فيديو محبط جدا

أتاني فيديو محبط جدا علي الواتس اب , وهو حوالي 4.5 دقيقة , اولاد وبنات في رحلة , شكلهم اولاد حلة واحدة
اولاد عادين ,, ما اثرياء ,,, ابناء الاحياء الوسطية والشعبية
برقصو سلولوي بشكل جنسي , ولا يخافون من كاميرا المصور , والانكي بنتين برقصو مع بعض وواحدة بتقبل التانيه ,, بتبوسها

قديم بتاع رحلة جبل اولياء صح ؟؟؟

يا اسامه
كيفك
ماعارفو والله , جاني اليوم
ماعارف رحلة وين
لكن واضح جدا , وهظار المصورة مع الراقصين وتفاعلهم معاها
ورحلة فقيرة , مافيها فنان , مفرش بس ,, زي اي رحله بتاعت شيرنق لناس تعبانين , مافي عربيه جمبهم يكونو مؤجرين هايس
احبطت والله
وقررت لو واحد من اولادي ماشي رحله ما بسمح ليهو ولو كانت مدرسيه

اسامة لا ما حقت جبل اوليا , عملت بحث وشفتها ,,, لا ما ياها
ديل برقصو علي حس مسجل اتنين اتنين وبتين برقصن سوا ,, ولا تجيهم الكامرا ببوسن بعض زي مرتين كده

من النفاج
آمال يا خية
حزين والله
حزين حد القهر
ديل اولادنا
كادحين زينا
ما اولاد اثريا الحرب والكوارث المدعومين بسلطة ابهاتهم ومالهم
ظاهر من لبسهم العادي والمحترم
وفقر رحلتهم

اللهم (نسألك) رد القضاء واللطف فيه


ما باقي غير الدعوات


والله يجيب العواقب سليمة


الحبيب ودابسن تحياتي

دي رحلة بتاع الهلال داك ؟؟؟
بكري المدينة
خلي الناس ينبسطوا ياخ
ما أكتر من القرف الحاصل في أي حاجة


تحياتي مثنى وثلاث ورباع

حفيظنا ...
كل زمن فيهو مصايبو لكن مصايب الزمن ده بقت اونلاين ياصاحب ....

وهلم جرا

الجنيد يا صاحب
بقينا في اضعف المقاومة ,,, صادق الدعوات
وربنا يحفظ ولايانا واولادنا

بدر يا اخوي دي ما انبساطة ,, دي قلة ادب ودمار
ده انهيار لقيم الطبقات الوسطي واللهي قيم شعب كامل
ولك التحايا

ملهم يا صاحب
عيب والله يا صاحب ,, وأكيد هسة في مشاكل داخل بيوت البنات والاولاد ديل , صورهم واضحه جدا , والرقيص داعر ,, متلاصقين شديد ,, وتاكلين روسينهم في كتوف بعض والولد ماسك البت من النص وبضغط فيها علي جسمو
وواحد تاني ماسك واحده بي وراء بشكل حميم ,,, ياخ حاجه مقرفه ومحزنه
زمان منازل اللهو كان الناس بخشوهو وخجلانين

يا عبدالحفيظ يا أب سن يا صديقي
الحاصل إنو في كبت رهيب جداً
وفي مثل هذه الحالات دائماً تنقد محل رهيفة
في الكبت المبالغ فيه تحدث أمور أسوأ من الشي المراد محاربته
مثلاً في الدول التي تفرض قيوداً صارمة على ظهور المرأة
تجد ظاهرة الشذوذ الجنسي
يعني يسدوا فيها بي جاي تنقد ليهم بي حتة تانية
في رأيي إنو الناس ما يحاربوا الحاجات دي
يخلوها تاخد راحتا تمااااام بعدين الناس بطنن بتطم وبخلوها براهم
لكن تقعد تساكك في الناس في الحفلات ودي لابسة ودي ما لابسة
بسووها ليك مكاجرة ساي
والله بكرة بعد بكرة يجوك أم فكو

النظرية يا أب سن: جنيهك دا أكان وقع بتقع معاه حاجات كتييييرة

من النفاج
حبابك عاصم الحسين
اللهم آمين
اللهم استر عوراتنا واقل عثراتنا

السلام عليكم ورحمة الله ..
فعلاً فيديو محزن جداً جداً .. والغريبة هم شايفين الحاجة دي عااادية ؟؟!!!

وللأسف في فيديو تاني حا يجيك قريب .. اها دا ممكن اسبوع تكون حزين ومستاء

والله غاااالب

وعليكم السلام ورحمة الله تعالي وبركاته
حبابك عمر
آي قريت في الراكوبة وفي بوست الاخت نجاة عن 5 شباب يغتصبون بنتا ,, فقبل ان افق من دهشة الفيديو احبطني ما قرأته
والله حاجات تخوف

يا حفيظ ..

طولنا منك يا زول .. غتست وين ؟

الشي التاني : انت زعلان مالك ؟
يعني الناس دي ما تفرّق أصلو ؟
بس يظلوا كدا رافعين الراية البيضا ..و ناس تسرق ؛ و ناس تستنزف في البلد ..
و المساكين ديل دايرين تمنعوهم حتى حق الرقص و ( البوس) و ( إلتحام الأجساد) ؟
فقرااااااااااااااااااااااااء
لما ما شبعوا عيش خلوهم يشبعوا (حنان) ..

الشي التالت : ياخي مش السيد الرئيس ليه باع طويل في المجال دا ؟
رقاااااااص و بتاع ( جبجبة ) كبير ؟

تيب !!

بالجد الواحد بقى محبط شديد من الدرك الوصل ليه حال البلد

مرحب عبداللطيف
وسعيد برؤيتك هنا
آي مافي خلاف ,,, الناس علي دين ملوكهم ,,, شباب شايفين انهم بيفوطوهم في الوظيفة والتعين ,,, وحتي الامتيازات لو كان موظف ,,, وبشوف نمط الحياة الاستهلاكي الفاخر من علية القوم والمسؤولين ,, والافلات من العقاب والكل مباح للبعض
,,,‏ ولا يحفظ الرئيس هيبة منصبة ولا جديته ,, ثم ينسحب ذلك علي الولاة والمعتمدين

بدر يا صاحب
الأخلاق دي ما معلقه في الهوا ساي , عندها مؤثرات بتأثر فيها وبشكل عميق , وهي البتغيرها ترقيها او تحط بها
لكن برضو لامن القيم تكون حميدة وعميقة بتقاوم ,, مثلا هسه استشري الفساد والرشوة بقت هي الاصل , والبيابا الرشوه عوير و داقس ,, لكن برضو في ناس برفضو الرشوه وبتحملو تبعات قرارم فقر وتشريد
انا قلت لبسهم محترم ومهذب لكن فعالهم شينة
ماممكن نخلي التيار يسوقنا , لازم نقاوم ,,, نقاوم المد المساهمه فيهو الحكومة ده ونحفظ قيم هذا الشعب ,
اكيد المودة

الله المستعان
عمل مقرف وهذا ما وصلنا له بعد كل تلك السنوات .
والعار لدعاة المشروع الحضاري واسلمة الدولة ، اين هم من تلك ا لممارسات التى لاتتناسب مع شعبنا ؟
الشباب اليوم في وضع نفسى وسئ للغاية ويجب انتشالهم من تلك الاوضاع وفتح مراكز التعليم المهنى والتكنولوجى مجانا لهم وإعادة ترتيب اوضاعهم الاخلاقية .
مع احترامي

من النفاج
آمال ياخية
واحدة من طرق تربيتنا ما نختهم في موقف امتحان ,, شفت بت في الفيديو رفضت الرقيص ,, وحنسوها ,, قبلت ورفضت وتاني حاولوها
بنربي اولادنا علي الثقة في النفس , والصاح والغلط , وبنديهم حرية تتناسب مع عمرهم ,, حرية مقيدة بمراقبتهم في كيفية استغلالها ,, وعقابنا بمصادرة الحرية او تقيدها حتي نثق في حسن استغلالهم
وفتح عقولنا لهم ونقاشهم
وانا بكتب في بالي النشر الفيديو , ولكن السلوك اسوأ من النشر ,, فالنشر رغم خطأه فقد فضح السلوك الخاطئ وداير وقفة , بالمناسبة ممكن يكون تم النشر بشكل برئ , عبر تناقل المقطع بينهم ,, وانسرق ولا راح موبايل واحد فيهم ,, ولا مرق من الشلة لصديق له اصدقاء من خارج الشلة
رأي في التصوير عموما او الاحتفاظ بمقاطع او صور شخصيه جاهرت به هنا ,, غلط
مع اكيد التأكيد علي صمود هذا الجيل وثوريته , ولكننا مقصرين ,, في بذل النصح له وفي الاسوة الحسنة وفي نقده والاساءة له
مع اكيد الود

عمر
محمد صديق
فتح العليم
حبابكم
وشاكر لكم تداخلكم في هذا الوجع

Quote: إنّ النظام الذي يقمع حرية الإنسان في الرّأي والإبداع والضمير والوجدان، ينتهي عاجلا إلى تدمير الشّرط الأوّل للأخلاق، والذي هو الحريّة. أي نعم، الحرية هي أساس كل نظام أخلاقي. لماذا؟ بالجواب الديني لأنّ الحرية شرط من شروط التكليف، بزوالها يرفع التكليف وتزول المسؤولية الأخلاقية عن الإنسان. وبالجواب الطبيعي لأن السوط يشوه الفطرة ويفسد الضمير، وينتج في الأخير مجتمعاً من المنافقين والمحتالين والمخادعين.

سعيد ناشيد

لاحوله ولا قوة الا بالله العلي القدير
اللهم احفظنا واحفظ ابناء المسلمين

عبد الحفيظ .. يا دفعه .. سلام

يبدو ان المكان .. هو غابة السنط .. حيث المتنفس الوحيد للخلط ..
اها .. الحكومه .. اكتشفت .. انو هذا المكان ... بقرة حلوب
وبقت تفرض رسوم على الداخلين .....
شفتا حكومتنا مفتحه .. كيف .....؟؟؟
عندهم المهم .. القروش ..
الاخلاق نوط ابيق ديييل .....

تحياتي ,,,,

مجيدو يا دفعة
وتوقع ان يتم حظر الواتس اب كعلاج لما حدث
وكما يقول القانون الاستهلاكي
ليت هيم ورك ليت هيم باص
بدر يا صاحب
تسجيل اعجاب
فالحرية شرط التقدم ,,, التقدم علي المستوي المادي و الروحي
تسلمو
بل
تسلما

فيديو الإغتصاب الله لا وراني ليهو ,,, لكن الهدف شنو ,, وزي ما بقولو الشباب الفهم شنو
جهل بالقانون توثق لجريمتك
ولا محاكاة للأفلام الامريكية البتحكي قصص عن بيع مقاطع الاغتصاب ولا القتل
ولا كانوا مساطيل
ولا شنو بالضبط
وكما تعرف بعضهم علي احد الجناة كما قرأت في احد البوستات هنا
لا بالجد ليه ?
إيه البحصل ده
فشل المشروع الحضاري فشلا ذريعا لعجز ولاة الامر ومنظريه من تطبيقه
واستهانتنا بتاريخنا ورموزنا

من النفاج
حبابك محمد سليمان
لا أظن احدا يرغب في إشاعة الفاحشة ,, فالنفس السليمة تأنف من ذلك
وفعلا كانوا يعشقون التصوير دون حرج

التعريف الغربي للإغتصاب يحمي المرأة والطفل ,, وهو تعبير اكثر انسانية
والاغتصاب لا يعني عندهم ممارسة الجنس بغير رضي
يا ريت واحد يفيدنا بتعريفهم للاغتصاب
معلوماتي غير دقيقة فهي سماعية ومشاهدة قنوات وقراءة حوادث

ياصديقى
ان الإغتصاب الذى حدث لم يكن ليعرف به احد
ولكن الإغتصاب الحقيقى كان فى تحدى المجتمع وبجاحه النشر والتفاخر بالفاحشه
وعلى المجتمع ان يأخذ رد فعله الطبيعى .... فى المطالبه بتغليظ العقوبه ...

لربما كبحت فى المستقبل بعض المنحرفين الآخرين من نشر افعالهم بهذا التحدى المعيب للمجتمع
يعنى العقاب حيسوقنا لى حته ...
البيعمل فاحشه ياشباب يعملها كتامى وماتتبجحوا بيها بين الناس ياوهم

الخلاصه فى حسن التربيه والسلوك القويم ياعبد الحفيظ ...

صبحك الله بالخير وراحة البال

سلام يا ملهم يا صاحب
وربنا يغطي عليك
القول قولك
انستروا ياخ حتي لا تشيع الفاحشة الاصلها بقت مطلوقه ساي
تعرف بحكي لي ود اختي وهو مهندس دووبو , يعني ود سغيير
بحكي لي عن مقاطع فيديو شخصية كميات ,, بنات برقصن براحتن وبراهن ,, في داخليه ولا اوضه فجأة تلقي الفيديو منتشر ,,, هن غلطهن في التصوير بس وتسرب الفيديو بشكل ما , تناقل مقاطع الفيديو ونشرو ,, واهو زي ما حكي واحد ,, واحده في بورتسودان خطيبها السابق نشر صورها وفرتقو العرس وانفضحت الاسره ,, شنو ثقافه كشف الحال دي ,, لا حولا لا قوة الا بالله ,, ونحن الكنا مأمونين علي بنوت فريقنا ,,, تقل ادبك بره حلتكم ,, وبنات الحله يخافن منك لأنك صعب وفقري
لا بالجد لازمن من عقوبة رادعة لمجرد النشر بس
شفت بنات برقصن بملابس عاريه , وهن في خدرهن وداخل بيوت سودانيه عاديه , صورتها صاحبتها ,,, ياخ انعل ابو الموبايلات امات كمره وامات بلوتوث

ده السودان الجديد..

Quote: وتوقع ان يتم حظر الواتس اب كعلاج لما حدث

استاذي ابو سن
تحياتي
هذا هو المشروع الحضاري .. يطيح ويسقط علي الأرض
ليس هناك خلاص أو علاج الا بإساقط وكنس هذا النظام
يا سيدي من يغتصب يفعوا عليه رئيس الدولة

فالموضوع ليس حصرياً علي الشباب وال على الجنسيات الاخرى
هناك من هم أكبر سناً يمارسون هذا السقوط برضاء تام بضحكات وإبتسامات سودانية
لاسف هذا ما يحدث تحت اسباب كتيره في مجملها هذا الخراب الذي اصبح يعلو كل شي
استاذي لم نكون في يوماً من الايام هكذا من فعل في هذا عليه الأن وفوراً ان يرحل
ولا سبيل ان أن نعمل علي ذلك

تحياتي

سلام حفيظ

( الكنا مامونين علي بنوت فريقنا. تقل ادبك بره حلتكم) هل هذا وضع امثل. واين هذه البره؟ حله أخري ليس بها مامونين؟ اتفق تماما أنو بنت الحله تتحاشي الشينه لتماسك أولاد الفريق

هذه مداخلة من الصديق دكتور صلاح بلول ,, وهي مداخلة ذكية
نعم الحلة التانية برضو فيها اولاد حلة بكسروك لو شافوك لافي بي فريقهم , لذا تماسك المجتمع

انه سودان الكيزااااااان لعنهم الله

لقد عن لي يا صاحبي
أنا من كثافة الإحباطات فينا
أن نقوم بعمل جمعية للإحباطات
حتى يمكننا أن نلملمها أمامنا جميعها
فتقتلنا وترتاح
فتسرح وتمرح في هذه الدنيا العريضة
حيث لن تسمع عقب ذلك
أي إشارة إلى وجود إحباط
هكذا ضربة لازب أو كما قيل...


وإنه يا صاحبي
فن التربية الحديث
تعويد الناس على الأشياء التي كانت تزربها القيم
حتى يعتادونها فيفعلونها أو يرونها
فلا يستنكرونها أبداً



دع (فيديو) وأطلق (محبط جدا) وحدها في هذا الفضاء...
فما أكثر الإحباطات وما أقل الحيل



تحياتي، محبتي واحترامي

شكرا يا صحاب
جاييكم

حبابك البراري
مرحب بيك يا صاحب
اعادة صياغة المواطن السوداني ,,, شوف الهمبوبة الكبيرة دي طرشقت كيف
اول ناس طرشقوها هم زاتم , الناس تتحدث عن فساد المتعافي مثلا والسيد الرئيس يدافع عنو
يتظاهر الاطباء ضد مامون حميدة ويثبتوهو غصبا عنهم
وبعد يتحدثوا عن الشوري
يحاكم القضاء مغتصب ويعفو عنو الرئيس
وخت في بالك بلاد الكفر اتبنت لأنو الرئيس الامريكي يسقط عشان كضب ,, ولا عشان اقام علاقة غير شرعية من وراء زوجته
انهارت اهم قيمة ,, وهي قيمة الشخصية السودانية ,, ومواصلين هسة في الانتقاص من رموزنا الوجدانيةالتاريخية
كامل الود

بلة يا صاحب
شاعرنا المبدع
ذكرتني واحد بدري في الثمانينات طلع نظرية اسمها المنظور الاحتباطي في تفسير الاحلام ,, ومتقدما خطوة في العلاج من خلال الاحلام
فعلا احباط ,, الاحباط هو الذي يفسر حالتنا
احباط يومي
احباط سياسي ,,, اكاديمي ,,, اجتماعي ,,, اخلاقي وايييييك اي حاجة خت قبلها احباط بتلقاها صاح
ولكن
لن نحبط
سنقاتل من اجل نكون
كامل المحبة

هذا الفيديو بتاع الواتساب غيض من فيض للحاصل الايام دى فى خرتوم انقاذ السجم والرماد وطالبات الجامعات بقن يقعن ويطيحن من الجوع يعنى باختصار الناس جعانة والجوع كافر وهذا هو اس البلاء الله يحفظ اهل السودان جميعا وتحياتى ود الناظر ابوسن وضيوفك الكرام .

مرحبا الحمودي
وحبابك
فعلا الفقر والحوجة قد تؤسس للسلوك الفالت , وما يحديث مرعب والانكأ منه ثقافة التوثيق للفساد والنشر
نشر خرب بيوت واساء للأسر

من النفاج
مرحب صديق شريف
وحبابك
تعرف إعادة صياغة المواطن والمشروع الحضاري لو رفع كشعار دون شروحات ما كان في مانع , لكن شبكونا مؤتمرات وبرامج عن انو سنعيدها سيرتها الاولي ,, وقالو عديل دايرين يعيدوا دولة الخلافة النبوية عديل كدة , وربط اسباب السماء بالارض ! دي شنو ما بعرفا لكن شكلها كده كلام كوبار وعلم لدني
من المبكيات لامن يتهيجو الناس بفتحو المواقع الاباحيه ويحظروا المنتديات السودانية

الاخ ود الناظر تحياتى باسال عن البروف الدكتور عبد الله ابوسن اين هو الان فى بريطانيا ام امريكا وطبعا هم جيران خالنا فى القضارف يعنى زى ماتقول بيت خالنا طه محمد على مواجه طوالى على بيت الناظر عوض الكريم ابوسن فى حلة حمد فى القضارف معليش هذا الدكتور كان فاعل خير وشاطر ما شاء الله يعنى حقه كان بخلى للناس المساكين وهو متخصص فى اعقد الجراحة جراحة المناظير وتحياتى مرة اخرى

مرحبا احمد الحمودي
وحبابك
رغما عن اجابتي سابقا في بوست آخر فلا مندوحة من إعادة الرد
لا تربطني صلة من أي نوع مع اسرة احمد عوض الكريم ابوسن , سوي انه ناظر عموم البطانة وجدي ود جلي عمدة رفاعة
واسم ابوسن من الاسماء المطروقة في البطانة
مع اكيد الود

pحبابك وحباب جدك ودجلى لكم التحية ويرحم جدك وولديكم واعذرنى لم اقرا ذاك البوست

خلو الشباب
بتاعين الاستديوهات بلعب بالعرسان لعب , واحد صحبي شديد رسل لي صور عرسان ووراني اسم الاستديو
عرس راقد ومغمض والعروس مدنقرة دايرة تبوسو ,, الله يخيبو ويخييب زاتو
وواحد قابض العروس ومتلصق عليها
يعني بعدين لو واحد جا يعرس بتي امشي معاهم الحفلة واباريهم للاستديو ولا كيف