طرب لا نهائي يا اهل المغني ... دي ( فلق الصباح ) ولا موت عديل كده ؟؟؟

18 دقيقة من الطرب اللانهائي ...

تحفة الخليل و كرومه ...

غناء اللحو ... و بادي محمد الطيب

في ثُنائية تحير ...

التحية للصديق صلاح النصري لاهدائه هذه التحفة لمكتبة الأغنية السودانية

كلمات فلق الصباح ( كامله ) من ديوان خليل فرح

فَلَق الصباح قـول لى
أهـو نورك لاح خِلِّى
يا خفيــف الــروح
هــو هـــذا نـداك
أم نــدى الأزهــار
من جنان رضـوان أصلك
لـذا كـل ربيع فصلك
اتـنـفــس فــوح
تتـنـفــس نـــاس
وريـــاض وبحـــار
ما ألذّ نسيـم وصلــك
مـا رأيت يا جميل مثلك
يـا بليــل السُّــوح
هــو هـــذا نــداك
أم هـوى الأسحــار
أنت روضة وليك زهرة
وله كوكب وليك بهرة
ضمخــوك للجبيــــر
زعفران وعبيـــر
إنتَ نـار فـى بهــار
صَبّـغْ الخـدين حُمرة
بعد ساعة بتشوف صفرة
الاصفـرار ده كتيـر
أخجلـوك يـا أميـر
ولّــه نُمّــت نهـار
صبح البُستـان شايل
شجـر الرمـان مايل

السُــلافْ فى الدِنـــان
والكنـــار فى حنـــان
والهِــزار فى هِــــزار
إنتَ كالطـاووس خــائـل
كبرياءك وفيـك خــايل
انـزل انـــت كمـــان
غـّن قـول يـا زمـــان
ويـــن حبـيـبــى آذار
مــا عرفنا عدوك زاهــل
ولَّـه لِسَّـه غُـــلام جاهل
مُتَهـــلل صيـــــف
شِتـــا عنــدك كيـــف
فــى اللـــعب بالنــار
فـى لهيبــك أشـوف ساحل
كالفــراشة أجيــك راحل
أنــا خــــايف كيـــف
يــا لطيـــف الطيـف
أهــوى وابقــى فـى نــار
فلــق الصبــاح نّـــوَّر
لــى نحــور الغِيــد صَـوَّر
جميعَـــنْ فـى الـــدور
مِــن خــدود وبـــــدور
صَــدَفَـــه و مُحَّـــارْ
عَـزَّة شُـوفى الحــوش نوَّر
بــى نجــوم الليـــل غَـوَّر
يـــا صبــاح النــــور
علـــى العيـــون الحـــورْ
والخـــديـــد الحــــار
عَــزَّة قـومى كفـاك نـومك
وكفــانــا دلال يـــــومكْ
إنـت يــا الكبـــرتــوك
البنـــات فــاتــــــوكْ
فــى القطــار الطـــار
عــزَّة شُـــوفى شبــاب قــومكْ
سبقـــوك علـــى كــومك
بـــت رجـــــال ولــــدوكْ
للقبيــــلة هـــــــدوكْ
إنـــت عِـــزْ وبَطَــار
الجمـــالْ فـى كمــــال وصفك
أدبِــك وجمـــال خِلْفــــك
الضميــــــــر كالعــــــودْ
والعيـــــون السُّـــــــود
فى البطـــانة كُتـــــار
منزلــك عُنْـــــوان ظــــرفك
نــوريـــة يَصــون إلفــــك
زَعَلِــــكْ يــا أم خــــــدود
سَــــوِّى ليــــه حــــدود
مِنُــــه يــا سَتَّــــار

الشفيف جدا استاذنا يحيى قباني ياخ ينصر دينك ذي ما قال الحلفاوي ،،، خليت صباحنا ده كلو سرور في سرور ,,, وفعلا يا دابو فلق عندنا الصباح ،،، الخليل كلامو براه يا استاذ يحيى عليك الله شوف الكلام ده كيف ياخ ده شي عجيب ،، ابداع وإمتاع .. رحم الله الخليل بقدر ما قدم لنا من فن راقي يرتقي بنا بهذا الزمان والمكان ..

تحياتي : ياسر العيلفون

موت نعم .. شكرا يا سيد

Quote: الشفيف جدا استاذنا يحيى قباني ياخ ينصر دينك ذي ما قال الحلفاوي ،،، خليت صباحنا ده كلو سرور في سرور ,,, وفعلا يا دابو فلق عندنا الصباح ،،، الخليل كلامو براه يا استاذ يحيى عليك الله شوف الكلام ده كيف ياخ ده شي عجيب ،، ابداع وإمتاع .. رحم الله الخليل بقدر ما قدم لنا من فن راقي يرتقي بنا بهذا الزمان والمكان .. تحياتي : ياسر العيلفون

ياسر العيلفون ( جنة عدن ) ...

صباحك كلو جمال يا فنان ...

بالله ثنائية عجيبه ...

و المدهش انو تقريبا غنو كل القصيده ... والابيات الما غنوها الناس قبال ده ...

Quote: موت نعم .. شكرا يا سيد

نعمل شنو لكن يا راشد ...

رحم الله بادي ... والخليل و كرومه بقدر ما امتعونا ...

وانعم بالصحه و العافيه علي استاذنا علي ابراهيم ...

يااا للحلاوووة

يا قبانى يديك العافية

أخونا أبو الياء سلام و أشواق كتيرة

دي فلق الصباح و موت و حياة

...........................
بس اللي مع بادي عبدالعزيز محمد داؤود و ل اللحو ....؟؟؟
ياخ دا صوت عبدالعزيز محمد داؤود و هو أكتر واحد غنى فلق الصباح

بالله كدي إتأكد لأنو الصوت صوت أبو داؤود ...

تحياتي و إحترامي

فعلاً تطريب عالى وحاجه توقف شعر الجلد
سلمت يا يحى مع اصرارى غلى رواية عم حدباى حيث ظل حتى الفنانين الكبار
يخطئيون فى الكوبلى الدى يقول:
صَبّـغْ الخـدين حُمرة
بعد ساعة بتشوف صفرة
الاصفـرار ده كتيـر
أخجلـوك يـا أميـر
ولّــه نُمّــت نهـار
_________________
حيث ان الرواية الصحيحة كالاتى:

صَبّـغْ الخـدين حُمرة
بعد ساعة بتشوف صفرة
الاصفـرار ده كتيـر
أخ جلـوك يـا أميـر
ولّــه نُمّــت نهـار

اويؤكد ذلك قول الخليل : الاصفرار ده كتير
حيث افاد عم حدباى ان الخليل يقصد انها مثل الذهب عندما يجلوه فيزداد لمعاناً
واصفراراً ولا يستقيم المعنى الا اذا فصلنا كلمة اخجلوك لان الاصفرار علامة
الشحوب والمرض ولا يمكن ان توصف به فاتنه واخ هنا للتأوه والله اعلم،،،

Quote: يااا للحلاوووة يا قبانى يديك العافية

حلاوة و بس يا دكتور ...

18 دقيقه متواصله من الجمال ...

حاجه ما تخلص ... شكلها كانت جلسة ما منظور مثيلها ...

Quote: أخونا أبو الياء سلام و أشواق كتيرة دي فلق الصباح و موت و حياة ........................... بس اللي مع بادي عبدالعزيز محمد داؤود و ل اللحو ....؟؟؟ ياخ دا صوت عبدالعزيز محمد داؤود و هو أكتر واحد غنى فلق الصباح بالله كدي إتأكد لأنو الصوت صوت أبو داؤود ... تحياتي و إحترامي

ابو حسين يا صديقي ...

الشوق زايد والله ... كيفنك و النصف الاحلي و الوليدات ...
____________________________________
لا ده علي ابراهيم يا عادل ...

ابوداؤود صجيح غناها كتير ...

لكن الجلسة دي كانت اللحو و بادي محمد الطيب ...

Quote: اويؤكد ذلك قول الخليل : الاصفرار ده كتير حيث افاد عم حدباى ان الخليل يقصد انها مثل الذهب عندما يجلوه فيزداد لمعاناً واصفراراً ولا يستقيم المعنى الا اذا فصلنا كلمة اخجلوك لان الاصفرار علامة الشحوب والمرض ولا يمكن ان توصف به فاتنه واخ هنا للتأوه والله اعلم،،،

موج يا سيدها ...

مشتاقين كتير ... و الغنيه ابدعوا فيها الكروان و اللحو ...

اول شئ انت من اهل المعرفه فما بنغالطك نهائيا ...

الشئ التاني حدباي و الخليل اصحاب و الاتنين غنو لفردتهم محمد عثمان منصور سنة 1926

كما ورد في كتاب البروف علي المك ... وده يثبت قرب المعرفه بين حدباي و الخليل ...

بس بتبقي مشكلتي رغم انو المعني الجابو حدباي اكثر لباقة ...

انو بروفيسور علي المك رحمه الله لقي القصايد مكتوبه بخط الخليل حسب كلامو ...

وفي الديوان مكتوبه ( أخجــــلـَوك ) ... وانا بفترض انو علي المك طبعها كما كانت مكتوبه و مشكله ...

والله اعلم ... ولكني معجب بشرح عمك حدباي ...


http://www.sudanesesongs.net/index.php?app=coreandmodule=attac...ostandattach_id=122046

Quote: Basher Akasha · الأكثر تعليقا · San Jose, California ابداع يا معلم لكن اسمعا من العميري برضو عجيبه رد · · منذ ‏15‏ ساعة Awad Alhassan · الأكثر تعليقا · Elementare تصويب الأخ صديق الموج هو عين الحقيقة وبه يستقيم المعني .. ولك تحياتي يا موج ...... أخوك عوض الحسن رد · · منذ ‏2‏ ساعتين

تحياتي الاخوة بشير و عوض ...

العميري طبعا ما عندنا فوقه كلام ...

تصويب الموج برضو يا عوض ما عندنا فوقه كلام تب ... :)

يحي قباني
ياسمح سازين

Quote: يحي قباني ياسمح يا زين

تسلم يا ابوعويض يا أمير ...

يا سلام عليك يا باشمهندس اداء ساحر واغنية تخلب الالباب

كنت قد فتحت بوستاً لها باداء عدد من المبدعين

أغنيه ومغنين .....(فلق الصباح)!

Quote: يا سلام عليك يا باشمهندس اداء ساحر واغنية تخلب الالباب كنت قد فتحت بوستاً لها باداء عدد من المبدعين أغنيه ومغنين .....(فلق الصباح)!

سلام سامي ...

فعلا اداء عجيب ...

زادها جمالاً ال 18 دقيقه الاتغنت فيها معظم ابيات القصيده ...

فلق الصباح مدرسة متفرده يا سامي ...

Quote: عَــزَّة قـومى كفـاك نـومك وكفــانــا دلال يـــــومكْ إنـت يــا الكبـــرتــوك البنـــات فــاتــــــوكْ فــى القطــار الطـــار

يا سلام استاذي يحيى .. غايتو الليله الكفيل .. الله يعوضو على دوام المساء ..
أنا شخصياً خليل يأخذني الى عالم آخر .. وخاصة بأصوات ذلك الرعيل الرائع ..

استاذي يحى .. خليل فرح .. ده شيء آخر ..

شوف شبه الوطن بالانثى .. ( الكلام الفوق ) .. لأن الانثى وفيه ومخلصة واذا انتقمت يكون انتقامها رادع ..
ولاحظ كل الظواهر الطبيعة القوية بإسماء الاناث اعاصير ( هيلين .. الخ )

استاذي يحيى احسب أن خليل كان يعطي الاعذار للوطن حتى لا يلوم الوطن .. لم يصفه بالخذلان أو التقاعس ولكن ارجع الاسباب الى الدلال والغنج ..
يخاطب الوطن كأنها الحبيبة :

عــزَّة قـومى كفـاك نـومك
وكفــانــا دلال يـــــومكْ
إنـت يــا الكبـــرتــوك
البنـــات فــاتــــــوكْ
فــى القطــار الطـــار

كأنه يريد ان يقول ليس الوطن متخاذل او خائف ..إلخ ، ولكن ذلك دلال وكبرياء ..
وحسب قراءاتي ( مع اني زول رطاني لكني بحاول اجتهد ) .. كبروتك .. يشبه خليل الوطن بالحبيبة المكبرته التي تمشى الهوينا وكي لا تثير الغبار
بل تمشى بدلال .. وأحسب ان المرأة المكبرته تهديء من خطواتها .. ويذكرني بالاعشى ( كأن مشيتها من بيت جارتها .. مر سحابه لا ... وعجل )
دع من سبقوك .. ولكنك سوف تصل بهذه الخطى الجميلة الواثقة ..

هو هكذا يشبه الوطن المنعمة والمدللة ..
وفي عبارة ( أخجلوك يا أمير .. لا نمت نهار ) يذكرني خليل العرب القدامي الذين كانوا يطلقون على الانثي المنعمة ( نؤوم الضحي)
وهي دلالة على أنها بنت ترف وجاه والسلطان .. او ( بنت العز)

خليل روعة بلا حدود .. ويمكن ان يستمع اليه الوطن لعدة قرون أخرى ..

مجرد اجتهاد .. لهذا الرائع

شكراً كثير .. استاذنا يحيى ..

شكراً على الجمال ..
يحق لنا ان نسمع ونسمع ونسمع من روائع الزمن الجميل ..
وبرضو يحق لنا ان نشفق ونشفق ونشفق على الاغنية السودانية من بنمسكه من الكبري ..
ودي البداية من ..
.

Quote: يا سلام استاذي يحيى .. غايتو الليله الكفيل .. الله يعوضو على دوام المساء .. أنا شخصياً خليل يأخذني الى عالم آخر .. وخاصة بأصوات ذلك الرعيل الرائع .

سلامات علي ...

دائما اقول للأصحاب ...

كم تمنيت ان اعيش في بداية القرن الماضي ...

تخيل انك تسترق السمع من منزل عبدالقادر سليمان ومعه الخليل و صحابه ...

( كما وصفهم حسن عطيه ) والذي كان يسترق السمع هو و حسن سليمان الهاوي ( شقيق عبدالقادر ) ...

او تكون في منزل عمك عمر البنا ... ومعه كرومه في دندنه من اشعار البنا !!!

زمن لا يعوض ... و عظماء بحق ...

Quote: شكراً على الجمال .. يحق لنا ان نسمع ونسمع ونسمع من روائع الزمن الجميل .. وبرضو يحق لنا ان نشفق ونشفق ونشفق على الاغنية السودانية من بنمسكه من الكبري .. ودي البداية من ..

الله يستر يا يوسف ...

شكلنا آخر الاجيال الحتحفظ التراث حقنا ...

لك الود يا جميل ...