الاجرومية في فوايد الكسرة بي موية

آي الكسره الواحدة دي والموية الاوحد منها

والكسرة انواع
‏ الكسرة الحمرا
والكسره البيضا
العيش المفندك والمامفندك
العيش المخلوط بالقمح ليكسبه غنجا وليونه ,, وتتفاوت نسب الخلط

أكل الفقراء يا أب سن
قالوا بتمرق الربا
واحتمال : التلاف

.
.
.

تحياتي يا ود ابسن

الكسره بي مويه اكان بقت فتريته وعليها زيت سمسم
وحتة طماطم وبصله

لا بتغلت عليك ولا ب ت و س خ ايديك



التعديل عشان مقص الرقيب اعترض على كلمة ب ت و س خ

.
.
.
.
.

حائط صد إستباقي يجب ان يقرأ في ختام البوست

ولكن !

إبتذال السلوك السوداني والتخويف منه , وإظهاره كشكل ردئ ومخيف ,, والتقليل من شأنه

فالكسرة بي موية أكلة شعبية توجب الاحتفاء بها ,, ولا أظن ان احدا سودانيا مغتربا لا تداعب احلامه رغما عن وجود كل اصناف المجتمع الاستهلاكي الطعامي السريع حوله ,,

فهي ليست طعاما مبتذلا بل كأنك تأكل الوطن !

ولها في دواخلنا قيمة الثراء الديني ,,, الدين حقنا نحن الشعب ,, فهي الانكسار والتواضع والمساواه

جبارة الكسور الكسرة
برادة القبور الكسرة
البدي الكسرة فوقو الخلق منكسرة....
والله اودا ب سن اخوي ،الكسرة دي اياها الريقونا بيها ،بي قرن شطه وملح ،ومرات طماطم، الا بالليل في طنوب لبن.
هسع اخوي صعبت ،وبعدين بدورلها سخينة وله شعيفة وله ام كنين..
والله يستر. شوال العيش بي 250الف.

بدر يا دفعة
تعرف يا صاحب
اياها زاتا بتمرق مال الربا ,,, اهلنا بأكلونا ليها ويقولو بتشيل السحت والربا ,, يعني بناكل فيها فوق راي ما ساي ,,,
كسرة مازي حقت اليوم , كسرة اليوم زي ورق البرنسيس ولا مناديل الورق ,,, ديك كسرتن غبشه وطاعمه ,,, مخلوطه بعجين عرق الامهات فوق المرحاكه ,, ومعيوسه بقرقريبه المحنه فوق دوكة التكافل
اي صحي والله
بتشيل السحت وعجب النفس

والعروس بأكلوها
الموص
قبل عرسها بيأكلوها الموص فوق شان تسمن , والموص ياها الكسرة بي موية علا زايدنها سكر ,, لا طحنية ولا حبوب تسمين
و
اللخوخة !

الآجرّومية أو متن الآجرّومية أو المقدمة الآجرّومية كلها عنوان للكتاب الذي ألفه ابن آجرّوم، تحدث الكتاب عن أنواع الكلام وإعرابه. تعتبر من أهم متون النحو العربي ولاهمية الاجرومية البالغة فقد تصدى لشرحها جهابذة العلماء والنحاة قديما.



ويكيبديا

حبابك بشير حسن بشير
شرفت حرم
اخونا بكري ده عندو محن , تعتر ليك بس
الكسرة فكت الريقة
فتريتة وغلا بايتة وتفقش فوقها بصلة وملحه والشطه ترف
دي عاد وين تلقاها

عب عزيز يا صاحب
شوف الكسره بي مويه فيها كل انواع الطعام ,,,,
تاكل وتحلي واياها زاتا كسره بي مويه
تزرق فيها ملحه تبقي اكل ,,, تكشح ليها سكر تبقا تحليه
ولا كمان لو كبيت فيها روب واديتا شطه وملحه وبصله

سنة المجاعة الناس بحتت بيوت النمل للعيش ,,, واكلت صفق الشدر ,,,
الشيخ فرح ودتكتوك جوهو جماعة يشترو منو عيشو المخزنو في المطموره ,,
قال ليهم
ماعندي مانع اشاورو
مشي للعيش وقال ليهم
‏ العيش البتودر الكرميش
‏ ابيعك ولا اخليك
وجاهم راجع
قال ليهم قال لي
لو بعت نور عينيك
انا مالي بيك

واللخوخة هي كوزمتيك بردوكت ماد ان سودان لي كرعين سودانيه

واخوتنا الفنجرية بنواحي الفيس
سلمي
وللاخ محمد مدني صديق اصدقائي نزار سمندل ومها الرشيد وآخرين
تحيه ونبلغكم شوال العيش نزل من 450ج لي 240 ج
ومن سخرياته ان يصبح الرغيف ارخص من الكسره ,, 3 طرقات بي جنيه قصاد عيشه بي طرقه
وعليك الله يا سلمي ما مشتهيه ليك كسره بي طماطم الله كريم

واخوتنا الفنجرية بنواحي الفيس
سلمي
وللاخ محمد مدني صديق اصدقائي نزار سمندل ومها الرشيد وآخرين
تحيه ونبلغكم شوال العيش نزل من 450ج لي 240 ج
ومن سخرياته ان يصبح الرغيف ارخص من الكسره ,, 3 طرقات بي جنيه قصاد عيشه بي طرقه
وعليك الله يا سلمي ما مشتهيه ليك كسره بي طماطم الله كريم

يبدو ان الامر يتجاوز الاستهانة بسلوكنا الشعبي ليطعن حتي في ثوابتنا
وبئسا لأحفاد لا يرعون مآثر اجدادهم بل يصيخون آذاناهم لكل هادم لاصلهم

من النفاج
آمال ياخية
عل الناس بخير
ههههههه
ذكرتيني امي فاطنه بت حليمه
رغم انها من رفاعه إلا انها تجيد القراصة ,, وتصنع ذات اكلتك بالقراصه والعصيده
لعله مزاج او ضيق حال فقد كنا صغارا ,, ولكنها اكلة كنا نطلبها ,,
مرشوشه بي مويه وزيت وبصله وفلفل وملح
وهي اكله لا يعلي عليها
كوستي مدينة القوميه السودانية ,,, قراصه 3 بوصه وسفروك يمكن ان تأكلها في اي دار دون ان يكون للقبيله دورا فيها
ياخيه
دايرين يهزمونا الناس ديل ,,, بهددونا بي اكلنا المنعونا ليهو
حرمو علينا شاي اللبن بالسمن واللقيمات

فوق
لحين
ميسره

من النفاج
ههههههه
الله يهقلك هقلة آ جلال عيسي
داير تودر الخواجة في حق الله
وحاجة غريبه ياخ ,, الكسرة المعجونة دي طوالي دايرة يعملوها تاني
تعرف مراتن عندي مزاج لامن طماطم الله كريم تمرق السوق ,, وهي طماطم بتقوم في كردفان في خور الرهد ابودكن بعد موية الخريف
بشيل الله كريم وربطة رجلة وشطه خدره ودكوه وبصل اخدر وشمار اخدر وكسره وزيت سمسم
بمشي البيت وبجيب الصينيه واقعد فيها براي ,,, كسره معجونه بس دون اي صنف آخر
وبكون احتفال عديل
وطوالي بطالبو بي زياده
وانا برفض
ما بتتعمل مرتين

ياله من زمن رائع حينما كنا صغارا بالمرحلة الابتدائية
كنا نتفاطر سويا
كلا ياتي بصحنه المطرقع
كنا خمسة وسادسنا مشاتر
أحياناً ياتي بفطوره
وأحياناً لا 00
لكننا لم نكن نكترث
فالفطور للجميع
لكن المدهش خمستنا كان فطورنا بموية
آآآآآآآآآآآآآآآي والله
ولكن مثلما نرى الشيف في لبنان وفي باريس يأتون بأصناف شتى من المكرونة
فقد كانت أمهاتنا ياتيننا بأصناف شتى من الكسرة بي موية
يعني أحدهم ياتي بكسرة بموية سادة 00 عليها فقط شطيطة وملحة
وآخر يأتي بطماطم معجونة
وأخونا آخر تأبى أمه الا أن تقطع الطماطم الى شرائح وتصب عليها الماء والفلفل
وهذه الأم غالباً ماتكون رمتها الظروف مع أهل العوض !!
أما آخرون فيأتون بكسرة بموية عليها بصلة { متفوفة } اي داقنها دق غرائب الابل
وهذه الأخيرة يشهد الله حينما أتناولها لا افهم اي حصة بعد الفطور !!!
وكثيرا ما اتمارض للذهاب للعيادة والتي هي الأخرى كانت عالماً آخر في زماننا
حيث ان المساعد الطبي اشبه بمدير المدرسة
ومن النادر ان يكتب لك راحة
هذا ان لم يعطيك { كف } زي السم وانت تشكو اليه آلامك
لكن أكلنا للكسرة شيء 00 والخموج الأخير الذي نجغمه جغمة جغمة شيء آخر
والخموج هذا أفضل ملائيين المرات من شوربة الكافيار !!!
لكن المدهش أخي عبد الحفيظ أبو سن نأكلها بموية ونحرز أجمل النتائج في المدرسة
الآن ابناؤنا ياكلون الهمبرقر
والدجاج المحمر
والسمك المشوي
ورغم هذا تجدهم غير سعيدين ويعيشون في عوالم أخرى
صدقني { الاسبايجيتي } كنت اتوقعها نوعاً من السيارات الفرنسية
حتى عرفت مؤخرا أنها أكلة ايطالية
لكن تظل هذه الكسرة بالموية متصالحة مع ذاتها
وجعلتنا اكثر تصالحا مع ذاتنا


هجمة مرتدة
أتانا ضيف من السودان وهو من ساكني الخرطوم وفي الخرطوم يسكن بحي الرياض
زارنا هنا بالسعودية 00
وللأسف أو للمصادفة لا أدري كانت وجبة العشاء كسرة بي موية
وهذه وصفة مجانية لمن يريد ذلك 00 وهي تتكون من شقين
الشق الأول العصيدة 00 كورتين دقيق
ماء مغلي عليه شوية ملح
وتضع عليه الدقيق ثم تحركه بقوة
الشق الثاني الموية وهي هنا بالسعودية محسنة وعليها تعديلات وراثية
المهم كورة زبادي 00 زائد فول حاجات مسحون على قول صاحبنا وشطة وملح وطماطم
وبالخلاطة تهرس كل هذه الأصناف
المهم صاحبنا بتاع الرياض اقسم بالله أكل لحدت ما عرقه بدأ يتصبب وخلع قميصه وعلقه بالشماعة
وزولكم اصبح بالفنيلة
وقال لينا والله دي اجمل أكلة أكلتها في حياتي
لكن والله ماعرفت الملاح بتاعكم دا ملاح شنو ؟؟
فقلت له دا ملاح فاصوليا فرنسية !!!

شكرا لك وانت تحرضنا على هذه التداعيات الرائعة
شكرا لك وانت تزرعنا في عمق الوطن علنا بابتسامة واحدة نداوي جراحاته وأنينه وأوجاعه

الإخوة الكرام عبد العزيز عثمان وعبد الحفيظ أبو سن بعد السلام
أقول لكم صراحة إن أحلى أكلة أكلتها في حياتي كانت كسرة حمراء بمية سخنة وزيت سمسم وبصل. طعم هذه الوجبة منذ أكتوبر 1977 ما زال في فمي. بعدها أكلت من المطايب في أركان الدنيا الأربعة من طوكيو شرقاً وحتى لوس أنجلوس غرباً ومن الدنمارك شمالاً وحتى السودان جنوباً. فكلما تذكرت تلك الوجبة وجدت طعمها يختلف عن غيره من الوجبات التي تناولتها. وإليكم القصة:
بعد إنتهائنا من تفكيك دسك الزراعة وتخزينه بالمشروع وقد أخذ منا النهار بطوله فقد نالنا ووالدي عليه الرحمة وسواق التركتر من الجهد ما نالنا. لم نذق طعم الأكل منذ البارحة. فقد خرجنا من منزلنا على أن نعود ساعة الفطور بعد تفكيك الدسك. لكن حالة الدسك حالت دون ذلك.
ذهبنا لقرية قريبة من المشروع. ووجدنا إحدى قرباتنا تعيش في تلك القريبة. طلبنا من كسرة بدون ملاح. ملأت لنا صحناً باشري. إشتريت زيت سمسم من دكان القرية ومعه بصل. طلبت منها أن تُسخِّن ماء وتصبه في الكسرة وتجهزها لنا.
فعلت المرأة الكريمة وتناولنا الوجبة بنهم وجوع منقطعي النظير، لقد أثبت لي تلك الوجبة القول الشائع: حلاة الأكل جيعان. وحلاة اللبس عريان. وحلاة النعال حفيان.
شكراً لكما فقد أرجعتونا ما يقارب الأربع عقود من الزمان حيث كان الزمن زين والشعر مغطي الإضنين. جوز الحمام فيهو 3 والسجوك بالمتر. الدستة فيها 15. والعيشة بقرش. وتذكرة الخرطوم لندن الخرطوم بسودانير 134 جنيهاً سودانياً.
بفعايلكم دي يوم بتكتلوا ليكم زول بالحسرة على ما مضى ولن يعود.
تحياتي

كبـّاشي الصـّـافي
(العوج راي والعديل راي)

الاعزاء
ابوحراز
كباشي الصافي
سأعود