اوتسي!

لا، ما اسم فلم جديد.


في ناس كتار جداً في الدنيا مهوسيين باوتسي. مجلات علمية، مواقع في النت، شكلة بين إيطاليا و النمسا في منو ليه الحق في اوتسي.
حتي براد بت عنده تاتو بتاع اوتسي.
شنو اوتسي؟

في سنة 1991 كان في اثنين ألمان رجل و امرأة hiking في جبال الآلب قرب الحدود الأيطالية النمساوية. الاتنين كانوا ماشين في الطريق المعبد او المعروف للناس.
لكن قرروروا انهم يطلعوا من الطريق و و يمشوا في طرق غير معبورة. بعد مسافة من المشي شافوا جثة. زول ميت و نصفه في الثلج و نصفه الاعلي مكفي علي وشه في التلج.
عرفوا انه الزول ميت. اتصلوا علي البوليس عشان يطلعوا جثة الرجل و يكلموا أهله. اللي اكيد بيبحثوا عنه.
لما جاء البوليس و بدوا يحفروا في الثلج عشان يطلعوا الرجل، لاحظوا انه الرجل معاه فاس من النحاس و سكين شكلها مصنوعة يدوياً. و انه ملابسه شكلها ما من الزمن ده.
لما طلعوا الجثة و أخدوها المعمل و من تحلل الأنسجة لقوا ان الجثة قديمة. قديمة جداً. عمرها اكتر كتير من ايام. بل اكتر كتير من شهور او حتي سنيين.
الجثة اقدم من الحرب العالمية الأولي. بل اقدم من الأهرامات. الجثة او المومميا عمرها حوالي 3300 سنة. الرجل ده مات من قبل 3 الف و تلتمية سنة.

الموميا اتعمل أيها اكسري، تي سي سكان و كل انواع الصور المعروفة في الطب و العلم.
المحصلة انه اوتسي ( ده الاسم اللي أدوه ليه)، كان عمره 45 سنة لما مات. و كان طوله متر و 70 سم. و وزنه كان 50 كيلو. جسمه كان قوي جداً و عضلات رجلينه كان كبيرة و قوية.
اوتسي كان مجروع جرح كبير في يده. جرح وصل للعظم. و باين من الجرح انه جرح دفاع عن النفس. لما زول يكون عاوز يضربك و ترفع يدك عشان تحمي وشك او رأسك.
من تحليل الأنسجة باين انه الجرح حص قبل يوم او اثنين من موت اوتسي. و لاحظ العلماء برضوا ان جمجمة اوتسي مهشمة.

و بقي سؤال في عقول العلماء و اي زول سمع باوتسي. من قتل اوتسي؟؟؟ من هو اوتسي؟ شنو اللي حصل ليه؟ و كيف انتهي بيه الحال ميت في قمة الجبال؟؟

في البداية العلماء ما قدروا يعرفوا معدته وين. لكن لقوا أمعاءه الدقيقة. في الأمعاء الدقيقة لقوا باقي الأكل اللي أكله و الماء اللي شربه في اخر يومين في حياته
. من تحليل العينات لقوا انه اوتسي كان منطقة عالية في الجبال. بعدها نزل للسهول. و رجع تاني للجبال محل ما لقوه ميت. عرفوا الكلام ده من نوع ال Pollen اللي اتلقي في معدته.
احدها كان من نباتات بتقوم في الجبال و الأخري بتقوم في مناطق منخفضة.
واحد من الPollen اللي اتلقت في أمعاءه كان سالم تماماً. و ده ( ذي ما قالوا العلماء) بيدل انه نزل من الشجر او العشب المعين قبل ما اوتسي يأكله بساعات.
و نوع ال Pollen ده بيظهر في الربيع. معناه اوتسي مات في الربيع قبل اكتر 3 الف سنة.
بعد فترة طويلة( سنة 2010) لقوا معدة اوتسي. و بتحليل مكونات المعدة وجدوا أن اوتسي اكل قبل موته بحوالي ساعتين. اكل وحبة فيها عيش مصنوع من القمح و لحم غنم.
لما حللوا شعره لقوا انه غالبا كان شغال ( او عنده علاقة) ب تعدين النحاس. و انه كان بياكل لحم قليل و حبوب كتيرة جداً.
من تحليل عظام الحوض و الرجلين انه كان بيمشي مسافات طويلة جداً. و غالبا انه كان راعي في مناطق جبلية.

اما عن صحة اوتسي عموما فان العلماء لقوا انه اوتسي سنونه كانت حالتها صعبة. سوس كميات. و انه كان عنده دود في معدته.
من ظفوره لاحظوا انه مرض 3 مرات في اخر 7 شهور. اخر مرة كانت قبل أسبوعين بس من موته.

في مرة كان واحد من العلماءبيبحلق في صورة 3 ابعاد لصدر اوتسي و لاحظ انه وسط ضلوعه في راس سهم. و منها أتعرف سبب الموت.
احدهم اطلق سهم علي اوتسي أصابه في صدره و نزف لمدة 20 ل 25 دقيقة ( من نوع الإصابة) و مات.
لكن الملاحظ انه الزول اللي اطلق السهم وصل اوتسي و كسر باقي السهم و أخد حجر و هشم جمجمة اوتسي و خلاه ينزف حتي الموت و مشي

من الحجات اللي اتلقت معاه كان فاس و كم سهم. واحد من السهام كان فيه دم لاكتر من زول واحد. وباين ان اوتسي قتل بيه نفرين علي الأقل.
الفأس اللي كان معاه باين انه ما صنعه زول براه. باين انه كان جزء من قبيلة و انه كان محارب.
العلماء الان بيفتكروا ان اوتسي كان في الجبال و انه نزل لقريته لكن لقي حرب او قبيلة اخري بتعتدي عليهم. حارب و طلع تاني الحبال. لكنه كان مصاب في يده.
احتمال يكون وحده او معه اخرون. لكنه قبل موته كان حاسي بالأمان لدرجة انه أوقد نار و طبخ لحم الغنم بتاعه و أكله. بعدها بساعتين هجم عليه أحدهم بسهم. و هشم رأسه و تركه ينزف و يموت.
المموميا حافظت علي شكلها لانه كانت في وضع مناخي مثالي في الجبال. بتكون مجمدة اغلب الوقت و في الصيف بتسيح.


بقي اوتسي اكتر من آلاته الف سنة في مكانه لحدي ما زول لقاه.

سلامات يا سمارت ...

ده عمك ( أوتزي ذا آيسمان ) لما لقوهو الشباب ..

سموهو اوتزى عشان لقوهو في جبال ( الأوزال ) Otztal Alps

قصتك بالعربي أجمل من الكلام ده ... و ماحواليها كمان اجمل و أجمل ...

The Discovery
Thursday, September 19, 1991 – 1.30 p.m.
Tisenjoch - 3210 m above sea level
and#214;tztal Alps (South Tyrol, Italy)

On a sunny day two hikers, Erika and Helmut Simon, from Nuremberg in Germany, were walking in the Otztal Alps. Descending from the Finail peak in the Tisenjoch area, the Simons decided to take a shortcut and left the marked footpath. As they walked past a rocky gully filled with meltwater, they noticed something brown on the gully bed. At first they thought it must be some sort of rubbish, but on closer inspection they realized with horror that they had discovered a human corpse.

Only the back of the head, the bare shoulders and part of his back jutted out of the ice and meltwater. The corpse lay with its chest against a flat rock and its face obscured. Beside the corpse the two hikers noticed several pieces of rolled-up birch bark.
Before leaving the scene, they took a photograph of what they thought to be the unfortunate victim of a mountaineering accident a few years back.

At this point nobody could have imagined that the dead man and the objects around him were soon to gain worldwide fame.

The story of a 20th century archaeological sensation was about to unfold.

متابعين يا أسمارت ،،

أها الزول ده كان متزوج أم لا ،، وهل كان لديه أطفال ،، وكان شغال شنو غير أنو حارب مع الجماعة ،، أها وهل شرب الشاى بعد أن ضرب الغنماية أم أكتفى بالماء الذى وجدوه فى بطنه ،، وهل كان لابسا ام عاريا ،،
أها الزول ده كان مفلس أم وجدوا بعض المال معه ،، وما نوع العملة التى كانت معه ومن أين صدرت ،، وهل هو من أهل المنطقة ام كان مغتربا مثلنا ،، ومن أى الأجناس كان هذا الرجل ،،

المهم فى شغل كتير لسع باقى على العلماء ديل ،،

فهل هنالك باقى للقصة أم خلاص نشوف لينا بوست تانى

سلامات مستر قباني. الأحوال؟
شكرًا جزيلا علي الصور. اليوم عندنا اجازة و من قبيل بحنس في روحي أقوم افتح كومبيوتر عشان انزل صور لكن باين انو كسلي كان أقوي من عزيمتي.
كتر خيرك علي المجاملة اللطيفة.

سلامات ماهر محمد صالح.
ما أظن الجماعة لقوا شاي في معدة صديقنا. احتمال ما لقوه لسه، او ما قتلوا. لكن ما في زول نفي ( او أكد) موضوع الشاي ده. :)

في لسه حجات كتيرة عن اوتسي.
مثلا، من تحليل ال DNA بتاعه عرفوا انه (لاكتوز انتولرنس)، اي انه اللبن بيعمل ليه غازات شديدة.
ده موضوع براه، لكن ملخص الحالة دي انه البني آدم زمان ما كان بيشرب لبن الأبقار و أصلا مع معتدتنا ما مجهزة لهضمه. لكن بعد آلاف السنوات جسم الانسان اتغير ( بتغير نوع أكله) و بقي يقدر يهضم اللبن. في ناس حتي الان ما بتقدر تهضمه و ما بتحتمله. علميا الموضوع معقد اكتر من كده لكن خلوه لمرة تانية.

بتحليل ال DNA برضوا عرفوا ان اوتسي عنده مشاكل خصوبة. و احتمال ما يكون بيولد.
اقول احتمال. لانه قبل فترة كان في دراسة اخري ( ما ليها علاقة بيه) لكن كان في عينات بتاعة DNA لكم الف زول في النمسا. و بالصدفة لقوا ان 19 منهم عندهم قرابة باوتسي. و
و في احتمال ضعيف جداً انه واحد فيهم يكون ابن ابن ابن ابن ........... اوتسي. لكن العلماء ما متأكدين. و لسه البحث جاري في الموضوع ده.

عن الهجرة و الاغتراب باين( من تحليل أسنانه ) ان اوتسي اتولد في منطقة معينة في النمسا لكنه مؤخراً في حياته اغترب لمنطقة اخري. و انه كان راعي في مناطق مرتفعة و انه كان بالجنبة كده شغال في النحاس.

لما حاولوا يعرفوا شكل اوتسي كان كيف لقوا انه وشه كان مكرمش ( لزول اكبر جداً من عمره) و انه كان عنده عيون بنية، غريقة. و انه ماكان حالق. و شكله تعبان و مُجهد.
لقوا برضوا في جسمه كمية من التاتوهات. و يظن العلماء انها من حاجة ذي العلاج بالإبر و حجامة.

اما عن ملابسه فكان لابس هدوم محترمة جداً.
كان لابس عباية و بنطلون و كوت. و حزام عديل كده. كان لابس جزمة من جدود حيوانات مختلفة.
الجزمة كانت ضد المياه.
الجزمة كانت جيدة و معقدة الصنع لدرجة انه في شركات أحذية كانت عاوزة تشتري ( ما عارفة من منو) حقوق تصنيع الأحذية دي.

Quote: قصة لذيذة والله .. ما عملو ليهو فراش بكا ؟

شكرا يا اسمارت على الحكي بالطريقة اللطيفة دي

اتمنى انك تدعمي البوست باكبر كمية من الصور (بطلي كسل) :)

متابعة باهتمام

Quote: اوتسي!

رحمكم الله
:)

Quote: التاتوهات

يا أسمارت لو سمحتى أخوكى محسى ،، ممكن ترجمة ؟؟

Quote: يا أسمارت لو سمحتى أخوكى محسى ،، ممكن ترجمة ؟؟

والله ان زول متسبل ساي !
يا كافي البلاء لا عربي لا انجليزي؟!
-
جمع تاتو (tattoo) - وشم - بس ما تقول لي وشم يعني شنو !
-
عليكي الله يا اسمارت لو في طريقة كلمي لينا الناس ديل يجوا يعرفوا لينا الكتلو ثوار سبتمبر ديل منو؟

هههههههههههههههههههههههههه حلوة والله لا عربى لا انجليزى دى

شكرا أيمن ،،

الآن رفعت الأقلام وجفت الصحف

بس بصراحة اللوم على أختنا أسمارت ،، كانت تقول الشامات بدل التاتوهات فهى اخف وزنا ونطقا ومعنىً ههههههههههههههه

سلامات عبد الله ادريس.
الرجل لحدي الان من معمل لمعمل و من مستشفي لمستشفي و حجاته كلها في المتحف. دفن ما دفنوه، تقولي لي فراش. لكن الرجل كان مدفون 3 الف سنة. كفاه.

سلامات فواز المنسي. اول ما ربنا يفتح علي و أفتح كومبوير ح أبدا انزل الصور.

سلامات خالد عبد الوهاب. و شكرًا جزيلا علي المتابعة. ان شاء الله انزل الصور.



ود البشرى، الأحوال؟ ذكرتني أغنية هنيدي. همام في أمستردام.
-اتش
-يرحمكم الله.
-اتش
-في آيه يا جماعة
-اتش ، ام ، ايه، اسم الكريم هماااااام.


سلامات أيمن محمود. و كتر خيرك في الترجمة لأخوانا ماهر.
تعرف في شغل ذي ده اتعمل قبل كده في مناطق في العالم حصل فيها تطهير عرقي. و ما بعيد يتعمل في السودان في دارفور. او حتي في الخرطوم لمعرفة كيف تم قتل الثوار.
البحوث دي لكم عموما مكلفة جداً جداً. و رغم اننا بنشوف حجات ذي دي في المسلسلات في النلفزيون كل يوم في جرائم قتل عادية.
لكن نادرا ما تتعمل أبحاث ذي دي لأي جريمة. بالكتير بيرفعوا البصمات و يلموا اي دليل حول مكان الجريمة و لو في عينات دم او حجات واضحة. :(


ماهر، حقك علي يا اخي. بعدين ( تاتوهات) دي ذاتها انا بالغتا فيها. الكلمة بالإنجليزي، أقوم أجمعها جمع مؤنت سالم، و اكتبها بحروف عربية!!!!
لكن كمان ما تلخبت لينا قراء الناطقين بالعربية :)
( الشامة) براها، و الوشم ( براه).
اللي في جسم اوتسي ( اوشمة) و ليس ( شامات)
:)

لا حولااااااااااااااا
منكم يا الفرنجة

الزول يموت موت الله الواحد دا تقوموا تطلعوا ( المستخبي ) في حياتو كلها ؟؟؟
لا تخلوا أكلو لا شرابو لا هدومو لا خصوبتو
كان كدي أخير لينا السودان دا بي سجمو ورمادو دا
نموت موتنا والناس العارفين عننا حاجة سمحة بيقولوها والعارفين حاجة كعبة ياهو الناس ح يسكتوهم بـ ( أذكروا محاسن موتاكم )

شكراً مهندستنا سمارت للسياحة الراقية
صدقيني مشروع ( راوية ) معتبرة .....
أيوة
راوية
مش رايوة العباسي ... حبيبتنا المشتركة



________________

يحيى قباني يا حبيب
ياخوى أحسن ليك تعال راجع لـ ( أم در وعهودا )
شايف ناسك ديل بيطلعوا في ( البلاوي ) كيف ؟؟

يا سلام يا هندسة بوست جميل وسواقة رايقة رغم المطبات مستمتعين بطريقتك الجميلة فى السرد

سلامات يا بشمهندس عاطف.
الفرنجة دي فعلا منهم خوف. قبل كم يوم كنا بنتكلم عن قصص التجسس بتاعة حكومتنا {الامريكية، احم، احم :) } التجسس علي ألمانيا و فرنسا و كل العالم. المهم كان معانا واحد مهندس اتصالات في شركة أمريكية كبيرة جداً. الرجل قعد يضحك علينا. قال لينا دي تكنولوجيا عمرها 10 سنوات. الحجات الجديدة- الان- أصلا ما ح تقدروا تتخيلوها.
اخير لينا ناس ( اذكروا محاسن موتاكم) ديل.
في الحقيقة في زول كتب قصة حول اوتسي. ح احاول افتشها. و أترجمها ؟؟؟ ما أظن اقدر علي موضوع الترجمة ده.


سلامات سامي. شكرًا شكر شكرًا علي الفيديو.
و كتر خيرك علي الكلمات الطيبة.

هى
نسيت أقول ليك أهممممم حاجة يا سمارت

أحفادك بختهم

يلقوا حبوبة حكّاية جنس حكايات
( أحاجيها ) كلها Class ( كلاس دي ما عارف بالضبط معناها شنو لكن مرة كدا صاحبتنا تيسير عووضة شكرت بيها زولة )

تحية سمارت
وضيوفك
العلم !
والمثابرة والجدية
ياخ الخواجات ديل بدهشوك
عندهم مسلسل بوليسي امريكي في إكتشاف حوادث القديمة ,, بقنعوك غايتو
استمتعت بالحكي

بشمهندس عاطف. الله يجبر بخاطرك. غايتو انا زمان ما في زول حجاني. لكن قاعدة احجي أولادي الان. عندي قردة كده عمرها 20 شهر. إها الزولة دي كل يوم لازم نحكي ذي 6 قصص كده لحدي ما تقتنع تنوم. تقول فاهمة حاجة!!!!
Class دي أظن انهم قاصدين بيها
High class
او احتمال اختصار ل Classic.

Who knows!!
لكن شكلها حاجة كويسة. :)

سلامات عبد الحفيظ ابو سن. تسلم يا اخي.
و الحمد لله انك استمتعتا بالحكي. أصلا ده الهدف من البوست. :)

سلام يا سمارت

زولك ده الزمن ده كلو ما اتحلل مالو يا سمارت ؟؟ لحدي ما لقوا المعدة والأمعاء قاعدين وحللوهم كمان ..

أنا قبل فترة شفتا فيلم عاملاهو الـ BBC ما عندو علاقة بي زولك أوتسي ده

لكنه يحكي عن تحلل الكائنات الحية وما يحدث بعد الموت ـ Afterlife; The Strange Science of Decay

كدي شوفيهو أصلاً شكلك بتحبي الحاجات الغريبة..

ده الجزء الأول المترجم باللغة العربية ـ وستجدي بقية الأجزاء تحته تباعاً..




وده رابط الفيلم الوثائقي كاملاً باللغة الانجليزية :




مشاهدة ممتعة

رئة اوتسي كانت حالتها صعبة. ما أظن كان بيدخن :) . اكيد السبب في سواد الرئاتينه من النيران اللي كانوا بيشعلوها عشان يأكلوا و عشان يشعروا بالدف.

نسيت اقول انه اوتسي كان لابس شراب ( اخضر و باستك من فوق... Just kidding ). كان لابس شراب مصنوع من نوع ناعم من الأعشاب.

كان شايل معه أدواته اللي بيشعل بيها النار. و هي حجار عشان يعمل الشرارة و 12 نوع من الأعشاب ( باين انها سهلة الاشتعال)

كان شايل برضو أعشاب و مشروم، العلماء لقوا ان نوع منها فيه مضاد حيوي. و الظاهر انه اوتسي استعمله للتداوي.

سلامات الهادي. شكرًا علي الفلم.
مع انه ح ينكد علي و يذكرني انها كلها في النهاية كوم تراب، ده طبعا بعد ما ياكلنا الدود، لكن ح احضره.
تعرف عشان موضوع الدود ده انا قررتا أني أتبرع بكل أعضائي، في حالة أني مت موت دماغي و باقي العدة كويسة. بدل ما يأكلها الدود ساي كده، خلي زول يستفيد منها.

مع انه صديقنا اوتسي كان عمره 45 سنة لكن ما كان عنده ضرس عقل. موش ما قام، أصلا ما عنده.
ده غير انه ما كان عنده الأضلاع رقم 12. ده غير الأضلاع المكسورة بسبب الجليد و تراكمه عليه. اوتسي برضو كان عنده Lyme disease و كمية من الحصوات.
كان عنده مرض في لثته ( ده غير التسوس).
صاحبنا رغم كرفيس الوش و كمية الأمراض اللي كان بيعاني منها كان لا يخلو من جمال. كان عنده فلجة!!!


إيطاليا و النمسا دخلوا في مشاكل كتيرة عشان يتفقوا علي منو ليه الحق في اوتسي.
في النهاية عملو مساحة للحدود بين البلدين. لقوا أني اوتسي اتلقي في مكان داخل الحدود الإيطالية ب 303.67 قدم فقط. و بقي اوتسي إيطالياً.

Quote: يحيى قباني يا حبيب ياخوى أحسن ليك تعال راجع لـ ( أم در وعهودا ) شايف ناسك ديل بيطلعوا في ( البلاوي ) كيف ؟؟

يعني نخلي ( الحجات ) السمحة دى و نمشي وين ؟

وين يا عاطف ... الشوق ما غلبنا ياخي ...

سلام يا اسمارت

شكرا لحكاية عمنا اوتســي .. حكي طاعم بالجد
حكاية ما دفنوه ولا ما علموا ليهو بكا دي استوقفتني كتير
عارفه عندنا في السودان حكاية ستر الجنازة بسرعة بسرعة دي
بتزيد مرات من حرقة الحشا والله صحي :)
الناس ماشية باكرام الميت دفنه ...
يعني يموت ليك زول عزيز وما تقدر تودعه أو تلقي عليه نظرة أخيرة
مثلا لو الزول في عطبره أو جده وابوه أو قريبه مات في الخرطوم
قبال ما تصل تلقى الجماعة قاموا بالواجب ودفنوا الجنازة بسرعة
في حين انو يمكن الزمن الذي يفصلك عن الحضور والقاء النظرة الاخيرة ساعتين زمان او ثلاثة
غايتو الخواجات في الحتة دي أحسن مننا كتير ..
يحتفوا بالجنازة زي احتفائهم بالفرح ... بنتظروا كل اقرباء الجنازة من الدرجة الاولى لكي يحضروا
عارفه الحاجة مهمة شديد وممكن تخفف من وقع المصيبة .. اسف للاطالة وآمل مواصلة القصة

رأيك شنو في قصة سرعة دفن الموتى العندنا دي؟

سلامات الأمين بشارة. اخبارك؟
كلامك صحيح 100and#1642;. الناس في السودان بتدفن سريع سريع. خليني احكي ليك قصتين.
القصة الأولي لزولة معرفتنا. كانت مسافرة بالبص ( أظن للأبيض) و معها ابنها في الثانوي. في السكة وقفوا لصلاة العصر في حلة ما. امشي يا المرة موتي. أتخيل دفنوها في حلتها ديك!!! ما وصلوها لزوجها في الأبيض و لا رجعهوها الخرطوم لباقي أهلها. معقولة بس؟ صحيح إكرام الميت دفنه لكن ما بالطريقة دي. :(
القصة التانية لزميلي في الشغل. أمريكي، و ماشاء الله عنده خمسة أطفال ( ايوه، الامركان بيعرسوا بدري و بيولدوا كتير مقارنة بباقي دول العالم الاول). المهم أطفاله كانوا بيجوا معاه المكتب مرات و بنلاقيهم في المناسبات. الكبير منهم و عمره 8 سنوات أتوفي. كل المكتب زعل عليه جداً. بعد يوم او اثنين اترسل إيميل بيقول ح يكون في ( احتفال بحياة وليم) في الكنيسة الفلانية الوقت الفلاني. اسالتا البس شنو؟ قالوا لي البسي هدوم سمحة و ما اسود. ما هدوم الشغل. مشيت. كل الناس ملمومة. أمه، ابوه، اخوانه، جدوده، حبوباته، أعمامه و عماته، خالاته و خيلانه، أصحابه و أهلهم، أصدقاء الاسرة. ابوه أتكلم امام الحضور و حكي عن انه كان بيحب اللمات، و كان ح يكون مبسوط جداً انه الناس دي كلها مجتمعة اليوم. و بكي اثناء الكلام و بكينا معاه. أمه حكت عنه و عن روحه الحلوة و بكت و بكينا. صديقه من المدرسة أتكلم عنه و حكي كم قصة مضحكة و ضحكنا. جده أتكلم. خالته المفضلة. و عمه الصغير اللي كان قريب ليهم جداً. بكينا. في النهاية قالوا لينا شكرًا. و طلعنا. في طريق الخروج لقيت أمه و ابوه بيودعوا في الناس امام الباب. حضنت أمه و قلت ليها
I am sure William is in a better place right now.
حقيقي بعد ما مشيت و سمعتا الناس بتحكي عنه و انا ذاتي حكيت للناس اللي كانوا قاعدين جنبي عنه لما كان بيزور ابوه في المكتب، حقيقي ارتحتا. و ذي ما قالوا. كان احتفال بحياة الطفل وليم.

في مشكلة واحدة في موضوع تأجيل الدفن في السودان. الجو و الكهرباء. السخانة شديدة و ما عندنا ( ثلاجات) مناسبة لحفظ الموتي. و حتي لو كانت في، عدم استقرار الكهرباء ح يعمل مشاكل. ما أظن انه في طريقة الناس تنتظر اكتر من ساعتين او ثلاثة قبل الدفن. و الله اعلم. ممكن لو في طبيب يفتينا في الموضوع ده. أظن برضو ان الفيديو اللي نزله الهادي ح يكون فيه معلومات عن الزمن البياخده الجسم البشري عشان يبدأ يتحلل.

عشان الحجات دي انا قلتا يدفننوني في اقرب مقابر مسلمين. و ربنا يدينا حسن الخاتمة.

يديك العافية يا صدقيي النذير. و شكرًا علي المجاملة اللطيفة. لو ربنا هون بجيكم بهناك. بس ذي ما بقولوا: القلم ليه رافع :)


سلامات الأخ قرحطب.
نعم، الحكومات بتمشي و تجي غيرها. حال الدنيا!


شكرًا عزيزتي ام أياد. تسلمي.
أهو دي الدنيا، بتلاقينا مرات حجات و ناس عجيبة تغيطنا او تغضبنا. بنحاول بنعلم منها حاجة و move on

تصحيح يا جماعة. المموميا اقدم مما كتبتا. ليها خمس الف سنة و تلاتمية سنة يعني 5300 و ليس ثلاثة الف.
قبل سيدنا عيسي و سيدنا موسى* ذاتو( عليها أفضل الصلاة و السلام)
---------
* يا بكري

شكرا أخت اسمارت للسرد الرائع لقصه اوتســي ...
ما عرفو كان يعتنق اي ديانه ؟
سبحان الله الجليد حافظ على جُستو طوال هذة السنيين

بوست جميل جداً يا سمارت.

Quote: عليكي الله يا ذكية البوست ده بعدين وديهو مكتبتك لما يدوكي ليها

Not cool, man
________________________________________

بكرى حلف بصلعته انه- يسمنى- ما ح يعمل لى مكتبة.

Badran Ahmed Ibrahim,
Thanks for the link. very comfy shoes

http://sahalie.blair.com/p/38047.uts?device=candnetwork=gandmatc...-oirsCFSho7AodTUUAgA

سلام يا دفعة :)
بناسبة دينهم الوكت داك الناس ديل كانو بيعبدو "فريجا" .

مرة سمحة شديد بيجرنها كدايس , الهة الحب والحرب , الاثنين سوا !!!!!!!!




لكن لو عاوزة شوية عن دينهم زمانك تلقيهو هنا :

http://en.wikipedia.org/wiki/Norse_religion


واصلى البوست الممتاز شديد ده .

ps The Mahatma Ghandi said" First they ignore you, then they laugh at you, then they fight you, then YOU win> TC

وائل ..........

شكراً سمارت على الموضوع العلمي المفيد والسرد الجميل الممتع الذي لا يُمَل.

وأنا أقرأ كلماتك ،

تخيلت أنه في عام 2456م ، وأثناء زيارة مجموعة من مواطني جمهورية شرق أفريقيا وجمهورية غرب القوقاز لثلوجِ جبال التاكا وجدوا جثمانَ شخص متوسط الطول نحيف البنية يحمل حقيبةً

وبإرسالها إلى المعمل وجدوا أن الحقيبة تحتوي على جواز سفرٍ يحمل اسم "جمهورية السودان" وجهاز آيباد ، قامَ العلماء بإعادة تشغيله ووجدوه يفتح في موقع اسمه سودانيز أون لاين ، .....

ولك أن تتخيلي باقي القصة !


ما هو شعور آوتسي الآن ؟ وهل يرضى بأن ينتهك الاحياء حرمته ويعبثوا به بعد موته بحثاً عن ما في معدته وما في جيناته وما في حياته ؟ وهو الذي قاوم من أجل كرامته حتى مات ؟

ما هو شعورنا نحن إن علمنا أن هذا ربما يكون مستقبلنا بعد تسعة آلاف عام أخرى :)


احترامي وتحياتي لك وللجميع !

سلامات د. وائل. كيف يا دفعة ?
شكرا على الوصلة. و شكرا على حكمة اليوم.
ما اظن فى شيء زيادة ممكن اكتبه فى البوست الان.
نتظر الجماعة ممكن يكتشفوا شنو جديد ان اوتسي



سلامات هاني عربى.
اكيد اوتسي ما ح يكون مبسوط بكل اللى اتعمل فى جثته.
او احتمال يكون بيحب العلم والعلماء و يكون Ok بكل الى حاصل ده.
ذى ما قلت فى مداخلة سابقة انى متبرعة باعضائي كلها فى حالتى موتى و كانت فى حالة تمكن من استعمالها. لكن لما كنت بقرا فى الورقة عشان امضيها و جاء ذكر الجلد, بطنى طمت, و قربتا اغير رايي. ما عارفة ليه الجلد? و ليس العيون او العضام.
فى ناس كتار بيتبرعوا بجثثهم بالمشارح فى كليات الطب عشان الطلبة تتعلم. (اظن) انه منهم انشتاين.

That's it. The end

Quote: That's it. The end

طيب ما انا محظوظ عديل كدا، لقيت البوست سيزون كامل وحضرتو حرف حرف

بالمناسبة المنتديات عملوها عشان بوستات زي دي!

باختصار كدا

رائعة يا إسمارت


أبحرنا في القصة حتى تخيلنا أننا جزءاً منها !

محمد يوسف الزين ....شخصيا!!!!!!!! وينك يا رجل ?
شكرا على الاطراء

عاصم فقيري....Glad that you like it

سلامات يا سمارت
اتوقعت البوست يكون اطول من كده ماعارف لييه!

المهم، عايز اقول انو الصورة التقريبية العملوها ليهو دي انا اظن انها مابتشبه اوتسي حسب صورة الجثة بتاعتو
واضح في صورة الجثة ملامح متوحشة كده وفيهو ملامح افريقية برضو
الزول الجابو صورتو ده مزارع ساي، مسكين ياخي ماممكن كلو كلو يكون ده اوتسي!!
حا احس بي خزلان شديد لو طلعت الصورة دي قريبة من اوتسي ههههههه

تحياتي وشكرا مرة تانية للبوست اللطيف

الليلة سناء خالد لكزتني، حنيت ليكم كلكم.. ولاني بخاف من الفيسبوك، قلت أجي اشمشم بي جاي.... اول هام مشتاقين... تاني هام، بوست ظريف جداً... تالت هام، بتك دي احكي ليها قصة زيادة منّي الليلة....

سلامات يا خالد عبدالوهاب....
فى كم تصور لشكل اوتسي. لكن اظن ان العلماء قالوا انه ده الاقرب لى شكله.
القصة فيها تفاصيل كتيرة عن الDNA و الناس اللى عندهم DNA قريب منه فى الدنيا الان. فى تفاصيل برضو عن استخراجه من الثلج تم كيف. لكن العلماء لسه شغالين. و لو فى اى وقت ظهرت معلومة جديدة ما ح اقصر معاكم.



مريوم....والله مشتاقين مشتاقين مشتاقين.كيفك?
الحمد لله البوست عجبك.
بنتى دى الا تجى تحكى ليها انت. الايام دى بقت تعرف تعد من 1 ل 10 بالعربى و بالانجليزى. اها انا اضانى اتقرقرت. لانها ما بتعد براها كده, لازم زول يسمع و يصفق لما تقول ليك :
عشراااااة, يااااى.
او
Ten, yaaay

___________________

سلامات يا سمارت ويامريم

عاملين شنو مع الرياضة والوزن والكروووش ؟
انا رجعت كيلوهاتي الفقدتها زمان (جت) وزدت من فوقها كيل بعير :)

ياسمارت العلماء ديل عايزين يصدمونا في اوتسي قريبنا ساكت!الزول ده افريقي مافي شك
لو في زول حريف يجيب صورة الجثة الظاهر فيها الوش جمب صورة الشكل التقريبي العملوهو العلماء عشان نقارن كويس

تحياتي

شوف يا ابو الخلد يا ابنى.....
النمسا و ايطاليا عملو مساحة لحدودهم من الاول عشان يعرفوا الزول ده واقع وين.
ده غير انه فى اكتر من زول متسلبط و قال انه لقى الجثة (او الموميا) قبل الباقين.
ده كلو كو و "لعنة اوتسي" كوم تانى. يقال بانه اوتسي عنده لعنة ذى لعنة الفراعنة. حيث انه 7 انفار ليهم دخل باكتشافه او دراسة الجثته او الادوات اللى اتلقت معاه ماتوا. و ما ماتو بس كده. ماتوا موت بشع فى حوادث بشعة.
عشان كده خلينا بعيدين احسن. اوتسي خواجة ابن خواجة.


بالهنا ....الكيلوهات اللى ذدتها.
انا حقيقي بقى ما عندى وقت اتريض. و لا حتى اكل. عشان كده ضعفتا شقاوة ساى كده و الحمد لله.