رساله خاصة للزول المولود في تسعه شهور وعشرة ايام

تحيه صباحيه وارجو ان يصلك مكتوبي ان كنت تهتم او لا ويجدك بخير
معليش عارفه انو زمن تقرا فيهو كلامي دا مافي بس عليك عزازك كان م تميت مكتوبي للاخر وكلامي دا يعلم الله حبة الزعل مافيهو بس فيه شوية محاسيس خاصاني دايراك تسمعه اول التبادي بقلبك ثم بعد ذلك اعمل فيها راسك فكرا ولو جا علي بالك بعد تخلص تسب لي حيث اني خيل لك خلخلت ماكنت تعتقده فاعرف اني سامحتك لوجه الله ..اساسا المسامح كريم والكريم الله وانا زوله خلقه الله وجابوني بشر اي زيك تمام ام واب المهم في فرق في ولادتنا يمكن يخليك تقول انا احسن واخير وابرك حيث انو امك لمن قربت ولادته كانت مبسوطه وفرحانه وتجهز لا خلت جهاز طفل لا خلت ديكور لا خلت ملايات وتياب وخبائز واللازم منو وابوك زاتو منتظرك تجي بفارغ الصبر وكامل الترقب ويشيل ويدفع في قروش التجهيزات ويصمد في قروش السمايه ويمكن كمان يكون ولدوك في مستشفي دريم دفعوا ليك عشره مليون بس حق الولاده وكمان كان م ولدوك الا في مستشفي حكومي بكون دفعوا برضو وبرضا ويمكن زغاريد استقبلوك بيها اهلك كان وليد والا بنيه
وسامحني للاطاله اصلو السمح بعجب اما وان دار محور السوال عني تماما بختلف الوضع مايجعلك مميزا عني فطوال شهور حمل امي بي تسب وتسخط وتلعن اليوم الشافت فيهو ابوي او المفروض انو ابوي حيث حملتني دون رضا وكبرت باحشائها وهي تحاول مرات ومرات قتلي دون فائده وخوف من يوم ولادتي بل وذهبت بي للدايه عقاب ليل واتيت للدنيا واظن اول شي عملو لفوني في ملايه قديمه وختوني في كرتونه وجدعوني قريب جامع بعد داك سقط عن ذاكرتي تفاصيل م حدث
وياسيدي الزول انا زول زيك استحق العيش الكريم فلست بجان لتقصدني بالعقاب
انا تماما زيك م اخترت ان اكون في هذا الحيز الوجودي بس جيت فيه
كتبت امله ان تكبر بداخلك رغبة في النظر الي دون ان تتهمني فلا اعرف من ابوي وليس ذلك ذنبي
اخيرا وليس اخرا ارجو ان تتاح لي فرصة الرد عليك ان رميت برسالتي هذي في سلة المهملات
وتقبل خالص تقديري انا العاوز اكون زول ايجابي
والسلام ختام
التوقيع زول عاوز يكون زول كامل الانتماء

يبدو والله تعالي اعلم اني سرقت فكرة الرساله من الرسائل التي تقوم بكتابتها الجميله حاجه امنه بس اختلف الراسل والمرسل اليه وعنوان البريد
مع خالص الود ليها

مها،،وحاجة امنة،،انثرا فينا ماتشاءن ،،تشرقان بالحرف،،تذهبان بالخيل حيث للضوء سوح وعشب وماء..
يا مها،،،ما وقعت عيناي العمشي علي حرفك،،حتي يممت وجهه،،فهو مضئ لاعمش مثلي.

سلامات صاحب الحرف الندي
عبدالعزيز عثمان
شكرا كتير وحاشاك العمش
معقول زول يكتب غاب جدي خمسين عام ويقول عمش !

سلام يا خية
كل الناس اولاد تسعة إلا قليلا جنا سبعة وبعيش , لكن ود تمنية ما بعيش اكوردينق لكلام حبوباتنا
من اللاخر ما وقع لي كلامك
مع اكيد الاحترام

سلامات عبدالحفيظ
اساني ان البعض ينظر الينا ككائنات طفوليه ونعاقب علي وجودنا دون النظر الينا م اذا تمت مشاورتنا في المجي الي دنيا البشر هذي
نحب فنمنع عمن نحب لشبهة النسب
نمشي في شارع الله فياشر علينا بوصمة
تقبل التحيه
الامضاء زول عاوز يعيش كويس

سيدي الزول المولود في تسعه
ماعارفه ليه كتبت لك انت دا دون خلق الله كلهم بس ياهو الحصل امر الله نقول عليهو شنو
لله في خلقه شئون !
المهم انت ضبحو وعزمو الناس علي يوم سمايتك انا لا .
اختارو لي اسم ساي وكتبو في سجل شهادتي ...انت شالتك خالتك وعمتك وحبوبتك !او حبوباتك
انا لا
شالتني يد رمتني في الكرتونه ورفعتني يد العسكري لمن لقوني في الشارع ال###### قرب ياكلني بدل المبروك قعد يقول الله ينعل الام الرمتك الرميه دي
المهم انت محظوظ بكل المقايس ابتدا من يوم اكتشاف اهلك انك جنين بدا يتكون وطبعا لا يفوتني ان اكد اني ابدا لا احسدك او احقدك علي شي بس بفتح عينك علي حاجات تكون ماشايفه ...ويعلم الله في سماه انا متحيره زاتي ليه اتولدت بس الله عنده حكمه بتظهر اكيد
اسمح لي اولا في الاعتذار تاني كان خلخلت جواك شي
بس م نحن بنشبه بعض في كوننا ولدنا بشر !
تصدق محاسيسي مجروحه من نظرات الشفقه البشوفه في عيون الناس هسي حاساها في دموعك وانت بتقرا كلامي دا ...بس دا م كان قصدي من الرساله
عاوزه اقول عاملني زوله زيك اختبرني ياخ مامعقول انا يعلم الله تعبت تعبت
وقبل الختام تقبل امنياتي في ان تجد ماخطته دمائ عندك نظرة عداله مادونيه
وكن بخير

الرسائل محاولة كتابة بلسان اطفال مجهولين النسب ..

مكرر

مكرر