جريمة بمستشفى (السلام) الخاص بالخرطوم

منقول من الفيسبوك

لاحولا ولاقوة الا بالله....جريمة بمستشفى (السلام) الخاص بالخرطوم .... توفي مساء امس صديقي حسن ابراهيم ( حسن كديس ) وهو يسكن جبره الجديده بالقرب من شارع الهوا وهو دفعتي تم الاتصال بي من قبل اصدقائي حوالي السابعه صباحاً وابلوغني الخبر فسألتهم دفنو ولا لسه قالو لي لي لسه ليه قلت ليهم قالو لي الجثه في المشرحه المهم ما طولت الكلام وركبت عربيتي ومشيت المشرحه وكانت المفاجأه احس المرحوم صباح امس بألم في بطنه وذهب الي مستوصف السلام وشخصو له مرضه بالزايده ، دخل العمليه علي الفور حوالي الساعه الثانيه ظهراً بعد المغرب وبعد ما فاق من البنج جاهو الدكتور وقال ليهو الحمد لله استأصلنا الزايده وطبعاً كانت انفجرت ونضفنا ليك بطنك وانت حسي تمام التمام . بعد اقل من ساعه من هذا الكلام بدأ حسن بالتوجع واتت الممرضه وادتو حقنه لتسكين الالم ولم يتوقف الالم وبعدها تاني حقنه وتالته ورابعه والكل يبحث عن الطبيب ولا يوجد طبيب وبدأت بطنه في الانتفاخ لحد غير طبيعي جاء طبيب امتياز وادخله غرفة العمليات لفتح بطنه ومعرفة الحاصل شنو وبينما هو بغرفة العمليات اتي الطبيب الجراح الذي اجري له العمليه وهو الدكتور مصطفي سيد احمد وهو مشهور علي نطاق الجراحه في السودان المهم قبل ما يدخلوهو غرفة العمليات للمره التانيه وبعد انتفاخ بطنه بدأ الدم يتدفق من فتحة العمليه وبغزاره حتي ملأ السرير وارضية الغرفه تماماً فجأه خرج الطبيب اثناء العمليه التانيه وقال دايرين دم يا ناس اهلو دايرين يمشو يجيبو دم لكن فصيلتو غير معروفه !!!!!!!!!! ما عملو ليهو اي فحص قبل العمليه المهم بعد مجابدات وشكل وكوراك مشو وجابو الدم وعندما رجعو المستشفي لو الراجل اتوفي وهرب الدكتور مصطفي اصحاب المرحوم رفضو يستلمو الجنازه وفتحو بلاغ وناس الادله الجنائيه جو وعملو العليهم ونقلو الجثه للمشرحه التقرير الشفهي لدكتور عقيل مدير المشرحه بأنو ما لاقتو فظاعه زي الشافها جوه بطن الزول ده طيلة فترة تشريحو وانو الزول ده ما عندو زايده وما اتعملت ليهو العمليه بتاعت الزايده اساساً وانو لقو تلاته شرايين رئيسيه مقطوعه تماماً وانو معدتو مليانه بحوالي 2 لتر من الدم وانو بطنو كلها مشرّطه بالمشارط من الداخل وحتي كمان استأصل جزو وارسلو للمعمل لتحديد الخدوش والجروح الحصلت علي الجزو ده المهم تقرير المشرحه لم يسلم لزوي المرحوم وتم تسليمه للشرطه نسبه لفتح البلاغ من زوي المرحوم المستوصف هو مستوصف السلام وتقريباً قالو بالقرب من المستشفي الكويتي ده الحركه المتكرره من المستشفيات الخاصه بصوره مستمره ومن الاطباء المستهترين برضو تخيلو زول يمضّوه علي تحمل جميع مخاطر العمليه ويدخلوهو عمليه وما يعلو ليهو فحص دم لمعرفة فصيلتو لا اله الا الله وانا لله وانا اليه راجعون للمرحوم والطب في السودان والساده المسؤلين عن الطب في السودان اتمني انو المستشفي ياخد جزاتو والدكتور كمان عشان تكون عظه للبعدهم والقبلهم يا رب تقبلو بواسع رحمتك يا رب انه حال البلد في عهدكم ياكيزان وكلوا في ميزانكم بإذن الله .. هسي بس يقولو شنو؟؟؟ والله ماف كلام .. and#8235;#‏ود_كسابand#8236;

نسأل الله له الرحمة والمغفرة

غايتو الله يعين أهلنا على البقى يحصل في السودان

_______________________

هسع يجوك ناس يقولوا ليك المعلومات دي غلط ومافي حاجة زي دي حصلت !

نرجو من الجميع الوقوف بحزم وصلابه لتبيان الحقيقه...
وقفة تجبر اية عابث بحياة مريض ان يتردد الف مرة قبل العبث...
ونريد الحقيقة واضحة بغير دغمسة...
نحن نعلق علي ما جاء هنا،،ولكن نريد نشر التقارير،،،
وعندها لكل حدث حديث
فنرجو التقرير الطبي،تقرير الوفاة والتشريح
اللهم ارحمه،وتقبله
ولا حول ولا قوة الا بالله,

اكاد ان لااصدق مااقرأه ....معقول للدرجة دي!!!!!!!!!!!!!!!!!!!!!!!!........شكرا لايراد اسم الدكتور والمستشفي ...اذا كان الامر كما تفضلت فهذة جريمة قتل وليس لها علاقة بالطب ...

بعض التفاصيل لايمكن ابتلاعها منها حكاية عدم اخذ فصيلة الدم ..طبعا لايمكن عملية من غير معرفة او تحديد فصيلة الدم ومع انو الان بطاقة الرقم الوطني تحمل فصيلة الدم ...
ومنها حكاية الدكتور يقصد تقطيع بطن المريض لانو ببساطة لماذا يرتكب جريمة وبشهود من ممرضين ومساعدي اخصائي !!!!!
نتمني التحقق من الرواية وايراد صورة من التقرير الطبي لاسباب الوفاة واعتقد ان اي شخص من هذا المنبر ما ح يقصر في تصعيد القضية الي اقصي درجة ...

لا حول ولا قوة الا بالله
الامور في سودان الكيزان وصلت حدا لا يمكن السكوت عليه ومن لم يمت بالفوضى التي تسرح وتمرح في المستشفيات مات بغيره
والله ما باقي غير يعملوا مرصد زي المرصد السوري لعد وحصر من يقضون بسبب فشل وفساد الكيزان

اخبار عازة

‘نا لله وإنا إليه راجعون

رحمه الله رحمة واسعة

***

يا زمراوي ، المرحوم دة ياهو حسن كديس بتاع قرية 15 بحلفا الجديدة ؟؟؟؟؟؟؟؟

Quote: هسع يجوك ناس يقولوا ليك المعلومات دي غلط ومافي حاجة زي دي حصلت !

العزيز زمراوي البركة فيكم و العزاء موصول لاسرة المرحوم.

من سرد الاخ زمراوي وسرعة تدهور حالته وإنتفاخ بطنه ,أرجح إنقطاع شريان كبير.
هذه كارثة يجب محاسبة الجراح وفصله من المجلس الطبي مهما كانت شهرته ومحاسبة إدارة المستشفي إن ثبت ما جاء بالتشريح من حقائق.

رحمه الله واحسن اليه والهم اله وذويه الصبر والسلوان

إنا لله وإنا إليه راجعون..

الاخطاء الطبية اصبحت معتادة ولا احد يحاسب ..

ولكن هناك نقطة لم استوعبها وهي تقرير دكتور عقيل الشفهي...

ولا اعتقد ان دكتور عقيل يمكن ان يصرح او يعطي تقرير شفهي والامر اصبح امر تقاضي...

والله اعلم

العزيز زمراوي البركة فيكم و العزاء موصول لاسرة المرحوم.

والله كل ما اقول اخد اولادي وامشي السودان نهائي نقرا جنس
المآسي دي نغير راينا..الله يجازي الكيزان بقدر ما اجرموا في حق
الناس والوطن..

له الرحمة والمغفرة ولكم واسرته احر العزاء

رحمه الله واحسن اليه والهم اله وذويه الصبر والسلوان

إنا لله وإنا إليه راجعون..

متى يكف الدكتور عقيل من الثرثرة للصحف فهو يضر بقصايا الضحايا
فبجهزون دفوعاتهم مسبقا

ولا حول ولا قوة الا بالله

مع حسين خوجلى الموافق 21 يناير 2014

مصطفى سيداحمد جراح ممتاز و يتخرج على يديه جراحين يعملون في كافة ارجاء العالم.
في حالات انفجار الزائدة تكون احتمالات الوفاة عالية،
كيف يمكن أن يقول مسار مصطفى أن الزائدة انفجرت و انهم ازالوها ثم يأتي الطبيب
الشرعي ليقول أن الزائدة لم تكن ملتهبة أساسا ؟
التحقيق فقط هو الوسيلة للوصول للحقيقة و عموما كل شي جائز الحدوث في ظل الانهيار الشامل
الذي الم بالسودان!
رحم الله حسن و أحسن اليه.

زمراوى الولى ..
البركه فيكم وجبر الله كسركم والبقاء الله

Quote: مصطفى سيداحمد جراح ممتاز و يتخرج على يديه جراحين يعملون في كافة ارجاء العالم.

الدكتور مصطفى طبيب جراح معروف وشاطر جدا
عندو وحده باسمة بمستشفى ابراهيم مالك وهو مدير مستشفى سعد ابو العلا منذ سنوات .. طبيب انسان بمعنى الكلمة وما أعتقد انو ممكن يتصرف تصرف زى ده نهائياً ..
عندى تواصل معاه بتصل بيهو واجيب ليك القصة الكامله ..

أين الإعلام مما يجرى ، لماذا لا يكون هناك برنامج
مثل الثامنة التى على mbc لنقل أدق التفاصيل للمواطن
السودانى .
سمعت ايضاً عن عملية توليد عادية توفي فيها الجنين نتيجة لعدم
خبرة الطبيب ثم توفيت الام مساءاً فى نفس اليوم ..
فقط كانت عملية توليد عادية ..

والله يازمراوي وصلنا حتي ما بنقدر نرجع تاني لانها نزلت الهاويه من الصعب رفعها تاني لي فوق

ده حال الاطباء ...لاحولة ولاقوة برضو تقولي ناسنا ديل كفار....والله ديل ملائكة عدييييييييل كده !!!

بس ما وريتنا حسن كديس ده منو الله يرحمة ويحسن اليه ؟؟؟؟

الله معاك يامجج

اللهم أرحمه و أغفر له
أخشي يخشو الاجاويد وتحصل التسويات , سمعت بقضايا كهذه تنتهي ويمارس الطبيب عمله
يتنازل أولياء الدم بفعل ضغوط الناس او بقبول التسوية المادية لسؤ الحال الاقتصادي
هل يمكن ان تتحول تلك القضية من حق خاص لحق عام ?

Quote: أوضحت مصادر طبية أن المتوفى حسن الذي فارق الحياة، بمستشفى "الثناء" الخاص، التابع لنقابة العاملين في وزارة التخطيط العمراني، حدثت وفاته نتيجة خطأ طبي من قبل الطبيب الذي أجرى العملية. وأفادت تحريات "التغيير" أن فريق التفتيش الذي ابتعثته وزارة الصحة الولائية للتحقيق حول الحادثة وجد أن المستشفى الخاص من غرفة عمليات وعناية مكثفة ومصعد، به خلل في التشغيل، ونقص في كوادر التمريض والأدوية. كما وجد الفريق أن المصعد مقفول لتقليل التكلفة، ولا يسمح له بالعمل إلا نهاراً، مما استوجب نقل المتوفى وهو في حالة خطرة عبر السلم، وعلى إثر هذا، قرر وزير الصحة الولائية إغلاق المستشفى، وإعادة النظر في المستشفيات التابعة للنقابات والاتحادات المهنية، والتي بدأ بالفعل تقييمها منذ العام الماضي. وأكدت مصادر مطلعة لـ"التغيير" أن تشريح الجثمان قد أوضح أن هنالك شرايين قد قطعت بواسطة الجراح الذي أجرى العملية، مع وجود ثقوب في الأمعاء الغليظة، مما أدى إلى النزف داخل تجويف البطن وعبر الشرج، مما عجل بالوفاة. ورفض الطبيب الذي قام بالتشريح تأكيد هذه المعلومات أو نفيها، بحجة أن الموضوع أمام القضاء. يذكر أن الجراح "م.د" جراح له خبرة فوق العشرين عاماً، ما يثير الشك في أن هنالك طبيباً آخر تحت التدريب قد أجرى هذه العملية الجراحية بدلاً عنه، وفي حضوره، لأن عملية الزائدة الدودية من العمليات السهلة التي يستطيع أن يؤديها طبيب عمومي حديث التخرج.

بما أن الأمر حدث في مستشى "الثناء" وليس "السلام" فعليك بالاعتذار للأخير.
الرحمة للمتوفى، وأرجو أن يكون الحكم رادعاً حتى لا " يلعب" الأطباء في السودان بأرواح الناس.

حادثة مماثلة حصلت لاحد ابناء ( سورتود ) في احدي المستشفيات الخاصة بالخرطوم .

Quote: بس ما وريتنا حسن كديس ده منو الله يرحمة ويحسن اليه ؟؟؟؟

اعتقد من ابناء لبب بالشمالية .. رحمه الله والهم زويه الصبر

لا حول ولا قوة الا بالله ..
رحم الله الفقيد واسكنه فسيح جناته مع الصديقين والشهداء وحسن اولئك رفيقا ... حقيقة تعجز الكلمات ..
الى هذا الحد انحدرنا .. الى هذا الحد لاقيمة للانسان فى بلادى .. هذا سوء يفوق حد الوصف ..يجب ان يتم التحرى فى هذه الحادثة ونشرها للجميع .. للحفاظ على الاحياء المتبقيين الذين ربما ينعاد عليهم نفس السيناريو ..
قضية مثل هذه ان صحت حدوثها واذا كانت الامور صحيحة فى بلادنا فبسببها يمكن ان يقال وزير الصحة لا بل يجب ان يحاكم بدءا به وان ينال الجزاء كل من شارك فى هذه المأساة لابل يجب تقال بها كل الحكومة وكل مسؤول له مثقال ذرة من الاحساس والخوف من الله .. اقدار الله لا جدال فيها .. ولكن الاهمال هو الذى يجب ان يبتر ..

لاحولا ولاقوة الا بالله

له الرحمة والمغفرة
فوض واهمال وعدم مسؤلية

ربنا يرحمو ويتقبلو قبول حسن إن شاء الله وأتمنى أهلو وأصحابو ما يتركوا حقو ويواصلوا فى القضية للآخر.

فى نقاط ما واضحة وأعتقد نتيجة للظرف كاتب الخبر ما أوضحها كويس:

هل المستشفى خاص ولا حكومى؟ وإذا خاص الجاب طبيب الإمتياز شنو؟؟!

تقرير التشريح ما أظن يكون شفهى لازم طبيب التشريح يذكر نتيجة التشريح كتابيا"
بعد إكتمال كل الفحوصات.

كيف مريض يدخل عملية تحت البنج العام وما معمول ليهو فحص لفصيلة الدم؟!

لا حول ولا قوة إلا بالله

والله الواحد يبكى حقيقة لامجازا لما آلت إليه حال البلاد والعباد..

والله كلنا دون استثناء مسؤولون عن ماحدث ويحدث لبلادنا وشعبنا..

اللهم تقبل المرحوم عندك شهيدا قتل غيلة وظلما وتقصيرا.