الماتادور الإسباني .. أحلام زلوط ..

قال يرغب في الاحتفاظ بكأس العالم للمرة الثانية على التوالي .. وهو أمر
بعيد المنال بل مستحيل عديل كدا برغم انو العباقرة قالوا لا مستحيل أندر ذا صن
خاصة في كرة القدم .
لكن العبد الفقير لله يتحدي هولاء العباقرة ويؤكد أن فوز أسبانيا بكأس العالم للمرة
الثانية على التوالي هو مستحيل له عينين ولسان وشفتين ويمشي بين الناس في الأسواق
وإحتمال كبير يشرب قهوة وشيشة .
نعم ..
دا مستحيل لأن أسلوب الماتدور انكشف للغاشي والماشي ولم يعد ( تيكي تاكا) يخيف
أحد فالبرازيل هزمت هذا الأسلوب 3-0 مع الرأفة و جنوب أفريقا تغلب عليه (وديا) مرتين
فيما تعادل معه المنتخب التشيلي .
ثم ..
أخوانا في الله ناس تشافي وهيرنانديز وتشابي وبوبول وفيا وحتي كاسياس قد هرموا
وما عادت تجري في نخاع عظامهم الحيوية التى قادتهم للتتويج كأبطال للكون في جنوب
أفريقيا وبالتالي يمكن لمنتخبات تضم فتيان أقوياء مثل بلجيكا وهولندا فضلا عن البرازيل
أن تتلاعب بهولاء العواجيز بل وربما أذلتهم .
المهم :
أهلنا البلجيك ديل شكلهم كدا ح يكون لهم كلمة مسموعة وفايتا أضان أهل الجلد والرأس
في مونديال البرازيل .. حد يراهن ؟
واخد بال حضرتك يا أبو الشباب ؟؟

بالمناسبة السعيدة دي
نسيت أن أذكر الأصدقاء والمعجبين انو الود الإسمو نيمار شبيه أنس النور دا
نحسا على فريق الراجل الواحد لغاية هسع .. ودا يؤكد إنو ماش كما قلنا بالضبط
حفظنا الله و أطال أعمارنا ..
نيمار بتاع الساعة كم عليك الله ؟
قوم لف بلا الله أداني معاك .

للماتادور ...او المانشافت

قلت لي نيمار مالو؟؟

هههههههههههههه

كويّس خالص, مع إنّي ما بحب أسبانيا لكن ح أشجّعهم
ونشوف يا تنظير ...






ماتنسى
قوم لف كان فازوا ولا لأ

تحياتي ياطلحة ...
اتفق معاك بخصوص اسبانيا كأس العالم تشمو قدحة تاني !!!
اما بخصوص البلجيك صراحة ما شفت كورتهم لكن اتوقع انو اقصي مايمكنهم تحقيقه
هو ما حققته رومانيا ايام (هاجي) او بلغاريا ايام (استشكوف) فوورة كده تنتهي بالمركز
الرابع او الثالث على احسن تقدير ............
كأس العالم ده ياطلحة زي حق (الفيتو) في الامم المتحدة حصري لدول معينة لكن مرات في
غفلة كده تفوز بيهو فرنسا أو اسبانيا ......... لكن بلجيكا مش ممكن
الزبدة كأس العالم ما فايت واحد من الاربعة الكبار (المانيا ، البرازيل ، الارجنتين ، ايطاليا) الترتيب مقصود

بدون طلحة وبدون تنظير كأس العالم للبرازيل أو الأرجنتين

Quote: أهلنا البلجيك ديل شكلهم كدا ح يكون لهم كلمة مسموعة وفايتا أضان أهل الجلد والرأس في مونديال البرازيل .. حد يراهن ؟

قوم لف

ياسر منصور
قلتا ليك نيمار بشبه انس النور ..ههههههههه

سلامات يا جنابو
ما بالضرورة اللقب يكون حكر على الأسماء المعروفة في العالم ..
كلامك دا برضو اتقال على اسبانيا قبل كدا ..
بطل كأس العالم ملامحو قاعدة تظهر من التصفيات ..
المنتخب البلجيكي قدم عمل لافت في التصفيات وأعلن عن جاهزيته مبكر لمصارعة الكبار
أتوقع أن يذهب بعيدا في البرازيل.




جرجير اتا تشجع أسبانيا إذن طايرة من قولة تيت .



صبري طه وين السؤال يا خوي ؟

قرحطب فور برنقا
ممنون للمتابعة والردود في البوك فيس ..
قاعد ألعب شطرنج مع واحد مصري شاف إسمي قال لي دا إسمك ولا فصيلة دمك .. ههههههههههههه .

طلحة يا حبوب..
مبدئيا اي فريق يرشحو الكج بيلية فده طوالي تستبعدو..
فيما يتعلق ببلجيكا فعلي المستوي العلمي الكروي فبلجيكا حاليا عندها افضل كلية لتخريج اللاعبين..
وامكن حاليا افضل محترفين علي مستوي العالم البلجيك..وعلي مستوي الورق عندهم منتخبين جاهزين من حيث جودة اللاعبين علي مستوي كل الخطوط..
لو في شي حيخزلهم فهو الجانب النفسي وخبرة وحساسية البطولة الكبيرة دي اضافة لي انو عندهم مشكلة تدريب واضحة حسب تقييمي..
عارف معظم وافضل لاعبي الدوري الانجليزي بلجيك؟؟
قائد توتنغهام وكومبني قائد السيتي ديل صخرة دفاع..
فيلاني وما ادراك ما ديمبلي في النص..هازارد ولوكاكو هجوم مرعب..
عارف انا الماني وبحب الالمان وبرشحهم لكن المنتخب المحيرني وشايف انو لو خت الرحمن في قلبو ممكن يفرتقا في وش الناس هو المنتخب الانجليزي!!
ياخ ده فيو لعيبة والله يدوني ليهم ادربهم ياخ ممكن اعمل منهم منتخب يخلللع... اولاد صغار مدعمين بالخبرة لكن ما عارف مالم!!!؟؟

اكتر منتخب غير محظوظ في العالم هولندا وبعدها افريقيآ ساحل العاج .

اسبانيا خاشة دوري الاربعة .

اتمني التوفيق لهولندا وساحل العاج وغانا ثم اسبانيا فقط .

Quote: اما بخصوص البلجيك صراحة ما شفت كورته

أنت ما شفت ناس لوكاكو بتاع أيفرتون كان كده ..

سلامات يا طويل العمر اها عاوزين نعرف توقعاتك لمتاهلي القارة السمراء


انا توقعاتي للبطل ما بتطلع من البرتغال اوالالمان

Quote: نا توقعاتي للبطل ما بتطلع من البرتغال اوالالمان

هي البرتغال أتأهلين يا الله و آمين ...
الأيد الواحدة ما بتصفق حتي لو كانت يد رونالدو ..
البرتغال لو وصلت دور الثمانية تكون ما قصرت يا سامي

ألمانيا هي المرشح الأقوي ثم البرازيل ثم أسبانيا و أيطاليا مع التحسب لظهر فرق متطورة بشكل مفاجئ مثل بلجيكا و تشيلي

هلا يا أبوعمير

Quote: امكن حاليا افضل محترفين علي مستوي العالم البلجيك.

مش إمكن بل الأكيد يا حبيب عندما تتحدث عن أكثر من 350 مليون
يورو هو سعر اللاعبين الذين قادوا المنتخب البلجيكي إلى نهائيات البرازيل.. والمؤكد
أيضا أن البلجيك هم أكثر لاعبين مطلوبين في الدوريات الأوربية، بفضل صغر سنهم
وإمكاناتهم البدنية والفنية العالية.
صحيح إن نقص الخبرة لدي هولاء اللاعبين ربما أثر على جهودهم في مواجهة العمالقة
الكبار في المونديال، لكن الراجح إن هذه المشكلة سيتم التعامل معها اعتمادا على الروح القتالية لدي
هولاء الشباب، خصوصا وإن المدرب مارك ويلموتس الذي قاد المنتخب إلى التأهل بسجل نظيف من
الخسارة أثبت ذكاء تدريبي لافت، وسيجد حلا ناجعا وحاسما لهذه المشكلة إن صح التعبير .
في منتخب بلجيكا يغلبك تتكلم عن منو وتخلي منو من نجوم الدوريات الأوربية
فهل عن إدين هازارد وكيفن دي بروين في تشيلسي الإنجليزي، واللا أكسيل فيتسل
في الدوري الروسي واللا مروان فيلايني في مانشيستر يونايتد، واللا دانيال فان بويتن في
بايرن ميونيخ الألماني وفينسنت كومباني في مانشستر سيتي..الخ الخ..

يا محمد جمعة معاك نتمني التوفيق للمنتخبات الأفريقية في البرازيل
هولندا منتخب لا يعرف كيف يتعامل مع اللحظات الحاسمة .

يا أبو السماسم كل البقدر أقولو ليك (من وجهة نظر خاصة) إنو النهائيات الجاية دي ح تكون
صعبة جدا على منتخبات الأحراش.

خالد عبدالله اتنين من المنتخبات الرشحتهم ديل أتوقع إنو ما يصلوا دور الأربعة .

طلحة يا حبوب..
انا بتوقع بلجيكا حضورها يكون لافت في الأمم الأوربية القادمة ..
بس كأس العالم ما ح تمشي فيهو كتير..
بالرغم من النتائج اللافتة في التصفيات بس على قدر المباريات اللي تابعتها ليهم شايف في حاجة ما مظبوطة على المستوى الجماعي للفريق..
وش البامية مااا ياهو ..وفي حاجة كده مفقودة في جماعية الفريق ..وإمكن إحساس النجومية مع صغر السن بتاعهم ده مفقدهم الحاجة دي..
بلجيكا في أول إختبار حقيقي في كأس العالم ح تسقط للأسف بس صدقني ح تكون تجربة مفيدة ليهم للبطولات الجاية ..

بعدين بذكرك يا أبو عمير
سيكون لبلجيكا كلام كبير في البرازيل .

يا أخطبوبطوف مالك رميت بياضك المرّة دي سريّع سريّع ؟؟
أقلو كان تنتظر القرعة البكرة دي وبراك عارف إنو المشككيين في إخطبوتيتك كتار...:)
أراهن وكل الرهان إثم ....:) النهائيات ما ح تطلع من البرازيل المانيا والبرتغال أرجواي
والبرتغال وإرجواي ديل بعد الزرة اللي إتزرزروها في الملحق دي ...تاني الأ الله

يا أميرهم جت عليهم
لا يفوت عليك إنو لغاية هسع ما قلتا منو البفوز لكن المراهن عليهو
انو أسبانيا تشمو قدحة + بلجيكا ح يكون لها حضور قوي حتي ولو رمتا
القرعة مع أقوي المنتخبات .

يا شباب ...بلجيكا في الثمانينيات كان عندها منتخب قوي ...ولكن كما قال عمر فارقو..البلجيك عندهم حاجز نفسي...

ولا اعتقد انهم سيصلون لمراحل متقدمة في المونديال