التشكيل الحكومى الجديد جهوى قبلى بامتياز "ناس تقعد تقوم على كيفها"

عفيت منك يا البشير دا السودان وكان ماعملت كدا ماكان تكون من ناس تقعد تقوم على كيفها وفوق رقاب الرجال مجرب سيفها هلا هلا

الله فرجينى

up

الاخ هاشم نوريت، تحياتي

قبيلة واحدة هي التي تحكم السودان منذ 1989 و لا زالت و هي قبيلة الاسلام السياسي مهما تعددت الوانها و اشكالها
و مسرحياتها

شنو يا نوريت رخيت البوست ده ما تدينا تحليلك و رايك في الموضوع؟

بجيك ان شاء الله والحساب ولد ونشوف الوزراء الجدد واحد واحد وقبائلهم والميه تكذب الغطاس ....

up

الناس البضاري الشمس بالغربال

Quote: الناس البضاري الشمس بالغربال

انت جيت يا النجيض طيب خليك متابع عشان الكلام ده مافيه اي فرقة للكذب واطلاق الكلام جزافا ..

up

up

محزن و مثير للشفقة انو في ناس لسه بتعتقد انو السيطرة و القبلية تتعلق بعدد الحقائب الوزارية، الكلام يتقال للزول الغشيم.

نعم الحكومة و الدولة تركيبتها قبلية و جهوية لابعد الحدود.

يعني يبقوك وزير مالية و انت من دارفور،و بعدك يشيلو وزير الدولة و وكيل الوزارة للمالية و محافظ بنك السودان و وزارة
التجارة و الاستثمار و الوكلاء و رؤساء مجالس إدارات البنوك و الشركات ليوزعوا اموالنا لمعارفهم من المغمورين من رجال
الاعمال و بعداك يسيطروا على سوق الخرطوم للاوراق المالية و منافذ النقد الاجنبي و صك العملة الضرائب و الجمارك
و يعينوا ابناءهم في كل الوظائف المالية الخارجية من ملاحق اقتصادية في سفاراتنا و صناديق و بنوك و منظمات عربية و افريقيا و عالمية.

و تاني شنو يا ربي،،،، ايوااااا،،، سيطرة قبائل و مجموعات بعينها على الموارد البشرية في كل المؤسسات السودانية الكبيرة تقريبا
و من ثم فتح باب واسع للقبلية و الاسرية في التعيين لمختلف الوظائف.

يعني في القطاع المالي، من الوزير انشاء الله ما تشوف زول من منطقتك الا عامل النضافة.

و على ذلك فقس في كل الوزارات.

Quote: محزن و مثير للشفقة انو في ناس لسه بتعتقد انو السيطرة و القبلية تتعلق بعدد الحقائب الوزارية، الكلام يتقال للزول الغشيم. نعم الحكومة و الدولة تركيبتها قبلية و جهوية لابعد الحدود.

ياسمير كوكو انت قريت كلام الراجل ده كويس ؟؟؟؟ لا يقصد ماكتبته انت الراجل بيقصد انه الحكومة من قبيلة واحدة بالعربي الجعليين ( ناس نقعد نقوم علي كيفنا ) الكلام ده معاك مظبوط ؟؟؟
تعال وريني وين الجعليين في الحكومة مين هم ؟؟؟؟
منتظرك انت وصاحب البوست يوضح ذلك ...مايحكمنا تنظيم الكيزان فيه النوباوي والجعلي والشايقي واي مكون سوداني موجود ... كل الجرائم الحصلت دي مسؤول منها النظام ... اي كوز وقت الحساب يتحمل وزره اما اقحام القبيلة في صراع لا ناقة لها فيها ولا جمل تجدنا نقف لكم شوكة حوت ... والزارعة الله فوق الحجر بتقوم ...

Quote: تعال وريني وين الجعليين في الحكومة مين هم ؟؟؟؟ منتظرك انت وصاحب البوست يوضح ذلك ..

الاخ اسامة بابكر،،،

كلامي واضح، و بتعلق بمفهومي للقبلية و الجهوية في اجهزة و مؤسسات الدولة الحكومية السودانية، لأن ما فهمته
من كلامك و من كلام هاشم، انو انتو بتتكلموا عن عدد وزراء الوزارات كدليل على وجود القبلية و الجهوية و انا
جيت قلت ليكم الكلام ده ما صاح.

و بعدين انا ما ذكرت قبيلة بالاسم في كلامي و لا حتى قريتو في اي مكان تاني من البوست، اللهمّ الاّ لو استنتجتو براك من كلام هاشم.

و بمناسبة سيرة المال ده، نصيحة لوجه الله للدول و المنظمات العالمية و العربية السلفت قروشها للناس المسيطرين
بحق في السودان حاليا و البالغ 40 مليار دولار، اي و الله 40 مليار دولار بالتمام و الكمال، اتدينوا باسمنا و اكلوه
بيناتم و لا ادونا منو و لا طرادة و عاملين ميتين عشان بقية السودانيين يدفعوا معاهم في المستقبل، نصيحتي ليكم
امسكوا الناس السلفتوهم ديل و اخلصوا حقكم قبل ما يمشو و لا يموتو، لأنو بعداك حقكم راح، السودان لن يدفع
و لا مليم احمر في قروش استمتع بيهو اقلية.

الموتمر الوطني هو الذي يحكم السودان الان و منذ 1989

Quote: الاخ اسامة بابكر،،، كلامي واضح، و بتعلق بمفهومي للقبلية و الجهوية في اجهزة و مؤسسات الدولة الحكومية السودانية، لأن ما فهمته من كلامك و من كلام هاشم، انو انتو بتتكلموا عن عدد وزراء الوزارات كدليل على وجود القبلية و الجهوية و انا جيت قلت ليكم الكلام ده ما صاح. و بعدين انا ما ذكرت قبيلة بالاسم في كلامي و لا حتى قريتو في اي مكان تاني من البوست، اللهمّ الاّ لو استنتجتو براك من كلام هاشم.

بس هو ذكر قبيلة بعينها وانا اختلفت معه لذلك ... وكلام هاشم لم يقصد الا قبيلة واحد لمح لها بعنوان البوسن ( تقعد تقوم على كيفها ) وده هنا الخلاف ...

وزير شايقى وواحد زغاوى وواحد حلفاوى وواحد بنى عامرى وواحد دنقلاوى...

فعلا حكومـة قائمـة على القبلية.

طبعا يا هاشم هـذه مزحـة.. لكن بالنسبة لى فلو الوزراء أكفاء (بسكون الكاف وفتح الفاء، وأوع تشدد الفاء تبقيهم عمانيين).. لو كانوا
أكفاء فما عندى إعتراض حتى لو كانوا من بيت واحد ولا اسال عن قبائلهم.

Quote: بس هو ذكر قبيلة بعينها وانا اختلفت معه لذلك ... وكلام هاشم لم يقصد الا قبيلة واحد لمح لها بعنوان البوسن ( تقعد تقوم على كيفها ) وده هنا الخلاف ...

كن كده، المفترض الكلام يوجه لهاشم براه و ما كان تلمني معاه.

Quote: كلامي واضح، و بتعلق بمفهومي للقبلية و الجهوية في اجهزة و مؤسسات الدولة الحكومية السودانية، لأن ما فهمته من كلامك و من كلام هاشم، انو انتو بتتكلموا عن عدد وزراء الوزارات كدليل على وجود القبلية و الجهوية و انا جيت قلت ليكم الكلام ده ما صاح.

انا ياسمير بالعكس معترف بان النظام قبلي وعنصري دي ماعندي فيها اي شك ... خلافي مع هاشم انه النظام والتشكيل الوزاري الاخير لا علاقة له بالجعليين ... وانت جيت قلت ( محزن و مثير للشفقة انو في ناس لسه بتعتقد انو السيطرة و القبلية تتعلق بعدد الحقائب الوزارية، الكلام يتقال للزول الغشيم. ) ومعنى كلامك انه الحقائب المهمة يمتلكها جهة عرقية معينة ... وعشان انا عرفت كلامك بشكل عام يصب في اتجاه راي هاشم وكلام هاشم يخص قبيلة بعينها لذلك تجدني سالتك سؤال محدد هل انت قرات كلام هاشم جيدا .

Quote: انا ياسمير بالعكس معترف بان النظام قبلي وعنصري دي ماعندي فيها اي شك

نقطة
سطر جديد

عمر حسن البشير ( الرئيس ) بديري دهمشي
عبد الرحيم محمد حسين ( دنقلاوي )
بكرى حسن صالح ( دنقلاوي )
حسبو محمد عبد الرحمن ( رزيقات )
إبراهيم غندور ( عبابدة )
الدكتور الفاتح عز الدين ( جموعي )
صلاح الدين ونسى ( محسي )
عبد الواحد يوسف ( مسيري )
إبراهيم محمود ( بني عامر )
مكاوي محمد عوض ( دنقلاوي )
وبدر الدين محمود ( جزيرة الفيل وترجع جزوره لشندي )
سمية أبو كشوة ( أسرتها من الرهد أبدكنة )
معتز يوسف ( الجزيرة المروية قرية صراصر )
السميح الصديق ( بني هلبة )
الطيب حسن بدوى ( كردفان ) نوباوي
تهاني عبد الله ( من مواليد نهر النيل عاشت طفولتها ودرست ببورتسودان )
علي كارتي ( حجر العسل - شايقي )

وين ياهاشم ناس نقعد نقوم علي كيفنا في هذا التشكيل ... والله الجعليين تهميش راسو عديل ...

أسامة بابكر يا حبيب البيقول ليك سمين قول ليهو آمييييين

Quote: أسامة بابكر يا حبيب البيقول ليك سمين قول ليهو آمييييين

ياود الباهي ياخوي الكلام كتر وسكتنا كتير والناس ديل ماشين زايدين زيادة ... والناس كلها قازة شوفة في الجعليين انا غايتو من هنا وغادي اي زول اتكلم في الجعليين بجيه ناطي في حلقو ... اسي الكلام ده واضح الراجل ده جاء وقال التشكيل الوزاري كله ناس نقعد نقوم علي كيفنا ... والمقصود واضح ... وجبنا ليه التشكيل الوزاري وقبائل الوزراء اها نشوفه بجي اعتذر من بهتنانه ده ولا يظل سادر في غيه ....


بعدين ياخي انا كنت مترقب حضورك للبوست من امس ... ترانا مرقنا لي شيل القباحة ...

يا أسامة ياخي روّق شوية ما توّر نَفَسك ساي
الراجل ما قال الجعليين, وقولة نقعد نقوم على كيفنا ليست ماركة مسجلة للجعليين
وسيدا قال نحن أولاد بلد ما قال أولاد جعل دا من ناحية القصيدة أما من ناحية المعنى فا القومة و القعدة العلى الكيف ما حكر عليكم
أنا مثلا دنقلاوي و أهو بقوم وأقعد محل ما عايز على كيف كيفي

Quote: يا أسامة ياخي روّق شوية ما توّر نَفَسك ساي الراجل ما قال الجعليين, وقولة نقعد نقوم على كيفنا ليست ماركة مسجلة للجعليين

اها انا خليني ياهندسة اشرح لي انت ... يعني قاصد اولاد السودان .... ولو اولاد السودان المشكلة وين ما اي سوداني من حقه ابقى وزير ... المقصود واضح ياهندسة ولا يحتاج لاي تاويل اخر ...

Quote: بعدين ياخي انا كنت مترقب حضورك للبوست من امس ..

تعرف يا أسامة أنا عندي عادة سيئة خلاص أصلو ماببرد لي لزول بطنو يلتقيني
شخص يقول لي قالو أنت متزوج بالسر بقول لهو دا كلامك والمدام كمان حامل ، يجيني
معتوة يسألني قالو أنت كوز أرد ليهو كوز وأمنجي وكل شهر ناس السفارة بيقبضوني ظرف
يهدي هسع في جيبي بتسمع في كلامك ، فاااشنو سلاح الإهمال دا وكتل الدش في اليد مرات
مريح راحة مابعدها راحة بتخلي الطرف التاني يموت بغيظو دا لو ماجاهو طه القرشي

هسع التشكيل الوزاري الاخير دا إتشكل ودار النقاش حوله قبل الاعلان عنه في شندي
المعاجبو كلامي دا أقرب حيطة قدامو تااااااخ كدة يخبط بيها رأسو

عارف يا اسامة أول ما يتبادر للذهن هو الكلام عن الجعليين لكن قصدي ليك لو قعدت تباري التأويل و القصد بتحرق دمّك ساي, وقت ما جاتك الطاقية عديل مطرّز فيها إسمك مالك متدّرعها, العمر و الوقت اثمن من تضييعه في حرق الدم
يومك التلقى مكتوب الجعليين عديل ما تقصّر حينها, و ح تلقاها أكيد :)

ثم بصراحة كدنقلاوي حرقتني قصة شايلين قولة نقعد نقوم على كيفنا ليكم براكم

المشكلة او الزبدة او الكنتة ليست في منصب الوزير
عندما كانت الحركة الشعبية في الحكم تولت اكبر المناصب لكنها لم تكن تستطيع تحريك تربيزة صغيرة من مكانها
المشكلة في هيكلة الدولة نفسها و في تركيبة الوزارات التى تحتل المناصب المفصلية فيها كوادر من قبائل معينة يمكنها ان تحيل اى قرارات لاى وزير الى مجرد حبر على ورق
و هناك لجان غير معلنة من كبار كوادر الانقاذ لها الكلمة العليا في تسيير امور الدولة و لا تكترث بوزير او غفير

Quote: المشكلة في هيكلة الدولة نفسها و في تركيبة الوزارات التى تحتل المناصب المفصلية فيها كوادر من قبائل معينة يمكنها ان تحيل اى قرارات لاى وزير الى مجرد حبر على ورق

شكرا بروف عوض، ده ياهو الكلام.
اضف للوزارات كل المؤسسات الحكومية و الحكومية التي تم خصخصتها
و البنوك و الشركات التي تم انشاءها بقروض بنكية من ودائع دين خارجي بفوائد متراكمة
و معلقة في رقبة السودان و تمنح للبعض في شكل قروض محاباة و قبلية.
مما ادى الى ظهور طبقة رأسمالية طفيلية في شكل رجال و سيدات اعمال لا يعرف من اين اتوا بتلك الاموال.
بالاضافة للسفارات و البعثات و المنح الدراسية وووووو القائمة تطول.

غايتو يا الجعليين .. في التشكيل الحكومي ده .. همشوكم جنس تهميش

بس كده كويس ..

عشان تذوقوا التهميش ده كيف ..

Quote: غايتو يا الجعليين .. في التشكيل الحكومي ده .. همشوكم جنس تهميش بس كده كويس .. عشان تذوقوا التهميش ده كيف ..

ياعلي عبد الله والله قبل التشكيل الوزاري الحكومة دي مافيها ولا جعلي سوى نافع علي نافع ... شفت الجعليين والجبهة الاسلامية لمن لا يعرف هما ضدان ... وفي اخر انتخابات الديمقراطية التالتة في دائرتنا 69 شندي الجنوبية الغربية نزل دكتور مهدي ابراهيم ولم ينال شيئا وكان اضحوكة ...

يا زملاء يا كرام
الكنكشة في عصب الدولة ماركة مسجلة ، والأخطر في الأمر أن أهل الكنكشة ديل لا يسهموا في الاقتصاد القومي بشيء يذكر !! وأنها مناطق قاحلة هجرها الجن والإنس ،وولايتهم على المال العام والسلطة بنسبة تفوق ال80% ، أين قومية الجيش والشرطة والأمن والجهاز التنفيذي للدولة ..ليس لأن القائمين من أهل الكنكشة لا يعلمون ذلك ، إلا أنهم يريدون باسم الدين أن يظلوا في المقدمة وباسم الحاكم المستبد أيضاً ، والشهامة والرجولة (نقعد نقوم على كيفنا في شقى في لقى دايمن مخدر( مخضّر صيفنا ) لم نقرأ في تاريخ السودان منذ 1505 وحتى 1956 من وقف في وجه المستعمر ..فنحن نحتاج لإعادة نظر في هيكلة الدولة والسلطة والثروة ونتكلم عن الحقوق والواجبات والكفاءات المهنية وغيره ..أما في ظل نظام شمولي فكل شيء وارد فلا تتعبوا أنفسكم ..فالمسألة لعبة كراسي بين مكنكشين .

بالمناسبة يا حلاوي قابلت كذا شخص من الجزيرة و سمعت منهم نبرة الضيق من أهل الشمالية و نهر النيل و تحدثوا عن سيطرة هؤلاء على السياسة و الاقتصاد.. المشكلة انو الواحد لما يسافر البلد ما بشوف غير المعاناة و مظاهر الفقر و العوز و لا اعرف ما هي الفائدة العائدة عليهم من هذه السيطرة!
انا مع كلام سمير و بروف و لكني سأحاول تخفيفه شوية بقولي أن عوائل بعينها هي من يدير ال show

Quote: بالمناسبة يا حلاوي قابلت كذا شخص من الجزيرة و سمعت منهم نبرة الضيق من أهل الشمالية و نهر النيل و تحدثوا عن سيطرة هؤلاء على السياسة و الاقتصاد.. المشكلة انو الواحد لما يسافر البلد ما بشوف غير المعاناة و مظاهر الفقر و العوز و لا اعرف ما هي الفائدة العائدة عليهم من هذه السيطرة! انا مع كلام سمير و بروف و لكني سأحاول تخفيفه شوية بقولي أن عوائل بعينها هي من يدير ال show

والله ياسيف الجزيرة مقارنة بمنطقتنا هي جنة ... نحن نبعد من امدرمان ثمانون كيلو ويومك كلو تعديه سفر ووديان ... ولو شفت المدارس والمرافق الصحة حدث ولا حرج ... وسؤال محدد انتو المتنفذين ديل منو ؟؟؟ لانو بحكم معرفتي لا نعرف اي زول يقرب لنا في مكان مرموق في الدولة ولا في محافظة المتمة باكملها ... وطيب مادام انكم بتروا بانه نهر النيل والشمالية مبسوطين نحن طيب متغربين وديننا طالع فوق شنو ؟؟؟

نافع دا ما جعلي
نافع بطحاني

حسي يا ود الشيخ نافع ده يزوغ كده قبلي ما بتبطح؟

!بالمناسبة يا حلاوي قابلت كذا شخص من الجزيرة و سمعت منهم نبرة الضيق من أهل الشمالية و نهر النيل و تحدثوا عن سيطرة هؤلاء على السياسة و الاقتصاد.. المشكلة انو الواحد لما يسافر البلد ما بشوف غير المعاناة و مظاهر الفقر و العوز و لا اعرف ما هي الفائدة العائدة عليهم من هذه السيطرة!
انا مع كلام سمير و بروف و لكني سأحاول تخفيفه شوية بقولي أن عوائل بعينها

من حيث المبدأ أنت وأسامة تقران بأن الكنكشة آتية من نهر النيل ، وأن مناطق في نهر النيل أفضل منها الجزيرة ..حسناً ..أنا مع التنمية المتوازنة لكل السودان ..ومع اقتسام السلطة مع كل السودان وحجة الكفايات المهنية ماف اقليم في السودان أهله ليس بأكفاء أو تعوزهم الخبرة الادارية ليبتعث مدير ادارة أو مدير مشروع وأبناء الاقليم يبيعون الأنكسة والستيانات في الخرطوم - كما وصفنا زميل البورد الصحفي عبداللطيف السيدح (جهاد الخازن) ومع دولة الدستور والقانون والحقوق والواجبات ...مجرد سؤال : ما اسهام الولاية الشمالية ونهر النيل في الدخل القومي ؟؟ وما اسهام اقليم كردفان ودارفور والاقليم الأوسط ؟؟وما نصيبه في التنمية والسلطة ؟؟ حتى في التوزيع الوزاري في ظل هذا النظام الشمولي ؟؟؟

Quote: من حيث المبدأ أنت وأسامة تقران بأن الكنكشة آتية من نهر النيل ، وأن مناطق في نهر النيل أفضل منها الجزيرة ..حسناً ..أنا مع التنمية المتوازنة لكل السودان ..ومع اقتسام السلطة مع كل السودان وحجة الكفايات المهنية ماف اقليم في السودان أهله ليس بأكفاء أو تعوزهم الخبرة الادارية ليبتعث مدير ادارة أو مدير مشروع وأبناء الاقليم يبيعون الأنكسة والستيانات في الخرطوم - كما وصفنا زميل البورد الصحفي عبداللطيف السيدح (جهاد الخازن) ومع دولة الدستور والقانون والحقوق والواجبات ...مجرد سؤال : ما اسهام الولاية الشمالية ونهر النيل في الدخل القومي ؟؟ وما اسهام اقليم كردفان ودارفور والاقليم الأوسط ؟؟وما نصيبه في التنمية والسلطة ؟؟ حتى في التوزيع الوزاري في ظل هذا النظام الشمولي ؟؟؟

للمعلومية يا عبد الرحمن ولاية نهر النيل في الميزانيتين الاخيرتين وبعد الذهب اغني ولايات السودان ...ولا مقارنة البته بين التنمية في ولاية نهر النيل والجزيرة .... انتم تتحدثون عن ولاية عاصمتها الدامر واقل مدينة من مدن ولاية الجزيرة لا تقارن بالدامر ...

Quote: نافع دا ما جعلي نافع بطحاني

لو كلامك ده صحيح حكومة الكيزان من 1989 مافيها ولا جعلي واحد ... لكن اعتقد بان نافع من تميد النافعاب وهم جعليين نفيعاب ...

للمعلومية يا عبد الرحمن ولاية نهر النيل في الميزانيتين الاخيرتين وبعد الذهب اغني ولايات السودان
بعد خروج الذهب ...طيب قبل خروج الذهب كم مساهمة الاقليم الشمالي في الدخل القومي ؟؟ لو افترضنا ميزانية السودان (حلة عزابة ) ؟؟ وبعد أن اكتشف الذهب ما إسهام الدامر ودنقلا وشندي ومروي وكريمة وعطبرة في الدخل القومي ؟؟ دعنا نتكلم بلغة الأرقام ؟؟ مقارنة مع شمال كردفان ..لأن الجزيرة انتهت تماما ( كان كلما جاء أهل الجزيرة يطرقون باب الوزير عوض جاز فيقول لهم الجزيرة (ما محتاجة) .

لا فض فوك يا حلاوى
هل تعلمون ان قبائل الجزيرة لم ياتى منها وزير الا في ما ندر
و من يختار لتمثيلها حتى في مناصب الولاة يكونون من اصول شمالية او نيلية
حتى انصار الكيزان من ابناء المنطقة يتم تهميشهم

Quote: للمعلومية يا عبد الرحمن ولاية نهر النيل في الميزانيتين الاخيرتين وبعد الذهب اغني ولايات السودان ...ولا مقارنة البته بين التنمية في ولاية نهر النيل والجزيرة

نهر النيل ولاية غنية نعم و لكن ليس بسبب الدهب كم قلت يا أخ اسامة، نهر النيل و الشمالية و الجزيرة
كلها مناطق غنية بالموارد البشرية و الكوادر الاكتسبت تعليم و خبرات أكثر من مناطق السودان الاخرى
و ده في حد ذاته مكسب كبير للوطن اذا ما تم توظيفها بالطريقة المثلى و سوف تعود بالخير على الكل.

المشكلة في الدولة البوليسية و الامنية و سلطة الحرب الموجودة حاليا و لأنها سلطة بلا ادنى فكر
او طموح اقتصادي او تنموي و بالتالي وظفت القبلية للبقاء و الاستمرار في السلطة دون مراعاة
مصلحة الوطن و مستقبل الاجيال الحالية و القادمة.

و لأن دولة بهذا الشكل لن تكون بمقدورها خلق فرص عمل كافية للكل او حتى لعدد معقول لدفع عجلة الاقتصاد و ده السبب الاساسي
لوجود دولة و ما ازدياد عدد السكان و بقاء سلطة الانقاذ لدهر من الزمان، فلذلك يصعد مثل هذا النقاش للسطح
و لن يتوقف طالما الانقاذ في السلطة بل ح تتعمق اكثر و اكثر فبدل ان الصراع بين المناطق و القبائل ح تكون بين الاسر داخل المجموعة الواحدة.

و لخلق تنمية متوازنة في المستقبل لا تعني احلال من يعملون حاليا باناس من مناطق اخرى او تنمية مناطق و حرمان اخرى
بل هوادراك خطورة الوضع في السودان بما فيه من تركيبة سكانية فريدة و العمل على ايجاد حلول اقتصادية مبتكرة لخلق فرص عمل للجميع.

يعني محتاجين لرجال دولة بفكر اقتصادي كبير و افق مستقبلي واسع مش زي الناس المرض البشيلوهم و بقعدو ببكو ديل.

الأخ العزيز/ عبد الرحمن الحلاوي

تحية طيبة
طبعا انا ما محتاج اجيب ادلة علي انو منطقة المناصير هي اكبر منطقة في السودان تم تهميشها منذ العهد الاستعماري الأول وحتي تاريخه، لأن هذا واقع تعرف عليه جميع السودانيون ابان ازمة سد مروي، برغم وجود عدد مقدر من حملة الدكتوراة في التخصصات العلمية النادرة منذ اوائل الستينيات، لكن ده ما بيمنع انو اساهم في تصحيح الوقائع التاريخية والظرفية التي ترد بصورة مغلوطة فس مداخلات بعض الأخوة المتداخلين هنا، و الحقيقة لفت نظري في مداخلاتك عبارات اعتقد من وجهة نظري الشخصية فيها مجافاة لوقائع التاريخ(سواء كان مقصود ولا غير مقصود) بصورة قاسية جدا.. اول هذه العبارات :

Quote: لم نقرأ في تاريخ السودان منذ 1505 وحتى 1956 من وقف في وجه المستعمر

الكلام ده يا حلاوي .. يجافي وقائع التاريخ الحديث، عندك في تلاتة قبائل خاضت معارك تاريخية ضد شرسة ضد المستعمر، هي (الشايقية، والمناصير والرباطاب) ابتداءا من معركة كورتي الاولي، ضد الاتراك، الي معركة الكربيكان ضد الجيش الانجليزي الغازي( راجع معركة النهر، لشرشل) ده فيما يخص مداخلتك اعلاه..
نجي لي دي:

Quote: بعد خروج الذهب ...طيب قبل خروج الذهب كم مساهمة الاقليم الشمالي في الدخل القومي ؟؟ لو افترضنا ميزانية السودان (حلة عزابة ) ؟؟ وبعد أن اكتشف الذهب ما إسهام الدامر ودنقلا وشندي ومروي وكريمة وعطبرة في الدخل القومي ؟؟ دعنا نتكلم بلغة الأرقام ؟؟ مقارنة مع شمال كردفان ..لأن الجزيرة انتهت تماما ( كان كلما جاء أهل الجزيرة يطرقون باب الوزير عوض جاز فيقول لهم الجزيرة (ما محتاجة) .

ولاية نهر النيل هي الولاية الاولي التي تتركز فيها الصناعات الثقيلة، واولاها صناعة الاسمنت، توجد فيها 5 مصانع كبري تدفع للخزينة العامة مبالغ مقدرة، تتبدي في ضريبة القيمة المضافة، وعوائد التصدير الي الاسواق السعودية،

Quote: استعرض قطاع التنمية الاقتصادية في اجتماعه اليوم بالأمانة العامة لمجلس الوزراء برئاسة السيد علي محمود عبد الرسول وزير المالية والاقتصاد الوطني تقريرا حول صناعة الأسمنت في السودان ، قدمه وزير الصناعة المهندس عبد الوهاب محمد عثمان . أوضح التقرير أن البلاد حققت الاكتفاء التام من سلعة الاسمنت بمعدل استهلاك 3 مليون طن في العام وان انتاج الاسمنت فضلا عن تصدير حوالي 79 ألف طن خلال النصف الأول من العام 2012م كمرحلة اولى ، كما اشتمل التقرير علي التحديات والمعوقات التي تواجه صناعة الأسمنت كسلعة استراتيجية لتحقيق التنمية الاقتصادية وأمن علي ضرورة تذليل المعوقات التي تواجه صناعة الأسمنت إنتاجا وتصديرا .

ولاية نهر النيل اكبر منتج للقمح بالرغم من ضيق الاراضي الزراعية في الولاية، ولاية نهر النيل اكبر منتج للفواكه، في السودان

Quote: إنتاج وتسويق الأعلاف والبرسيم المضغوط والذي يصدر إلى دول كالمملكة العربية السعودية.

Quote: وفي الوقت الحالي يقوم مشروع الزيداب بتوفير 75% من احتياجات ولاية الخرطوم ونهر النيل والشمالية من الفواكه والموالح .

وهي اول ولاية عرفت زراعة القطن (مشروع الزيداب)

Quote: تأسس مشروع الزيداب الزراعي في العام 1905 كأول مشروع زراعي في قارة أفريقيا يروي بالري الاصطناعي، وبعد إنشاء خزان سنار عام 1925 احتل مشروع الجزيرة المركز الأول من حيث كبر المساحة وتبقى خانة المركز الأول للمشروع الرائد (مشروع الزيــــــــــــداب) الذي ذهب مزارعوه لتعليم الزراعة لمزارعي مشروع الجزيرة.

ده قليل من كثير يمكننا ايراده في شأن اكثر الولايات انتاجا قي السودان برغم قلة الكثافة السكانية للولاية مقارنة بباقي الولايات، وهي كما قال الاخوة هنا، اقل الولايات تنمية، برغم وجود الكثير من ابنائها المؤهلين في سدة الحكم..
وفي الختام تقبل مني احترامي وتقديري..

Quote: عبد الواحد يوسف ( مسيري )

لا احب تسمية الاشخاص بقبائلهم ولكن وددت تصحيح المعلومة فقط..
فالاخ عبدالواحد يوسف ابراهيم وزير الداخلية ليس مسيرى انما هو حمرى .. نسأل الله له التوفيق فى مهامه الجسام وان يكون فى صف الحق كما عهدناه دلئما,, وان يكون امن المواطن همه الاول ..

ولاية نهر النيل هي الولاية الاولي التي تتركز فيها الصناعات الثقيلة
الأخ منصوري
وعليكم السلام ورحمة الله وبركاته
ماذكره الإخوة فيما يتعلق بالتنمية المتوازن وتوزيع السلطة توزيعاً يحفظ الاستقرار والتوازن في دخل الفرد ، ورفع نسبة دخل الولايات وإنتاجها تحكمه ظروف طبيعية وامكانات - لا خلاف على ذلك - لكن الخلاف على الوصاية التي يمارسها مليون ونصف على 30 مليون - ومتى شعروا بأن الكفة ليس لصالحهم في النظام الديموقراطي قلبوا (حلة العزابة) ورجعنا القهقري ...لم نقرأ في حكم نميري أو عبود بأن الناس كانوا يتكلموا بعنصرية أو بغبن كالذي حاصل اليوم ..حينما أرى رجل من الجزيرة حاله يغني عن السؤال ..وكان بالأمس مزرعته تدر عليه الخير وعلى من يشاركه في العمل معه من إخوته في السودان الواسع لا يستطيع أن يحصل على وجبه بينما هناك من يتكلم عن مليارات الدولارات في جيبه وأبناؤه يدرسون في ماليزيا ويذهب إلى دبي وتركيا وغيره ..أليس هذا مدعاة للنظر فيما وصلنا إليه من تردي ..أتعلم كيف قتل الخليفة عثمان بن عفان - كما سماها الأديب في سفره ( الفتنة الكبرى) إنها المحاباة والتواصي بالسلطة للقرابات ومن في شاكلتهم ..حتى في الوظائف الخاضعة للتنافس العلمي نجد كما أن هناك شرطاً مبطناً ( الأولويه لأبناء نهر النيل والشمالية ، ثم بقية الولايات وحتى في هذه الولايات يتفرسون الوجوه بحثا عن جماعتهم ) وخذ مثلاً في توزيع وزارات الذي حصل هذا الاسبوع ( واحد دنقلاوي من جزيرة الفيل والثاني بديري من صراصر) تفتكر الناس عندها قنبور ولا ريالة ..الناس تعلم أن هذا نظام شمولي يحكم بقوة السلاح وليس بقوة الفكر وصناديق الاقتراع وما تمدد كل هذه الفترة إلا لرضا القواعد بالحال ( دا زولنا ، دا قريبنا) ، وملخص هذه المشاركة ..أننا ما دمنا في ظل نظام شمولي فستجد نفسك أحبطت وتقوقعت وكفرت بالمواطنة وبالوطن والدين الذي يتكلم عنه هؤلاء( فالدين عدل وشوري ورحمة) .

Quote: ولاية نهر النيل هي الولاية الاولي التي تتركز فيها الصناعات الثقيلة الأخ منصوري وعليكم السلام ورحمة الله وبركاته ماذكره الإخوة فيما يتعلق بالتنمية المتوازن وتوزيع السلطة توزيعاً يحفظ الاستقرار والتوازن في دخل الفرد ، ورفع نسبة دخل الولايات وإنتاجها تحكمه ظروف طبيعية وامكانات - لا خلاف على ذلك - لكن الخلاف على الوصاية التي يمارسها مليون ونصف على 30 مليون - ومتى شعروا بأن الكفة ليس لصالحهم في النظام الديموقراطي قلبوا (حلة العزابة) ورجعنا القهقري ...لم نقرأ في حكم نميري أو عبود بأن الناس كانوا يتكلموا بعنصرية أو بغبن كالذي حاصل اليوم ..حينما أرى رجل من الجزيرة حاله يغني عن السؤال ..وكان بالأمس مزرعته تدر عليه الخير وعلى من يشاركه في العمل معه من إخوته في السودان الواسع لا يستطيع أن يحصل على وجبه بينما هناك من يتكلم عن مليارات الدولارات في جيبه وأبناؤه يدرسون في ماليزيا ويذهب إلى دبي وتركيا وغيره ..أليس هذا مدعاة للنظر فيما وصلنا إليه من تردي ..أتعلم كيف قتل الخليفة عثمان بن عفان - كما سماها الأديب في سفره ( الفتنة الكبرى) إنها المحاباة والتواصي بالسلطة للقرابات ومن في شاكلتهم ..حتى في الوظائف الخاضعة للتنافس العلمي نجد كما أن هناك شرطاً مبطناً ( الأولويه لأبناء نهر النيل والشمالية ، ثم بقية الولايات وحتى في هذه الولايات يتفرسون الوجوه بحثا عن جماعتهم ) وخذ مثلاً في توزيع وزارات الذي حصل هذا الاسبوع ( واحد دنقلاوي من جزيرة الفيل والثاني بديري من صراصر) تفتكر الناس عندها قنبور ولا ريالة ..الناس تعلم أن هذا نظام شمولي يحكم بقوة السلاح وليس بقوة الفكر وصناديق الاقتراع وما تمدد كل هذه الفترة إلا لرضا القواعد بالحال ( دا زولنا ، دا قريبنا) ، وملخص هذه المشاركة ..أننا ما دمنا في ظل نظام شمولي فستجد نفسك أحبطت وتقوقعت وكفرت بالمواطنة وبالوطن والدين الذي يتكلم عنه هؤلاء( فالدين عدل وشوري ورحمة) .

كل كلامك ياعبد الرحمن صحيح مية المية ... لكن ازيدك من الشعر بيت في عطبرة مدينة الحديد والنار تم تشريد 3000 عامل من السكة حديد ... وكل هؤلاء صاروا عالة على المجتمع بعد ان كانوا منتجين ... المشكلة ياعبد الرحمن من عملوا المليارات هم موالي هذا النظام فيهم من هم بالجزيرة ومن هم بولاية نهر النيل ومن هم بدارفور لماذا تغضون الطرف عن اغنياء الغفلة وترمون اللوم علي الولاية ... مشكلتنا ليست مشكلة محاباة ولايات ولا مشكلة قبلية .. مشكلتنا مشكلة نظام سرق البلد قاطبة وحول ايراداتها لمنسوبيه ان كانوا من نهر النيل او الجزيرة او الشمالية او دارفور ... واسال سؤال اين الراسمالية الوطنية المعروفة ؟؟؟ اين الشيخ مصطفى الامين ... ؟؟؟ اين النفيدي ؟؟؟ كل هؤلاء حيكت حولهم مشاكل ضريبية مقصودة لاقصائهم من السوق وتبديلهم براسمالية طفيلية حصلوا علي ما يملكون بطريقة غير شرعية ان كان ذلك عن طريقة سرقة المال العام او غسيل الاموال ... انتم تتحدثون عن الفقر والعوز والمسغبة في ولاية الجزيرة ولا تعرفون شيئا عن ما يحدث في نهر النيل والشمالية ...عندنا كل المزارعين تركوا الزراعة واعباءها المتمثلة في الجبايات والنقل وذهبوا يكسرون الصخور بحثا عن الذهب ... اعرف من ترك اسرته بحثا عن الذهب ويقضي قرابة العام وبترك اطفاله ... المشكلة ياسادتي مشكلة وطن مسروق من عصابة وهذه العصابة تمثلها كل ولايات السودان دون شك .. لذلك ان تترك الغول الذي يلتهمنا جميعا مائة مرة في اليوم وترمي اللوم على ولاية بعينها هذا يزيد مشكلتنا تعقيدا ... يجب علينا جميعا تضافر الجهود من اجل ازاحة هذا النظام وبعداك لكل حدث حديث ....

Quote: المشكلة ياسادتي مشكلة وطن مسروق من عصابة وهذه العصابة تمثلها كل ولايات السودان دون شك

إذن نقر بأن لا أحد ناج من أثر الأنظمة الشمولية ولو كنت من ولاية فقيرة أو غنية ..إذن السودان لا يصلح دون ديموقراطية ،علينا تأهيل أنفسنا جميعاً ، ونخرج من هذه القيم البالية من جهوية وعنصرية ، على الشماليين أن يخرجوا من عقلية المستعمر والوصايا على شعوب السودان ، وعلى شعوب السودان أن تسعى بكل عقلانية للحفاظ على روح التعايش ونتواضع على أن التنوع هو مصدر قوة وليس تهكم ، علينا أن نعزز دور المدرسة والجامعة بمناهج تلبي هذه المتطلبات لنحصل على أمة من الناس في السودان للعيش الكريم الآمن ..وإلا الشرذمة والتراجع والتخلف لسيورث جيلاً بعد جيل وسيظل السودان ثقبا في خريطة العالم إلى أن يرث الله الأرض ومن عليها .

الأخ عبدالرحمن الحلاوي

لا أسكت الله لك صوتا .

Quote: و لأن دولة بهذا الشكل لن تكون بمقدورها خلق فرص عمل كافية للكل او حتى لعدد معقول لدفع عجلة الاقتصاد و ده السبب الاساسي لوجود دولة و ما ازدياد عدد السكان و بقاء سلطة الانقاذ لدهر من الزمان، فلذلك يصعد مثل هذا النقاش للسطح و لن يتوقف طالما الانقاذ في السلطة بل ح تتعمق اكثر و اكثر فبدل ان الصراع بين المناطق و القبائل ح تكون بين الاسر داخل المجموعة الواحدة. و لخلق تنمية متوازنة في المستقبل لا تعني احلال من يعملون حاليا باناس من مناطق اخرى او تنمية مناطق و حرمان اخرى بل هوادراك خطورة الوضع في السودان بما فيه من تركيبة سكانية فريدة و العمل على ايجاد حلول اقتصادية مبتكرة لخلق فرص عمل للجميع. يعني محتاجين لرجال دولة بفكر اقتصادي كبير و افق مستقبلي واسع مش زي الناس المرض البشيلوهم و بقعدو ببكو ديل.

يا سمير كوكو
تحية واحترام
هنا اتفق معك تماماً
اختلافنا في موضع آخر لا يعني اختلافنا للأبد

Quote: الأخ عبدالرحمن الحلاوي لا أسكت الله لك صوتا .

انت بس أطلع منها
أيها الساعي بالفتنة بين الناس
مهما اختلفنا في النهاية بنتفق
عشان ما تتعب روحك ساكت

الإخوة الزملاء ..لكم الشكر جميعاً ..فقد خرجنا من العنوان إلى المضمون ثم الخلاصة أننا جميعاً نختلف حينما نصبح في قبضة الشمولية ..ونتفق تحت همبريب الديموقراطية والحرية والانعتاق ...واختلافنا لا يفسد بيننا مودة ..فقط اعرفوا جذور المشكلة وتفهموا واقع الحال ومآلاته ..فالبدايات الصحيحة دائماً تقود إلى النهايات الصحيحة ..هذه الأسماء التي ملأت أرض السودان ضجيجاً وصياحاً ل24 سنة وما تزال إنما فقاعات لم تخلد في ذاكرة البسطاء في أرياف ووديان وسهول وجبال السودان شيئاً غير السخط واللعن ..فأهل السودان باختلاف سحناتهم وألوانهم ولهجاتهم إلا أن بينهم حساً مشتركاً وهذا الحس كالمغنطيس تحمله في دواخلك حلاً وترحالاً وهو خاصية سودانية تحتاج لكشف نقابها ..هذه الخاصية لا ترتبط بدين أو مكان ..فنأمل أن تعود المياه إلى مجاريها وتزول حالة الحزن والإحباط الذي يعم حالتنا حالياً ..وإن الأيام لحبلى بالمفاجآت ..ولودامت لغيرك ماوصلت إليك ..أيهاالمستبد.

يقول أسعد التاي أحد أعضاء صفحة شباب الكيزان بالفيسبوك (سائحون):

Quote: كل او جل قروش (المالية) التي يتولاها (الرطاني) بدر الدين محمود، و المحفوظة في (بنك السودان) الذي يتولاه (الرطاني) محمد خير الزبير هي من عائدات (النفط) الذي يتولاه (الرطاني) مكاوي عوض او من (الاستثمار) الذي يتولاه (الرطاني) مصطفى عثمان اسماعيل و كلها او جلها تصرف على شئون (الرئاسة) التي يسيرها (الرطاني) بكري حسن صالح و (الدفاع) الذي يتولاه (الرطاني) عبدالرحيم حسين بمساعدة (الرطاني) يحي محمد خير.

Quote: كل او جل قروش (المالية) التي يتولاها (الرطاني) بدر الدين محمود، و المحفوظة في (بنك السودان) الذي يتولاه (الرطاني) محمد خير الزبير هي من عائدات (النفط) الذي يتولاه (الرطاني) مكاوي عوض او من (الاستثمار) الذي يتولاه (الرطاني) مصطفى عثمان اسماعيل و كلها او جلها تصرف على شئون (الرئاسة) التي يسيرها (الرطاني) بكري حسن صالح و (الدفاع) الذي يتولاه (الرطاني) عبدالرحيم حسين بمساعدة (الرطاني) يحي محمد خير.

وديل برضهم رطانة ...