لقيت 16 ألف أسترليني منسية في فجة في لندن

كيس منفوخ فل .
ربطة فيها 10 ألف وربطة فيها 6 ألف
+ 3 كريدت كارد أتنين من باركليز + وأحد من لويد
+ ورقة أنشورنس سيارة + حبتين بندول .

ترسلهم لي طوالي في مانشستر والبندول هدية ليك

Quote: كيس منفوخ فل . ربطة فيها 10 ألف وربطة فيها 6 ألف + ورقة أنشورنس سيارة + حبتين بندول .

عثمان موسي سلام ياعزيز

علي النعمة أنا أكثر زول لفيت أوربا دي بالطول وبالعرض مالقيت لي منديل ورق واقع
وبسمع طوالي أنو ناس المخدرات لمن البوليس يزنقهم بيرمو قروش متلتلة في الشارع وكل ما أشوف
لي كيس واقع بشوتو برجلي عسي ولعل تتحقق الامنية ويخيب ظني . قروش واقعا في أوربا دي الله تعلم .

أها تقسم معاك ولا أرسل ليك البوليس وانا ما طماع انت شيل ربطة العشرة وأنشورنس السيارة وحبتين البندول
ورسل لي ربطة الستة

يازول مالك عصرت علي الاحلام،،غنم ابليس بودرن،،،طوال عمرنا نروح،،نرمي،،ننسي،،نلقي دي،،ولا تعريفة،استغفر الله مره لقيت لي كورة الزمان ديك،،قدر القرينة ،،الحلة كلها جات باركتها لي،،حتي كدت ان اكون مبروك الحلة .

يا رشا
سلامات
كانت الوأطة صباح
و لو بتعرفي لندن زين يا رشا . أنا ادليت من المترو في محطة EDGWARE RD .
وقبالة محل MARKS AND SPENCER هناك في تلفون كولبوكس في الشارع . أها لقيت ليك الكيس ده في الفجة ديك .
..
وهاك القصة

عزيزنا عادل الباهي
سلامات
ربطة العشرة بتاعت فنيلتك ؟
ياخ أخوك اليومة ديك كان في جميع القنوات .
والنديك حكاية كيس أدجوار روود .

عزيزنا عبدالعزيز
سلامات يا مك
ياخ دأك اليوم كان يوم عجيب .
ورق أسترليني جديد يلمع ربط عليها ختم البنك تلمع .
يازول لفيت الكيس في جريدة الحياة ومشيت مسافة مية متر ولفيت يمين علي نقطة المتروبوليتان بوليس .
وتعال شوف هناك الحصل .

سمح ارح قوام قوام قول قومت نفسنا،،شكلك داير تقوم قيامتنا بس.

عان يا عبدالعزيز !
ضابطة البوليس السمحة القابلتني في دخلتي للنقطة .
فيها لكنة ناس ويلز .
الزولة شافت شعري المنكوش والجاكت المكرمش والجريدة الملفوفة أتخلعت .
وأفتكرتني زول مشاكل و جيت من المترو أشتكي . وأنت عارف أنجليزي صاحبك أنجليزي حواشات ساكت ههههها .
يازول في ما بعد بجيب ليك صورة الضابطة السمحة وصورة من شهادة التكريم .

عارف يا عادل الباهي !
القصة دي ليها خمسة وعشرين سنة بس عليك أمان الله
الشيء العملتو الضابطة دي نفعني في حياتي جنس نفع .
وبوريك الحكاية .
ياخ الانجليز ديل ناس تمام .

*

عزيزنا الفاتح سليمان
سلامات
وألف شكر علي المرور الكريم

ود عمى عثمان
اللهم اجعلوا خيييييييير
عليك الله رشا دى ما تتلوم معاها باقى العيشة في بلادكم ديك صعبة ومكلفة

بتنا العزيزة وضاحة
سلامات
وياخ اللوم الله لا جابو .
في خمسة دقايق يا وضاحة البوليس جاب خبر الزولة النست الكيس .
ومن ورقة أنشورس العربية بس .
وحالتو الزمن دأك الكمبيوتر كان يختلف ولا كان في موبايل . أهلك الانجليز مدهشين وناس عديلة .

وت التهقلك....يعني ما غمتولك شئ..
طلعت ورق كراريس.
انا قت ليك نحن ناس اخرا اعثمان اخوي
الدنيا دي ماعندنا فيها نصيب
نعصر علي الطيبة وسمح النضم
قت ادوك شهادة
عوافي،،،انا شاالله تكون ما ودرتها.

يا عبد العزيز
أنت قاصد مسحة الشنب ؟
أدوني يازول .
الناس ديل يا أخوي ناس منصفين .
أول شيء أدوني علي كل كريدت كارد .
وأدوني علي القروش الكاش ويازول جابوني في الجرايد فوق .
وده خلاف الشهادة .
والحكاية يازول طويلة .
وبرجع ليك لي البنية بتاعت لكنة ويلز وقصة عمها المات مكتول في حرابات المهدية .
بس بعد موت عمها ده وكتلو في بلدنا الزولة دي أكرمتني في حكاية الكيس ده جنس كرم .

بالحيل بعرف لندن
هو بالله مارك اند سبنسر فاتحين محلهم دا في الحتة دي من خمسة
وعشرين سنة؟ موش القصاد هيلتون بتاع ادوار رود؟
وقلت لي مشيت طوالي على النقطة! دقست دقسة عمرك

عارف يا عبدالعزيز
جماعتك ساعة ونص شابكني كوتشنات .
وتصوير .
عنواني في لندن وفي السودان وسبب الزيارات الكل أسبوعين للندن وبشتري شنو وببيع شنو .
والتحقيقات دي بعد حساب القروش الكاش وبعد ما شافوا الكريدت كارد .
عليك أمان الله يا عبدالعزيز يا أخوي في لحظة من اللحظات قلته الجابرني علي التلتله دي شنو ؟
مافي شويتين والا صاحبة الكيس تجي داخلة النقطة وهي تبكي من الفرحة .

Quote: عارف يا عادل الباهي ! القصة دي ليها خمسة وعشرين سنة بس عليك أمان الله الشيء العملتو الضابطة دي نفعني في حياتي جنس نفع . وبوريك الحكاية . ياخ الانجليز ديل ناس تمام .

عثمان ياحبيب احتمال الخواجات ديل زمان كانو منصفين لكن في الخمسة عشر سنة الاخيرة عضتهم بقت تسعر . كنت شغال في شركة
قامو أشترو مني إجازتي السنوية ولمن جينا آخر الشهر بقو يملطحو فيني المادة كم والقانون الفعلتو لمن خجلتا زاتو من مساككة حقي
وأتعوضت الله المهم مرة مع آخر الشهر المحاسبة دقست عاوزا ترسل الف وخمسمائة في حسابي ختت ليها صفر بالغلط ورسلتها خمسة عشر الف
، دقيت ليك الحساب شفتو كم لمن رأسي لفا ، دخلت عبر النت أشوف الجهه المرسلة المبلغ لقيتا ليك الشركة وعشان اساومهم جريت جري للبنك و
أي جهه أديتا تصريح تسحب من حسابي تلقائيا وقفتها وقلت ليهم عاوز المبلغ كاش الان لانو عبر الماكينة لا يمكنني صرف اكثر
من الف في اليوم ولمن جيت الصباح لقيت ليك المدير والمحاسبة منتظرني يرجفو زي الترزي يوم
وقفة العيد في الباب . المحاسبة قالت لي رسلنا مبلغ مالي في حسابك بالغلط قلت ليها عارف حنقعد نتحاسب ولا تمشي تضربي راسك بالحائط
والله قعدو صاغرين واستلمت متآخراتي كلها حتي سلمتهم المبلغ العندي فما تشكر لي الراكوبة في الخريف والله الخواجات ديل يأكلو مال النبي

يا رشا حليل لندن
بلدنا الزمان وحشتنا كتير .

صحيح يا عادل
هبوب الأزمة المالية هبشت كتير من دول العالم
بس أنا برضو بتخيل الانجليز لسع شوية محافظين .
وتابع معاي الحكاية .
القصة يا عادل جرت

يا عمّك كبّ الرصّة كلّها قبل ما تصبح ونمشي نكابس في الشِرتيت وما نلقى زمن :)

عزيزنا هاني
سلامات
مافي حاجة حتفوتك ياخ كلوكلو .
أها يا أخوي في مابعد قصة القريشات المنسية في لندن كانت هي السبب
في سهولة التاشيرة الي أمريكا . تتخيل الكلام ده كيف .

Quote: سلامات مافي حاجة حتفوتك ياخ كلوكلو . أها يا أخوي في مابعد قصة القريشات المنسية في لندن كانت هي السبب في سهولة التاشيرة الي أمريكا . تتخيل الكلام ده كيف .

بتخيّل كدا القسم أداك شهادة حسن سيرة وسلوك أو تقدير او شكر ، وبتخيل كمان انه الحادثة أنشأت سلسلة معارف جديدة انتهت جوا السفارة الامريكية :) وسهلت الاجراءات والضمانات.


ولا كيف ؟

يا عادل
قصة ال 16 ألف المنسية حصلت في لندن أيامات الديمقراطية بدايات 89
الزمن دأك كان عندي عمل تجاري بين لندن دبي الخرطوم . أها يازول مشيت أجدد تاشيرة لندن
لقيت الكلام الحصل في قسم المتروبوليتان بوليس كلو في شباك التاشيرة .
أها جماعتك أدوني تاشيرة مفتوحة خمسة سنوات وبدون رسوم تاشيرة .
وأقولك كلام والله القصة سنة 1996 برضو نفعت وبدون كلام دخول أمريكا من لندن وعلي كيفي زي الماشي الدامر .
وخليك متابع

في قسم البوليس الجماعة أتكلموا عن السودان وشكروني
وكنت قايل الحكاية لاعن هني أنتهت .. ومشيت . مشيت . كنت ساكن في شرق لندن في أبتوم بارك .
وكان زي بعد باكر رأجع الخرطوم بعد شحن البضاعة .. بس تعال شوف باكر الحصل .

اها حصل شنو

بتنا العزيزة مها
سلامات
ما حصل الا خير ..
خليك معاي في درب أدجوار روود الشارع المحبب للجاليات العربية .
تابعي معاي جرايد اليوم التاني وصورة صاحبة القروش .

Quote: بس تعال شوف باكر الحصل .

تستاهل التكريم يا مان والاشادة.
مرور على سبيل التحية والمتابعة.

محبتي

عثمان انت راجل شهم وتستحق كل خير .. وتصرفك صح ..

عثمان يا كلس..
والله العظيم ،، ما شككت لحظة في عظمة شعبنا العظيم.
وبعيدا عن الفكاهة والقرقراب،،،
انت سفير محترم لهذا الشعب..
وبكل جدية،،،تعظيم سلام.

عثمان موسى الصيل..متابعة للسرد الممتع و للقصة التي تحكي عن أصالة و نزاهة..كل الود

Quote: Mohamed Elrazi · الأكثر تعليقا · City University of New York Graduate School تصرفات محترمه من بلد محترم لي رجل محترم. اها ياجماعه ياها دي الشريعه ولا حاجه تانيه؟؟

شكرا يامحمد الررازي
هو ماقلت
سلامات ياعثمان

عثمان موسى كب الكنته بسرعة الدوام انتهى ...

مرحبتين عزيزنا عبدالله فقير
وألف شكر علي المرور الكريم

عزيزنا الحاج حمد
سلامات
وألف شكر علي المرور الكريم
ما بتخيل يا حاج حمد في بوليس منظم في العالم كلو زي البوليس البريطاني .
ما عارف طريقة الاختيار دي بتتم كيف . بوليس في قمة الادب .

مش قتلك يا عبدالعزيز ؟
مش قتلك حبايبنا الانجليز ديل لو الزول عمل فيهم حسنة الله أداهو .
ياخ مسحة الشنب في الكاش بس كانت 1600 + مية في كل كريدت كارد يعني المبلغ طلع 1900 أسترليني
وشوف الفايدة الجات بي سبب الحكاية وكمية المعارف .

عزيزنا الأخ Muhib
سلامات
وألف شكر يا أستاذ علي المرور بشارع النقطة .
تحياتي

عزيزنا الفاتح ميرغني
سلامات
حبايبنا الانجليز ما بنسوا ليك حاجة .
وزي ما حكيت .. لقيت السفارة في الخرطوم عندها خبر وقاموا أدوني تاشيرة مفتوحة .
وكمان ممكن أكون ضامن كان في زول داير تاشيرة بشرط العودة وكدي . والموضوع كان سنة 1989 .
بعد ما ضاقت الحالة وأصبحت في صعوبة في السفر وفي كيف تطلع دولارات وأعدامات وسجن والقصص ديك .
سنة 1996 مشيت السفارة الامريكية .
القنصلة الأمريكية عاينت للتاشيرة البريطانية المكتوب عليها مجان بدون رسوم .
وطوالي أتصلت علي السفارة البريطانية .. ما عارف الحصل شنو .
بس بعد شوية طلبت مني أمشي أدفع في الشباك . ومن اليوم دأك بقيت طالع نازل .. شايف يا الفاتح القصة نفعت كيف ؟
تحياتي

أخونا عثمان موسى سلام وعام سعيد

غايتو دي يا أخوي لا سبقك عليها إنس ولا جان ... وأحد أخونا بحب الدولارات حب شديد يا عثمان ويشييل ويكمتر فيها ... يوم دخل المستراح وطلع الجزلان وختاهو في الشباك ... الجزلان فيهو 14 ألف دولار ... يعني توفيرة بتاعت 8 شهور تقريباً .. وبعدما قضى الحاجة خرج وما إتذكر الجزلان إلا بعد ساعتين ... عييييييييييييييك ..

القصة دي حقيقية يا عثمان ... حصلت في المنطقة الشرقية بالسعودية ...


تحياتي

عزيزنا العمدة محمد هارون
سلامات
أكيد اليومين دي الجو أتصلح في مدينتكم .
وأكيد رجعت تمشي مشوارك الصباحي كداري من ( رويل أووك ) شاقي علايل ( كوينز وي ) وماسك درب
الهايد بارك الي ماربل أرش . أعاهدك يا محمد لو مواصل مشيك في
الفجة دي يوماتي ممكن عطر المكانات ديك يشفط من جسمك المنحول كل عجاج وكتاتيح الدبرسة .
لندن جميلة يازول . وصورة الضابطة أم لجن بعد كل دي السنين تزازي وتلمع قدامي .
تحياتي

نتابع

Quote: تصرفات محترمه من بلد محترم لي رجل محترم. اها ياجماعه ياها دي الشريعه ولا حاجه تانيه؟؟؟؟

في ميزان حسناتك إن شاء الله تعالي.
لو إحتجت لواسطة عشان أرسل واحد لندن بجيك. لأنك جنتلمان.

متابعين

بوست يرد الروح............

متعك الله أخي (عثمان) بالصحة والعافية وحفظك وأسرتك

عزيزنا حماد
سلامات
ألف شكر علي المرور الكريم

عزيزنا محمد
سلامات وسعيدين بي مرورك الكريم عبر الفيس بوك
كيفك وكيف عامل مع عالم جامعة نيويورك . دي ياخ جامعة يطول عنها الكلام .
ربنا يوفقك ومشكور علي التشجيع وعلي الحديث الجميل عن بريطانيا .
تحياتي

عزيزنا التاج
سلامات
وسعادة شديدة بي مرورك الكريم عبر الفيس بوك .
ياخ ده كلام كتير علينا وكلو من لطفك وكرمك .. ونعم بريطانيا هي بلاد العدل والقانون .
ألف شكر يا أخي العزيز

تصرف حكيم منك يا عثمان
مثلك قبل سنوات وجدت شنطة نسائية في ترولي وانا متجه الى القطر لاداء امتحان
اتصرفت بسرعة شلت الشنطة معاي داخل القطر .. رغم ما يشكله القرار من خطورة لي
وبحثت عن اسم وعنوان صاحبة الشنطة
وجدتها في شارع قريب من بيتنا
بعد ان اديت الامتحان ولان الوقت متاخر جدا ليلا ارجعت الشنطة الى السوبرماركت الذي وجدت فيه الحقيبة
بعد ان اخذت مديرة المكان كل معلوماتي ذهبت مرتاحا الى اليت
اليوم التاني اتصلت صاحبة الشنطة وهي تبكي
استاذنت ان تزورنا في البيت
قالت انها كانت تطمح ان تعود لها كروت البنك والكرت الصحي والرخصة وبقية الكروت على اسوأ تقدير
لكن ان تعود لها المحتويات كاملة :
قروش كاش - غوائش ذهبية - 2 موبايل حديث - وغيرها .. فهذا غير مصدق ابدا
لازلت اذكر ان سبب زيارتها كما قالت : تريد ان ترى بعينها هل الشخص الذي ارجع هذه المحتويات شخص حقيقي ام خيال !!
شكرا لك

عزيزنا نور الدين عثمان
سلامات
ومشكور علي المرور الجميل .
في ما بعد ما بعد .. وبعد ما القصة جرجرت
والكلام جاب الكلام . عرفت كل تفاصيل سبب نسيان الكيس يا نورالدين .
وعرفتليك قدر شنو صاحبة الكيس زولة مرتاحة ونايمة في همبريب ( الاولد مني )
الزولة يا نور الدين من برايتون في الجنوب . وبتعمل في الريل استيت . وعندها برضو البيت الكبير حق الأسرة
في بورتموث فاتح علي البحر .
المضحك يا نورالدين أنا ما كنت عارف أتاري وأحد في الكريدت كارد كان ( نو ليمت ) يعني هي ليها الحق تسحب وتشتري منو أي مبلغ
علي كيفها .
مصير الزولة كلو كان في الكرت ده .

عزيزنا حماد
سلامات
وألف شكر علي المرور الكريم
ويا ريت الوأحد ربنا يقدرو ويساعد الناس .
تحياتي

عزيزنا Ammar
سلامات
تابع ياخ .. متابعتك تشرفنا كتير .
تحياتي

عزيزنا نصر الدين
سلامات
البرد الروح حقيقة يا نصر الدين هو الخطاب المرسول من المتروبليتان بوليس لندن .
الخطاب والكرت الذي أصبح شهادة . ده بوليس يا نصر الدين يجبرك علي أحترامه ومساعدته وأحترام طريقته
في العمل الدقيق والمنظم الذي يقوم به .
ألف شكر أخي

سلامات
اها يعلم الله اول بالتبادي قايلاك بتكتب في قصه ..وراجيه المفاجات
اها
المره دي المرور للتحيه
والاشاده
المروءه والاخلاق صفات كانت عند الرجل السوداني ومازالت رغم كل شي

عزيزنا الأستاذ خالد العبيد
سلامات
بارك الله فيك أخي خالد .
وألف شكر علي المرور الكريم .
تحياتي

بوست شهامة و سرد ممتع..متابعين عزيزي عثمان موسى.

عزيزتنا مها
سلام
ومشكورة كتير علي المرور الجميل .
ياخ أنتي قاعدة في أحلي بلاد الدنيا .. حليل ال U K البلد الرحيمة والكريمة .
تحياتي

بعد ما رجعت من مركز البوليس .
وأحد قال لي : يا عثمان المبلغ ده كان أشتريت من مستر
لانكستر كربريترات هانتر ولا قلوب بيد فورد بس كان ال 16 أسترليني عملت خمسة ألف صافي
خلاف الجمارك وخلاف تذاكر ال K L M .
..
بعد كم شهر قابلت صاحبنا في مناطق الجملة في منشستر .. وريتو التاشيرة
المفتوحة وكلمتو عن مسحة الشنب الكاربة والشهادة . لامن قعد وطنطن .. ياخ الكربريترات تطير ههههههها

قصة مؤثرة وسلوك غير مستغرب من أهلنا ناس دامر المجذوب

غايتو الحكاية دي لو وصلت حسين خوجلي كان طار بيها السماء عمل ليها رتوش وإفتتح بيها برنامجو بكرة

ياخ لو معاك الشهادة الميتروبوليتان وقصاصات الجرايد أعملها إسكان ونزلا.

غريبة يا عثمان لندن دي من المدن المحببه لي جدا ودائما بنزل في فنادق منطقة ساسيكس مع تقاطع إجوار رود علي بعد خطوات من محطة إجواررود وفجة الكيس. عشان كدا قصتك دي قادر أتخيلا بكل أبعادا.

قبل سنة واحد نرويجي لقي 20 الف يورو في الترام سلما للبوليس وكان خبر رئيسي في الاخبار. غريبة مافي زول ظهر قال حقتو حتي الليلة رغم النشر الواسع!

لكن من القصص الغريبة المرت علي كانت قبل كم سنة في مدينة ليمازول في قبرص كانت معاي المدام وكنا قاعدين في مطعم لبناني بتاع وجبات سريعة في كراسي برا المطعم في انتظار الشاورما وكانت المباني التجارية
مطلة علي البحر الأبيض المتوسط يفصلا منو شارع رئيسي وبعدو شريط حدائق عليها مجسمات وملاعب أطفال يعني طلة جميلة جدا.

شفت مجسم جميل معمول من خردة في شريط الحدائق قلت للمدام لحدي ما الشاورما تجهز اقطع الشارع اصور المجسم. وأنا جاي راجع من المجسم جاء قدامي موتر فيهو نفرين طائر بسرعة صاروخية ووراهو عربية بنفس السرعة وفجأة طارت من الموتر كرتونة في الهواء ونزلت مطر من اليورو من السماء

و الشارع إتغطي بالورق الأصفر والأزرق. وفي ثواني الناس كلها هجمت علي الشارع من المحلات القريبة والحركة وقفت والناس نزلت من عرباتا وهاك يا خمش ولخم في البانكنوت . حتي اللبناني والود الشغال معاهو جو طايرين مافضل زول إلا أنا اللقيت نفسي بصور في المنظر والمدام القاعدة مخلوعة والمنظر دا علي بعد 3 أمتار منها.

في أقل من دقيقة نضفوا الشارع من القروش حتي الشالا الهواء في ناس سكوها . جات عربية بوليس بعد كم دقيقة لقت آثار الجريمة إختفت وماشفت زول مشا أتكلم معاهم والله رجع ليهم حاجة. وغريبة الموتر ما رجع تاني.

غايتو اليوم داك إقتنعت إنو الأغاريق فعلا عندهم شره قروش.

عزيزنا الحاج حمد
سلامات
وألف شكر علي المجاملة الحلوة .
أمتدت الصداقة وتبادل كروت المناسبات مع صاحبة الكيس . وعرفتني علي بعض أهلها وأهدتني
كتاب عن الرئيس اليوغندي عيدي أمين .. كانت يا حاج حمد قمة في التسامح .. و كانت من أجمل السيدات العاملات
في مجال الريل أستيت .

عزيزنا أسامة البلال
سلامات
ياخ اليوم دأك جماعة نقطة البوليس جهجهوني ويومي كلو مرق دق حنك وتصوير .. والحمد لله .
كنت مشغول وعندي ألف شغلة . كان مفروض بعد مشوار أدجوار روود . أقوم أكسح مشوار لفنشلي .
عندي فيها حاجة .
وبعدين يا أسامة فنشلي دي بحبها و الشركة حقتي كان أسمها فنشلي فاشون ..
كنت شغال في مجال الملابس من لندن الي دبي لصالح
تاجر حضرمي في دبي .
المهم الشركة حقتي أسمها ( فنشلي فاشن ) وبرضو بشيل بضاعة للسودان لي محل صغير وكدي .
أنت عارف فنشلي وخلاف السماحة والموضة .
هي المنطقة الفازت فيها السيدة / مارجريت تاتشر 1959 نائبة في البرلمان .
وبعدين أظن وزيرة تعليم وبعدها بي زمن رئيسة وزراء . ..
كان لابد من رد الكيس يا أسامة وأنشاءالله ربنا يدينا العمر ونتحاوم في ديك المكانات الحنينة .

عزيزنا قور حطب
سلامات
أرجو أن تكون بخير
كان كنت متابع لدراسة الطب في جامعة الفاشر ولا كان كنت شغال في الجامعة .
ياخ ربنا معاك في ده الظرف العصيب وأنشاءالله نسمعبيك عالم كبير .
مشكور علي المرور الكريم

نتابع

نتابع

كنت أسكن في شرق لندن دقيقتين كداري من
محطة أبتوم بارك . شارع وأحد يفصلني من سوق السبت الرهيب .
كنت أدفع 240 أسترليني ايجار للغرفة .. والغرفة كانت هي السكن ومكان المعيشة ومكتب الشركة المسكينة .