مباراة كبيرة للمريخ امام بايرميونخ الالماني

لعب فريق المريخ مبارة كبيرة امام احدي ابطال واكبر الفرق الاروبية في استاد حمد بن خليفة
بمدينة الدوحة والتي انتهت قبل قليل بهدفين لصالح بايرميونخ دون مقابل للمريخ ، وقدي ادي
الفريق السوداني ادائاً جيدا في المبارة والتي حاول فيها الوصول الي شباك خصمه اكثر من مرة
عبر لاعبه عنكبة .

المبارة بداية جيدة للفريق حيث اظهر اداء بدرجة كبيرة
وتالق حرسه اكرم الهادي .

Quote: الفريق السوداني ادائاً جيدا في المبارة والتي حاول فيها الوصول الي شباك خصمه اكثر من مرة عبر لاعبه عنكبة .

يا مان عنكبة شنو وشنكبة شنو ؟
المُباراة كانت من طرف واحد مع سلبية اللمسة الأخيرة للاعبي البايرن ...

أصلو ما توهم نفسك .. الكلام دا برضو قولو لي مزمل عشان بُكرة ما يوهم الناس ساي !!

الشوط الأول نسبة استحواذ البايرن كانت 69%

وفي الشوط الثاني ما عارفها بالضبط كم لكن واضح جداً إنها زادت واحتمال تكون اتعدّت الـ 80%

صبري طه:
والله انا ما مريخابي لكن بالنسبة لفريق
مقفول في البلد دي وليعيبته بتعشوا بالبوش
بتاعنا دي وتطلع المباراة 2/صفر دي في حدي زاته
اداء جيد.

لماذا لا نغرس الوطنية التي اندثرت عبر
الرياضة وخاصة كرة القدم ، نكون فقط
سودانيين في حالة لعب فريق لعبة كبيرة
زي مباراة المريخ اليوم .

Quote: لماذا لا نغرس الوطنية التي اندثرت عبر الرياضة وخاصة كرة القدم ، نكون فقط سودانيين في حالة لعب فريق لعبة كبيرة زي مباراة المريخ اليوم .

ول أبا عوض نواي بعد السلام
مبروك للمريخ هذه النتيجة. هذا هو الفريق الذي هزم فشلونة 4 صفر في ميونيخ.
تتكلم عن الوطنية الناس بقت تخلط بين جمال الوالي وعبد الرحمن خضر الوالي. كله والي وكله عند العرب صابون.
الوطنية بقت سلعة قديمة منتهية الصلاحية وصارت مزايدة لا أكثر ولا أقل.
الما بعرف الفرق بين الكوع والبوع يتحدث لك عن سياسة أيزنهاور وهو لا يعلم أنه ليس باكنباور.
لك والأسرة خالص التحايا.
تحياتي.

كبـّاشي الصـّـافي
(العوج راي والعديل راي) .

ولد امي كباشي
كيفك والاولاد انشاء الله تامين ما نفاصين
- طبعاً الوطنية في السودان مفقودة بصراحة
الزول كان داوس مرته يقول ليك انعل ابوالبلد .
عموماً نحتاج الي سنين عددا حتي نسترد الوطنية

هسة جييت من المباراة

الاستحواذ كان اكتر من 80% عند الالمان، الكورة كانت قوون و باك
لكن المريخ دافع بشكل رائع، و المشجعين كانوا واقفين بشدة مع الفريق
مما خلق جو ايجابي شديد داخل الميدان طبعا المشجعين بنسبة
95% سودانيين خواجات بالعدد، الملفت حضور الجالية
السودانية بأسرها و اطفالها فكان فعلا جو عائلي رائع و المريخ
لأنه دافع ببسالة فاستحق وقوف الجمهور معه،
لكن فرق المستوى كان واضح للغاية فأول ما يمسكوا ناسنا
الكورة يهاجمهم الالمان بشكل مكثف
مما صعب عليهم خلق أو هجمات

اللاعب المقصود عنكبة كان رقم 18 و كان فعلا
مزعج و خلق تهديد محدود على مرمى الالمان لكنه
كان كافيا لرفع الروح المعنوية لنا في المدرجات

في النهاية شوتة يتيمة في مرمى الالمان، و ناس
البايرن جاملونا و ما نزلوا ناسهم كلهم، لكن شفنا
ناس ريبيري و فيليب لام اللي اتغيروا على ما اعتقد
في الشوط التاني

بالمناسبة حارس المريخ الاول كان ممتاز

Quote: لماذا لا نغرس الوطنية التي اندثرت عبر الرياضة وخاصة كرة القدم ، نكون فقط سودانيين في حالة لعب فريق لعبة كبيرة زي مباراة المريخ اليوم .

الوطنية دي كانت فى قبل ما يظهر الاعلام المتعصب
هو سبب إندثار الوطنية فى كرة القدم.
فى زمناً ما بدري شديد غالبية السودانيين فى المهجر
كانوا مع أي فريق سوداني يلعب برا السودان.
حسي الواحد بقي يكره الفريق الآخر أكثر من حبه
لفريقه.
اعلام نفعي مُضلل.

امجد شكراً علي المرور
واضافة معلومات مهمة
عموماً بداية تستحق التشجيع

الاخ /الكريم ميرغني
والله انت قلت الصدق !
الاعلام المرتشي هو الذي دمر
الوطنية بصراحة
عموما شكراً علي مروروك وتعليق الجميل
لك تحياتي والاسرة الكريمة