أم وضّاح.. وجع وش بالطريقة الصاح!!

أم وضاح ..(النصيييحة ما متذكر إسمها منو والله ) ..لكن الزولة دي ظهرت كصحفية مستضافة في برنامج عبر قناة النيل الأزرق كزولة مدافعة عن الفنانين الشباب ..
وأتذكر كانت في حلقة تناقش تجربة طه سليمان ..وده كان أول مرة عن نفسي أشوف الزولة دي في التلفزيون ..وكانت ضيفة ساي..
شويتين وأشوف ليكم الزولة نزلت في قناة النيل الأزرق مقدمة لي برنامج تقريباً إسمو البساط أحمدي..
أم وضاح حالياً بتتنطط ما بين كل القنوات السودانية ..
بدت بالنيل الأزرق..
نطت لي هارموني..
عرّجت على قناة قوون تقريباً..
الايامات دي شايفا في قناة الخرطوم ..
الزولة دي عايزة تصل لي شنو؟؟
ورسالتها الاعلامية شنو؟؟
علماً بي إنو عندها برامج من نوع البرامج بتاعت كسّير التلج الظاااهرة ( وفي البال حلقة ود الجبل..)
لماذا لا تستقر هذه الصحفية في قناة واحدة؟؟
وما هو سبب تنقلها المستمر بين القنوات؟؟
ولييي ما بتقدم نفس البرنامج في القنوات المختلفة دي؟؟؟ يعني بتظهر في كل قناة بي شكل مختلف وبرنامج مختلف اللهم تتفق في طريقة لبس التياب والحنة المبالغ فيها ..
هل لأنها بتقدم برامج قدّر ظروفك أم بيتم الاستغناء عنها أم ماذا؟؟
صراحة الزولة دي محيراني تماااماً ..

انت برضو؟؟

ههههههههههههه


نفس الشعور والله..

وجع وش وكسير تلج وتصنع..

الله يصلح الحال

بالله يا خال؟؟
يعني طلعت مظهراها عاااملة ؟؟
انا قايل روحي براي الملاحظ القصة دي..

يا أبو عمير يعني بقت على أم وضاح دي ؟؟
وجع الوش في وسائل اعلامنا بالذات القنوات على قفا من يشيل وبدون أي مقومات أو امكانات
ودا البزيد وجع الوش ويكرمشو يخليهو (فد حتة )..
مثلا عندك حمزة عوض الله على أيامو كان وجع وش خالص لكن الدكتور عندو حاجة
كويسة قاعد يقدما للمشاهد أقلاها ثقافتو واطلاعو الواسع ..
لكن تاني أمسكم كلهم بالدور من الزول الاسمو ناجي مرورا بالسمحات سماحة جمل الطين
(جت عليهم) كلهم وجع وش وطمام بطن وكسر رقبة الخ الخ الخ .
والله أنا لو في يدي غير عبدالله محمد الحسن وحسين خوجلي ما فيهم زول يطلع للناس في الشاشة دي.
بالمناسبة وين البت الاسمها رشا ديك ؟؟؟؟؟

سلام يا عمر..
أم وضاح دي اسمها حنان عبدالحميد..
وأوووول مرة أتفق معاك في حاجة..
ياخي دي بتتكلم بسرعة خيالية..
وطبعا شفت حلقة ود الجبل في حلتو جبيل الطينة..
وبعدين تعاااال ياخينا..
شنو الموضة الحصلت في البلد دي وأي صحفي عايز يبقى مذيع ومقدم برامج
طلال مدثر في الشروق..
خالد ساتي في الخرطوم
المبعد عبدالباقي الظافر في أمدرمان..
فاطمة الصادق في النيلين..
يبدو انو مافي أي معايير للمسألة دي..

والله يا أيمن الإتفاق الجابتو أم وضاح ده اكان كده ده طرفي منو :)..
الغريبة فاطمة صادق دي بدت بالعكس أو خلينا نقول شهرتها التلفزيونية خلتا تتشاف في الصحافة اكتر..
لكن عموما كده كلهم ده تلتخ بيهو ده..وكلهم بتاعين محلسة ودهنسة لأغراض معلومة بتخلي الزول يحزن على الحال الوصلوا ليهو الناس ديل..

تخريمة :
شكلو كده هملة القيد الصحفي خلت إنو تقديم البرامج يهمل ..

والله يا طلحة إنت زولي تب فيما يتعلق بي حمزة عوض الله ..
الزول ده بييي وجع وشو لكن والله زول مثقف وبتطلع منو بي حاجة ..
ومرات الزول ده لمن يقلب ود حلة بتلقاهو زول ظريف جداً وممكن فييي التلفزيون ده يقدم مواد خفيفة ولطيفة لو خت الرحمن في قلبو..
الغريبة امبارح جابوهو في التلفزيون كان عيان وناس التلفزيون سجلوا ليهو زيارة.. وهو في سرير المرض برررضو مسك المايك نضم طن :)..

عارف عبد الله محمد الحسن ده عمل حاجة غريبة جداً ..الزول ده بدا دراسته الجامعية في اللغة العربية كبييير كده عشان يطوّر روحو ويزداد معرفة ..وده الخلاني أحترمو أكتر..
بس برضو عندو عيب المقدمات الشعرية الطويلة ديك قبل الدخول في الموضوع...

Quote: (النصيييحة ما متذكر إسمها منو والله )

يا عمك اصلا دي بداية الوهمة من هنا.. نك نيم أو اسم مستعار ودي برضو تقليد لي مين ما عارف

هي كده بالضبط يا أنور..
الغريبة لاحقاً طلعت زوجة صحفي رياضي رااايق وما زول اضواء شديد كده مع إنو قديم في الصحاة الرياضية في الجرايد السياسية..

كلامكم القلتوهو صاح

الا في حسين خوجلي يعني هو الما عامل لينا وجع وش ؟؟

كل القنوات وبلا استثناء كل الناس لاعبين فيها دار الصفو لفو ولفو
نفصس الشخصيات السياسيه والفنيه والصحفيه والشعراء وحتي المقابلات محصوره في ناس معينين

كمال افرو محمد شريف علي بشري الفاضل وما عارف منو

ياخ القصه يا عمر هوب لس ما في امل

Quote: والله أنا لو في يدي غير عبدالله محمد الحسن وحسين خوجلي ما فيهم زول يطلع للناس في الشاشة دي.

يا طلحة ظلمتَ سعد الدين حسن لكن فيك الخير ياخ

يا ود الفاروق ام وضاح دي أنا بستحملا عشان مريخابية غايتو كان هلالابي تاكل نارك
:
:
:
:
:
:
:
مع التحيات لله الزاكيات

Quote: ( وفي البال حلقة ود الجبل..)

حلقة ود الجبل ممكن تاخد أوسكار .. كأسوأ حلقة في برنامج حواري...

اتفقنا او اختلفنا حول شخصية ود الجبل، ولكن كان بإمكان المذيعة أن تستخرج منه الكثير...
حتى الإخراج كان سيئاً ... وما عايز أعيد مشهد اللقطة ( البايخة ) اللي كان ممكن المخرج إبعادها
حيث أن البرنامج مسجل ... وليس مباشراً.. لكن نقول شنو؟؟

نطيط الصحافيين إلى القنوات الفضائية أتى كنتيجة حتمية للواسطات واللوبي ...

تحياتي عمر والضيوف

طارق يا ميرغني ..
كيفنك يا حبوب..
حسين خوجلي ما قاعد ينطط بين القنوات وإن كان كتير الطلة .. حسين خوجلي كان ما بين قناة التلفزيون القومي ثم قناته الشخثية امدرمان .. وإن كان لحسين ميزة التسويق لبرامجه فهو واضح الاهداف والرؤيا برضو واضحة ..وده ما دفاع عنو بصراحة بقدر ما هو إبعاد للمقارنة بينه وبين ام وضاح دي اللي بصراحة مع كترة الطلة فهي ما واضحة في فكرتها ولا في برامجها .. المهم عايزة تنضم وتكتتتر من الحنة والتياب ..

عبد العزيز يا حبوب..
حلقة ود الجبل بي أي حال من الأحوال ما ممكن تكون أجمل من حلقات عفاف أمين معاهو فما عارف لييي أم وضاح مشت كررت الضيف من جديد واختارت عبارات بصراحة كانت بتاعت كسير تلج بصورة مزعجة وإن كانت في ظاهرها جابت تفاصيل الاسرة والزوجات و و ..
فعلا الأوسكار جاهز ونجي نديها الكاس في حفل فخيم :) :)

هلكتنا بالحنن والكشاكيش البتلبسا وبطبقات المكياج السميكة.

_______
أما بخصوص حمزة عوض الله فحبذا لو استمعتم له في برنامج المجال الرياضي الإذاعي؛
شخص لا علاقة له بحمزة التلفزيوني .. محلل رياضي لم ينجب السودان مثله .. هكذا بالمطلق.

Quote: الغريبة فاطمة صادق دي بدت بالعكس أو خلينا نقول شهرتها التلفزيونية خلتا تتشاف في الصحافة اكتر..

فاطمة الصادق دي أنا اشتغلت معاها في جريدة واحدة قبااااال ما أجي السعودية..
الكلام ده نهاية التسعينات وقبل دخول الألفية.. والزمن داك مافي إلا تلفزيون السودان فقط..
وأمسك عندك الأستاذة لبنى خيري زوجة زميل المنبر عبود عبدالرحيم.. كانت مذيعة في هارموني..
والمرحومة المغفور لها نادية عثمان مختار.. ابتدأت صحفية في الخرطوم وأخبار اليوم..
ثم مذيعة في هارموني وقناة أمدرمان..
قائمة طويلة عريضة جداً من الصحفيين انتقلوا إلى الشاشات الفضائية..
وكأن العمل التلفزيوني أصبح مكملاً لشخصية الصحفي..
أو أن الصحفي الناجح لا بد أن يطل على المشاهدين كذلك من القنوات التلفزيونية..

يا أيمن شكلك ما فهمتني يا كمان عايز تقشر بي معلومة إنك إشتغلت مع فاطمة صادق :):):)
انا قصدت ليك فاطمة صادق في الصحافة ما كان عندها وزن وحضور ..قامت جات الشاشة عبر البوابات الرياضية قامت اتشهرت أكتر من كونها صحفية والناس عرفتا مقدمة برامج رياضية..

Quote: هلكتنا بالحنن والكشاكيش البتلبسا وبطبقات المكياج السميكة.

أحسنت يا سحس :) :)..
عارف أم وضاح دي بتكون لمن مشت لي بتاعت المكياج وقعدت في الكرسي بتكون قالت ليها لو سمحتي أديني واحد مكياج طبقات ..

Quote: يا أيمن شكلك ما فهمتني يا كمان عايز تقشر بي معلومة إنك إشتغلت مع فاطمة صادق

ياخوي حسين خوجلي بكل امكانياتو وشهرتو وسلطانو بالذات في اليومين دي ما قشرت بيهو..
مع إنو كنا بنتعشى خمسة سنين كل يوم مع بعض..
عايزني أقشر بفاطمة الصادق؟؟

Quote: عارف أم وضاح دي بتكون لمن مشت لي بتاعت المكياج وقعدت في الكرسي بتكون قالت ليها لو سمحتي أديني واحد مكياج طبقات ..

بتكون قالت ليهو: "الرسول .. رطل مكياج"!

انت عارف ياعمر ام وضاح دي لم اتقبل تقديمها اطلاقا
ويظهر لي احساس كده انها ما مقتعة بكلامها البتقولوا
وانها تريد ان تثبت شيئا لدى المتلقي وده يظهر من المبالغة في كل
شيء الحنة الثياب و طريقة التقديم
هل لقصر قامتها اثر في هذا