موقعة المريخ مع البايرن اشبه بموقعة كرري لافرق بينهما ...

خسرنا موقعة كرري وفرحنا
وخسر المريخ وفرحنا
ولكن هل سيقول البايرن عن المريخ كما قال الجيش الانجليزي عن ابطال كرري
ياخي البايرن ديل طلعوا هبوب سااااكت شابكننا قاهرين الابطال وشنو وشنو وطلع حكي في حكي
البايرن شابكنا ليك ( ميا زان ميا ) يعني نحنا زينا مافي وطلعوا نمور من ورق ...


كابتن هيثم فوووووق للاربعين وبحاورهم مثل الاطفال ...
نرجع نقول ياجماعه هذه المباراه كانت مكسب كبير لنا كسودانيين
لاننا نحنا بلد معروف بالمجاعات والكوارث والحروب فقط كويس هذه المباراه شاهدتها دول كثيره من العالم وعرفوا بان توجد كره سودانية
.
.
ندخل في كلام المباراه رغم الخساره كسب المريخ الاعداد النفسي لابطاله قبل الاعداد البدني ( الثقه )
تخيل نفسك لعبت مع نجوم مثل نجوم البايرن ومع لاعب مرشح افضل لاعب في العالم اكيد سوف تغير من مشيتك وتديك دفعة معنويه
زي كانك طقطقت ليك زول عاتي في الحله ومخوفهم اكيد بتمشي رافع كتف ومنزل كتف
اما قصة المريخ دفع ومادفع دي كمان نواحي اخرى سوف نستعرضها وقت اخر ...

اهم شيء في كرة القدم تعرف قدر نفسك وتلعب على اساسها
ونجح المدرب في ذلك وساعده نجوم المريخ بالتطبيق

حبيبنا
وليد
تحياتي
رغم قصر فترة الإعداد المريخ كان في الميعاد

مودتي

لولا الملامة وقلة الذوق كان عملتها Auto play

بتبالغو :)

سلامات يا وليد

Quote: تخيل نفسك لعبت مع نجوم مثل نجوم البايرن ومع لاعب مرشح افضل لاعب في العالم اكيد سوف تغير من مشيتك وتديك دفعة معنويه زي كانك طقطقت ليك زول عاتي في الحله ومخوفهم اكيد بتمشي رافع كتف ومنزل كتف

عارف خطورة الحتة وين؟ مع نفسية اللاعب السوداني الهشة بصفة عامة ونفسية الوصيفابي البتعشق العيش في الماضي و اجترار إنجازات كان بالصح كان قاطعنها من راسهم, ناسك ديل ح يصيبهم غرور وخاصة أكرم و الدفاع التحمّلوا عبأ المباراة و تألّقوا و ح يجوا في أوّل إختبار حقيقي في التمهيدي ويلعبوا بغرور و ستكون نفس المفاجاة الأصابتهم يوم الصفاقسي و التاكسي و الوحدات, ويطيروا من التمهيدي ويقعدوا لينا في لعبنا مع البايرن و نحنا عالمي و زارعين بطاطس :)

حبيبنا
وليد

المبارة كانت صعبة للمريخ ورغم ذلك المريخ ظهر بشكل جيد رغم عدم جاهزيتهم الكاملة

البايرن فريق جاهز تماماً من حيث الأعداد الفني والبدني والفارق كبير بينه وبين بايرن ميونخ من ناحية الجاهزية
بايرن ميونخ فريق مواصل اعداده ولم يتوقف عن المشاركات سواء علي الدوري المحلي دوري ابطال اوربا وقبل ايام كان مشاركاً في بطولة كاس العالم

المريخ .. بدأ اعداده قريباً ومحترفيه وصلو في نفس يوم السفر الي قطر
يعني إعداد المريخ بدأ اعداده بمعسكر قطر ولم يتجاوز الاسبوع

هنالك اسباب كثيرة لم تجعل المريخ ان يظهر بشكل افضل مما كان عليه في المبارة منها :

اولاً : صعوبة وصول مهاجمي المريخ الي مرمي فريق البايرن وليست لضعف قوة الهجوم التي لا يمكن ان نحكم عليها الان لانها المبارة الاولي للفريق بخط هجوم يعتبر جديد ( عنكبة + تراوري ) وتراوري هو الذي لعب في الشوط الاول ..

ثانيا : ـ خط الوسط كان فيه اضافة لاعب جديد للفريق ولاول مرة يلعب مع المريخ ( باسيرو بامبا )

ثالثاً : خط الدفاع هو الخط الوحيد الذي ظهر بمستوي جيد خلال المبارة ( علي جعفر +امير كمال+ غاندي + بلة جابر ) بما فيهم الحارس اكرم الهادي سليم وكان ذلك واضحاً من خلال الانسجام التام بين اللاعبين وتمكرزهم الجيد داخل الملعب . و حتي التغييرات التي تمت وكانت بدخول ( موسي الزومة + الطاهر الحاج ) لم ثؤثر كثيراً علي اداء مستوي الدفاع .

رابعاً : تغير مستوي خط الوسط في الشوط الثاني بعد دخول المحترف الاثيوبي ( شيملس ) وليست لضعف مستواه الذي لا يمكن ان نحكم عليه من اول مبارة له مع المريخ و قد يكون ايضاً بسبب عدم انسجامه مع المجموعة والدليل علي ذلك تمريراته الخاطئة في بعض المرات للمهاجم ( اوليفيه ) وسوء التفاهم بينهم ووقوع اوليفيه في مصيدة التسلل اكثر من مرة ( ومن خلال لمساته اعتقد بان المريخ كسب لاعب حريف )

وحسب وجهة نظري لو بدأ كروجر بالمهاجم ( اوليفيه ) من بداية المبارة بوجود صانع اللعب هيثم مصطفي كان يمكن ان يصل المريخ لمرمي الباير اكثر من مرة وذلك للتفاهم الموجود بينهم .

عموما اداء ومظهر الفريق وشكله داخل الملعب كان جيداً مقارنة بفريق جاهز بدنياً وفنياً ..


المدرب كروجر مدرب شجاع وقدير ولعب بتكتيك عالي خاصة من الناحية الدفاعية رغم انه لم يلعب دفاعياً الا ان تنظيم الفريق وانتشاره في الملعب كان لها الاثر في خروج الفريق باقل خسارة ..خسر النتيجة لكنه لم يخسر الاداء .. وتمثلت شجاعة كروجر في التبديلات التي اجراها حيث قام بتبدبل لاعبين لم بعيدين عن روح التنافس والمشاركة في المباريات من الموسم السابق ( الزومة + سعيدالسعودي+ بلة جابر ) ...

فريق متصدر الدوري الالماني و فاز علي برشلونة رايح جاي وبعدد وافر من الاهداف وحقق ابطال اوربا وكاس العالم ويفوز علي المريخ وفي بداية اعداده و بهدفين نظيفين يعتبر انجاز وانجاز كبير حققوه فتية المريخ ....

مودتي

التحيات يا وليد
وحمدلله ع السلامة

** ود عبداللطيف..
** سلام..
## الراكوبه فى الخريف بتتشكر ؟؟؟
## وقت الناس ماإستعدت للمبارأه البوبار وفتح الزرار فى بيت الإيجار لزومو شنو؟؟؟ (المال السايب ..............)
## قُبال ماالمبارأه تتلعب العالم كلو عارف النتيجه المُتفق عليها :- 2\صفر ....
## أعفص هنا البوستات قبل الكوره بيومين تجد تعليقى :-

انت يا أساسى .. المريخ دا جاااادى ؟ ....

دعوة عشاء رسمية بعد مباراة بايرن ميونخ في حالة..!!]

الفروق بين موفعة كرري والدوحة يا كابتن وليد مع تقديرنا لفكرتك ..

موقعة كرري دخلها الانصار بثقة في النفس وروح المنتصر و بالرغم من انه اجتمعت معهم الكثرة والشجاعة ولكن هزمتهم التكنلوجيا والتكتيك الاحدث ..
موقعة الدوحة دخلها المريخ بروح المنهزم قبل صافرة البداية يكفي تصريح المدرب بأنه يتوقع اي نتيجة عدا الفوز او التعادل .. لكن نفعهم التكتيك والخرمجة في ذات الوقت ( اي عدم ترك فرصة للخصم بترتيب هجماته وافكاره ... هو تكتيك في النهاية )..

صحيح ان فريق البايرن غلب برشلونة رايح وجايي لكن لو قابل المريخ برشلونة لانهزم بالعشرة .. لانه برشلونة متمرس على ضرب طريقة الخندقة وتشتيت الكورة باسلوبه المتفرد في تكرار مفاجآت الخصم .. ممكن فجأة تلاقي المدافع بيكي انفرد بالمرمى .فضلا عن ان كل اعضاء الفريق هدافين اي لايوجد هداف متخصص يمكن محاصرته .

ثالثا اتبع مدافعي المريخ اسلوب الارهاب بضربات الجوز والانزلاقات في فريق كل اعضائه نجوم لو اصيب اي لاعب وغاب عن الملاعب لمدة شهر واحد ربما لن تتوفر له فرصة ثانية ليدخل التشكيلة .. وايضا هذا ممكن نعتمده كاسلوب طالما تغاضى الحكم ولم يشهر البطاقات الحمراء ..

الدرديري كباشي ... سلامات

Quote: موقعة كرري دخلها الانصار بثقة في النفس وروح المنتصر و بالرغم من انه اجتمعت معهم الكثرة والشجاعة ولكن هزمتهم التكنلوجيا والتكتيك الاحدث .. موقعة الدوحة دخلها المريخ بروح المنهزم قبل صافرة البداية يكفي تصريح المدرب بأنه يتوقع اي نتيجة عدا الفوز او التعادل .. لكن نفعهم التكتيك والخرمجة في ذات الوقت ( اي عدم ترك فرصة للخصم بترتيب هجماته وافكاره ... هو تكتيك في النهاية )..

والمريخ دخل المباراه واحترم الخصم للفارق الكبير وكبير جدا بين المدرسه الالمانيه والمدرسه العشوائية
دخل لكي يدافع وكان يعلم رغم الدفاع سوف يخسر ولكن عمل على الخروج باقل الخسائر
والان فريق المريخ دا لو لعب مع اي فريق في الصومال ولا اثيوبيا عادي ممكن يخسر باهداف كثيره
كرتنا ماعندها اسكيل اوثقف معين حتى الناس تستطيع تقيم اللاعب جيدا وتتوقع منه عمل محترم
ممكن اليوم يكون فوق وغدا يكون في الاسفل

Quote: ثالثا اتبع مدافعي المريخ اسلوب الارهاب بضربات الجوز والانزلاقات في فريق كل اعضائه نجوم لو اصيب اي لاعب وغاب عن الملاعب لمدة شهر واحد ربما لن تتوفر له فرصة ثانية ليدخل التشكيلة .. وايضا هذا ممكن نعتمده كاسلوب طالما تغاضى الحكم ولم يشهر البطاقات الحمراء ..

يازول ديل دبابات بشريه ومحترفين بحق وحقيقة دا كلام قديم وفكر قديم الان الالمان ديل كان مستعيدن يضربوا ليك ناس بله جابر والزومه ومعهم الجمهور انت بتعلب ولا شنو بعدين عادي ممكن يكون مكسور الانكل للمحترف ويقولو ليك ح يغيب اربعه اسابيع عن الملاعب
اها انت عارف مع الغياب دا برضو بكون بمرن في اجزاء مختلفه من جسمه سليمه حتى لايتاثر ياخي كرة القدم دي فكر وعلم ونحنا نجهله صراحه ..

عمران صالح ... ياخي طبلتك عينه ممتعه في يوم في احدى القنوات شاهدت ليك راجل معلم بتاع عشره بلدي ورقيص شرقي
في النهاية وقف فوق الطبله وقعد يرقص كمان
ابداع يااااااااخ شكرا لهديتك ياحبوب ..


ود البشرى ... كيفك ياملك

Quote: عارف خطورة الحتة وين؟ مع نفسية اللاعب السوداني الهشة بصفة عامة ونفسية الوصيفابي البتعشق العيش في الماضي و اجترار إنجازات كان بالصح كان قاطعنها من راسهم, ناسك ديل ح يصيبهم غرور وخاصة أكرم و الدفاع التحمّلوا عبأ المباراة و تألّقوا و ح يجوا في أوّل إختبار حقيقي في التمهيدي ويلعبوا بغرور و ستكون نفس المفاجاة الأصابتهم يوم الصفاقسي و التاكسي و الوحدات, ويطيروا من التمهيدي ويقعدوا لينا في لعبنا مع البايرن و نحنا عالمي و زارعين بطاطس :)

كلامك دا ياعمران فيهو 90 في المائه من الحقيقة ولكن نقول التكرر يعلم الحمار الناس دي ان شاء الله تستفيد من هذه التجربة وتتعامل معها بجديه
انا بالنسبة كان اكرم ولا المعز ديل ما بطمنوني اصلا ياخي المريخ محتااااج شغل كتيييييير
وهذه المباراه ليس مقياس حقيقي.. كما تعلم فريق متوقع تعاطف الجمهور معه في حال الهزيمه وسوف يجد مليون مبرر
عادي ممكن يرجعوا من قطر وتلقاهم راقدين رز في اول مباراه لهم ...
المباراه على العموم كانت جميل ولعب المريخ في مربعه فقط ولم يشكل اي خطورة على البايرن
نقوم نقول المريخ نجح في الدور الدفاعي لان طوال عمر المباراه كان مدافع حتى ولو كانت الكره معه لان طوال زمن المباراه كان يلعب في مربعه
.
.
ود البشرى كل سنة وانت طيب وتشكر على المرور الجميل

طارق المريخي الوجيه

Quote: حبيبنا وليد المبارة كانت صعبة للمريخ ورغم ذلك المريخ ظهر بشكل جيد رغم عدم جاهزيتهم الكاملة البايرن فريق جاهز تماماً من حيث الأعداد الفني والبدني والفارق كبير بينه وبين بايرن ميونخ من ناحية الجاهزية بايرن ميونخ فريق مواصل اعداده ولم يتوقف عن المشاركات سواء علي الدوري المحلي دوري ابطال اوربا وقبل ايام كان مشاركاً في بطولة كاس العالم

دي اصعب مباراه في عمر فريق البايرن لم تقابله كره قدم بهذه الطريقة لذلك كانت صعبه على البايرن وليس المريخ
كما تعلم الكره السودانية سلحفائية جدا جدا لذلك صعبوها عليهم انت عارف هم مندهشين من جمهور المريخ والمريخ للان ...

Quote: اولاً : صعوبة وصول مهاجمي المريخ الي مرمي فريق البايرن وليست لضعف قوة الهجوم التي لا يمكن ان نحكم عليها الان لانها المبارة الاولي للفريق بخط هجوم يعتبر جديد ( عنكبة + تراوري ) وتراوري هو الذي لعب في الشوط الاول ..

انتو جادين ولا شنو كمان كنتو عايزين تهاجمو والله لو كوره ساااكت ضربت العارضة كان تشوفو كلام تاني وكوره في القاموس مافي
الناس بتقطع الكره والامداد بكل سهوله من المريخ في الهجوم عارف ليه اول حاجه في مره كانو 3 لاعبين مقابل اتنين لم يحسنوا التصرف
ولو تعاملو معها بفكر كان ممكن تكون هدف وكره عنكبه الاولى ايضا برضو كان ممكن تكون هدف لو استقبلها الاستقبال الجيد
ياخي قصة لاعب جيد وقديم دي انتهت زمان شوف الفرق القوميه بلومهم كيف وفي وقت زي شنو بضربوا كفر زي الترتيب كرة القدم ساهله
جدا ونحنا برانا مصعبنها ...

Quote: عموما اداء ومظهر الفريق وشكله داخل الملعب كان جيداً مقارنة بفريق جاهز بدنياً وفنياً ..

فعلا كان شكل لاعبي المريخ جميل ووقفتهم والتغطيه سليمه في اوقات كثيره لانهم كانو متخدقين وقريبين لبعض
حتى عند استلامهم للكره الانتشار كان بكون جميل بس تنقصهم دقة التمرير وكيفية بداية الهجمه ...

بالله استمتع بالمقطع ده

11 تمريرة ... زي الليل

تمريرات بالمسطرة والقلم

متعة والله متعة

Quote: عارف خطورة الحتة وين؟ مع نفسية اللاعب السوداني الهشة بصفة عامة ونفسية الوصيفابي البتعشق العيش في الماضي و اجترار إنجازات كان بالصح كان قاطعنها من راسهم, ناسك ديل ح يصيبهم غرور وخاصة أكرم و الدفاع التحمّلوا عبأ المباراة و تألّقوا و ح يجوا في أوّل إختبار حقيقي في التمهيدي ويلعبوا بغرور و ستكون نفس المفاجاة الأصابتهم يوم الصفاقسي و التاكسي و الوحدات, ويطيروا من التمهيدي ويقعدوا لينا في لعبنا مع البايرن و نحنا عالمي و زارعين بطاطس :)

يا وليد .. الكلام الفوق الـ قلت عليهو صحيح بنسبة 90% ونسبتو لـ عمران لـ محمد البشري.
عمران جاب الطلبة.

Quote: عمران جاب الطلبة .

حبيبنا ود البشرى ما يزعل يا وليد ياخي
انا زي ما قال ميرغني جبت الطلبة .

اعتقد انو المباراة .. لاتخضع لقواعد النقد والتحليل العادى سواء للمباريات التنافسية او الاعدادية ..عشان

بالنسبة للبايرن ليست مباراة اعداية فالفريق فى منتصف الموسم .. والمبارايات البلعهبا الان .. فقط لابقاء مستوى اللياقة مرتفع ومواصلة التدريبات ... لانها فترة اجازة قصيرة منتصف الموسم
فالبايرن ما اعتقد عاوز يعمل انسجام لتشكيلة جديدة او طرق لعب جديده او اى اضافات على الفريق .. وهو فى منتصف الموسم


بالنسبة للمريخ ... لاتعتبر مباراة اعدادية بالمعنى المعروف لان الاعداد يبدأ متدرج ... للوصول للتشكيلة والانسجام واللياقة ووووووو ... فمباراة بالحجم ده بالنسبة للمريخ ... هى مباراة كرنفالية احتفالية تبقى فى الذاكرة للتاريخ فقط
ومستوى الفراق بين مستوى الفريقين لايجعهلا اكثر من مباراة مهرجانية ... حتى كلمة اعداد بالنسبة للمريخ اشوفها كتيرة .. لفارق المستوى الهائل بين الفريقين

لذا ... نتيجتها ايا كانت ما اعتقد انها بتعكس اى حاجه او بتوضح اى حاجه

دى مباراة نحكى بيها بعدين لو ربنا مد فى اعمارنا ... نحكى بيها لى احفادنا

زى ما عملو معانا فى مباراة سانتوس وبيليه .. او الهونفيد وبوشكاش

مباراة للذكرى

يا وليد عليكـ الله كلم حرسي ده ياخي مرضنا والله
11 تميريرة في عشرين متر مربع فرحان بيها
مسحناها من الواتس جات لاحقانا في حوشنا !!

معقولة يا حرسي ياخي فريق ليهو مية سنة وكم كاس خارجي تفرح بـ 11 تمريرة ليهو في ربع ملعبو ؟؟؟

Quote: انا زي ما قال ميرغني جبت الطلبة .

الطلبة بالالماني.

Quote: خسرنا موقعة كرري وفرحنا وخسر المريخ وفرحنا ولكن هل سيقول البايرن عن المريخ كما قال الجيش الانجليزي عن ابطال كرري

ولي

كيف حالك .. وطبعاً كلام متوقع من زول هلالابي زيك
اها عشان الاقتباس الفوق دا هاك كلام جارديولا بذات نفسه

Quote: بيب جارديولا : لم اتوقع فريق افريقى بهذه القوة وجمهور السودان اضفى نكهه خاصه على المباراة قال مدرب بايرميونخ الالمانى بيب غراديولا فى المؤتمر الصحفى الذى اعقب المباراة :لعبت امام فريق محترم و لم اتوقع ان هنالك فريق افريقى بهذه القوة والتكتيك المحكم وان فريق المريخ فريق جيد ويقدم اداء نال الاعجاب واشاد بالجمهور السودانى الذى اضفى على اللقاء نكهه خاصه وجعلتنا نلعب فى اجواء تشبه البوندسليقا وقال اجبرتنا فرقة المريخ على تقديم كل مالدينا واعتبر ان مباراة المريخ تجربه مفيده.

بيب جارديولا : لم اتوقع فريق افريقى بهذه القوة وجمهور السودا...هه خاصه على المباراة
تعرف لمعرفتي بنفسية الهلالاب ما متوقع منكم كلمة حق
والله صحي :)

الخبير ... طلحه

Quote: التحيات يا وليد وحمدلله ع السلامة

تسلم ياطلحه وتسال منك العافية

مشكور يا ميرغني تيتاوي

Quote: يا وليد .. الكلام الفوق الـ قلت عليهو صحيح بنسبة 90% ونسبتو لـ عمران لـ محمد البشري. عمران جاب الطلبة.

ود البشرى زول لطيف وفكره عالي في كرة القدم

ود البشرى اشتقنا ليكم عديل والله ولكل الناس هنا في سودانيز

استاذنا وحبيبنا ابو محمد فؤاد

Quote: ## قُبال ماالمبارأه تتلعب العالم كلو عارف النتيجه المُتفق عليها :- 2\صفر .... ## أعفص هنا البوستات قبل الكوره بيومين تجد تعليقى :-

انت لعبت كوره ياخ حتى ولو كانت النتجيه متفقه وممكن نقول كان تمرين
نقوم نشوف الاشياء التي نجح فيها المريخ دخل لكي يحافظ على مرماه
وانت لاحظ لحركة لاعبين المريخ كيف كان يتحركون اثناء الكره مع الخصم
اهم شيء تركز على الوقفه من خلال حركة الكره في كثير من الاحيان تجد هؤلا الشباب لم يقصروا
ياخي فرق شاااااسع جدا جدا بين الفريقين عندي اصحابي في المانيا ومنهم عمر الزبير لو تعرفه ود بحري
نقل لي كل شيء في الاعلام الالماني ...
بعدين الناس ديل كانو جادين وحالو اكثر من مره زيادة الاهداف بس لم يحالفهم الحظ
والمدرب حاول يعمل اشياء جديده وطريقة لعب لتطبيقها في المريخ
زي ما تقول المباراه كانت عباره عن مناوره ...

Quote: انت لعبت كوره ياخ حتى ولو كانت النتجيه متفقه وممكن نقول كان تمرين نقوم نشوف الاشياء التي نجح فيها المريخ دخل لكي يحافظ على مرماه وانت لاحظ لحركة لاعبين المريخ كيف كان يتحركون اثناء الكره مع الخصم اهم شيء تركز على الوقفه من خلال حركة الكره في كثير من الاحيان تجد هؤلا الشباب لم يقصروا ياخي فرق شاااااسع جدا جدا بين الفريقين عندي اصحابي في المانيا ومنهم عمر الزبير لو تعرفه ود بحري نقل لي كل شيء في الاعلام الالماني ... بعدين الناس ديل كانو جادين وحالو اكثر من مره زيادة الاهداف بس لم يحالفهم الحظ والمدرب حاول يعمل اشياء جديده وطريقة لعب لتطبيقها في المريخ زي ما تقول المباراه كانت عباره عن مناوره ...

وليد

صباحاتك نواضر
طيب يا وليد اقتباسك الفوق يدل على حاجة واحدة بس
وهي انو المريخ لعب كورة كويسه وبانضباط تكتيكي عالي اشاد به كل النقاد
واي زول لعب كورة أو بعرف حاجة عن الكورة السودانية
يدرك أن انضباط اللاعب السوداني عموما ضعيف ممكن يتقيد ليك بتعليمات المدرب
ربع ساعه أو نص ساعه وبعدين بعمل الفي بالو .. وينسى كلام المدرب داك كلو
دي اكبر فائدة إنك تحدد هدفك وهي انك تقفل ملعبك كويس وتطلع بأقل خسارة من فريق هو بطل العالم
الالمان ناس جادين في الكورة وممكن يحشوك 20 قون لو اتيحت لهم الفرصة
وهذا يعني نجاح المريخ في استراتيجيته الدفاعية بنسبة 90 %
وحتى الأقوان جات من اخطاء فردية بحته لافراد الدفاع ..
مع مرور الوقت اكتسب المريخ الثقة وعمل هجمتين ثلاثه
واحدة منهن لولا انانية اوليفيه كان ممكن يسجل منها المريخ وفرصتين لعنكبه
وبرضو يا وليد رغم التغييرات الكتيرة حافظ المريخ على انضباطه التكتيكي ولم يختل توازن الفريق كثيرا
بل بالعكس الشوط التاني كان احسن .. مع العلم انو ماف مريخابي ولا واحد عاقل كان يتصور
أن يهزم المريخ البايرن ..... والله صحي :)


تحياتي

الامين البشاري

Quote: صباحاتك نواضر طيب يا وليد اقتباسك الفوق يدل على حاجة واحدة بس وهي انو المريخ لعب كورة كويسه وبانضباط تكتيكي عالي اشاد به كل النقاد واي زول لعب كورة أو بعرف حاجة عن الكورة السودانية يدرك أن انضباط اللاعب السوداني عموما ضعيف ممكن يتقيد ليك بتعليمات المدرب ربع ساعه أو نص ساعه وبعدين بعمل الفي بالو .. وينسى كلام المدرب داك كلو دي اكبر فائدة إنك تحدد هدفك وهي انك تقفل ملعبك كويس وتطلع بأقل خسارة من فريق هو بطل العالم الالمان ناس جادين في الكورة وممكن يحشوك 20 قون لو اتيحت لهم الفرصة وهذا يعني نجاح المريخ في استراتيجيته الدفاعية بنسبة 90 % وحتى الأقوان جات من اخطاء فردية بحته لافراد الدفاع .. مع مرور الوقت اكتسب المريخ الثقة وعمل هجمتين ثلاثه واحدة منهن لولا انانية اوليفيه كان ممكن يسجل منها المريخ وفرصتين لعنكبه وبرضو يا وليد رغم التغييرات الكتيرة حافظ المريخ على انضباطه التكتيكي ولم يختل توازن الفريق كثيرا بل بالعكس الشوط التاني كان احسن .. مع العلم انو ماف مريخابي ولا واحد عاقل كان يتصور أن يهزم المريخ البايرن ..... والله صحي :)

والله صحي صحي كلامك دا الحاصل في مباراة المريخ مع البايرن وانا ماقلت غير ذلك ولا ح اقول غير ذلك
سجمنا يا البشاري :
انت حصل ليك شنو عارف لانك خاتي في حساباتك اني هلالابي والكلام دا غلط وحتى ولو كنت هلالابي
ياخي والله اتشرف ولكن ما اظن في يوم اجي وابخس مجهود الشباب ومجهود ادارة المريخ كما يعمل بعض
من المتشبهين بهلاليتهم نحنا تربية ابو امنه حامد يا البشاري ننظر للكره بعين الجمال والحب
لكل الالوان اذا كانت مريخيية او غيرها وليس بعين الحقد والكراهيه
ماحصل في الاعلام واستهلاك كلام فاضي وفيها شنو المريخ لو دفع مايدفع في زول بيدفع من جيبو
حتى جمال الوالي ماعندو موضوع يعمل مؤتمر عشان ينفي
ياخي ماقلت ليك نحنا لسه ماوصلنا مستوى فهم الرياضه ...
.
.
البشاري انا عندي صور هنا كنت عايز اجي اوضح بيها كيف نجح المريخ بالخروج باقل الخسائر
وانا اتحدثت عن شكل الحركه بتاعت لاعبي المريخ وانضباتهم عارف ليه لان المباراه كانت عباره عن كرنفال
ومافي اي ضغط على اللاعبين عشان كدا لازم رياضتنا تحاول تعمل طبيب نفسي للاعبي الهلال والمريخ والفرق الكبيره ..

Quote: وهي انو المريخ لعب كورة كويسه وبانضباط تكتيكي عالي اشاد به كل النقاد واي زول لعب كورة أو بعرف حاجة عن الكورة السودانية

حتى دا راي الالمان ولو حتى راي الانجليز زاتو ربنا اعطانا عقل عشان نميز ونشوف ونستوعب
هل هذا فعلا حدث في المباراه ام مجامله ...