Post: #1
Title: لو علم الشاعر عمر البنا أني الان اقرأ في ديوانه ( نعيم الدنيا ) علي الآيباد داخل قطار في كندا !!
Author: يحي قباني
Date: 01-04-2014, 11:44 PM
Parent: #0
تري هل كان يتصور العم عمر محمد عمر البنا
المولود في العام 1900
حينما كتب أولي قصائده
زيدني في هجراني
و في هواك يا جميل العذاب سراني
ان ديوانه هو الذي يسرني الان قراءته
بعد ان تأخر بي القطار في رحلة لا تستغرق اكثر من 90 دقيقه
تأخر لمدة ساعتين لتجمد ( تحويله ) و هو قادم من مدينة وندسور
ليقلني من مدينة لندن أونتاريو الي تورونتو !!!
كان رفيقي في هذه الرحلة الآيباد
والذي حل محل الرفيق الاول ( الكتاب )
ولكن العم استيف جوبز رحمه الله
احدث ( طفجة ) في عالم التكنلوجيا باختراعه لمنتجات ( أبل )
فأصبح الايباد الان هو خير رفيق لإمكانية حمله عدد لا حد له من الكتب علي صيغة ( بي دي أف )
|
Post: #2
Title: Re: لو علم الشاعر عمر البنا أني الان اقرأ في ديوانه ( نعيم الدنيا ) علي الآيباد داخل قطار في كندا !
Author: يحي قباني
Date: 01-05-2014, 00:02 AM
جلست بجانبي سيده في العقد السابع من عمرها
بها فضول واضح منذ ان كنا جلوسا ننتظر القطار المتأخر
اختلست النظر الي الايباد و ابتسمت ...
فرديت الابتسامة بأحسن منها ....
ولم أشأ ان افتح معها موضوعا ... فهي تريد ان ( تكسر ) الدقائق
وانا أنشد المتعه في قراءتي لتلك الأشعار الحالمة ...
ولكن فضولها لم يتركها و لم يرحمني ...
فاختلست نظرة ثانيه و قالت
ما هذه اللغة المكتوبة التي تقرأها .؟
قلت اللغة العربيه ...
قالت أراك غارقا مبتسما في القراءه حتي عيونك تبتسم
لابد من انه كلام جميل !!!
قلت لها بل اجمل ما يمكن ان يقرأه الانسان !!!
قالت شوقتني ... هل هو شعر ؟ من شكل الصفحة أكاد اجزم انه شعر
قلت لها بل اكثر ... يمكن ان تسميه ( سحر ) ...
قالت هل يمكنك ترجمة بعض من ذلك السحر ؟
|
Post: #3
Title: Re: لو علم الشاعر عمر البنا أني الان اقرأ في ديوانه ( نعيم الدنيا ) علي الآيباد داخل قطار في كندا !
Author: معاوية المدير
Date: 01-05-2014, 00:11 AM
Parent: #2
يا قباني إنت من عطبرة ؟؟؟...
|
Post: #4
Title: Re: لو علم الشاعر عمر البنا أني الان اقرأ في ديوانه ( نعيم الدنيا ) علي الآيباد داخل قطار في كندا !
Author: يحي قباني
Date: 01-05-2014, 00:24 AM
Parent: #3
Quote:
يا قباني إنت من عطبرة ؟؟؟... |
هههه
ود المدير يا صديقي
عجبتك ( التحويلة ) المتجمده دي ولا شنو ؟
لا والله و اتشرف باني أكون من عطبره
لكن ركبته قطارات السودان لما روحي مرقت ...
من ايام الصناطور كان بقدم ( الجنجبيره ) في القزازه ام كرش
لغاية الوقت البقينا ننزل فيهو من القطر زى الراجعين من المقابر
|
Post: #5
Title: Re: لو علم الشاعر عمر البنا أني الان اقرأ في ديوانه ( نعيم الدنيا ) علي الآيباد داخل قطار في كندا !
Author: يحي قباني
Date: 01-05-2014, 03:28 AM
Parent: #4
سألتني الحاجة الكنديه لو بالإمكان ترجمة بعض الأبيات من الديوان
فقلت لها ...
قبل التفكير في محاولة ترجمة اي حرف من حروف أشعار عمر البنا
دعيني اولا ان أسألك انا سؤال ...
هل تصدقي ان كاتب هذا الكلام ولد قبل 113 عام !
لم يكن حولهم سوي اختراعين او ثلاثة مثل الراديو !!!
من يصدق أني اقرأ ما كتبه بل اكتب الان عن لقاءنا هذا
و عشرات السودانيين سيقراونه علي ( الهواء مباشرة )
نجلس انتي و انا علي مقاعد القطار الوثيرة
( الواي فاي ) يملآ المكان و يصل العالم بعضه ببعض بكبسة زر واحده !!
قلت لها ...
تخيلت نفسي الان ادخل علي العم عمر محمد عمر البنا في منزله بآم درمان
و في يدي هذا الآيباد ...
لأجده جالسا في غرفة جالوص ...
عنقريب حبل مرخي و حباله منحوله ... ( تحت ) كل ما جلسنا عليه ...
الرتينه يعلو ضوءها و ينخفض تعلن عن احتياجها لحبة جاز ...
و تخيلت أني قلت له ...
يا عم عمر ... الخواجيه القاعدة جنبي دي قالت دايره يترجوا ليها من شعرك
وانا قلت لي نفسي لو ترجمت كلامك ... مهما قلت ما حتحس بيهو !!!
حسي لو داير اترجم ليها
يا نعيم الدنيا كيف الحياه غير ليمك
ومن بعدك اصبح حظي زى لون هضليمك
أقولها ليها كيفن يعني ؟
فسألني العم عمر يا ولدي انت الوداك ليييي كندا شنو ؟
يا ولدي انا مشيت مصر مضطر انا و عمك كرومه
و اتجرسنا و اشتقنا لام در ...
لما الريد كتل عمك كرومه قال لي اكتب فكتبته
أمتي ارجع لام در و اعوده
و أشوف ( نعيم ) دنيتي و سعوده
عارفها يا ولدي ؟
قلت ليهو طبعا يا عمنا ... قاااعده هنا في الايباد ؟
قال لي هو الايباد ده شنو؟
انحنا شكلوا في حاجات كتيره حصلت في ال100 سنه البنا و بينكم؟
قلت ليهو يا عمي
ال 100 سنة آلبي حساباتكم دي انحنا عشنا فيها حاجات الف سنه !!!
|
Post: #6
Title: Re: لو علم الشاعر عمر البنا أني الان اقرأ في ديوانه ( نعيم الدنيا ) علي الآيباد داخل قطار في كندا !
Author: عبد الدائم سيد أحمد
Date: 01-05-2014, 07:29 AM
Parent: #5
رحلة سعيدة يا قبانى
لو فتشت جوة القطر اكيد حتلقى ليك سودانى ولا اتنين
اصلو نحنا بقينا موجودين فى كل مكان و الحاجة السمحة
الفينا اننا بنصاحب بعض بسرعة ....
اها بعد تتعارفو اقعدو غنو مع بعض عشان تكسرو ( الوكت ) ...
و يا حبذا لو لقيتو ليكم كرتونة زوداة و استعملتوها كايقاع ...
و حولو كلمات الاغنية حسب الجفرافيـــــــــا ....
من ( تورونتو ) وحلّ ...... قام من البلد ولّى ...... دمعي للجــاكيت بلّ
( مونتريال ) حبيبي غشــا ..... وحصل في ( اوتاوا ) عشا ...... دمعي للجــاكيت بلّ
( فانكوفر ) الحبيب طلاك ...... بعده الزاد نفوسنا هلاك
يا ( بانيف ) حليل نزلاك ........ يازمن الفراق نسلاك
حل زى الصقر خوى ...... بالبدر ( كـيبيـك ) ضوّى
عاد لا حوله لا قوّه ...... حبيبي الليله في ( الكــوه )
اها الكوه دى مخصوص ختيتها من ضمن مدن كندا
لانو ما بعيد بكره بكره تسمع ناس الكوه طلبو الانفصال .....
|
Post: #7
Title: Re: لو علم الشاعر عمر البنا أني الان اقرأ في ديوانه ( نعيم الدنيا ) علي الآيباد داخل قطار في كندا !
Author: يحي قباني
Date: 01-05-2014, 05:35 PM
Parent: #6
Quote: اها الكوه دى مخصوص ختيتها من ضمن مدن كندا
لانو ما بعيد بكره بكره تسمع ناس الكوه طلبو الانفصال ..... |
شكرا نور الدايم علي المرور العطر ...
الكوه تذكرني بصديقي الرائع عصام يحيي رحمه الله ...
فارقنا في عز الشباب ... كان رجلاً من كوكب آخر لا يشبهنا في اي شئ ...
رحمك الله يا صديقي ...
|
|