حقيقة ما جري للطبيبة السودانية بالقريات ...(نرجو توقيعكم علي العريضة الإلكترونية).....

.

مساء الخير يا شباب
اود ان اطلعكم علي بعض التطورات وحقيقة ما جري للطبيبة السودانية بالقريات ....
بحمد لله تمكنت مجموعة مقربة للطبيبة المعنية من الاتصال بها نيابة عنكم وعن الاطباء السودانيين في كل ارجاء الارض ...
وكانت سعادتها عميقة جدا وأبدت ارتياحها وتقديرها لاحساسها بوقوفكم معها واستعدادكم لفعل أي شئ لدعمها ونصرتها
وانا هنا أروي لكم القصة كاملة وعلي لسانها:

الحصل كالآتي:
( كانت مغطية أفترنون في الطوارئ الساعة 11 م كان مافي مرضي ، مشت غرفة القهوة وهي غرفة للفيميل "غرفة استراحة للنساء فقط" بس عشان تعمل غيار لجرح في يديها ..
جاء المرافق " المرافق دا قبل كدا اتعدي عليها ودفرها وأشتكتوا وجاء إعتذر ليها وعفتو يعني المرة دي جاي عن سبق إصرار وترصد عشان ينتقم منها".......
لحقها جوة الغرفة وقال ليها يا دكتورة أختي تعبانة ...
قالت مع انه ما مفروض يدخل غرفة النساء : بس لو المريضة فعلا تعبانة حتجي تشوفها ....
قال ليها عندها ألم في معدتها ...
قالت ليه في الغرفة الفلانية فيها دكتورة للحالات الباردة "غير الطارئة والعاجلة" وديها هناك .......
الراجل طلع ورجع تاني قال ليها :
ليش ما تشوفيها انتي يا حمارة ...
قالت ليه : دي غرفة نساء لو سمحت أطلع من هنا ....
طلع العقال حقه وبدأ يضرب فيها ...
حاولت تهرب من الغرفة بس الغرفة كانت صغيرة ...
في سيستر سمعت الاصوات ونادت الدكاترة من الطوارئ وجو مسكوه منها ونادوا ليه الشرطة وقبضوه ..
أخته الكانت تعبانة قامت تنبذ فيها وهو ذاته ينبذ ....
تقبضوني عشان هادي السودانية ؟؟؟

الطبيبة السودانية أدت أقوالها أمام القاضي وأمير المنطقة أمر انه ما يطلع بكفالة لحدي ما القضية تنتهي...

إتصل عليها قنصل السفارة السودانية وحكت له الحصل دا كله وحتي انهم بيعانوا الامرين ....
من المراجعين نبذ وإساءات وقلة أدب .....
قال ليها تكتب الكلام دا في ورقة والأطباء المعاها يكتبوا تضررهم دة ويرسلوه ليه بالفاكس وهو حيقابل وزير الصحة السعودي ...

الطبيبة مصرة انه ما تخلي حقها حتي لو كلفها إنها تفقد وظيفته ....)

انتهي

PLEASE SIGN THE PETITION AND SUPPORT THE DOCTOR

https://secure.avaaz.org/ar/petition/wzr_lSH_lswdy_wwzr_ldkhly_lswdy_ltDmn_m_lTbyb_lswdny_lmDrwb_bql_lmwTn_lswdy_bmstshf_lqryt/?fbdm

عزيزي أحمد
سلامات وياخ ليك التقدير والاحترام

يا أحمد يا أخوي ياخ الطبيب السوداني في بلدو تبنضرب ويتسجن ويموت .
والله يا أحمد في طبيب أستاذ جراحة رجع السودان قال يقعد كفاو هجرة مات من الوجع والقصص العجيبة .
السعودية مهما كانت أهو برضو هي محطة الناس تصبر فيها لامن ربك يحلها وينعدل الحال بي هناك .
وبعدين يا أحمد يا أخوي المجانين كتار وموجودين في أي مكان .
ياخ وأحد عشان أمو ماتت في مستشفي في أمريكا دخل وبي رشاش رشاليك دكتور أمو بهلة طلقات وخرج .
..
ربك يصلح حال الجميع

تم عمل اللازم

.

ده كلام غريب جد ...
يعني عشان الدكاترة ما مقيمين داخليا ننسي قصة الدكتورة دي
ولا الفهم شنو ؟؟؟

تسلموا اعزائي وضاحة وعثمان موسي لمروركم الكريم .....
وياريت يا عثمان لو بقدر انساه الموضوع دا ...
وأنا طبيب وحاسي بالحاسة بيه الطبيبة دي ...
البكرة حتصبح مع زملائها الاطباء والممرضات وموظفين المستوصف مكسورة الخاطر ومغتصبة الحقوق ....
دي طبيبة وزميلة بتتزل وتتهان من غير وجه حق .....
ما بتفرق وين ولي علي يد منو ...
كان جوا البلد او خارج البلد
المبدأ واحد
يجب ان ندين مثل هذه التصرفات وبشدة ...
وأن نعمل علي منع تكرارها ثانية


تسلم اخي أحمد موسي واوفيت وكفيت في سطر واحد .....

يبجب تصعيد الامر لاعلي جهة وانا علي يقين بان حقها ستناله .........

Quote: يعني عشان الدكاترة ما مقيمين داخليا ننسي قصة الدكتورة دي ولا الفهم شنو ؟؟؟

استاذ احمد موسى الرجل لم يقل ان الدكاترة غير مقيمين ، انما قال انهم بتهانو ويضربو في بلدهم .......هذا والغريب ان الجناة في بلدهم لا يحاسبون بل هم محصنين لانهم سماسرة وخدام السلطة .......ومع ذلك اتفق معك بان هذا لا يعني ترك وتناسي حقوق الدكتورة ......لكن يجب ان ندين الجاني سواء خارج او داخل السودان .......والعمل علي تقديم الجناة خارجيا او داخلياً للعدالة ......

علم وتم عمل اللازم
نرجو من سفارة السجم ان تتحرك وعلى وجه السرعة،،،

والله يا دكتور أحمد
أنا معاك أدين الهجوم علي الطبيبة
ومعاك في وجوب حماية الطبيب وسلامتو في أي مكان في العالم
وياريت برضو الناس تتكلم عن أنظمة السكيرتي في المستشفيات .
وياريت المهاجرين والمهاجرات الشباب يهتموا بي الرياضة وطريقة الدفاع عن النفس .
والاستعداد الشامل لكل الظروف .

.

أدت أقوالها أمام القاضي وأمير المنطقة أمر انه ما يطلع بكفالة لحدي ما القضية تنتهي
----------------------------
شكرا يا احمد على المعلومات الجديدة
عادل ومنصف قرار الامير ببقاء المعتدي حتى انتهاء القضية
وندعم صمودها حتى النهاية
ايه يعني تفقد وظيفتها ؟
خليها تجي هنا والله الاسترال بفتشو لي الاطباء بي را س الدبوس
وبتلقى احترام وتاهيل عالي

YOU MAY TRY AGAIN FARIDA


http://www.avaaz.org/ar/petition/wzr_lSH_lswdy_wwzr_ldkhly_l..._bmstshf_lqryt/?fbdm

السلام عليكم اخي احمد

حاولت اوقع وجدت العبارة ادناه

عذراً، إن هذه العريضة غير موجودة أو تم إلغاؤها

كامل التضامن مع الدكتورة ولتأخذ حقها كاملا وغير منقوص ولو بقدر راس الابرة

شكرا للتوضيح

سلام للجميع ,
الكلام دا عجيب !!!!!!

يعني عشان المجرمين في حكومة السجم ذلوا واهانوا انسان السودان نقوم نقبل الذلة والهوان خارج السودان,

ونبرر ذلك بسلوك الكيزان وعدم احترامهم للناس ؟؟؟

يعني نبقى ملطشة في العالم ؟

لا لاستعباد الناس والحط من قدرهم ,

وتسلم الطبيبة السودانية ومن أهانها ذليل ومهان ,

والقانون يأخذ مجراه للنهاية .

كفاية استكانة وصوت مبحوح يا ناس !

والرزق من عند الله فقط !
وفوق إلى أن يرعوى الجهلاء الذين يضربون الحرائر .

ست البنات.

YOU MAY TRY AGAIN FARIDA

https://secure.avaaz.org/ar/petition/wzr_lSH_lswdy_wwzr_ldkhly_lswdy_ltDmn_m_lTbyb_lswdny_lmDrwb_bql_lmwTn_lswdy_bmstshf_lqryt/?fbdm

شكرا د.احمد التجاني حمودي
وشكرا لكل الموقعين
ومعها باذن الله.

ورجاء يا وضاحه
وعثمان موسي
عدلوا مداخلاتكم تماما

فاترضوا ان السعودين متابعين هذا البوست

هل يصح ان يجدوا امثال مداخلاتكم هذه؟!

لكل مقام مقال يا وضاحه.

ونضالنا امام الطغمه التي اذلتنا لا يبيح للاخرين اهانتنا.



وعارفه يا دكتوره(الضحيه) انا في كلمة زي دي قبال كده لما واحده قالت مش تعتقلني مجرد قالت تشموتني لاجل هذه السودانيه
لصقت ليها كف قربت احت اسنانها) اياك ان تتراجعي عن حقك .وباذن الله منصوره.وما ضاع حقا ورائه مطالب.

شكرا د.احمد
ساحرص علي التوقيع ولو وجدت صعوبه سارجع اوضح.

عزيزنا دكتور أحمد
سلامات تاني ليك والأخوان والأخوات المتداخلين .
داير أقول للأخ الكريم المتداخل عبر الفيس بوك . أي مالو التاكندو .
أنا ماداير الحاجات الحصلت لينا نحن تحصل لي بت ولا لي ولد من ناسنا .
يازول بتنضم كيف .
وكتين أصلك طالع خارج بلدك خليك مستعد . خليك مستعد عشان تحمي نفسك . تاكوندو جن احمر كلو .
ياخ أنا القدامك ده في هجوم علي في محلي والنهار وبي 4 مسدسات لو ما ربك ستر كنت هسع أكون مافي .
ولسع في باقي رصاصة في رأسي ده نايمة .
وأحتمال يحصل شيء منها وأرد ده يا أخوي خلاف خسارة مليون دولار وطظ في المليون والحمدلله علي سلامة الناس المعاي .
أنا كلامي عن الحماية
كلامي عن سلامة المهاجرين الجداد وعن التفكير في الحماية الشخصية .
شنو يعني توقيع وأحتجاجات والحال في حالو ؟
كلامي يا أخوي الناس تكون مستعدة تكون قوية .
هسع أنت لو متعلم التاكندو البتقول عنو ده . كان في وأحد هددان ساكت بهد عليك بي عقال .
ما كان بتشيلو وتعلقو من كراعو بي عقالو يا أخوي .

Quote: عذراً، إن هذه العريضة غير موجودة أو تم إلغاؤها

لا




حول ولا قوة الابالله






ده فى السعودية \



كده

https://secure.avaaz.org/ar/petition/wzr_lSH_lswdy_wwzr_ldkhly_lswdy_ltDmn_m_lTbyb_lswdny_lmDrwb_bql_lmwTn_lswdy_bmstshf_lqryt/?fbdm

Quote: ما بتفرق وين ولي علي يد منو ... كان جوا البلد او خارج البلد المبدأ واحد يجب ان ندين مثل هذه التصرفات وبشدة ... وأن نعمل علي منع تكرارها ثانية

الاصل فينا عزة النفس والاباء والشهامة والنجابة والكرم ,

الخطا والتجاوز يحصل في كل مكان في العالم , ونعاني من وطن وحكومات فاشلة نعم ,
لكن هذا لايغير قيد انملة المتجاوز لانتركه ونسعى في التضيق عليه ,
وشكرا اختي الطبيبة فانت قامة والمطالبة بالحق نخوة , اصبري وشدة وتزول ..

تحية لكل من وقف مع الحق بكل المستويات ..
حبابنا سوا يد واحدة وهم واحد ..
______________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور

أين النخوة والرجولة ،،،،،

كيف لرجل أن يمد يده ويضرب إمرأة ، وأي أمرأة ،،، (طبيبة سودانية )

إعانك الله وقواكي .

وإن خيروكي في عقوبة المعتدي أطلبي منهم أن يتم جلده بسوط عنج ، عشان يعرف أن الله حق .

الأخ عثمان موسى
وكل من يقول ان هذا الأمر عادي وانه لا يجب ان نقوم بأي عمل ضده

اقول ليهم ان المقصود ليس الدكتورة في نفسها حسب فهمي ولكن فهم هذا المعتوه وفهم البيت الذي تربى فيه ان كل ما هو سوداني هو عبد يجب ان يكون تحت قدميه
هكذا تعلم وهكذا تربى وهكذا نشأ ولذا لم يتورع عن ضرب السودانية ولكنها لو كانت من جنسية تانية حتى مصرية فإنه لن يتجرأ على ضربها بل لكان جرجر اذيال
الهزيمة وانزوى.

السوداني لا قيمة له
إلا عند البعض اهل البلد

اسلوب مدان ومرفوض ويجب متابعة الامر الي نهايته ...
لكن برضو هناك حقيقة ان تهاون السودانيين مع السعوديين اضاع هيبتهم قبل كرامتهم وحقوقهم ...

أخونا القنصل دا القدر عليهو مكالمة تلفونية فقط وأكتبوا لى شكوى

السيد القنصل ياخى اركب ليك طيارة ولا عربية واصل بنت الناس دى فى محلها ( اولا عشان تشعرها انو عندها اهل فى الغربة المرة دى)أصلها وأسمعها وواسيها وتعال راجع عندكم شغل غير تفقد احوال خلق اللة هنا واكيد بنت الناس دى محتاجة لدعم نفسى ومشيتك ليها هناك على الاقل بتدعمها نفسيا وناس المستشفى واهل البلد بيشعروا انو وراها ناس وسفارة ومسئولين ( لكن بس تلفون ) .
عليكم اللة ماتبقوا على البنات (انتو والزمن والغربةوأهل البلد).
(دبلوماسيين انابيب ماعرفين ابجديات شغلهم)

التحية لصاحب البوست ولجميع الإخوة المتداخلين

لكن Osman Musa و وضاحة

مداخلاتكم غير موفقة .. وقد شوهت البوست كثيراً ..

فلكل مقام مقال .. ولكل حدث حديث

التحية لصاحب البوست ولجميع الإخوة المتداخلين

لكن Osman Musa و وضاحة

مداخلاتكم غير موفقة .. وقد شوهت البوست كثيراً ..

فلكل مقام مقال .. ولكل حدث حديث

كل النساء خط احمر المفروض المبادئ ما تتجزأ
استخدام العنف الجسدي واللفظي ونشر الاشاعات والاكاذيب ضد اي امرأة مرفوض
يا دكتور احمودي
على السفارة ان ترسل ديبلوماسي رفيع لمتابعة هذا الامر الخطير
وكلنا مع الدكتورة

ده تعدّي واضح على طبيبة، يهمنا في الأمر أنها بنتنا (سودانية).

حتى الآن أرى أن الأمر يسير في مساره الطبيعي (تمت الشكوى وتقوم السلطات بدورها من تحقيق يفترض أن يؤدي لعقوبة الجاني ورد حقوق المعتدى عليها).

أما إذا تقاعست السلطات في أداء دورها، هنا فقط يأتي دورنا (توقيع عريضة إلكترونية أو تحريك الأمر بالشكل الذي يرد حق الطبيبة وحفظ كرامتها).

أما من ينتظرون السفارة أن تقوم بشئ، أقول لهم تعقّلوا ووجهوا جهودكم في شئ مثمر.

كامل تضامننا يادكتور .

رجاء مراجعة الموقع .

Quote: أخته الكانت تعبانة قامت تنبذ فيها وهو ذاته ينبذ .... تقبضوني عشان هادي السودانية ؟؟؟

التخلف الإنساني، بؤس التعليم، إنعدام حقوق الإنسان و سيادة العبودية الحديثة ( نظام الكفالة)
مشاكل هيكلية يواجها من يعمل في بعض دول الخليج التي تصفها منظمة العفو الدولية بالتخلف القانوني و إستعباد البشر
كل هذا لايردع المواطن الخليجي من إستعراض غرائزه الأولية للاجانب الذين يعيشون تحت رعب يسمي الترحيل لذلك كثيراً ما يتنازلون عن حقوقهم
هذا واضح من بين سطور هذه الطبيبة التي " سوف لن تترك حقها حتي لو فقدت وظيفتها" و لماذا تذكر الضحية أمر فقدان الوظيفة أصلاً
و هي المعتدي عليها ؟؟ هذا هو ما أسميه "رعب الترحيل" الذي حول الجاليات المقيمة الي ضحايا لغياب القوانين المكتوبة
و إنعدام قوانين الإجراءات الجنائية..الخ رغم المجهودات الكثيرة للإصلاح تحت ضغوط المنظمات العدلية الدولية
ما عدي جاليات قليلة ثبتت حقوق رعاياها في عقودات العمل، أغلب السغارات تخشي المواجهة مع هذه الــدول خوفاً من رعب الترهيل لرعاياها
و فقدان التحويلات ( السودان لايذكر في هذا الشآن حسب الإحصاءات الرسمية حيث متوسط تحويلاته بائس لبؤس الوظائف التي يعمل فيها السواد الأعظم ن السودانيين)
هذا الأمر لا يقدح مطلقاً في العلاقة المميزة بين السودانيين و السواد الأعظم من مواطني دول الخليج علي المستوي الإنساني
فكثيراً ما يتساهل معك المواطن من هذه الدول و يعامك بصورة خاصة جداً فقط لأنك سوداني- هذا شئ لا يمكن نكرانه خاصة مثل هذه الأوقات- أي أوقات التجاوز و العضب
حتي لا نسقط في التعميم المخل. آلموضوع موضوع سيادة حكم القانون و الردع القانوني وليس حب أو بغض الشعوب لبعضها و هذه الدول تعرف ذلك أكثر منا ولها أجهزة ضخمة
للإصلاح القانوني حيث هم أكثر الضحايا لبؤس النظام من المقيمين !!
كل الدعم لهذه الطبيبة الشجاعة
و نتمني أن تنهض بلادنا حتي لا نضطر لدخول في هذا الدروب الضيقة التي أساسها بؤس الحياة في بلادنا حيث جعلت السوداني يدوس علس كرامته لبضع ريالات و ياليتها ريالات كثيرة :(

عادل اسحق

شكراً على كلامك الجميل

Quote: و نتمني أن تنهض بلادنا حتي لا نضطر لدخول في هذا الدروب الضيقة التي أساسها بؤس الحياة في بلادنا حيث جعلت السوداني يدوس علس كرامته لبضع ريالات و ياليتها ريالات كثيرة :(

بس الدا الدايرنو نحن من الله
نعيش داخل وطننا مستورين حال ومرتاحين بال

بل أوجب الواجبات ان يذهب اليها السفير شخصيا
وأن يتابع هذه القضية بنفسه...
ويحصل علي ضمانات بعدم
تكرارها...

ان لم تكن النخوة فلتكن بي حق ضريبتها البتدفعها

أنا أتوقع الآتي:

السعوديون سوف يستغلون طيبتنا العويرة ديك ..

وسوف يردمون الطبيبة وناس السفارة وكل السودانيين هناك بالكلام المعسل من قبيل:

يا السلام السودانيين ناس طيبين .. والله إحنا السعوديين نحب الشعب السوداني المسلم الطيب ..

خلاص باركوها .. والعفو لله .. هذا الولد مخبول .. والله ما عندو حق يضرب طبيبة سودانية ..

وفي النهاية يطلعوا ولدهم من الشرطة ..

ويشطبوا القضية ..

وتروح القضية ذي الشمار في المرق ..

ويبقى في النهاية: نحن السودانيين الطيبين جداً جداً

تحياتي لكم جميعا

نعم الطبيب والطبيبه بينضرب في السودان ..وغير الأطباء بينضرب أيضا ...

خلاص ده مبرر عشان نرضى بالمهانه والذله من الاخرين؟؟

ده منطق غريب جدا ..

سلامات يا دكتور الصادق
أنا بتكلم عن مسؤولية المستشفيات تجاه الناس الشغالين .
وعن أنظمة الحماية .
أنا بتكلم عن أستعداد أي زول لحماية نفسو في ساعات عملو بي التمارين وأنت عارف المستشفيات أصبحت
توفر للناس الشغالين صالات ال FITNESS مجان وخلال ساعات العمل . مرتين في اليوم عشان كل الاحتمالات .
مافي دكتور بيقدر يقيف عشرة ساعات في غرفة عملية لو ما كان زول فيت وقوي وعندو أستعداد .. ده قصدي يا دكتور .
الاستعداد والتحوط ..
والكلام ده كان بت كان ولد . عشان مايجيك مجنون وبي عقال .
زي عقالو ده لو كان في مستشفيات بروكلن كان أكلو ساندوتش وبدون طماطم ..
...
تحياتي وأنا معاكم في دبلن يو وأحد شهر أتنين أنشاءالله

مرحب بيك ياعثمان موسى في دبلن

الإتيان بقضايا مشابهـة من السودان عمل سلبى ويفتقر للحصافـة والتركيز على المشكلة القائمـة، مما يصاعـد فى تمييع القضيـة الحاليـة وتشتيت دم الطبيبة بين الدول..
فهل هـذا عمل مقصود من ناس لا تريـد نشر هـذه القضيـة فيثرون الغبار حولهـا؟ أم انها الغفلـة والعفويـة الســــودانية؟

هنا حملة للتضامن مع طبيبة مهيضـة الجناح مكسـورة الخاطر.. فما فى داعى للكتابات التى هى اشبه بالونسـة منها بمساندة هـذه الطبيبة المظلومـة.

أتصور فقط واحدة تنادى يا ابو مروة، فترد عليها، والله ظالمنك وزمان برضو فى ناس ظلموا مرة تانية فى الحتة الفلانيـة، والله مساكين أنتو النسوان بقيتو ملطشة فى كل حتة
ثم تسيـر فى طريقك!!!!

Done

تسلموا أعزائي جميعكم لوقتكم الأديتوه للبوست دا ولاهتمامكم بأختنا وزميلتنا الطبية المظلومة وهي وحدها الآن تمارس الطب في اصعب المناطق بالمملكة وبنفسيات ومعنويات سيئة

تراجي و علي عبد الله حسن ...لكم الشكر والتقدير كله لادارتكم لمحور النقاش الي مصبه الصحيح والمقصود هنا ...

وضاحة أحيئ فيك دائما ظلك الخفيف وروحك الجميلة والحكمة ولك كل التقدير والاحترام لسحبك للفيديو

وكما ذكرت د.نجاة الخطوط الحمراء واضحة والمبادئ لا تتجزأ ...

أخي صديق الموج مرورك الكريم أضفي قوة وزاد من اهمية الحدث والبوست ..
وأشكرك لانزال رابط العريضة الإلكترونية الواضح جدا وانا جربته الان وعملت ليه كوبي ونزلته في قوقل ودخلت علي العريضة.....

ارجو ان تتمكن فريدة والهلالية ومحمد جمعة من الدخول الي موقع العريض باستخدام الرابط المنزل بواسطة صديق الموج ........

أخي محمد ابو العزائم اتفق معك بانه تجاوز متعمد لخطوط حمراء وتعدي واضح علي بنتنا واختنا المقهورة الطبيبة السودانية ....

نحن نتابع الامر من علي قرب ونعلم بمساره الي الآن في مساره الطبيعي ....
ونحن لا نشك في القضاء السعودي ونزاهته ...
ونعلم تماما بأنه عندما ترفع عريضة إلكترونية في النت في هذا التوقيت تعبيرا عن التضامن مع زميلتنا الدكتورة ......
لا يعني أبدا الطعن في نزاهة القضاء السعودي أو تسفيه لمجهودات الأمير والأمارة وإهتمامهم بالقضية ......
بل هو فقط إظهار لحجم التفاعل الكبير من قبل السودانيين بالموضوع وإنه اصبح قضية رأي عام والكل يراقب وينتظر ما يستفسر عنه التحقيق والقضاء ...
البعد الإعلامي ذو اهمية كبيرة إذا كانت لغة التخاطب مهذبة ولا تخرج عن حدود المهنية وفي نطاق صلاحيات الجهة المخاطبة ...

ولكن وكما نعلم كلنا كل شئ ممكن ان يحدث في المملكة !!!!!!
ولا نستبعد بأن يكون الجاني الآن حرا طليقا يتقهوج ويشيش في البر مع اصدقائه ...
ولذا قررنا وفي هذا الوقت بأن نضمن هذه العريضة الإلكترونية لمحاضر القضية للسلطات السعودية المسئولة وذلك مع التكثيف والبعد الإعلامي لتقوية القضية ولإنصاف الطبيبة السودانية المظلومة ....
ولكي لا نسمح بأي حال ان يتم بتر القضية ووأدها في أي مرحلة من مراحلها .....
كما حدث ذلك في قضايا مشابهة لم تحظو بمثل هذا النصيب الإعلامي الوافر......
إلا ان التدخل الخارجي والوساطات من جهات أو أشخاص معينيين وأد تلك القضايا وضاع الحق من اصحابها ....

اعزائي لكم الشكر ثانية ويجب علينا ان نتحد ونمنع من تكرار ما حدث لأي سوداني او سودانية بداخل السودان او خارجه ......

ودمتم احبتي والحرية والكرامة للمرأة السودانية في كل زمان ومكان