قوم ياراجل جيب لينا عدس !!!! ومعاها { نهرة } كمان !!!

ورغم أنني متأكد تماما وبما لايدع مجالا للشك أنني أحضرت هذا العدس
اتيت به مع كل الأشياء المطلوبة ودفعت ثمنه
مرات كده هناك اشياء تجعلك في شك
بل تجعلك تترنح وكأنك شارب ليك صفيحة مريسة وقزازتين من النوع ابوجمل !!!!
قلت يا ابوهشام ممكن تكون نسيت العدس في الدكان
ويمكن مع مشاغل الدنيا الكثيرة لم تتذكر هذا العدس اطلاقاً
ويشهد الله ان مازاد يقيني انني بحثت البيت كله
دار دار
وزنقة زنقة
ولم أجد هذا المخلوق
ولكن أثناء بحثي وجدت ورقة ملقاة على الأرض ومكتوب عليها :
طريقة سهلة سيدتي الفضلى لتقشير الوجه
واعطائه نضارة وبياض أحلى
والطريقة كالآتي :
{1} كاس ماء فاتر
{2} نصف كوب حليب
{3} نصف كيلو عدس !!!!!
{4} تمزجي الماء والحليب وتضعيهن في النار
{5} تغسلي العدس جيدا ومن ثم تضعيه على المزيج
{6} تتركيه لمدة نصف ساعة
{7} ثتركي الخلطة لتبرد لمدة 10 دقائق ثم تضعيها قناع على الوجه

ومن بعد هذه الوصفة قوم يا ابوحراز أجري بسرعة الى السوق مرة أخرى لشراء العدس
أخيرا عرفتو عدسنا مشى وين ؟؟؟

قال عدس الوابل قال !!!!

حبيبنا ابو حراز بركة العودة وإن شاء الله تطول
بس أحمد الله إنو الموضوع بقى في العدس الرخيص نوعا ما
المرة الجاية تسليم ومعاهو توقيع وإلا حتشتري مرتين

سلام أبو حراز

كلو من قناة بداية وقناة المصارع


ياخ الشطة الخضراء والجرجير قالوا بتصلح الشعر

الواحد عادي أثناء ما بيأكل يدخل يدو في شعر المره ويجاذف ليهو صفقة جرجير وقرن شطة خضراء

سلام مربع أخي حمد عبد الغفار

Quote: سلام أبو حراز كلو من قناة بداية وقناة المصارع ياخ الشطة الخضراء والجرجير قالوا بتصلح الشعر الواحد عادي أثناء ما بيأكل يدخل يدو في شعر المره ويجاذف ليهو صفقة جرجير وقرن شطة خضرا

انت عارف مرات كده الواحد بتعاور ويقول انو معجب بنسرين سوركتي ونسرين النمر
وهذا سيكون وبالا عليه اكثر من عدس الوابل نفسو
ومرات بالصدفة تحول الريموت قدام المدام
وفجأة وبدون اي قصد تشوف مذيعاتك
وما هي لحظات حتى يتم خطف الريموت
وبقدرة قادر تلقى نفسك وجها لوجه في قناة توم آند جري
هذا ان لم ي تذهب بك اللعنة الى طيور الجنة !!!

أخي محارب البورد القديم ترهاقا 00 تحية من الأعماق

Quote: حبيبنا ابو حراز بركة العودة وإن شاء الله تطول بس أحمد الله إنو الموضوع بقى في العدس الرخيص نوعا ما المرة الجاية تسليم ومعاهو توقيع وإلا حتشتري مرتين

عدنا بعد غياب طويل
ولم نجد الكثيرين من المحاربين القدامى
اقلام شاخت
واقلام انزوت
وأخرى مليئة بالدماء الحارة

ونحن عدنا اليكم وبقينا نسمع الكلام
جيب عدس يعني جيب عدس
الله يستر من الأيام القادمات

يا ما معقول
أخوي أبوحراز عاود نشاطه بعد طول غياب
وينك ياظريف افتقدت كتاباتك الرائعة الساخرة
كيف أخبارك واخبار ست النفر
يا حليل العدس شقيق الفول
الإتنين يا كافي البلاء صارا غاليين وليس في المستطاع شرائهما
ما عارف أهلناالمساكين تاني ياكلوا شنو؟
قال السودان سلة الغذاء العالمي وأهله ما قادرين ياكلوا الفول والعدس وكيلو الطماطم بـ 25 جنيه
يا خي خليك معانا وما طول الغياب
تحياتي وأشواقي الكثيرة

مرحبتين حبابك واليوم السعيد الليله جابك

اتمني ان تكون عوده بلا انقطاع اخى محمد عثمان

ودي وتقديرى


.
.
.
.
.

قلت لي عدس الوابل نزل وبالا عليك؟!

يا سلااااااام على سلامة العودة
بعودتك نقدر نكدب شلابي الذاكرة

الرائع حد الوهج 00 ود البوش

Quote: يا سلااااااام على سلامة العودة بعودتك نقدر نكدب شلابي الذاكرة

أعجبتني جدا عبارة شلابي الذاكرة
وارجعتني عشرات السنين للوراء
حينما كانت تتخضب ارجلنا الصغيرة بطمي الجزيرة الرائع
وكنا نجري وسط هذه الشلابي وكأننا نجري بين ممرات الريفيرا
ويالها من لحظة ممتعة وشيقة حينما ننتهي من كديب الشلابي ونقع { جمبلغ } في الترعة المجاورة
نقع كما خلقنا الله ونحن أطفال من الجنسين وبقلوب بيضاء مغسولة بالحليب ومجففة بضوء القمر !!
ومن ثم نخرج بعد كل هذه التعة
لاملاريا
ولابلهارسيا
ولاتايفويد
ولا حتى احتفالات ميلاد !!
ولا ادري هل كنا لحظتها متاصالحون مع انفسنا
أم أن الطبيعة متصالحة معنا ؟؟؟

شكرا لك وانت تحرضني على هذه الذكريات والتداعيات المعتقة
وسعيد انا بان تكون احد المعجبين بكتاباتي
وفي نفس الوقت كم يحز في نفسي ان يكون كل المعجبون بكتاباتي من الرجااااااااااااااااااااااال !!!!


هجمة مرتدة
ناس المنشية والرياض والعمارات وكافوري لايعرفون شلابي الذاكرة
يوم كده حاتخنقوا ليكم حنكوش بعباراتكم الخشنة دي

قال { جمبلغ } قال !!!!!

أخي محمد الأمين موسى 00 تحية دسمة جداً

Quote: قلت لي عدس الوابل نزل وبالا عليك؟

مالو ردك صغير كده زي أبو الشهيق !!!!!

ياخي انا بمزح شكرا لحضورك الكبير

أخي بشير 00 تحية وتقدير

Quote: مرحبتين حبابك واليوم السعيد الليله جابك اتمني ان تكون عوده بلا انقطاع اخى محمد عثمان ودي وتقديرى . . . . .

كيف أخبارك 00 واخبار صالحة معاك
انا انقطع فعلا عن النت عند سفري للسودان
هناك المشاغل كثيرة
ومن النادر ان تجد متسعا لتصفح النت
تبقى مشاكلك في توفير قفة الملاح
والتي تركناها لاتكلف اكثر من عشرين الف
هسي القفة الفاضية ب 40 الف

أخي اسحق
تحياتي وتقديري بعد غياب طويل

Quote: يا ما معقول أخوي أبوحراز عاود نشاطه بعد طول غياب وينك ياظريف افتقدت كتاباتك الرائعة الساخرة كيف أخبارك واخبار ست النفر يا حليل العدس شقيق الفول الإتنين يا كافي البلاء صارا غاليين وليس في المستطاع شرائهما ما عارف أهلناالمساكين تاني ياكلوا شنو؟ قال السودان سلة الغذاء العالمي وأهله ما قادرين ياكلوا الفول والعدس وكيلو الطماطم بـ 25 جنيه يا خي خليك معانا وما طول الغياب تحياتي وأشواقي الكثيرة

تمام 00 وست النفر بخير ولازالت الغيرة تلتهب وكأنني توم كروز
ولازلت أحظى بالسلام على الخالات فقط لاغير !!!
بينما لانرى ناس الأهلية وفير آند لفلي 00 وحتى ناس عدس الوابل
هؤلاء تسمع وقع اقدامهم !!!!

أتيت ومررت بفداسي في الكثير من المرات
كانت تتلحف بالغمام
ويتلوى النهر على خصرها في صورة جمالية رائعة جدا
يا أخي ما أجمل هذه القرى حينما تغازل انهارها !!!!

حروزة الجميل

وييينك؟؟

انت في الطائف اصلو والا في في سقط لقط


يعني العدس ما للغدى يا حروزة؟؟

قول للمرة نص كيلو لراسك ونص لغدانا شان قرجة جايينا

زبط الشطوت والسلطات خلينا نطير بعدسك ده

سلام للزوار والعابرين

تحياتي أخي قرجة

Quote: حروزة الجميل وييينك؟؟ انت في الطائف اصلو والا في في سقط لقط يعني العدس ما للغدى يا حروزة؟؟ قول للمرة نص كيلو لراسك ونص لغدانا شان قرجة جايينا زبط الشطوت والسلطات خلينا نطير بعدسك ده سلام للزوار والعابرين

القرجة اخبارها شنو ؟؟ الا زلت ترفع القرجة
أم اصبحوا يرفعونها أمامك

انت عارف قبل الاغتراب كان اي شافع يقل ادبه في فريقنا اقوم امحطو ليك عشرة سيطان زي السم
والله مما يقولوا للشفع عثمان جاء يدخلوا بيوتهم زي السواسيو
هسي رجعنا السودان تقول للشافع ود اختك قوم جيب موية
عليك امان الله يحمر فيك ويخليك عطشان يومين بدون موية

ومرات تسمعهم يقطعوا فيك 00 ياخ الحاج دا مالوا كلامو كتير
قال شطوط قال
والله ست النفر تطورت وبقت تقرا سودانيز اون لاين
وتاني والله الا نكتب ليكم عن قطع الغيار وأدوات السباكة


الأسكودا بعناها في مزاد علني !!!

لكل القراء الذين مروا من هنا
ونثروا بقعاً من الضوء بقراءتهم لهذا البوست المتواضع
تحية لهم من يمين القلب الى شماله
طبعاً ها البوست انا اسميه { البوست الضكر } فكل الماركين فيه من الرجال
وكم يؤسف ان يكون كل القراء برضو من الرجال
تحية لكم 00
تحية لكل القراء من سودانيز اون لاين
ومن خارج سودانيز
كلماتنا تظل جافة وبلا معنى ان لم تجد قرا امثالكم

Quote: كلماتنا تظل جافة وبلا معنى ان لم تجد قرا امثالكم

تعال هنا جاري وين برا يا حمامة مع السلامة برا الرتينة بقت
لسع ما زال الحفل طفلا يحبو هههههههههه
.
ما دام انت في السودان كلمنا يا ابوحراز عن يوميات المغترب اثناء الاجازة
هل ما زال منخلعا ام لسع ما خل الضحكة العالية ديك بسبب وبرا سبب
ياخي ونس شوية
.
.
عليك الله اخر مرة لعبت الضقل متين
قال ضكر قال

تحياتي للجميع
تغيب عن بوستك يومين تجي تلقى الجماعة كشحوا ليك عدسك في الصقيعة
والصفحة الأولى كلها وزراء خشنين
ووزيرات ناعمات !!!
تقول ناس سودانيز اون لاين رايح ليهم وزير

أخي ود البوش 00 تحية

Quote: تعال هنا جاري وين برا يا حمامة مع السلامة برا الرتينة بقت لسع ما زال الحفل طفلا يحبو هههههههههه . ما دام انت في السودان كلمنا يا ابوحراز عن يوميات المغترب اثناء الاجازة هل ما زال منخلعا ام لسع ما خل الضحكة العالية ديك بسبب وبرا سبب ياخي ونس شوية . . عليك الله اخر مرة لعبت الضقل متين قال ضكر قال

تعرف قعدنا في السودان شهرين 00 كانت من اجمل وامتع الأوقات
النسوان ياكافي البلاء ما يتركنك تستمتع باجازتك
تطول هنا في الغربة تقعد تكورك ياراجل تعال ياراجل تعال
اها تمشي تبقى ليك في رقبتك
وتبدأ كل يوم تسالك ياراجل انت راجع متين
وهذا كله بسبب انو الواحد مرات بتعاور وبقول البت دي سمحة والبنية دي نجيضة
وهاك ياشكلة لي رب السماء
سالتني مرة يازول انت الناقصك شنو عشان كل يوم تقول عاوز اعرس والبت دي فلانة وي علانة
وعمك فعلا ماعنده اي سبب
وحاولت اشوف لي سبب غريب جدا
وقمت قلت ليها والله انا لمن عرستك { ماشالوني الجماعة على أكتــــــــــــافــهـــــم يوم العرس }
الزولة امت صارة وشها وقالت لي انتظر بوريك
وانا ماعرفت بوريك دي معناها شنو
المهم بعد اسبوع من هذا التهديد والوعيد مشينا حضرنا حفلة زواج قريبها
والله انا لا حس ولا خبر
فجاة اشوف ليك اربعة رجال عتاولة من اقاربها يحملوني على أكتــــــــــــافــهـــــم في هذه الحفلة
وبدأوا يجوبون بي على الحضور وسط ذهول السيد العريس وضيوفه
اقسم بالله نزلوني ونفسي مقطوع

قال ماشالوني في العرس قال !!!