يأيها القراء والأعضاء نحبكم جميعا ونحزن لفراقكم

نعم الموت حق وحوض كلنا واردوه..
ولكننا فى هذه الحياة مطالبون بالحفاظ على أنفسنا وعلى من حولنا..

يا أخوانا من أنعم الله عليه بقيادة عربة أو امتلاكها أو ركوبها فليتأكد قبل أن يدوس على دواسة البنزين أنه ومن معه من الركاب قد ربطوا أحزمتهم..

يا أخى وأختى عندما تسوق عربتك فى الطريق تصرف وكأنك أنت الوحيد العاقل بين من هم يشاركونك الطريق..

قف فى الاشارة الحمراء ولا تتحرك مباشرة عند الاشارة الخضراء فاعط نفسك ثوانى لتتأكد أن ليس هناك من سيقطع إشارته الحمراء لتهور أو لعطل فى عربته..

عندما تنوى الانحراف يمينا أو يسارا أحرص على تشغيل إشارة الانحراف قبل زمن كافى لتنبه من هو خلفك..

ربنا يحفظكم جميعا ويرحم من رحلوا بسبب حوادث المرور.

وصايا غايه فى الاصاله ..شكرا ياسيد بله
لك التحيه والتقدير

بس البركبو مواصلات زينا ديل يعملوا شنو لو السواق دقس
تبقى علينا دقسه ولحسه فى الغربه ...
غايتو الواحد حابى يقابل مصيرو بى مزااااج يعنى مافى خوف من الموت والحمد لله
وعشمانين فى رحمة ربنا رغم تقصيرنا
وخاتى اسبوتيق انو اكون من السبعين ألف البخشو الجنه بلاحساب شفت كيف
(قل ياعبادى الذين أسرفوا على انفسهم لاتقنطوا من رحمة ربكم ان الله يغفر الذنوب جميعاً إنه هو الغفور الرحيم )
مهما يكون
وبقينا الواحد قبل ماينوم يتشهد ويجهز نفسو عشان يمكن مايصحى تب

احترامى

اللهم احسن خواتيم اعمالنا

احترامى

( قل ياعبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم ( 53 ) وأنيبوا إلى ربكم وأسلموا له من قبل أن يأتيكم العذاب ثم لا تنصرون ( 54 ) واتبعوا أحسن ما أنزل إليكم من ربكم من قبل أن يأتيكم العذاب بغتة وأنتم لا تشعرون ( 55 ) أن تقول نفس يا حسرتى على ما فرطت في جنب الله وإن كنت لمن الساخرين ( 56 ) )

( أو تقول لو أن الله هداني لكنت من المتقين ( 57 ) أو تقول حين ترى العذاب لو أن لي كرة فأكون من المحسنين ( 58 ) بلى قد جاءتك آياتي فكذبت بها واستكبرت وكنت من الكافرين ( 59 ) )

شكرا ملهم يافنان

اليقظة مهمة فى كل الأحوال

مرحبا بله
مرحبا ملهم
قال تعالي
‏[‏ قل يا عبادي الذين أسرفوا علي أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم ]

متكلين علي الرحمة
يارب من القوة لي الهوة

سلام ياعبد الحفيظ أبوسن

وربنا يحفظك ويحفظ الجميع

شكرا د.بله.

وبعضهم يتستهتر بهكذا بوستات.

واعلم انه لوال قلبك المحب لهم جميعا لما استقطعت من زمنك الغالي لتكتب هذين الحرفين او السطرين او المداخلتين.


قبلها كتبنا لكم ايام انهمرت عليكم الثلوج نملكمم شيئا من خبراتنا….ك(كندين) ونحن قلوبنا مقطوعه عليكم بعد ال (قلوبل ورمين) ده!

للاسف كلمة شكر ما وجدناها منكم.




المهم كثر خيرك

باسم كل من رغبت في حمايتهم.


والله يا بله من تجربتي انه ناس العالم الثالث ديل بسوقوا سواقه اجارك الله.

وخليني احكي لك قصه قصيره…..
لماذ ذهبت لاسرائيل حضر بعض اخوتي اللاجئين لاستقبالي

وطبعا اصحاب العربات فيهم معددوين.

المهم احدهم كان يقود سياره …..كاد قلبي ان ينخلع وانا معه من (نمط السواقه)!!
فسالته يا اخي اين تعلمت السواقه قال في (ليبيا) فقلت له لا الله الا لله….لعلمك ما تفعله بنفسك في نظري هو موت جاهز.

وللاسف يبدو الاسرائيلين انفسهم اقرب للشرقين في طريقة تعاطيهم مع السواقه و بالتالي نفس الذعرنه و نفس السبهلليه و نفس عدم الانضابط المروري.

رغم انه شوارعهم تبدو علي الاقل افضل من نمط السواقه بالاردن. التي ايضا تعرف انني اعرفها.

المهم في المره الاخيره وهم سايقين المطار…..قلت له يا اخوي بعد اذنك درب السلامه للحول طويل……اه خليني اسوق براي و انتو ارجعوا بعدين براكم

وفعلا لما سقتهم الجماعه تفنسوا الصعداء……وآمنو بسواقة ناس العالم الاول!!

ربنا يحفظهم وليلداتنا و اخوانا و حبانا……لكن يعلم الله نمط سواقتهم هي موت محقق.

سلام ياتراجى

ماشفت بوست السقط
لكن نحن فى منسوتا وقيل أن منسوتا أبرد من كندا ومن ألسكا..
ولاية فيها 10 ألف بحيرة صغيرة وكبيرة بتتجمد كلها فى الشتاء بالاضافة لأنها تقع فى المنخفض الجوى كما يقول أهلها..
يعنى نحن عاملين زى السمك الخاتنوا فى حوض ومعاه وحوله كمية من التلج..

بالنسبة للسواقة هناك فيالطيف
فى مصر لما الاشارة تكون خضراء العربات واقفة ولما تكون حمراء بتكون ماشة حسب ما اتفق.

شكرا على المساهمة الصهيونية ههههههه

اليقظه مفيده بلاشك ياسيد بله والله ...
مره ماشى فى شارع بتتوسطو جنينه
فيهو بت بتلعب بى هنبوكه بمبيه منفوخة وكبيره
وكان اليوم يوم عطله
كانت معاها حبوبتا كبيره فى السن
كانت الجنينه جمب تقاطع الإشاره فى الحته الانا ساكن فيها
الإشاره بتاعت التقاطع كانت حمره فى اللحظه ديك
طبعا انا جيت انا ماشى بى طرف الشارع
اتلفتا يمين شفت بالونه طايره فى الهوا
البالونه طارت
وركت فى نص الشارع
الطفله جات جاريه
وفى نفس اللحظه الإشاره فتحت ...
البت دنقرت شالت البالونه ...والعربيات ضربت بووورى
الناس وقفت فى حاله شلل تام من المفاجأه
...





الحمد لله انى كنت قريب وانتشلتها فى اللحظه المناسبه لى مكان جدتها
الجده بقت ترجف بطريقه تحيرك ....

شكرتنى
وقالت لى امها وابوها مسافرين ...ماتو فى حادث حركه
البت هسى كبرت واتزوجت ...

احترامى

مهالك الحوادث،،،انها الحروب المنسية...
اما احزاني علي احبة رحلو بالحوادث،،فيصعب ان اتحدث عنها...
ظللت اقود السيارة منذ الثانوي،،سواق لوري...
وقد الاف الاف الكليلومترات ،باسيا،وافريقيا وامريكا كمان...
حذرا،،لم احصل علي غرامة مرور واحدة،،ولم اطلع فوق طوبة ...
ولكن،،،هل يغني الحذر من القدر...
في مصر المحروسة،،وانا اقف في المكان الصاح،،،والصاح جدا،،لياتي واحد،،هو نفسه لا يدري من اين وكيف..
ستة اشهر،،، ويل جير...
وحديد في الارجل...
وقناعة بان الاعمار بيد الله...
واقود الان بكل حرص واكتر
واعلم ان ما اصابك لم يكن ليخطئك
رغم كل شئ
تحياتي واحترامي.

شفت ياملهم
الزول لما يكون سايق المفروض يتوقع كل من حوله مثل هذه الطفلة..

شكرا لشهامتك

سلام ياعبد العزيز

استمعت لدكتور الكيالى وهو باحث اسلامى ومهندس وفيزيائى..
قال أن هناك أجل مقضى وأجل مسمى
يعنى ممكن الواحد يموت قبل أجله السمى بالأجل المقضى!!

شاهد واستمع لهذا المقطع:

Quote: شفت ياملهم الزول لما يكون سايق المفروض يتوقع كل من حوله مثل هذه الطفلة.. شكرا لشهامتك

تصدق انا ماشفتها شهامه فى اللحظه ديك والله ولا وحتى وانا بكتب فى الحصل هسى
بقدر مالقيت نفسى بجرى تلقائياً والله
أكان كدى اهلنا البسطا ديل زرعوا فينا شيتا حلو تب وماقصروا
والحمد عليهو ياسيد بله...

واحد اخونا هنا الله يرحو اسمو عمر ...
كان بيسافر بين البلدان والنجوع فى تجاره مربحه جدا جدا وبقى من قناديل مصر
اتروج من الفيوم وجاب عروس وقعدت معاهو سنتين كده
جاب منها بت واحده
لمو فيهو الجماعات ديل خلوهو قلب 360 درجه
اها من مساؤى قلبتو قفل مرتو فى اوضه وحرم عليها طلوع الشارع
لافسح لاترويح لاغيرو
المره زهجت وطلبت الطلاق
قال ليها خلاص بطلقك
بس بتى مابديكى ليها
قالت ليهو احسن انفد منك بى جتتى دى اهو انت فى النهايه ابوها وحتربيها
طلقا
بيقى يسق بتو معاهو الشغل
واستمر الحال البت عملت 3 سنوات كده بقى مرات يخليها من الجيران
مرات ومرات ياخدها معاهو
البت كلما كلو كلام سودانى طبعا لنها لصيقه بيهو
اشترى ليهو موتر ...وبقى يمشى بيهو التجاره بتاعتو
وجوامع الجماعات
لمن دخل الشتا طبعا هنا الموتر فى الشتا مع الطين ده كارثه
...
...
نصحوهو يركنوا عشان مايحص ليهو حادث لو فى امطار
المهم ركن الموتر وبقى يركب الهايس فى المواصلات
...
يوم ركب ليهو فى هايس جمب السواق والسواق فاتح بى سرعة كبيره
وفى ملف من ملفات الغربيه لبسو ليهم فى عربيه تانيه ...
...
كل الفى العربيه ماتو وهم طلعوهم بعد ماقصو الصاج بتاع العربيه
...
البت منتظره ابوها
لبوها مارجع
...
الجثمان فى المشرحه ....
الجماعه ملصو القروش وخلو تلفون تعبان كده وشوية فكه ونوته
النوته كان فيها عنوان واحد زميلنا هنا
....
استلم الجثمان ودفناهو واتصلنا بى اهلو
وختينا البت مع اسره واحد زميلنا
...
وين ابوى ابوكى مسافر..المصريين كده مابقولو ليها مات
ونحنا بقينا نقول سافر وحيسافر وخلاص بقى ده قرب يسافر
...
فى كميه من رهيبه القروش فى شقتو اختفت لانو ماكان بخت فى بنك وحريص على قروشو
زى ماقال زميلنا الأخد البت معاهو ...
...المهم من نفس النوته اتصل بالسودان ووضح ليهم الحاصل وجاء اخوعمر اخد البت معاهو السودان
بى شهادة الميلاد والإسم والإجراءات بتاعت السفاره...
قال الله تعالى : " إِنَّ اللَّهَ عِنْدَهُ عِلْمُ السَّاعَةِ وَيُنَزِّلُ الْغَيْثَ وَيَعْلَمُ مَا فِي الْأَرْحَامِ
وَمَا تَدْرِي نَفْسٌ مَاذَا تَكْسِبُ غَدًا
وَمَا تَدْرِي نَفْسٌ بِأَيِّ أَرْضٍ تَمُوتُ إِنَّ اللَّهَ عَلِيمٌ خَبِيرٌ "[ لقمان:34] .

اللهم احسن خواتيم اعمالنا وردنا الى اهلنا قبل مانموت فى الغربه دى
وحل السودان من الكابوس النحنا فيهو ده..فرحنا قبل مانموت يارب

احترامى