يا جماعة وين النصرى امين زول كندا ?

قبل كم يوم فى بوست اخونا خالد عبد الوهاب سال مريم و انا عن النظامى للغذايي و الرياضة. و جاء فى بالى النصرى امين اخونا فى كندا
كيفك با النصرى? ان شاء الله طيب?
كيف الشغل? و كيف الشغل التانى?كيف ال truck?
كيف الرياضة ?
كيف الاكل ? لسه ما بتاكل عيش ?
وزنك كم الان ? او مقاس البنطلون كم ???
كيف مع البرد ?
كيف الاولاد و امهم ?

و كيف معجون الأسنان?

سلامات ياسمارت

ايوة صحيح، كيف النظام الغذائي وكيف عاملين مع الرياضة؟
ياخي انا عندي احساس عظيم بالامتنان لهذا الرجل الطيب النصري امين
بسبب النصري وبسببك كمان انتي ياسمارت ومعاك مريم انا قدرت انقص 10 كيلو في شهر واحد!
والمهم ماكانت نقيصة العشرة كيلو، الاهم كان اني اكتشفت انو من السهولة تنقص وزنك واتثقفت بشكل ممتاز بالنمط الصحي واهمية الرياضة وكيف انك تقدر تحتفظ بنمط صحي في حياتك وتتحكم في وزنك، فياخي الف شكر وشكر ليكم كلكم وربنا يديكم الصحة والعافية
انا عندي ايميل النصري، اتراسلت معاهو قبل فترة وقال انو بخير بس مشغول شوية، بكرة برسل ليهو ايميل وابلغو بالبوست ده واتمنى اننا نشوفو هنا من تاني

تحياتي

كوستاوى....ما بتنسي كلو كلو انت???
صحى والله....كيف معجون الاسنان?
النصرى ده عنده حجات بيعرفها براه.
مرة قال تلفونه البلاك برى وقع فى الحمام....و لحدى الان شغال!!!!!!



خالد عبدالوهاب...كيفك?
على شنو يا اخي!!!!
و الله وحشونا ناس البوست اياه.
مريوم,....النصرى....العوض...نجاة......وابتهال....غباشي.
ود النخيل...امير ...
والناس اللى هربوا من للبوست ذى د.نجاة...و ود الصايم.

زمن يا اخوانا

!!!!!

ياخ ازيكم شديد... انا جيت ماره صدفة لقيت البوست ده...

انا لقيت لي برنامج جديد ظريف جداً للأسف ما استمريت فيه، بس مستمر فيه نادر ومبسوط منه جدا ونتائج حلوه شديد... ما اوعدكم قريب اجي... لكن بحاول


سمارت مشتاقييييييييييييييييييييييييييييين

هسع لو كنتوا بتلعبوا شليل وين راح ما كنتوا خشيتوا في المعافرة دي!!!

التكنلوجيا قليلا منها ما بطالة
لكن كمان (ملاح) الطبيعة منعش للحياة

يسال عنك الخير يا اسمارت (ولو انو السؤال جا متاخر سنة كاملة)

النصرى امين زول كندا ظل لسنة كاملة يبحث عن الحقيقة والحمدلله لقاها اقرب اليه من حبل الوريد ....

اسئلتك متعدده سأخر الرد على موضوع الريجيم الى النهاية

نبدا بالحاجات (الميتة)
ال Truck

فى صيف هذه السنة (بالتحديد شهر يونيو) تعرضت مدينة كالقرى لفيضانات و "سيول" مهولة ..الخسائر كان بالبلايين..
داون تاون المدينة ظل مغلقا لايام عديدة .....
مبنى رئاسة البلدية تعرض لشلل كامل ...
المهم ..
بعد انتهاء الكارثة باسابيع ..بدات حركت البناء والتعمير...ونشطت شركات الانشاءات ....
النصرى امين زول كندا ..الفايدة الوحيدة الطلع بيها من الكارثة دى انو عرضت ال Truck للبيع فى موقع كيجيجى وطلبت سعرا أعلى
من سعر شراءه (اشتريته بالف دولار)

للمفاجاة جاءنى صاحب شركة انشاءات صغيرة ودفع لى 1500 دولار ثمنا له وانا اكاد لا اصدق ..(كيف لاحمق ان يشترى هذه الخرده!!!)

المهم انتهت قصة حب طويلة مع Truck

النصرى امين زول كندا
Salam

كوستاوى غايتو لو بتستعلم معجون غير Crest Pro-health حقك رايح
هذا المعجون اعجوبة من اعجوبات زماننا هذا




هناك ايضا
Gum Protection

انا بستعملهم الاتنين ,,,وهجرت نهائى باقى كل انواع معجون الاسنان

سلام خالد
كيفك ؟ ان شاء الله الامور تمام التمام

نعم كنت مشغول لفترة فى قضاء بعض الامور المعائشية ..الحمدالله انتهيت منها وانشغلت بامور اخرى "غير حياتية" ان صح التعبيرين ..

والله انا سعيد انك نجحت فى تحقيق اهدافك ..
شغلانة الريجيم دى mental اكتر من اى حاجة تانية .....اى نعم الظروف بتلعب دور كبير لكن الاراده والتصميم هم الاساس


بصراحة انا لا اغيب كثيرا عن البورد لكن فترة وجودى قد تقتصر على دقائق معدودة .

.اطالع فيها العناوين واتخارج ونادر ما اخش لقراءة البوستات

هدفى الوحيد معرفة اى احداث جسيمة تمر على البلد ...فسودانيزانلاين ما زالت الرائدة فى عالم جلب الاخبار الطازجة من السودان ....

سلام يا مريم
كيفكم وكيف نادر ؟

اتخايل لى انت الوحيدة المستمرة فى البرنامج بنفس الحماس ..الظاهر نادر نفسه بقى زيك
بصراحة الشغلانة صعبة جدا ....خاصة لمن لا يعيش حياة روتينية (بمعنى ان كل يوم يوم يشبه الذى يسبقه)

عندى زميل فى العمل ...اسميه انا وصديق لى ب
Creature of Habit

هذا المخلوق يكرر نفس الافعال وبالدقيقة والثانية ..كل يوم ولعشرات السنين ....
مثلا
ياتى الى العمل فى ساعة معينة ..يوقف عربيته فى مكان معين ...يشرب قهوته فى وقت معين ..كل شئ فى حياته مظبوط بساعة معينة
وطبعا ساعة الرياضة فى البرنامج اليومى الروتينى

نحن ما عارفين يوم بكرة حنعمل شنو وما متزكرين امبارح عملنا شنو
كوجان فى كوجان
وشغلانه الريجيم محتاجة ظبط وربط ونظام

سلام يا زين العابدين
كيفك وكيف مونتورويل كما ينطقها الكنديين

ما شايفك فى الفيسبوك

تلفونى هو نفسه لم يتغير

مريوم....شنو البرنامج بتاع نادر ?? نورينا

كوستاوى....القعاد فى الكرسي اليوم كلو مضر جدا...
لكن خلاص كل يوم اقول لناس الشغل ارح نلعب شليل


النصرى......وينك يا رجل????
فقدناك يا اخى. بعدين انا و مريم سالنا منك قبل كم شهر كده...دى ما اول مرة

Quote: النصرى امين زول كندا ظل لسنة كاملة يبحث عن الحقيقة والحمدلله لقاها اقرب اليه من حبل الوريد ....

سجمنا....ما تكون بقيت انصار سنة!!!!!


مبروك بيع الtrcuk!!!!
العربات مرات فيها حجات حير. احنا حصلت لينا ذى قصتك دى فى عربية كورلا

Quote: نعم كنت مشغول لفترة فى قضاء بعض الامور المعائشية ..الحمدالله انتهيت منها وانشغلت بامور اخرى "غير حياتية" ان صح التعبيرين ..

بالجد...بقيت انصار سنة ???

اها احنا فى انتظار باقى القصص...خاصة الامور ال ما حياتية دى

ما قلنا ليكم ما تخسموني، الغدا في النار

Quote: مريوم....شنو البرنامج بتاع نادر ?? نورينا

البرنامج انا رسلته ليك من شهرين، لكن شكله ال iMessenger بقى حرامي... القصة يا ستي بدت في بدايات السنة دي لما Dr.Micheal Mosly البريطاني الشغال مع BBC عمل documentary كان هدفه منه انه يوري الناس يعملوا شنو على يزيدوا الlife span بتاعتهم.. او بصورة اكثر دقّة، يزيدوا من الوقت البعيشيوه وهم اصحاء من غير ما ترهقم الامراض بتاعت الكولسترول والضغط والكانسر وخلافو.... المهم قام عمل بحث عن الابحاث الحاصلة في المجال ده، وجرّب كم طريقة لحدي ما وصل للأبحاث البتتكلم عن الintermittent fasting او الصيام المتقطّع... لقى انه في اكتر من شكل للنوع ده.. وجرّب كم طريقة، وكان بعمل فحوصات عشان يشوف مستويات هرمون اسمه IGF-1 او البسموه الgrowth hormone، وهو الهرمون الابحاث بتشير لي انه زيادة وجوده هي البتأدي للaging.. ووجدوا انه عنده علاقة بالامراض المتعلقة بالكبر في السن، وبالذات بالكاسنر... اصلا هو كان خايف لي بت ام روحو لانو ابوه اتوفى بي سكري وكاسنر وقام خاف على روحو... اها في النهاية واحد من العلماء الكان بتكلم معاهم قال ليه ما ليك إلا انك تجرب نوع من الصيام المتقطّع ده، واسمه 5:2... وبعتمد على انه الواحد يصوم يومين في الاسبوع، وباقي ايام الاسبوع ما يهتم كتير بي البياكله.... يعني مثلا يصوم الاتنين والخميس (ringing any bells؟)... طريقة الصيام دي ما زي صيامنا، فكرتها انه في يوم الصيام الواحد مسمموح ليه انه يتناول 600 كالوري للرجال و500 كالوري للنساء.... الطريقة دي سريع جداً بقت معتمدة عند الناس وميزتها القدرة على الاستمرار... اي زل بستمر فيها لوقت طويل جداً يصل لسنة اقل شي... الجسم بفقد فيها الوزن بمعدل هاديء جداً... للنساء تقريبا 0.46 كيلو (ولا بحوّل ليكم، ده بحثنا بريطاني بي جاي، حولوه براكم لرطل)... والجسم حتى لو وقفتو الصيام ما برجع الوزن بسهولة لانه فعليا البنزل هو دهون ما مويه ولا عضلات... الشي التاني الناس كلهم اتكلموا عن شعور بالسعادة والراحة لانهم بعملوا حاجه ما ضاغطه وممكنه في سبيل صحتهم وانهم شايفين النتائج في معنوياتهم وفي اجسامهم... كل الconcerns كانت الخوف من الصيام نفسه، باعتبار ده ما ممارسه معمول بيها في الغرب.. لكن انا عجبني لانه احنا اصلا متعودين على الصيام، وشكل الصيام ده بخليك تشرب وتاكل خلال اليوم لكن بكميات محددة... وغالبا بتلزمك الظروف انك تاكل بروتينات وخضار لانه البروتين بشبع لفترة طويلة والخضار قليلة في الكالوريز... يعني الزول بتوجه غصبا عنه للسمك والدجاج والخضار وبالذات الورقية لانها قليلة في الكالوريز.. وبغيّر عادات بايخة زي مثلا احنا عندنا عادة نشرب الشاي بالليل وغالبا معاه كارثه... اول اسبوعين بتكون صعبة شويه ويوم الفطور بكون في هلعة شديدة للأكل... بعداك الموضوع ببقى إلى حد كبير عادي... وبتبقى تاكل بصورة معتدلة في الايام الخمسة العادية، وفي يومين الصيام بكون في التزام لانه معروف انه تاني يوم العيد... الصيام بكون لمدة تقريبا 36 ساعة... يعني تبدأي الساعة سبعة المساء يوم الاحد تفضلي صايمة الاتنين كله، التلاتاء الساعة سبعة صباحا يوم العيد... أنا استمريت فيه لمدة شهر وكنت مبسوطة فيه جداً، لكن حصل لي طاريء صحي ما قدرته استمر... لكن حأرجع ليه خلال اسبوعين تقريبا من الان.. نادر مستمر ليه شهرين ومبسوط جدا وملتزم والنتائج بتاعت ظاهره خالص.... الشي الاخير انه قد ما تظهر الحاجات دي في الارقام بتاعت الوزن، لكن احسن طريقة لقياس التأثير بتاع الدايت هو عن طريق قياس محيط الخصر... وبظهر في الملابس شديد...

انا اختصرته ليكم نقّه كتيره جداً... لكن للعايزين يعرفوا اكتر، ده الفيديو الاصلي الاتذاع شهر 3 في BBC... انا عادة بغلّب الجانب العلمي، لكن عندي قناعة نابعه من تصوّف انه اي شي كان بعمله النبي عليه الصلاة والسلام فيه حكمه... عشان كده قدر ما فتشته عن انتقادات للطريقة دي او مشاكل حصلت للناس، لقينها كلها دلع خواجات.. وغالبيتها من موضوع الصيام، يقول ليك بحس بي دوخه وصداع وما عارف ايه... من الحاجات البقولوها انه ما تمت تجارب كافية عليها، شخصيا انه القناعة الدينيه خلتني ما اهتم كتير بالنقطة دي...

Eat, Fast and Live Longer - Horizon from Steve Hartman on Vimeo.

خلاص ونسة خشم الباب دي كفاية... لما اجيكم بعد شهر كده... اكون رجعته ليها، وممكن اكتب عن تجربتنا في البيت والوجبات البنعملها وإلخ

خالد عبر الايميل... ياخ العتب على الذاكرة والله.... كيف حالك؟ وكيف الامور عساك طيب.... نجاحك في السيطرة على حياتك ده تديه كله لي روحك، لانك السبب فيه... انت الجيت فتشتنا وتابعتنا وطبّقته البنقول فيه... فمبروك ليك والله.. وربنا يديم عليك الصحة والعافية



النصري... اعتقد انه انا وصلت لقناعة انه الزول لازم يكون بعمل في شي تجاه موضوع صحّته ده... ولو ما عمل حيكون زهجان وكرهان روحو لانه ما بعمل في حاجه... نادر اقتنع بكلامي بعد ما وريته الدايت الجديدة دي... في الغالب انا ما كنت مهتمه بي موضوع الاكل شديد.. كل تركيزي كان على اني اشرب مويه كتير احاول اعمل خيارات صحية، لكن كنت ما بخاف الله... الرياضة ما فرّطته فيها خالص... ويومي كنت بتحدى نفسي اني لازم اقل شي نص ساعة اعمل حاجه، ان شاء الله العب wii مع الاولاد... كدي ورينا شمار انصار السنة حق سمارت ده بالله.. رغم انه في تقديري oil and water don't mix يا قول مُرسي يا حليلو

والله يا اسمارت لى فترة طويلة بتسائل معقول ده الدين النزل على رسولنا الكريم!!!
معقول ده الاسلام الذى يصلح لكل زمان ومكان !!
هناك شئ ما ياهو ...
فى حاجة غلط somewhere ما كنت عارف بالظبط اين الاختلال

فى حاجة ما راكبه عدلها ..

فى حاجات كتيرة جدا جدا جدا جدا جدا مشاترة .....وغريبة وعجيبة ....

كنت اؤدى الفرائض اداء واجب ...وخوف من الرحيم الغفور ...


اقيف هنا احسن

يعني يا اسمارت و مريم بعد الكلام ده كلو نفهم انو الرشاقه بقت زي الفي الصورة دي ؟

ولا مأ ابالغ انا كمان ؟؟؟

ههههه ... مشتاقين يا بنات بلدي المجتهدات ....

اسمارتي سلامات

و يا النصري مشتاقين فعلا.

فيكم الخير يا اسمارتي.

سلامات يا مريومة. و شكرًا علي الشرح المفصل.
تعرفي انا الايام دي صائمة عديل كده. صيامنا العادي ده. و ح أكون صائمة لمدة 45 يوم، ان شاء الله. و الصيام بالنسبة لي فرصة أني أغير اي عادة غذائية ما كويسة. حتي شراب الشاي ببطلوا نهائي مع الصيام.
قبل كم شهر رحلتا في بيت في سلالم. في الكم شهر ديل نقصتا 10 رطل. غايتو، اخلص من موضوع الصيام دي و بشوف موضع صيامك :)

مستر قباني. يا اخي ما تبالغ!!!!
مريم دي بتكون بقت رشيقة كده. انا المشي بقي بالتلتلة!!!!

تسلمي يا تراجي. كيفك؟ و كيف أولادك؟ ان شاء الله طيبين.



النصري، عادي جداً الحاجة اللي حصلت ليك دي.
ما عارفة ممكن اقول ليك شنو!!! لكن ما شكلك محتاج لأي شيء مننا في الموضوع ده. شكلك كده وصلت لقناعات و مرتاح معها، و دي اهم حاجة. كل اللي بقدر أقوله ليك ان الاسلام دين عظيم. أمسك المصحف و اقرأ. براك. مرات كتيرة ح تمر عليك آيات تحلف تقول اصلوا ما مرت عليك قبل كده.
في آيات و احاديث كتيرة جداً ما بتتفهم في غير السياق اللي نزلت فيه. انا بعتبر روحي كنتا محظوظة جداً، لان والدي - عليه رحمة الله- كان متفقه جداً في الدين. و كان متصوف. و كان مستعد يناقش معاي اي شيء في الدين.
و بالمناسبة في البورد ده في ناس كنوز. منهم د. ادروب ابوبكر. ما تتخيل انا استفتا منه كيف في مواضيع الوراثة و الوصايا.
I think we should pick his mind in other things.
اي زول ماشي الحج بيسالني يدعي لي بشنو، بقول عاوزة الناس تدعي لي بالهداية.
ربنا يهدينا جميعا.

والله يا اسمارت ما خيبت ظنى ابدا
كنت متوقعك ما تخشى فى تفاصيل قناعاتى الجديدة وفعلا ودبلوماسية شديدة لم تضايقينى بالسؤال عن تفاصيلها..
باختصار (عشان نخلص من الموضوع ده ونشوف موضوع الريجيم) وصلت لقناعة ان الدين الذي نراه امامنا الان
تاثر سلبا (وما اظن ايجابا) باراء وافكار بشر كتيرين جدا ...ثقافات مجتمعات ......ظروف حرب وسلم ...
اصبح الدين مطاطى ..كل زول (او عالم) يجرو من جهة حتى يناسب افكاره...
الحاجة الوحيدة الماقدر زول يغيرها هى القران الكريم ...ثبات فى النص وديناميكية فى المعانى ...

نقرض على كده



---------------------------------------

للاسف لم اتريض منذ سنوات ..اظن اخر مرة كانت فى بداية 2012
كل مرة اقول ابدا اكسل

مرة عملت العذر مفتاح التريدميل المغنطيسى ضاع ..ادانى 3 او 4 شهور عذر ...
ما عارف اعمل شنو

بالنسبة للغذاء ..فهو احسن حالا من الرياضة ....لا زلت حتى هذه اللحظة مقاطع السكر مقاطعة كاملة ..لا اشرب اى شاى او قهوة بسكر ...

مشكلة الرغيف قائمة و ما اظن هناك حل لها ...خلاص استسلمت ورفعت الراية ....
جربت كل شئ وما نفع ....
مرة سمعت فى برنامج nbr ان القمح به مواد ادمان مثل الكافيين ....

الوزن :: تقريبا ثابت ....لكنه مايل للزيادة لان مازلت البس بنطلون مقاس 42 لكن فى شوية ضيق ما زى الاول ......

سلامات يا النصري.
خلي البوست ده و بمناسبة السنة الجديدة، دي تكون مناسبة انك ترجع للرياضة مرة تانية. أتذكر الإنجاز اللي عملته المرة الفاتت.
انا ذيك، من زمن طويل ما مارستا اي رياضة. لكن ذي ما قلتا قبل كده رحولي لبيت فيه سلالم و ضغوط الحياة و الشغل في الفترة الفاتت ساعدني أنقص وزن ما بطال. الان وصلت لوزني بعد اول طفل. عندي ذي 10 رطل و أصل الوزني قبل الأطفال. الهدف القادم لوزني قبل الشغل. غايتو لما أصل وزن قبل الشغل ده عازماكم حفلة عديل كده.

..