معشوق أحمد أبنو أمنة النور يسطع فوق
************************************
قال لي المخاطب فا لي حالك سو حب خاتم الرسالة التبعو غيم الجو
الثانية الوحوش بتريمو وسط الصو رد الشمس وأحيا للجنازة التو
************************************
والله العجب العجيب يا خوي يوم خيبر قال ليهو الزراع يا المصطفي أحزر
ليك سمتني زينب ضامرة المنكر يا صاحب لواء الحمد والكوثر
************************************
بحكيلك يا أخي لا تبقي مغترا سمي وشالو طه اكلو ما ضرا
القمرا المنير من السماء خرا نصفين أنقسم وضرع العجوف درا
************************************
والله في الثلث الاخير يا خلي فاح كافور ومن بيت الحميراء وفتق الناسور
لمتين نقطع المر ضحوي بالوابور ونزور سيد مدينة حاط بناها السور
************************************
الصلاة والسلام ليك يا اب علامة جزيل مافاهو الخلايق بالنهار والليل
عرش المولي تملأ ولي قوايمو تكيل الكرسي ودعايمو وجابها صالح ليل




ـــــــــــــــــــ..
منقول للفائدة العامة ..

تحياتي يا حيدر
شكرا لرفع هذا الأدب الصوفي الرفيع في مدح سيد الرسل سيدنا محمد عليه الصلاة والسلام
كنا أطفالا وكبرنا وهرمنا ونحن نحب ونتأدب حين سماع درر وروائع أبوشريعة ، حياتي ، قدورة، الحفيان ، حاج الماحي ، الشريف يوسف الهندي ، المكاشفي، وباقي شيوخ ورواة المديح النبوي .. شوف ليك بلاغة وبديهة في اختيار الألفاظ والكلمات والعبارات (10 ألاف صلاة ومية وسلام مطبوق) سلام وصلاة مضاعفة بغير عدد ... يحضرني زميل البورد (ود الخليفة) وكان في فترة ما يعطر فضاءات هذا المنبر بمدحة مختارة كل جمعة ... له التحية في مخبأه وبعده من هذا المنبر
الشفيع إبراهيم

على سبيل التحية

مرحبتين ود جبريل طولنا منك والله ..
ان عارف مديح الحبيب بيجيبك بننزللك كل يوم مدحة..انت بس اظهر وبان ..:)

المحبة والاشواق ياوجيه

سلامات مولانا الشفيع .. تحايا واشواق

والتحية لود الخليفة والله فرق معانا الرجل ..اظن قرأت خبر بالفيسبوك انه تزوج حديثاً او قد يكون تشابه اسماء..
له المحبة

وصلى الله وسلم على الحبيب خير البرية ..