Post: #1
Title: ياخوانا ساعدوني بالجد ما عارفة اعمل شنو
Author: احلام وهبي
Date: 12-17-2013, 08:58 PM
Parent: #0
ولدي سامي عيان من يوم الجمعة
عندو التهاب وحمي
وما بحب ياخد الدواء ولا التحميلات
مواعيد الداوء فاتت وانا ساعة بحنس
ومعاي البت الشغالة . فقلتة ليهوه مناخيرو
وبشده شربتو الداوء رجعوا كلو
قولي لي اعمل شنو
|
Post: #2
Title: Re: ياخوانا ساعدوني بالجد ما عارفة اعمل شنو
Author: خالد كيبا
Date: 12-17-2013, 09:18 PM
Parent: #1
سلام احلام ندعو من ربنا الشفاء العاجل لولدك
ولادك عمرو كم يا احلام?
الأطفال بعملو كدة وقت يكون عندهم إلتهاب في الحنجرة والألم بكون شديد إثناء البلع
عشان كدة في التحميلات أو حقن .... راجعي الطبيب خليهو يشوف الحنجرة, وراجعي الصيدلية تاني.
وما تضربي عليك الله ..... مشكلتنا دايما نحل أي شي بالضرب .... والحاصل في السودان اليوم كالو جاي من عنف وحاجات كتيرة بيمر بيها الانسان وقت يكون طفل.
الكلام ده إذا كتبتيهو وانتي في أمريكا كان قبيلك جو ناس مكتب حماية الطفولة وشالو منك!
الشفاء العاجل يا رب
|
Post: #3
Title: Re: ياخوانا ساعدوني بالجد ما عارفة اعمل شنو
Author: nour tawir
Date: 12-17-2013, 09:26 PM
Parent: #2
ضرب يا أحلام خطأ أساسى فى التربية..
من حرقتك ولا من غير حرقتك..
أخلطى الدوا بأىّ عصير هو بيحبه , بزيادة سّكر شوية..
وأن شا الله العآفية..
|
Post: #4
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-17-2013, 09:38 PM
الاخ خالد ... تحياتي
ولدي عمرو سنتين وتسعة شهور
والله انا ما حصل ضربتو لكن الليلة
بالجد زهجني .
حتي الدواء عملتو ليهوه مع العصر ما شربو
وبرضو مع الحليب ما شربو
|
Post: #6
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-17-2013, 09:47 PM
العزيزة نور .... سلام
الدواء مع العصير خلطوا مع الحليب خلطو
برضو مارضي يشرب ..
وانا لما ضربتو والله حسيت قلبي وجعني
لكن اعمل شنو. حتي التحاميل ما بحب ياخدا
هسة قلت لابوة ما في حل غير نمشي المستشفي
ونرقد كم يوم ولماجرعات الدواء تخلص نرجع البيت
|
Post: #5
Title: Re: ياخوانا ساعدوني بالجد ما عارفة اعمل شنو
Author: عصام دهب
Date: 12-17-2013, 09:39 PM
Parent: #1
سلام يا أحلام ..
و ألف سلامة لسامي و ما يشوف شر و ربنا يحفظكم جميعاً ..
و من ياب خبرة المجرب ـ مع الأخذ برأي الطبيب ـ أرى أن الأمر ليس مزعجاً ..
طولي بالك شديد و تفهمي أن سامي لا يرفض تناول الدواء لأنه لايريد العلاج ..
هو طفل في المقام الأول والأخير يتعين أن تتعاملي معه على هذا الأساس بالترغيب و الدحلسة و التحنيس ..
لن تقنعيه أبداً بالضرب و التخويف و العصبية ..
روقي المنقة وهدئ اعصابك .. و شجعيه لتناول جرعة قليلة و كافئيه بما يحب حتى يكمل جرعته ..
و يمكن وضع التحاميل اثناء نومه ..
حاولي و حاولي وحاولي و لا تيأسي و إن رفض و تمنع فيمكنك اللجوء للستوصف او المستمشفى لمنحه جرعة المضاد عن طريق الحقن ..
هذا عن تجربة بل تجارب ..
و ننتظر رأي المختصين لتعم الفائدة ..
ربنا يشفيهو و يعافيهو و يحفظكم .. و تحياتي لأبو سامي ..
و ما تشوفوا شر ..
|
Post: #7
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-17-2013, 09:57 PM
Parent: #5
الاخ عصام دهب .... تحياتي
والله يا عصام ما خليت تحنيس ولا دحلسة وغني ورقيص
وطلعنا بالعربية واديتو لفة ولما رجعناالبيت برضو
ماعايز ياخد الدواء ....
غايتو الله المستعان مرض العيال صعب
وابو سامي بيسلم عليك كتير
غايتو يا عصام الحمدلله انتهينا من ابو سامي والحمدلله بلغ العافية
وبقيت في سامي . بس الله يدي العافية
|
Post: #9
Title: Re: ياخوانا ساعدوني بالجد ما عارفة اعمل شنو
Author: خالد كيبا
Date: 12-17-2013, 10:04 PM
Parent: #7
احلام غالبا ما يكون في إلتهاب وجرح في الحنجر ... دايما تغير الجو من ساخن لبارد بساعد في إزالة الغشاء المغاطي المحيط بالحنجرة ومسالك التنفس وبسبب جروح والتهابات وكده بيكون في آلام شديدة لكل الناس وخاصة الأطفال.
ولدك صغير شديد ما يقدر يعبر ليك عن الشي الواجعو ويحدد ليك مكان الوجع وين ... حاولي تعملي ليهو حمام بخار ما سخن و راجعي الصيدلية عندهم بخاخات للالم والاوجاع بتساعدو.
واقفلي الشبابيك عشان مايكون في هواء داخل من شباك وخارج من شباك تاني عشان المسالك التنفسية عندو ما تنشف وحاولي ليهو شاي نباتي دافي يشوفك انتي بتسوي فيهو وأسليهو دير شنو فيهو يا حبذا إذا في عسل يشوفك انتي بتكبي فيهو في الشاي
التحميلات وقت يكون نايم أخدها بيكون ساهل ....ولبسيهو كويس!
أنا بتخيل موقفك وقت الواحد بشوف في طفلو بتالم وما يقدر يساعدو .... لكن إنشاء الله كلو يهون
معليش احلام احنا بدل نشوف نعالج سامي كيف مسكنا في الضرب وبنظر ليك تربي ولدك كيف معذرة!
Tip: اعملي تعديل و امسحي الجملة الفيها ضرب من البوست
ندعو من ربنا الشفاء العاجل
|
Post: #8
Title: Re: ياخوانا ساعدوني بالجد ما عارفة اعمل شنو
Author: د. ياسر عبد القادر
Date: 12-17-2013, 10:03 PM
Parent: #5
سلامات احلام
سلامتو سامي و ما يشوف شر
هذه فترة أمراض للاطفال....خاصة الاصابة بألاحتقان في الحلق و سخونة الجسم المصاحبة لإلتهابات الجهاز التنفسي العلوي و هي ما تسبب صعوبة في البلع للاطفال و ربما صعوبة التنفس عند تأثر الجيوب الانفية ,,,,,
لا لاتضربيه نهائيا.....عند صعوبة تناوله للدواء الرجاء الذهاب به لأقرب مستوصف إذا كان هو مشخص المرض مسبقا و المطلوب فقط اعطاء الجرعه فأي عنصر تمريض خاصة إذا كان نسائي يمكن أن يسهم في إعطائه الدواء بسلاسة......و بالعدم يرجي مراجعة طبيبه لأنه يوجد بدائل أخري لنفس الدواء تعمل نفس المفعول يمكن أن تكون خيارا أفضل
عادة الطفل الاول بيكون موترا لأبائه...ولكن مع الطفل الثاني و الثالث بيصبح الامر عاديا
تحياتي لأبيه
|
Post: #10
Title: Re: ياخوانا ساعدوني بالجد ما عارفة اعمل شنو
Author: nour tawir
Date: 12-17-2013, 10:09 PM
Parent: #8
أحلام..
تآنى جيت لآنى عآرفة حالة الآم لمن الطفل يمرض..
فكرة المستشفى كويسة..
وما فى أحسن من الطبيب جهة الآختصاص...
بس أنتى هّدى أعصابك...
الولد حيبقى كويس...
بأذن الله..
وطّمنينا بالله..
|
Post: #11
Title: Re: ياخوانا ساعدوني بالجد ما عارفة اعمل شنو
Author: smart_ana2001
Date: 12-17-2013, 10:52 PM
Parent: #10
كُور علي يا احلام. ربنا يشفيه و يطمنك عليه.
قبل كم أسبوع كدا، بنتي ( 20 شهر) كان مفروض ناخد مضاد حيوي. و من اول ما شافت الفتيل كوركت: لا، لا. Nooo
اهم شيء يا احلام طفلك ما توريه ان الموضوع ده مهم شديد. و أنك متنشنة. لان الأطفال مهما كانوا صغار بيتنشنو مع أمهاتهم. بردي أعصابك. و بكل هدؤ حاولي إديه الدواء. لو رفض اعملي فيها شربتي انتي. و أدي روحك صفة حارة. و كلام من نوع انه ماما شاطرة و شربت الدواء. غايتو بنتي بينفغ معاها الحركات دي.
اهم شيء انك تطولي بالك. انا حاسة بيك تماماً.
ما تضربيه، لكن كمان ما تعاقبي روحك عشان ضربتيه مرة واحدة. انسي الموضوع و ما تفكير فيه تاني. و تأكدي انه هو نساه الان.
ربنا معاك.
|
Post: #12
Title: Re: ياخوانا ساعدوني بالجد ما عارفة اعمل شنو
Author: Dania Elmaki
Date: 12-17-2013, 11:36 PM
Parent: #11
كر علي حبيبي. احلام حاولي تديه الدواء بالحقنه بدون ابره. انا بتساعدني مع احمد. بخلي زول يمسك يديني و انا بليد الشمال بمسك الوش ناحية الخدود و بفتح الخشم و باليد التانيه بضغط الحقنه سريع. لو ما نفعت الطريقه دي التحاميل حلك الوحيد. ربنا يشفيه.
معليش ما تعاقبي روحك عشان ضربتيه. انت ما قاصده و فقدتي اعصابك. بس اعتذري ليه و احضنيه عليك. هو اكيد كمان اتخلع عشان اول مره يتضرب. طمنينا عليه.
|
Post: #13
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-17-2013, 11:38 PM
Parent: #11
الاخ خالد ...
العفو يااخ انا والله ما حسيت انو انكم بتنظرو كيف
اربي ولدي بل بالعكس بتنصحوا فيني وانا شاكرة لكم
وهسه هو نايم عملته ليهوه تحميلة ومسحتو بالفكس
بس ما عارفة هل ممكن اديهوه الدواء وهو نايم ؟
|
Post: #14
Title: Re: ياخوانا ساعدوني بالجد ما عارفة اعمل شنو
Author: يحي قباني
Date: 12-17-2013, 11:44 PM
Parent: #13
الفكس ده يا ستي حقو تبعدي منو ... عن تجربه
ايوا طبعا ... صحصحيهو وهو نص نايم بيشرب زى الماحاصل شي ...
واديهو حبة مويه بعدها ... ويواصل نومه ...
اهم حاجه الحرارة تعملي ليها كنترول ما تزيد ...
وقولي بسم الله الشافي المعافي ...
ربنا يحفظهم جميعاً ...
|
Post: #19
Title: Re: ياخوانا ساعدوني بالجد ما عارفة اعمل شنو
Author: مريم بنت الحسين
Date: 12-17-2013, 11:58 PM
Parent: #14
ألف سلامة على الوليد يا احلام... محمود ولدي عنده الحركة دي... اكتشفته فيما بعد انه حساس جدا لطعم الدوا وبقلب ليه بطنه.. حسي عمره سبعة سنين وبعذبني فيه عذاب شديد.... لما كان اصغر شويه كنت بعمل طريقة دانية دي... وبكب ليه الدوا في حلقه بعيد من اللسان عشان ما يضوقه.. وبقفل ليه نخرته... بقوم يبلعه.. طبعا عبارة عن عذاب شديد... وبرضه كان بستفرغه,,, تحسسه من طعم الدوا ده تحديدا بتاع اللوز، وممكن يكون نفس الدوا بتاعكم لانه مشهور (اوغمنتين)، دكتوره قال لي كبي الدوا وقولي ليه تشربه والا ما عندك اي شي تعمله تاني.. مهمتك الوحيدة انه تشربه، وقال لي تخليه معاه... مسكين حاول اكتر من مره انه يجبر نفسه وكتير بستفرغ... اي شي حاولته معاه، لحدي ما قريب ده وصلت لطريقة عبقرية (ايوه بشكر في روحي),, اول ما نجي لشرب الدوا بجيب منديل فيه ريحه.. مرات منديل بتاع ديتول المهم فيه ريحه خفيفه... وبديه الدوا.. وطوالي بديه المنديل بقول ليه شمّه... لما يجي يشم المنديل بضطر يبلع الدوا، وبنشغل بالمنديل والريحه وتلقي موضوع الدوا اتنسى تماما...
انا ما عارفه ولدك عمره كم، لكن كتبته الكلام ده لانه ناس كتار بعانو من المشكلة دي مع اولادهم
|
Post: #15
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-17-2013, 11:49 PM
Parent: #13
د. ياسر ... تحياتي
الشر مايجيك ان شاءلله
والله يا د. ياسر فكرت ارجع بيهو الطواري تاني
لكن هسة هو نام وخطيت ليهوه فوطه مبللولة علي جبهتو
غايتو الله كريم لحدي الصباح
|
Post: #17
Title: Re: ياخوانا ساعدوني بالجد ما عارفة اعمل شنو
Author: يحي قباني
Date: 12-17-2013, 11:57 PM
Parent: #16
دي مشكلة الفكس هنا ...:
هم بقولوا تحت سنتين ... لكن وليداتنا ما زي وليداتهم ... عشان كده نعمل حساب سنه سنتين زياده
"The ingredients in Vicks can be irritants, causing the body to produce more mucus to protect the airway," said Rubin.
"Infants and young children have airways that are much narrower than those of adults, so any increase in mucus or inflammation can narrow them more severely."
|
Post: #18
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-17-2013, 11:57 PM
Parent: #15
الاخت نور ..
والله انا هسه بيكم انتوا اعصابي هدت
والتوتر الكان فيني راح خالص
الله يديكم العافية
|
Post: #20
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 00:51 AM
Parent: #18
سمارت ... سلام
البنوتة الحلوه الف سلامة ليها وما تشوف شر ان شاءلله
عارفة يا اسمارت انا جربتة مع سامي كل الحيل من حنيس لرقيص لغني
حتي طلعتة واديتو لفة بالعربية يمكن قرابة الساعه ولما رجعنا البيت
برضو ما عايز ياخد الدواء لما اعصابي فلتت مني واتوترت
وهسة هو نايم عملتة ليهوه تحميلة ومكمدات
غايتو الله كريم لحدي الصباح
|
Post: #21
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 01:05 AM
Parent: #20
دانيا.... تحياتي
الله يخلي ليك احمد يا رب
انا اصلا سامي بديهوه الدواء بالحقنة لكن
بعد ده برجعو كلو . ومرات خلاس مابفتح خشم
والله مصارعة عديل في الدواء ده يا دانيا
غايتو يا دانيا بس الله يدي العافية
|
Post: #22
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 01:11 AM
Parent: #21
الاخ يحي قباني .... تحياتي
غايتو حاعمل بنصيحتك بعد ما يغرق شوية في النوم حاديهوه الداوء
والفكس العملتو مسحتو , وعملت بدلو مكمدات باردة .
وشكر ليك
والله يديك العافية
|
Post: #23
Title: Re: ياخوانا ساعدوني بالجد ما عارفة اعمل شنو
Author: azhary taha
Date: 12-18-2013, 01:20 AM
Parent: #21
ربنا يديهو العافيه بالمناسبه لي صديق زمن الدراسه الثانويه ومن ناس عطبره وحلفا اسمه معاويه وهبي هل هو خال الصغير?
|
Post: #24
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 11:32 AM
Parent: #23
مريم ... تحياتي
سامي عمرو سنتين وتسعة شهور
وهو اصلا بكرة الدواء يصوره عجيبة خلاس
وفعلا بياخد ( اوغمنتين) كل 12 ساعة وادول كل 8 ساعات وبروفين تحميلات كل 8 ساعات
وهسة الليلة الحمدلله بعد الجرعة بتاعت الاوغمنتين الحرارة نزلت
وطبعا اخد الدواء بعد مصارعة شديدة .
وياستي ربنا يخلي ليك محمود يا رب
|
Post: #25
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 11:37 AM
Parent: #24
ازهري ... سلام
معاوية وهبي قريبي ..
وهو الان مقيم بالسعودية
|
Post: #26
Title: Re: ياخوانا ساعدوني بالجد ما عارفة اعمل شنو
Author: امجد محمد الأمين
Date: 12-18-2013, 11:46 AM
Parent: #25
المشكلة دي عامه .
بيعاني منها تقريباً نسبة كبيرة من الاباء .
انا شخصياً ولدي كل ما يكون عيان ما بشرب الدواء .
فلمن نمش للدكتور بنقول ليهو المشكلة دي بيحاول يديهو ادوية طعمه مستساغ للاطفال .
وفي بعض الاحيان الأدوية المستشسغه دي ما بتكون متوفره فبنلجأ للحقن .
وبي مرور الايام هو بقي يعرف لو ما اخد الدواء فالحقن هي الحل فيشرب الدواء .
ربنا يشفي ولدك .
|
Post: #27
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 12:09 PM
Parent: #26
عارف يا امجد . سامي انا جربتة كل الطرق
معاهوه . يعني مثلا الادول طعمو حلو لكن برضو
ما بحب يشربو . ممكن المضاد الحيوي طعمو ما حلو
المشكلة ابوه لما يشوف سامي ببكي . طوالي يقوم يشيلو
مني ويقول لي خلاس خليهو . وشوفي قلبو ده بيضرب كيف والولد
لما بيرجف خلاس خليهوة .
وطبعا دي اكبر مشلكة . كيف اخليهوه مالازم يشرب الداوء.
يعني سامي وابوه بيوتروني .لما اعصابي تتحرق .
غايتو بس الله كريم علي
وربنا انشاءلله يخلي ليك ولدك
|
Post: #28
Title: Re: ياخوانا ساعدوني بالجد ما عارفة اعمل شنو
Author: ismeil abbas
Date: 12-18-2013, 12:13 PM
Parent: #25
ألأخت/إحلام. ألف سلامة لسامى وربنا يحفظه ويحفظكم ويمتعكم بالصحة والعافية.
ألأطفال فى أعوامهم ألأولى دائماً بكونوا كده وألوالدين بكونوا قلقين عليهم أكثر...
حسب تجاربى الشخصية وبمناصحة الطبيب دائماَ..كان إبن خالى بروفيسر صلاح أحمد إبراهيم إختصاصى طب ألأطفال تعبان معانا شديد..لو هو خارج السودان أو نحن, بنستشيره قبل أن نذهب للطبيب..وبنصح دائماَ بعدم ألأسراع لطبيب ألأطفال إلا فى الحالات المزعجة التى تقدرينها وأن يكون الطبيب طبيب ألأسرة أو البتراجع عنده ألأسرة على طول لأنه بكون عارف تاريخ أمراض الطفل حتى لا يرهقه بالعلاجات الكثيرة والمضادات الحيوية.
وأهم شىء أن تكونى ثابته عند اللحظات الحرجة لاسمح الله لو حصل لأبنك أى شىء مثل ألأسعافات ألأولية..وعند الحمى المكمدات أو فتح الدش على رأسه وتغطية بعدها جيداً.
تحياتى لك ولأبوسامى وألأطباء أدوا إستشاراتهم فقط هذه تجارب شخصية وأسأل مجرب ما تسأل طبيب...ناس د/ياسر راحت عليهم....تقديرى له ولكل من مره من هنا.
|
Post: #29
Title: Re: ياخوانا ساعدوني بالجد ما عارفة اعمل شنو
Author: بدر الدين الأمير
Date: 12-18-2013, 12:53 PM
Parent: #28
مع تقديرى لكل الوصفات
بس ياناس سامى نجاضة طالع على امو
السنى راقد في الغرفة التانية وشمتان
في نجاض سامى لامو بمعنى اخر الولد بياخد
في تار ابو من امو النجاضة
وفتكم بعافية
|
Post: #30
Title: Re: ياخوانا ساعدوني بالجد ما عارفة اعمل شنو
Author: احمد حمودى
Date: 12-18-2013, 01:22 PM
Parent: #29
سلامتو وبعد الشر عليه وربنا يغتيه ويحفظه ليكم تحياتى احلام وسلامنا لود السنى
|
Post: #31
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 02:01 PM
Parent: #30
الاخ اسماعيل.... سلام
مشكور علي النصايح المفيدة
والله يخلي ليك اولادك يا رب
وان شاءلله دايما تشوفم متفوقين وناجحين يا رب
والله يديك العافية
|
Post: #32
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 02:14 PM
Parent: #31
ما بتردوا علي التلفون مالكم انت منال
عليك الله يا بدر .في نجاضة اكتر منك
|
Post: #33
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 02:18 PM
Parent: #32
الاخ احمد ,,, سلام
ان شاءلله الشر ما جيك
وتسلم
تقبل سلام ابوسامي
|
Post: #34
Title: Re: ياخوانا ساعدوني بالجد ما عارفة اعمل شنو
Author: صديق الموج
Date: 12-18-2013, 02:30 PM
Parent: #33
ربنا يشفى سامهروردى مش اسمه كده؟ وما يشوف شر يارب..
هسه دى مشكله يا احلام يا اختى؟؟
ياخى شوفى الزول الثمين داك يشربه بدالو وخلاص
كان ابا برضو غرغريه ليه بى نخريه
يشرب شحمه ولحمه سامى ماعنده مروة لى الانتبايوتيك ده
ده اقتراحى فى القضية...
لوووووووووووووووووول،،،
|
Post: #35
Title: Re: ياخوانا ساعدوني بالجد ما عارفة اعمل شنو
Author: ولياب
Date: 12-18-2013, 03:08 PM
Parent: #34
سلامتكم يا بنتنا وسلامة سامي وأبو سامي وربنا يبلغهم العافية .
بالنسبة لولدنا الصغير سامي أرجو أن لا تقلقي كثيراُ فهم في هذه المرحلة معرضون لأنواع الالتهابات والحمى ، وطبعاً من حقك القلق بس مش بالزيادة .
كلنا بنقلق عند مرض الأطفال ، ولكن أهمية التعامل مع الأطفال في هذه المرحلة مهمة جداً ، في فترة ما كنت عنيف مع إبني (محمد) صاحب العشرة أعوام
حيث أنه لا يطيق المضاد الحيوي (الشراب) ، وفشلت بعنفي في تناوله للدواء لفترة وبعد ذلك تراجعت وأصبحت أتعامل معه بلطف ، وأحضرت كم نوع
من العصير وتم إضافته للدواء وكان يرفض بعض العصائر ، إلى أن توصل قناعته بأن عصير كوكتيل التوت هو الأنسب ، وأصبح يتناول المضاد الحيوي
حاولي معه بتقسيم الجرعة (5 مل) إلى جرعات أصغر وأسقيه في فترات متقاربة وذلك بإضافة عصيره المحبب .
إبتعدي عن الفكس فعمره صغير ولا يوصى به ، وحاولي معه بكل لطف دون الضرب .
ومن المهم جد يا إحلام في حال الحمى أن تحمميه ، حيث الماء يخفف من درجة حرارة الجسم .
له منا أجمل الأماني وله كل الصحة والعافية .
|
Post: #36
Title: Re: ياخوانا ساعدوني بالجد ما عارفة اعمل شنو
Author: يحي قباني
Date: 12-18-2013, 04:27 PM
Parent: #35
Quote: وطلعنا بالعربية واديتو لفة ولما رجعناالبيت برضو
ماعايز ياخد الدواء .... |
طيب يا احلام كان تراعي شعور ناس مريم و ( السعودية ) عموماً
في حتة ( لفة العربية دي ) ...
_____________________________
طمنينا انشالله السني الصغير طاب ولا أحلي ...
|
Post: #37
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 04:42 PM
Parent: #36
صديق الموج .. سلام
اسمو سامي الدين السهر وردي
والشر ان شاءلله ما يجيك يا صديق
وبعدين صاحبك الثمين داك هو لنفسو ما بحب الدواء زي ولدو
تقبل سلام ابو سامي
|
Post: #38
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 04:48 PM
Parent: #37
ولياب . سلام يا قريبي
ربنا يخلي ليك محمد
جربتة اخلط الدواء مع العصير برضو ما شربو
لكن فعلا حكاية اني اقسم الدواء عملتها ليهوه امبارح بالليل
غايتو بس الله المستعان مع مرض الاطفال بالذات لما يكونوا عنيدين
|
Post: #39
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 04:59 PM
Parent: #38
يحي . الحمدلله سامي الليلة احسن من امبارح كتير
وبعدين انا والله نسيت انو النسوان في السعودية غير مسموح ليهم بقيادة العربات
وكمان بعرف نسوان كتار في السعودية عندهم رخص وبيسوقوا خارج السعودية
وعلي فكرة امبارح بالليل بعد كلامك مسحت الفكس العملتو لسامي
ومشكور ياخوي علي النصيحة
والله يديك الف عافية ويطول في عمرك يا رب
|
Post: #41
Title: Re: ياخوانا ساعدوني بالجد ما عارفة اعمل شنو
Author: يحي قباني
Date: 12-18-2013, 05:11 PM
Parent: #39
Quote: وعلي فكرة امبارح بالليل بعد كلامك مسحت الفكس العملتو لسامي
ومشكور ياخوي علي النصيحة
والله يديك الف عافية ويطول في عمرك يا رب |
الله يسلمك ويرضي عليك ...
و الحمد لله انه بخير و احسن اليوم ...
الفكس و اشياء اخري كتيره شائعه في بلادنا ...
اتعلمنا غايتو بعد 20 سنه في البلاد دي شنو الصاح منها و شنو اليجب اننا نتحاشاهو ...
حتي المضاد الحيوي يا احلام ... الكنا بس الولد يسخن نمشي اقرب صيدليه و نتناوله ...
هنا طبعا مافي الكلام ده ... و الدكتور الا بعد ما خلاص يكون هو الحل الاوحد حتي يكتبو ...
خصوصا هنا الامراض الفايروسيه كتيره و اعراضها تشيه الامراض الباكتيريه
لكن في معظم الوقت بتمشي بالمقاومه فقط ... او تاخد دورتها ...
طبعا كلامي ده كلام بس ابوي و عن تجارب ...
يا ريت اخواتنا و اخوانا الاطباء و الصيادله الفي الخارج ( غير الدول العربيه ) يفتونا كمان ...
تحياتي لك ... و لصديقي الجميل ابو سامي ...
|
Post: #40
Title: Re: ياخوانا ساعدوني بالجد ما عارفة اعمل شنو
Author: Frankly
Date: 12-18-2013, 05:06 PM
Parent: #38
شكراً اختي احلام وهبي وكل ضيوفك الكرام على هذا البوست المدرسة الثر
نسأل الله أن يشفي طفلك شفاء عاجلاً وكل أطفالنا
نتمنى نقل هذا البوست للربع الأوّل من 2014
الصبر فعلاً مهم مع الأطفال وأيضاً مع غير الأطفال
يعجبني هذا الملصّق الي يحمل عبارة
قد تفقد أكثر من صبرك
والملصق يشرح نفسه
|
Post: #42
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 06:30 PM
Parent: #40
الاخ فرانكلي ... تحياتي
مشكور يا اخوي علي المرور
تسلم من كل شر ان شاءلله
والله يقدرنا علي الصبر
|
Post: #43
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 06:35 PM
Parent: #42
الاخ يحي
ابوسامي بيسلم عليك كتير
|
Post: #44
Title: Re: ياخوانا ساعدوني بالجد ما عارفة اعمل شنو
Author: عمر علي حسن
Date: 12-18-2013, 07:50 PM
Parent: #43
يا أم سامي
قبل كم وتلاتين سنه نطق ابني اكرم اولي كلماته .. وكانت .. الدوااااااااااااا .. نطقها بلوعة بالغة ..
حاولنا معه كل ما فعلت مع ابنك وفشلنا بينما نجح هو في زيادة جرعات التوتر والانفعال عندنا ..
كنا في جمبيلا وليس بها طبيب فنرسل وصف الحاله برقيا للسفارة في اديس ابابا فيذهبوا بها الي الطبيب
وياتوا منه بالتعليمات .. نصحنا الطبيب ان نستخدم المكمدات للحمي ومسح اللوزات من الخارج بالاسبرين
وملح الطعام والصبر علي بطء الاثر .. وقال ان الله سينجي الولد من المرض .. ويساله ان ينجيه من فرط
حب والديه
وجدت اكرم بعد ثلاثين عاما وولده مشدود من يديه وقدميه وهو يفتح فمه بيد ويمسك ملعقة الدواء بالاخري
ويصيح في الولد .. ترجعه بكسر راسك .. والولد ينظر اليه شذرا وبتحد ظاهر .. سررت في داخلي لانه
يلقي من العنت ما لقيناه منه .. ولكنني طلبت من ان يتوقف .. وارتاح حفيدي لارتخاء القبضة الحديدية
عن يديه ورجليه .. وحملته بعيدا واعطيته الدواء (بالبوز) بدون ملعقة فشربه ثم بصقه ..
لو كانت حالته خطرة لحجزوه بالمستسفي ..
عمته طبيبة .. تغطي وجهها عندما تكشف عليه او تقرر اعطائه حقنه .. وتري ان افضل من يعطي الدواء للطفل
طرف ثالث مثل الممرضات او الجيران
مهما فعلت بالدواء فان الطفل سيعرفه .. للاطفال من المناعة ما يحميهم حتي وهم لا يجدون الدواء
يجب الا تنزعجي الا اذ قالو لك نحجزه بالمستشفي
قال القرقور لامه .. لو ماشفتيني نازل في طاجن الزيت ما تخافي علي .........
تعظيم سلام للسهروردي وهو يتعلم المقاومة والمرازاه .. وتحياتي لابيه وهو مصهين عما يجري حوله من عراك
ولك تمنياتي
عمر علي حسن
|
Post: #45
Title: Re: ياخوانا ساعدوني بالجد ما عارفة اعمل شنو
Author: خالد كيبا
Date: 12-18-2013, 08:16 PM
Parent: #44
سلام احلام
إنشاء الله أصبحتو وقيلتو علي خير و عافية
الظاهر سامي حمتو خفت شوية، مشاء الله ربنا يتمم الشفاء
عايز أضيف وأذكي كلام استاذنا الجليل قباني عن الاثار السلبية للمضادات والادوية الكيمائية عموما وخاصة عند الأطفال.
زي ما زكر استاذنا إنو في أمراض كتيرة خاصة الحميات الخفيفة بتحتاج تمر خلال دورة الفيروس أو البكتيرية المسبب ليها والادوية ما تفيد في القضاء علي المرض انما بتخفف الآلام في خلال الدورة دي. عشان كدة التسرع في الأدوية و المضادات ما بتساعد جهاز المناعة انما بتخليهو يتعود علي المضاد المعين وفي المستقبل بيفشل في الدفاع عن الأمراض. الأدوية إلا في حالة الإرتفاع المستمر للحمي لمافوق 40 درجه عند الأطفال وإلتهاب الجهاز التنفسي الدكتور قد يكتب مضاد لمساندة جهاز المناعة .... في شاهيات وأعشاب طبية كتيرة بتدي نفس مفعول المضادات وبتقوي جهاز المناعة واستعمالها ما فيهو أي مخاطر. مثلا في ألمانيا الطبيب العام ما بيكتب ليك أي علاج كميائي من البداية، الحلول الأطباء بقدموها للمرضي في البداية هي الطبيعية زي الشايات الطبية والأدوية المستخلصة من جذور وصفق الأشجار الطبية وبزكو استعمالها بصورة مستمرة.
أنا شخصيا بشرب من 20 سنة يوميا الشايات دي وبشرب مع ولدي مالك يوميا كباية شاي من الأصناف المقوية لجهاز المناعة المختلفة والمساعدة للنوم، ولدي مالك من يوم ما اتولد قبل أربع سنوات ونصف بشرب معاي الشاي بالعسل ونحمد ربنا إنو ندر ما زارتنا الحميات.
الأطفال بحبو الطقوس دايما في حالة نكون محتاجين لشاي بمشي معاهو نشتري الشاي من المتجر سويا ونختارو سويا ويوميا قبل النوم بعد حمام المساء البرنامج بيكون نسوي الشاي سويا وهو يختار النوع الهوا عايزو لليلة وكدة.
بعد ما سامي يشفي إنشاء الله، حاولي حاجة زي دي إحتمال تنفع سامي وتنفعكم انتو برضو، أنا بتذكر عندكم مولل فرنسي في الدوحة فيهو الشايات الطبية المختلفة دي كنت بشتري منهو وقت أكون في الدوحة في رحلة عمل .
تاني في شي مهم شديد للاطفال الناس مرات كتيرة ما بيهتمو بيهو و هو نومة النهار (Nap) مهمة شديد لتقوية جهاز المناعة عند الأطفال.
هنا رابط من الشركة البنشرب شايتم
http://www.celestialseasonings.com/products/herbal-teas
ودي صورة لبعض الأصناف
زي ما ذكرو الاخوه الكرام إنو البوست جميل وفيهو معرفة مفيدة للجميع شكرا ليك يا أم سامي.
الشفاء العاجل يا رب .. كل الاحترام والتقدير
|
Post: #46
Title: Re: ياخوانا ساعدوني بالجد ما عارفة اعمل شنو
Author: احلام وهبي
Date: 12-18-2013, 08:35 PM
Parent: #44
الاخ عمر ... تحياتي
ياسلام يااخ احلي حاجة في الدينا لما الابو يبقي جد
ربنا يخلي ليك اكرم وحفيدك والله يديكم العافية وطول العمر يا رب
عارف يا عمر . ابوسامي لما ادي سامي الدواء طبعا مصارعة شديدة
وبكاء طوالي يجي يقول لي انتي ما شايفة الولد ده من البكاء والخوف
قلبو بيضرب وجسمو كلو بيرجف خلاس خليهوه .والله انا كثافتي بتوصل السماء
وما عندي غير الصبر الصبر عليهم هم الاتنين
|
|