Post: #1
Title: أغنية يا جوهر صدر المحافل هي عصير الغناء السمح
Author: Osman Musa
Date: 01-26-2014, 07:25 PM
Parent: #0
وبي صوت أولاد شمبات
|
Post: #2
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-26-2014, 08:22 PM
Parent: #1
أرجو التكرم بجلبها هنا بصوت أولاد شمات
|
Post: #3
Title: Re: أغنية يا جوهر صدر المحافل هي عصير الغناء السمح
Author: Abureesh
Date: 01-26-2014, 08:38 PM
Parent: #2
|
Post: #4
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-26-2014, 09:43 PM
Parent: #3
يا سلام عليك عزيزنا أبوالريش
ألف شكر علي جلب جوهرة الغناء
|
Post: #5
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-26-2014, 11:52 PM
Parent: #4
يا جوهر صدر المحافـــــــــل ***** روحي معـاك اتلطفيلهــــــــــــــا
ما النور الفي حِلّيه رافـــــل ***** في حُـق نًهده قلوبنـــا قافــــــــــل
ما الظبي الفي مقيله غافــل ***** تــــارة يميــل والتانية جافـــــــــل
وجهه يَنــور والبدر آفـــــــل ***** فوق للبدر يزيـــــد نفيلــــــــــــــه
يا النور خدك لاح مقابـــــــــل ***** للشعــر الطـال ليلــــه سابــــــــل
سهم ألحاظــك ليّ نابـــــــــل ***** بي كل شيء دون هجري قابــــــل
يُنسب نوحي علي البلابـــــل ***** وإنت القمــــره بتُنسبيلهــــــــــــــا
ليك جوز عين نعسان وكاحل ***** وخصــر يميـــل وصـدر راحــــــــل
وليّ وجــدي اللي جسمي ناحل ***** بحر الشــوق ما ليــه ساحــــــــــل
بيني وبين النـوم مراحـــــــل ***** ووين للطيـــف أنا القي حيلــــــــــة
الفـــرع البتّني راتـــــــــــــل ***** طيره ينــوح في غصونـه خاتــــــل
بهوي نسيم لي فكري شاتل ***** والأسد الفي القيـــد يناتـــــــــــــــــل
يتأكـد ماليه قاتــل .......... ***** غيـر مكحــول ظبـي ..... النتيلـــــه
ضاوي ثناك لي بريقه راسل ***** لاح بين عُنّابتين ..... عواســــــــــل
صــدرا يرجح وكتفه حاتـــل ***** رنا طرفــك للسيـف يماثـــــــــــــــــل
بيه .. يجنـدل كلّ ... باســـــل ***** وساحبة دغس وخــدود أسيلــــــــــه
يالمرنوع لي كتفه ... هادل ***** في دروعـه ولي معاصمه جــــــادل
أنا ساهــر والليل ســــــادل ***** شـرط الحاكم يبقـــي ..... عـــــادل
لا أقبل بهــواك مبـــــادل ... ***** كيف اعشق وأرضي البديلـــــــــــــه ؟
مانع طيفك ليّ لا يغــــــازل ***** داخل قلبي أنــا ليــــك منـــــــــــازل
يا لائـم لا تبقـــــي هـــــازل ***** أنا فــي الحــب لي روحـــي بــــــاذل
إنت بحالة سهري جاهـــــل ***** دي الأنجـــم فأســــأل سهيلــــــــــــة
لي طيفـك ما لقيت وسائــل ***** غيــر بَســـًّط النسمــــات رسائــــــــل
أعجـــب شيْ وأغـرب مسائل ***** حلم الصاحـــي ودمعـــه سائـــــــــــل
لو شكّيت في أمري سائـل ***** البدريـن كونـــــــــك ..... مثيلــــــــــه
أنا لي شوقي ودمعي هامل ***** جمـر الحــب لي جسمـــي شامــــــــل
حتى الطيــف لي لا يُجامـــل ***** مع ُكّلاً مــا كُنــــت ...... آمـــــــــــل
دمــي تحنّن بيــه الأنامــــــل ***** وهل يرضيـــك كـده ..... ياجميلـــــــه
*****************
|
Post: #6
Title: Re: أغنية يا جوهر صدر المحافل هي عصير الغناء السمح
Author: يحي قباني
Date: 01-27-2014, 02:10 AM
Parent: #5
التسجيل الأصلي لأولاد شمبات يا ابوعفان
من درر مكتبة الأغنية السودانية
لحنها كرومه ...
و بجيك راجع ... نتغزل في ابوصلاح و في ابراهيم و عوض شمبات
|
Post: #9
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-27-2014, 01:50 PM
Parent: #6
عزيزنا يحي قباني
ألف شكر وأنت تجلب المعدوم في سوق الخرتوم .
التسجيل القديم الأصلي عجيب .
أرجو التكرم بالحضور والمساعدة .. تحياتي
|
Post: #7
Title: Re: أغنية يا جوهر صدر المحافل هي عصير الغناء السمح
Author: صديق الموج
Date: 01-27-2014, 02:55 AM
Parent: #5
عثمان يا حبيب كيف الحال
فعلا جوهر صدر المحافل هى اللياذة غناء الحقيبة وهذه القصيدة بها اعجاز لغوى
لا اظن ان هنالك شاعر غير ابو صلاح قد وصل اليه وللاسف لم ينتبه اليه الكثير
من المحققين او الباحثين ، فلاحظ اعزك الله اخى عثمان ان هذه القصيدة تحتوى على
عشرة مقاطع كل مقطع يتكون من خمسه ابيات مقفية بقافية واحدة وهنالك بيت سادس بقافية
مختلفة و هذا البيت السادس قافيته مختلفه عن الخمسه ابيات التى تسبقه ولكن هذا البيت
وهو بيت القفلة امره عجب..
لان ابوصلاح التزم شى واحد فى هذا البيت السادس فى كل القصيدة، اذ كان يضع حرف
الياء بين اخر حرفين من حروف القافية فى المربع ويقفل بحرف الهاء مثال:
النور الفى حليه رافل فى حق نهده قلوبنا قافل واستمر على حرفى الفاء واللام حتى البيت
الخامس وفى البيت السادس وضع حرف الياء بين الفاء واللام وختم بالهاء اذا يقول
فوق للبدر يزيد نفيلة (نفيله) ومثال اخر: النور خدك لاح مقابل للشعر الطال ليله سابل
والتزم القافية الباء واللام حتى البيت الخامس لاحظ قفلة البيت السادس وانت القمره بتنسبيله
(بتنسبيله)وفعل ابوصلاح ذلك فى كل القصيدة ، لذا قال ابو صلاح فى مستهل القصيدة تلطفيلها
ولم يقل تلطفيبة لان القافية كانت فاء ولام : يا جوهر صدر المحافل روحى معاك اتلطفيلها .
فوضع ابوصلاح حرف الياء بين حرفى الفاء واللام وقفل بالهاء وجاءت الكلمه اتلطفيله وهى
صحيحه وان آلفت الاذن اتلطفيبه ويا لها من عبقرية..
بقى ان اقول يا حبيب انك نسيت مربعه كامله ولابأس من ايرادها:
زايد شوقى ودمعى باهل كيف نارو تشععل مناهل
ضاقبى الكون مع انه ماهل نومى تصعب ووجدى ساهل
لو بى حالة سهرى جاهل دى الانجم فاسأل سهيلة
اما المربع الذى اوردت انت وختمته بى لو بى حالة سهرى جاهل ففبه خطأ بسيط
اذ ان الصحيح كما يلى:
تمنع طيفك لى يغازل داخل قلبى انا ليك منازل
يالائم لاتبقى هازل انا فى الحب لى روح بازل
هل عاشق يسمح لعازل خلى نصيحتك عنى زيله
ولاحظ ايضاً بين حرفى الزاء واللام وهى قافية المربع وضع ابوصلاح العبقرى حرف الياء واضاف
حرف الهاء فى نهاية الكلمة فى البيت السادس (زيله) وهو ما التزمه فى كل القصيدة.
والذى يلحن فى هذه القصيدة طوالى ينكشف يا عثمان يعنى اى غلط طوالى الفنان يقعد فى السهلة
والله يا عثمان الحقيبة دى عايزة زول يقعد ليها ويسبر اغوارها ومازالت تحتاج ملايين القراءات
والبحث والتنقيب فيها وكتر خيرك انت من مره لى ثانية بتلقى ليك حجر فى بركتها ونحن غرقانين
فى ساس يسوس قاطع الله السياسة فقد شغلتنا عن الكثير وبجيك بالمهلة ان شاء الله سلمت،،،
|
Post: #8
Title: Re: أغنية يا جوهر صدر المحافل هي عصير الغناء السمح
Author: ياسر السر
Date: 01-27-2014, 06:03 AM
Parent: #7
الله الله جوهر صدر المحافل ومعاها صديق الموج ويحي قباني كمان ( ده ما قدر الله جانا عديييييييل )
لا يفتى ومالك في المدينة . انا غايتو في حضرت ود الموج ويحي قباني يطيب لي الجلوس مهذب امامهم يكون الكلام ... هؤلاء عباقرة التوثيق الفني السوداني نسال الله ان يمتعهم بالصحة والعافية وننهل من معينهم كمان وكمان ..
اما جوهر صدر المحافل فدي مدرسة فنية راقية ابدع في نظمها شاعرنا الفخيم صالح عبد السيد ابو صلاح وابدع في لحنها عبقري الاغنية السودانية كرومه واجادها عن كسب اولاد شمبات ... ولا يفوتني ان اذكر ايضا عمنا مبارك حسن بركات فقد اجادها ايضا ,,, وهي لوحة فنية كاملة ... ولا ازيد ...
التحية لك اخي عثمان موسى فقد اعطيتنا مؤونة عام من الراحة النفسية ...
تحياتي : ياسر العيلفون
|
Post: #10
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-27-2014, 03:33 PM
Parent: #7
عزيزنا أستاذ صديق الموج
الزول الفنان المتمدن لي حد العضم .
سلامات يا أيها الناقد والعارف والحكيم .
حضورك يا موج يشرف أي محفل كان .
مرحب .
وليك متروك حبل الكلام .. حدثنا عن القالو السيد الرئيس مبارك المغربي عن صدر المحافل .
وعن القالو الباحث زولنا الطيب محمد الطيب عن شاعر الجوهرة .
تحياتي وتقديري وشجزيل شكري
|
Post: #11
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-27-2014, 04:04 PM
Parent: #10
سلامات عزيزنا الفنان ياسر
الفنان الذي ترعرع في مدارس الدبيبة والعيلفون الفنية وشرب من تلك الانهر .
ليك التحية وليك الشكر علي المرور
|
Post: #12
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-28-2014, 01:53 AM
Parent: #2
نتابع
|
Post: #13
Title: Re: أغنية يا جوهر صدر المحافل هي عصير الغناء السمح
Author: خالد العبيد
Date: 01-28-2014, 02:47 AM
Parent: #12
سلام
بحق تعتبر واحدة من اجمل اغاني الحقيبة
ضاوي ثناك لي بريقه راسل ***** لاح بين عُنّابتين ..... عواســــــــــل
----------------------------
الصحيح ضاوي سناك
مع الف شكر لمفترع البوست
|
Post: #14
Title: Re: أغنية يا جوهر صدر المحافل هي عصير الغناء السمح
Author: خالد العبيد
Date: 01-28-2014, 03:04 AM
Parent: #13
ومن الملاحظات ان البيت الذي قمت بتصحيحه هنا
لا يوجد على الاطلاق في روايات اخرى
ايضا تختلف بعض الكلمات ويتم تبديلها مثل :
الفرع البتنى مايل
وفي رواية اخرى :
الغصن البتنى مايل
على العموم كثير من اغاني الحقيبة لا يمكن احكامها وضبطها في نص واحد وذلك للتداول الشفهي في تلك الفترة
وذلك لا ينقص ابدا من روعتها
شكري
|
Post: #15
Title: Re: أغنية يا جوهر صدر المحافل هي عصير الغناء السمح
Author: يحي قباني
Date: 01-28-2014, 05:40 AM
Parent: #14
Quote: عزيزنا يحي قباني
ألف شكر وأنت تجلب المعدوم في سوق الخرتوم .
التسجيل القديم الأصلي عجيب .
أرجو التكرم بالحضور والمساعدة .. تحياتي |
سلام عثمان ...
جانا ود الموج العارف بالخبايا و مواطن الجمال ...
انا طبعا رغم انو الاغنيه لحنها و غناها كرومه ...
لكن قناعتي التامه انو شعراء تلك الحقبه كان شعرهم بيطلع ملحن جاهز ...
المعروف و الظاهر طبعاً اعمامنا عمر البنا و عبدالرحمن الريح ...
لكن لما نجي لأبوصلاح ... خصوصاً جوهر صدر المحافل ...
و مجاراتها بي شوف العين قالت ده لا لا ..
القالب اللحني واحد ... وده شي كان متعارف عليهو ... لكن هل بيعني انو كرومه ركب الكلمات علي نفس اللحن ...
ولا ابوصلاح دندن بي كلماتو وهو بيكتبها علي نفس اللحن ...
الروايات كتيره ...
اما الوصف او ( الوصّيف ) و تطويع الكلمه كما يكتبها ابوصلاح بعبقريه ...
ابوصلاح ينفرد بالمرتبه الاولي دون شك ...
في اعتقادي ان ابوصلاح وصف المرأه من راسها لي ساسها ... بمفردات مهيبه ...
بجيك راجع ليها ... دون تحفظ او اختشا ...
ياخي ابوصلاح جنن الغزلان جن ...
_________________________________________________
تحياتي ياسر العيلفون ...
دائما حضور في مواطن الجمال ...
|
Post: #16
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-28-2014, 06:30 PM
Parent: #13
مرحبابك عزيزنا خالد العبيد
|
Post: #17
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-29-2014, 01:11 AM
Parent: #16
يا ريت أستاذ الموصلي يجي يتكلم لينا عن الأغنية
و عن السر شنو في جمال صوت أولاد شمبات .
|
Post: #18
Title: Re: أغنية يا جوهر صدر المحافل هي عصير الغناء السمح
Author: خالد العبيد
Date: 01-29-2014, 03:25 AM
Parent: #17
شكر لك يا عثمان على الترحيب
المعروف ان ابوصلاح ابن حي المسالمة له في كل قصيدة كتبها حكاية
وقرات من قبل حكاية قصة بدور القلعة فبالتاكيد ان لصدر المحافل قصة ما بعدها قصة !
نتمنى من الغواصين المهرة - صديق الموج ، يحي قباني - اثراء هذا البوست بتلك القصص الجميلة
انا اعرف قصة من الاسكلا وحلا التي كتبها ودالرضي على سبيل المثال
لا ما نع ان اذكرها اذا لم يكن هذا الحوار الجميل فقط عن صدر المحافل وابوصلاح
احترامي
|
Post: #19
Title: Re: أغنية يا جوهر صدر المحافل هي عصير الغناء السمح
Author: الحاج حمد الحاج
Date: 01-29-2014, 11:33 AM
Parent: #18
عثمان اخوي..جوهر صدر المحافل قمة الابداع.غناء سمح جدا.
|
Post: #20
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-29-2014, 04:28 PM
Parent: #19
Mohamed Mustaf
الاخ العزيز عثمان لك التحية على حسن الاختيار والتحية موصولة للاخوة الذين تطرقوا للبوست . الحقيقة شاعرنا صالح عبدالسيد ( أبوصلاح ) هو من عمالقة شعراء
الحقيبة مع العلم بأن جل شعراء الحقيبة هم مبدعون وكل شاعر له مدرسته الخاصة ومن أروع قصائد أبوصلاح هي قصيدة من قليبو الجافي . حيث كان يقف بعيدا في حفل زواج
وشاهد فتاة جميلة ترقص وحيدة في ( الداره ) فهي في غاية الجمال حيث أرسل النسيم ليبلغها التحايا وإعجابه بها
من قليبو الجافي ولي قليبي الحان .... النسيم إتمحن عامل إستمحان
الغصون تتناول منو خمر ألحان ... والطيور تتناشد رائق الألحان
الفروع تتمايل ميلة الفرحان .... الزهور بتصفق ويرقص الريحان
يانسيم ما بالك تتني قامة البان .... إنت رائق تلعب والعشوق تعبان
إكتشف ما دائي والدواء الصعبان ... هل دا جُرحاً بالغ ام دا سُم ثعبان
قالي لازم جُرحك مُدة الازمان ... لا روائحي يطِبك لا ولالقمان
البِداوي جِروحك شُفتو يا سقمان ... في عصير الند البِنضحُو الرُمان ( عصير الند مقصود به عرق الثدِي ) ولنا تواصل ( الفنان محمد كرار -- جدة 9
..
المشاركة السمحة دي
جات عبر نفجاج الفيس من عزيزنا الفنان محمد كرار
له التحية والاحترام والشكر
|
Post: #21
Title: Re: أغنية يا جوهر صدر المحافل هي عصير الغناء السمح
Author: Osman Musa
Date: 01-29-2014, 05:52 PM
Parent: #20
عزيزنا خالد العبيد
بعد التحية
خليني النحكي ليك عن الأغنية النكتة دي .
وأكيد الأغنية كلها مليانة بي الصور الجميلة .
عندنا وأحد أيام قوانين سبتمبر 1983 أيامات المحاكم الناجزة وهوشة عوض الجيد .
عندنا زول أتمسك بي الليل شارب فل . تاني يوم طلع زعلان جدا من المحكمة بعد ما أتجلد .
وهو طالع من المحكمة ولسع باقي القصة في الرأس كان بردد في مقطع الأغنية
البقول : شرط الحاكم .. يبقي عادل
شرط الحاكم .. يبقي عادل . هههههها
..
تحياتي
|
|