Post: #1
Title: الطفل الـمعجزة يتكلم عن الإستثمار
Author: abdalla elshaikh
Date: 12-03-2013, 01:52 AM
لو فتحت ماسورة لوجدت هذا الطفل الـمعجزة يتكلم عن الإستثمار في بلاد السودان ولكأنما هذا الإستثمار {راكوبة قش} يسهل بناؤها و تشليعها في نفس اللحظة! علما بأن الإستثمار عملية مركبة و معقدة إزدادت تعقيدا في عصر العولمة الإقتصادية و بروز تكتلات إقتصادية إقليمية و دولية مثل منظمة التجارة العالمية{WTA}
فيا مصطفي و قبل عصر هذه العولمة الفاحش كانت للـمحاصيل السودانية ميزة تفضيلية تـمنحها جواز مرور للأسواق العالمية ومن ضمن هذه المحاصيل الفول السوداني والذي يدخل السوق العالمي إبان أعياد الكريسماس ورأس السنة فتقبل الشركات علي شرائه لا لجودته ولكن السوق العالمي في تلك الفترة خال من الفول ألأمريكي والذي يدخل السوق بعد ذلك!! ولكن جات إنقاذكم و طردت تجار الحبوب الزيتية من السوق وسلمت هذه السلع الإستراتيجية لـمنسوبها فكانت الطامة الكبري إذ ضل هؤلاء القوم الطريق فوصلت أول شحنات الفول السوداني لأوربا بعد ألأعياد فوجدت أفوال محمية إقتصاديا فدق الفول السوداني الدلجة و لـم تقم له قائمة حتي كتابة هذه السطور
الدول الصناعية يا مصطفي بتحمي منتجاتها الزراعية ودونك شكوي الدول النامية في مؤتمر الـمكسيك (2003) والذي خرجت منه أثنتان و عشرين دولة غاضبة علي سلوك الدول الصناعية تجاه الـمنتجات الزراعية لدول نامية في حجم البرازيل مثلا
فيا مصطفي أرعي بقيدك لأنو مشاريعك الزراعيه دي حاتروح شمار في مرقه في ظل العلاقات الدولية الجديدة
|
Post: #2
Title: Re: الطفل الـمعجزة يتكلم عن الإستثمار
Author: abdalla elshaikh
Date: 12-04-2013, 01:21 AM
Parent: #1
فيا مصطفي كيف عايز تقنع مسثمرين أجانب لكي يستثمروا
بالسودان وهم يعلمون تمام العلم بإن إستثماراتكم إنتو
في ماليزيا وحدها تفوق الثلاثة عشر مليار بشهادة رئيس
وزراء ماليزيا الأسبق و باني نهضتها الإقتصاديه
فيا جماعة ما تضاروا خلف طرق العشر ففي زمن هذه
العولمة سقط مصطلح {العالـم قرية صغيرة} و إنولد
عن حم العولمه مصطلح {العالـم شاشه بلورية} بتعبير
خطاب حسن أحمد(1997) أو (The World is Flat) بتعبير
الصحفي الامريكي ثوماس فريدمان{2007) بـمعني أدق يا
مصطفي من الممكن لأي مستثمر أن يستوثق من هذه الـمعلومات
قبل إرتداد بصر سليمان الحكيم
|
Post: #3
Title: Re: الطفل الـمعجزة يتكلم عن الإستثمار
Author: معاوية الزبير
Date: 12-04-2013, 03:39 AM
Parent: #2
مصطفى دا يا عبد الله من النقة بتاعت الاستثمار دي كللللها همو يطلع ليهو بي كم أرنب
بعد داك البلد دي تحرق، تتشوي، تتقلي، أي حاجة، ما شغلتهم. ياخ الواحد ولا بقول لي نفسو
أخلي فيها روّاب يمكن بكرة أفلّس،
فاااا شنو يا ود الشيخ، بَطّل الكتابة الجادة، انت ما نصيح ولّ شنو،
الناس بضحكوا على الكتابات الزي دي
الحكاية فاتت مسرح العبث بي هنووووووك، تقول لي جودو!، لا ، كاراتيه
وبعد، إزيك يا حبيب، نعلّك طِيبة ياخ
|
|