ماذا لو هزمنا بايرنموينخ ؟

اتاخيل لي المسالة حا يكون فيها شبهة كادوكية بت ستين فتلة حتى ولو ادى المريخ المبارة بكامل نجومه ومعهم الاحتياطي وكامل جهازه الفني ومعهم الجالية السودانية بدولة قطر

كل حاجة وارده بنسبة كبيرة ..

المريخ لديه من النجوم ما يمكنه من هزيمة منتخب من البرسا والبيرن معاً .

يا راجل دا موسي الزومه وبله جابر براهم بي فريق البايرن كلو ..

وعندنا اكرم يساوي اربعة مرات نوير .
وهيثم سيبا يساوي ربيري ومعاهووو شفان شتيجر و عليهم مولر ..


تاني شنوو ؟؟
وعندنا مزمل ابو القاسم .
و الوالي رئيس طوالي ..


قرقر قرقر قرقر

كترت المحلبية يا مان ...

سلام يا الكهير ..

سمعت قصة طريفة مفادها ..
يحكى أنه في إحدى البرلمانات العربية ..
و بعد أن عجزوا عن تنمية و تطوير البلد عجزا خرافيا ..
فقد تفتقت عبقرية أحد النواب عن فكرة مهولة لتنمية ذاك اليلد ..
الفكرة حسب ذلك البرلماني الشفت ..
تتلخص في أن تعلن تلك الدولة الصغيرة الحرب على أمريكا ..
و تقوم بمهاجمة ما تيسر من الأهداف الأمريكية في كل مكان ..
و حينها سوف يجن جنون أمريكا و تقوم بتدمير تلك الدولة دمار العدو ..
و بعد الهزيمة بالطبع الاستسلام و الصلح و قولة الروب ..
سوف تقوم أمريكا بتبني مشروع لإعمار و تنمية ذلك البلد ..
على غرار مشروع مارشال الإقتصلدي لتعمير أوروبا ..
الذي أعقب الحرب العالمية الثانية ..
أعجبت الفكرة البرلمانيون و سروا بها وعزموا على تنفيذها ..
غير أن واحد منهم كان عقلانيا جداً ..
قال لهم يا شباب يا أخوانا ..
أن فكرتكم قائمة على فرضية أن تهزمنا أمريكا في الحرب ..
و من ثم تقوم بإعادة تعمير و تظبيط بلدنا .. صااح ؟؟
قالوا ( نعم )
لكنه فأجأهم ..
طيب : ماذا سيكون وضعنا لو أننا هزمنا أمريكا ؟؟
فحينها ضحكوا حتى تنفقلوا ..
و عملوا رايحين ..
ثم انصرف كل منهم إلى الصراف ليحجز صرفته ..
و ماتوا جميعا ..
..

ما عارف السبب شنو لكن كلما احاول ان اطرد فكرة بايرموينخ دي من راسي تزاحم عقلي ما يجول به جراء مباراتنا مع الوحدات الاردني التي انتهت بهزيمتنا بسبعة اهداف في العام 2008




الحارس اكرم حا يكون ( اكرم ) حارس وربنا يكضب الشينة

Quote: وعندنا اكرم يساوي اربعة مرات نوير . وهيثم سيبا يساوي ربيري ومعاهووو شفان شتيجر و عليهم مولر ..

فعلا ... فعلا يا امجد ههههههههههههههه

سجمنا وكروووومة هجمنا :)

Quote: ماذا لو هزمنا بايرنموينخ ؟

والله يا الخير أنتو ما بعرف حتعملو شنو لكن غايتو نحن حنشوف لينا بلد تانية

ستكون المرة الاولى فى تاريخ البشرية ان يرى المستحيل جهرة!!

زي ماقال ليك المسطول

يا نموت من البرد يا نموت من الضحك ؟؟؟؟؟؟؟؟؟؟؟؟؟

غايتو كل ما يجيبوا سيرة الكورة دي ...بتذكر جدول عشرة..

محمد عبدالماجد قال بتذكر جدول تسعة..


خخخخخخخ

إنت كدي أكتب إسمو صاح ..بعد داك هزيمتو دي مقدووور عليها ..

Quote: إنت كدي أكتب إسمو صاح ..بعد داك هزيمتو دي مقدووور عليها ..

انتو اكتبوها وهم يتغلبوا.

خخخخخخخخخخخخخخ

الألمـــان لو شغلو (مكنتهم) الأصلية ، على الأقل حيفرموا ما بين (8-9) كيلو في تسعين دقيقة .

يقال والله اعلم ان عنتر قتلة اعمي

ما قلنا ليكم يا الصفراب دا لقاء عالمي بين فريقين كبيرين
ودا شعراً ما عندكم ليه رقبة

نهزم الباير دي شوية واسعة حتى التعادل كمان يا الخير اخوي
ربنا يستر

** الخير..
** سلام..
## غايتو خيالك دا فاطمه شاش ماعندها ...هسه لو البايرن ديل جو سكرانين لط ومساطيل والمريخ لاعبين 22 لاعب ضد 9 من الألمان ,,, لربما .. مُمكن خيالك الواسع دا يتحقق !!##
** العصفوره أفادت :- أن الوالى إتفق مع الألمان إنو النتيجه ماتتعدى الإتنين **

يا الخير عوافي
الحاصل في بوستيك دا يجسد تماما مشكلة الكورة السودانية .. الركون للعاطفة فقط
ولا غير العاطفة على مستوي الادارة والتشجيع وكل المتعاطين معاها .. والدليل ان المريخ ح
يتغلب من البايرن تسعة أو عشرة على الأقل فقط لأنو اتغلب قبل كدا من الوحدات الأردني سبعة
وكان حارسو أكرم الهادي سليم ..
يقيني انو لو المريخ دا كان غلب الوحدات ( مثلا ) سبعة صفر كان الكلام عن مباراتو مع البايرن
ما ح يكون بالتشاؤم المفرط المالي البوست دا .. ودا كلو بى سبب الانفعال والتفاعل اللحظي اللي
بتتسبب فيهو العاطفة.
طبعا الغائب عن مشجعين الكورة السودانية من لدن أحبابنا الهنا ديل وبرضو في صحافة المدرجات والتعصب
انو كرة القدم لا تعترف أبدا بفريق كبير أو صغير ولا يهمها الأسماء بقدر العطاء، وفوق كل ذلك فهي ظروف وحاجات تانية
لا علاقة لها بانو دا المريخ وداك بايرن ميونخ .
أقول قولي هذا وأؤكد بناء على المعطيات المعلومة للجميع أنو الفرق بين المريخ وبايرن ميونخ
كالفرق بين الواطة والسماء من مجاميعو .. لكن مع ذلك يبقي السؤال الذي بالطبع لا ولن اتحرى له إجابة مجيب:
ماذا لو اتهزم المريخ بهدف أو هدفين أو تلاتة أو أربعة فقط أو تعادل أو حتى غلب ؟؟؟؟؟
طبعا لو حصل الكلام دا الناس الشايتا ضفاري هنا دا ح يرجعو برضو ينظروا ولا كأنهم
أمس دفقوا الزيت .
والله فترنا من الحصص المجانية الما قادرين تفهموها دي .
لفوا كلكم لامن رويساتكم الكبيرة دي تسخن .
واخد بالك يا أبو الشباب ؟

يا الطلحة الكورة الافريقية كلللها على بعضها كده إنكشفت وبانت على حقيقتها ..
أسوأ فترة تمر بيها الكورة الافريقية الفترة الفاتت والجاية دي..
فترة يشيل فيها واحد من أضعف فرق القارة خلال الاربعة سنوات الماضية البطولة الافريقية مرتين لي تلاتة مرات ..
الأهلي المصري واحد ممن أضعف الفرق في السنوات الاخيرة وبدون دوري جا شال البطولة ..
ما عشان الاهلي قوي لالالا عشان افريقيا انتتتهت كروياً..
وحتى المنتج الاحترافي ونوعية اللاعبين البقت تتصدر لي اوروبا مضروبة ..
الغريبة المفاهيم واااحدة ومكررة ..
الاهلي لمن فاز بي بطولة افريقيا هلل وكبر اعلامهم واعلامنا بأن الاهلي فريق عظيم تأكدت قوته بأن فاز بالبطولة بدون دوري..
نفففس الاهلي وبعد اقل من شهرين جا اتملطش ملطشة سنينك فكتب اعلامهم غن السبب الأهلي لعب بدون دوري !!!
ياخ معقولة بطل افريقيا ياخد خمسة ؟؟؟؟؟؟؟
زمان تصنيف البطولات عالميا كمستويات فنية أمم أوروبا ..أمم أفريقيا ..كأس العالم ..كأس أندية الأبطال أوروبا ..كأس أندية الأبطال أفريقيا ..ثم بعد داك بتجي اسيا ونفيسة وعشة و و و..

اغلب الناس المرو من هنا هم ناس " شواطين كتف بيليه"
طيب ممكن تدونا فكرة -نحن الأجيال اللاحقة- عن الحتة دي؟؟؟1

Quote: زي ماقال ليك المسطول يا نموت من البرد يا نموت من الضحك

هههههههههههههه

وقسما يالخير اخوي ماقريت موضوعك وبرد ليك على العنوان بس

واقول ليك




يازول انت نصيح ..؟؟

الأخ الخير كل عام وأنت بألف خير

طبعاً الفارق الفني الكبير والخبرة والإمكانيات لاتخفي على أحــد
نحن فعلاً كنا دون المستوي وصحيح ان الجماعيه مفقودة وصحيح ان الانسجام غير موجود
وصحيح ان الدفاع غائب والمحور والوسط يتحمل الخسارة وصحيح ان أكرم يتحمل جزءا كبيرا من الاخفاق
ولكن لا ننسي أن بايرن منتخب قوي وبطل أبطال أوربا وألمانيا و و و ومن الصعب جداً هزيمته فهذه طبيعة الألمان
ومعروف عن الفرق الألمانية لاترحم وقاسية وشاهدنا من قبل هزيمة المنتخب السعودي القوي وفرق عالمية لاحصر لها
المهم كانت الغاية هي الإحتكاك مع الفرق الكبيرة ولاتهم النتيجة أمامنا فرصة للإستفادة من هذه التجربة للاعبين والجهاز الفني
ومراجعة الأخطاء لإثبات الذات ونشكر جماهير فريقنا على هذه المساندة والدعم والأهم من ذلك تفهمهم وتقبلهم بصدر رحب لهذه النتيجة
والمريخ قادم وبقوة وندع الانتقادات والسخرية جانباً وسوف نعوض جماهيرنا في مباراة بروسيا في 23 مايو 2054 إن شاء الله ومازال هناك امل
.
.
.
أرجو يا أخوي الخير ما نسمع الكلام دا بعد المبارة