Post: #1
Title: أجعص سوبر ماركت في الخرطوم تلقي قدامه 3 حلل لبن...(احتمال تكون في صورة)
Author: سيف اليزل برعي البدوي
Date: 01-08-2014, 03:31 AM
شكلها طلعت موضة...و بقلدوا بعض
بختوها في تربيزة حديد عادية...
يا ريت لو ختوها جوه..
المنظر مش حضاري...
حلل الالمونيوم بتاعت زمان ديك...
و تلقي السوبر ماركت جواه حاجات راقية
واقسام للسكر واقسام للخضار وكل شئ تمااام
|
Post: #2
Title: Re: أجعص سوبر ماركت في الخرطوم تلقي قدامه 3 حلل لبن...(احتمال تكون في صورة)
Author: سيف اليزل برعي البدوي
Date: 01-08-2014, 03:49 AM
Parent: #1
هل الخرطوم قرية كبيرة؟؟؟
هل نفتقد ثقافة العرض the presentation
في حاجات كده ما بنشوفها الا في السودان..
مثلا بيع السعوط ده ما ممكن تكون في مصانع ويتغلف زيو زي معسل الشيشة
بدل الغرف بالملاعق ده
طريقة بيع اللبن محتاجة فنيات...
مثلا ستات الشاي والناس القاعدين ببنابرهم جمب الخور
ممكن تكون بنابرها احسن شوية وترابيز احسن شوية
يعني لازم نهتم بالمنظر شوية بارخص تكاليف
ليه ما نعرض حاجاتنا بطريقة احسن متعمق في الفولكلور شوية
تهذيب الاشياء قليلا...
تجميل الأشياء..
بالذات فيما يخص التجارة...
تزويق و تزيين الاشياء...
مثل الليمونة التي توضع في طرف الكوب ..فكرة بسيطة تجعلك تدفع اكثر
الجدية وعدم التعامل بعشوائية مع الأشياء...
|
Post: #3
Title: Re: أجعص سوبر ماركت في الخرطوم تلقي قدامه 3 حلل لبن...(احتمال تكون في صورة)
Author: سيف اليزل برعي البدوي
Date: 01-08-2014, 03:57 AM
Parent: #2
حتي الباعة المتجولين لو جملوا أشيائهم بديكور مع مراعاة النظافة بكون أروع...
لماذا لا نكون منظمين و نهتم باللافتات و نوكل هذا الأمر للمتخصصين
يعني نظرية البوهيه والجلبطة علي الحديد طوااالي ده مفروض ناخد فيها وقفة
الدعاية والاعلانات الان علم و فن
التجارة شطارة...
والمنافسة تؤدي للتحسن في الأداء...
سلع رديئة الان بأسعار عالية...
الأسعار تقفز لأن التجار بغرفوا السوق وبوده الجنوب
فهناك توجد سيولة ولا توجد سلع كافية...
غلاء و جشع...و بضاعة رديئة تحير عقل اللبيب...
|
Post: #4
Title: Re: أجعص سوبر ماركت في الخرطوم تلقي قدامه 3 حلل لبن...(احتمال تكون في صورة)
Author: سيف اليزل برعي البدوي
Date: 01-08-2014, 04:38 AM
Parent: #3
التعبئة و التغليف بتفرق ...
و ممكن ترفع سعر الحاجة..
صاحبي محمد قال لي سعوط السودان ده يا سيف مافي حل
غير يتباع freshكده وحتي السعوط المغلف هنا بأمريكا به مواد حافظة
يعني ممكن يسرطن عادي
أما بتاع السودان فلا...
المهم البوست عبارة عن ملاحظات من خلال الصور...
و في انتظار تعليقاتكم...
|
Post: #5
Title: Re: أجعص سوبر ماركت في الخرطوم تلقي قدامه 3 حلل لبن...(احتمال تكون في صورة)
Author: ابوحراز
Date: 01-08-2014, 07:07 AM
Parent: #4
شوال البصل لو جيت تدخله البيت الا تكورك لجيرانك كلهم
و المدهش لو اشتريت ليك شوال عيش { ذرة }
علي بالطلاق الا تقول يا { أبو } مروّة
يعني ممكن شوال البصل يتم تفريغه الى مائة عبوة صغيرة
وكذلك شوال العيش
شوف التسالي والفول السوداني كيف يتم تعبئتهم وتغليفهم بالخارج
ونحن لازلنا نغرف
انا اتكيفت من احدهم لديه مشروع تعبئة الدكوة السودانية مع الشطة والليمون
على غرار العبوات الصغيرة التي يقدمها كنتاكي والبيك
نقل الأعلاف وهي خضراء مكلف جدا
ونسبة البروتين في الأعلاف الخضراء منخفضة
اها لو جففناها وعملناها في شكل مكعبات تكون ذات عدة فوائد
سواء على مستوى الترحيل
وكذلك ارتفاع القيمة الغذائية
هناك تغييرات كثيرة قد بدأت في طريقة العرض
ويبدو لي اننا نتطور للأحسن
نحتاج المزيد من الوقت
وسيفرض السوق علينا ذلك
وكذلك الذوق
|
Post: #6
Title: Re: أجعص سوبر ماركت في الخرطوم تلقي قدامه 3 حلل لبن...(احتمال تكون في صورة)
Author: سيف اليزل برعي البدوي
Date: 01-08-2014, 03:04 PM
Parent: #5
Quote: مشروع تعبئة الدكوة السودانية مع الشطة والليمون
على غرار العبوات الصغيرة التي يقدمها كنتاكي والبيك |
ده كلام تمام وبدون مواد حافظة يعني صحية جدا ما زي بتاعتنا هنا في امريكا مليئة بالمواد الحافظة
|
Post: #7
Title: Re: أجعص سوبر ماركت في الخرطوم تلقي قدامه 3 حلل لبن...(احتمال تكون في صورة)
Author: Alshafea Ibrahim
Date: 01-08-2014, 03:34 PM
Parent: #6
المربح جدا ولا يمكن الاستغناء عنه اللبن ، الفول ، والفحم ، تقريبا هذه الآشياء لا يمكن لأي تاجر الاستغناء عنها ، تشتري حليب ب 100 ج تبيعو ب 150 ج مع شوية تحسينات بعضها من الموزع وبعضها من البائع أمام الدكان ...
تحياتي يا سيف
الشفيع
|
Post: #8
Title: Re: أجعص سوبر ماركت في الخرطوم تلقي قدامه 3 حلل لبن...(احتمال تكون في صورة)
Author: سيف اليزل برعي البدوي
Date: 01-08-2014, 04:12 PM
Parent: #7
سلام يا الشفيع
في واحد تاني قافل اللبن ده مع حللو في مكان براه ومعاهم زول بياع لابس لاب كوت شئ في منتهي النظافة والرقي
اللهم اجعل كل ايامنا لبنا...
مودتي
سيف
|
Post: #9
Title: Re: أجعص سوبر ماركت في الخرطوم تلقي قدامه 3 حلل لبن...(احتمال تكون في صورة)
Author: عمران حسن صالح
Date: 01-08-2014, 06:15 PM
Parent: #2
شكرا اخونا سيف والموضوع شائكـ حد المغسة .
معليش ما قصدي اغير ليكـ مسار البوست بس ضحكتني دي : Quote: مثلا بيع السعوط ده ما ممكن تكون في مصانع ويتغلف زيو زي معسل الشيشة
بدل الغرف بالملاعق ده |
شكلكـ ما بتسف ههههههه غرفة الملعقة دي ومعها شمّة للريحة جزء من عملية كيف السعوط إجمالاً ههههه أو كما قال السعاطي الجنبي ده :)
|
Post: #10
Title: Re: أجعص سوبر ماركت في الخرطوم تلقي قدامه 3 حلل لبن...(احتمال تكون في صورة)
Author: Ahmed Elsadig
Date: 01-08-2014, 07:11 PM
Parent: #9
سيف تحية طيبة
| Quote: هل نفتقد ثقافة العرض the presentation |
presentation ولا display
|
|