فخامة زول ...أبوذر عوض الله ود البطانة

فخامة زول ...

صباح اليوم ذهبت لإرسال شئ عن طريق البريد .. وجدت أمامى فى الصف بعض السودانيين.. سلمت وأخذت دورى .. أتممت الإجراء وأخبرنى الموظف السعودى بالمبلغ المطلوب .. أخرجت المبلغ الذى معى فإذا به ناقص .. سألت الموظف عن أقرب مكينة صراف.. إلتفت إلي الأخ السودانى الذى بجوارى بغضب وإستغراب قائلا :
- جيب القروش دى ومخاطبا لى والموظف ناقصة كم
- وقبل أن أستوعب مراده أخرج من جيبه بقية المبلغ
- قلت له ياخى باركة القصة ما فيها طوارئ و...
- حسم الأمر قائلا : ياخ باركة شنو؟ حاجة بسيطة ثم دفع للموظف الذى يراقبنا مندهشا.. ثم أخرج من جيبه مبلغ لم يعده وأعطانى إياه قائلا : دة حق التكسى
- يا راجل تكسى شنو؟ معاى عربية .. والله معاى عربية .. هدى ليها برة و..و.. قال لي كب بنزين أنا ما برجعة.
- .. يا .. و... دقيقة..
- ولاااا شغال بالموضوع زول إتجاه واااحد
- أنا دهشتى هينة .. الكلام صاحبنا الموظف السعودى وقف أي شغل وبقى متابعنا ليك .. أها ياخ أنا أبوذر من البطانة ريفى تمبول قرية عدالخضر
- ياخى ؟؟!! أنا أصحابى من تمبول وأنا عمار صلاح من الجزيرة مسعودية
- بالله ماشاء الله ياخى أها هنا وين و..و.. و..
- صاحبنا السعودي متابع وصراحة حنيت عليهو بالذات بعد التعارف وصل مرحلة إنى طبيب طوارئ والزول البيكرم فينى عامل عادى ..

عامل عادى بالحسابات بتاعة الشعوب التانية إلا من رحم ربي فى هذا الزمن لكنه (زول) زول وكفى ..

يتكالب علينا المتربصون من الخارج ويخنقنا بنو جلدتنا فى الداخل .. تجور علينا بلادنا .. تركلنا مؤسساتنا بسبب (إنهم أناس يتطهرون) .. تزكمنا أنوف الفساد بجميع المرافق وتضرب على شخوصنا كل (عوامل التعرية) الموجهة .. ورغم ذلك يبقى وسيبقى بإذن الله (فخامة الزول ونقاء الزولة) سلامة القلب والشهامة والمروءة غير المصطنعة وعفوية حب الخير للناس..
أبوذر عوض الله

كيف يكون الحال لو ما كنت سوداني و ناس الحاره ما أهلي؟