ترا أبو فهد قال عندهم شغالة سودانية ... يازينها ...!!!

هكذا ستكون أحاديثهم وونساتهم في استراحاتهم عما قريب

وأبو فهد الذي يتكوم عند مدفأته يحتسي الشاي مع رفاقه ويدخن المارلبورو،
يوصيهم بالتقديم على ( شغالة، خدامة ) سودانية..
فهي أزين ... وأنظف.. وأكثر طاعة ... وأرخص سعرا

وأم فهد تبشر صويحباتها بالواتساب ... بأن السودانية وصلت واستقبلناها الاسبوع الماضي
في المطار.. والحين شغالة ما تشتكي

وأم فهد - التي هربت منها عشرات الشغالات - تحتمي أخيرا بالسودانيات
بعد أن رفضت الفلبين إرسال عمالتها المنزلية للسعودية لرفضهم الاتفاق الجديد

والاتفاق الجديد .. به ساعات عمل محددة وإجازة اسبوعية ومخطط للمنزل
وكم عدد افراده .. واعمارهم ... ومساحة المنزل في حد ذاته ...

ام فهد سعيدة الآن

وعندما كان البداح مسئول الاستقدام بالغرفة التجارية يتحدث عن اتفاقات
قريبة ستوقع مع بعض الدول العربية ... كان يعني ما يقول

وأبو فهد هذا كان لا ينظر إلينا في وقت مضى
ويطلب منا أن - نشوف - ليهو محاسب أو مهندس أو محامي أو مترجم سوداني

الآن ممكن يتصل ويقول : شوفوا لينا شغالة ( كويسة )

وممكن عادي يحدد من أي منطقة


عجبي

الذين ينكرون وجود شغالات سودانيات في السعودية ،

عليهم بالواتساب ، فالصورة الحايمة الأيامات دي لإقامة نظامية ل ( مديرة منزلية)
لا تخطئها العين .. الإقامة مجددة حتى 1437 هجرية ...

اجتهد جهاز شئون العاملين بالخارج ووصل لاتفاق ( بتعديل المسمى )
وهذا في حد ذاته انجاز .. مش الانجازات برضك بتقاس بالشكل دا

الله المستعان

الشغل ليس عيبا ..هناك اسر فقيرة جدا وتحتاج الي المال حتي لاتنجرف الي مزالق اخري ..لايكفي ان تجلس في برجك العاجي وتعظ الناس
ويدك في موية باردة ...السودانين اطباء ومهنيون ياتون الي السعودية كرعاة اغنام ..فلماذا لا تسال عن السبب الذي يدفعهم الي ذلك ..

سلام يا عبدالعزيز ...
و المشكلة شنو في إنو السودانيات يشتغلو خدامات ؟! و بتين الشغل الشريف كان منقصة ؟!
الخدامات الانت مستعر منهم ديل بكونو فاتحين بيوت في السودان... ساترين ناس و معلمين ناس و معالجين ناس في بلد سلام الله بقى بقروش !!
المؤلم في موضوعك ده إنو كل الهاميك نظرة السعوديين ليكم !!

أبدا يا أمين

دا مش الموضوع
الموضوع أنك ما عارف كيف تعامل الشغالة في السعودية
أنت ما عارف الضنك العايشات فيهو
انت ما عارف العمل ل 20 ساعة
إنت ما عارف يا امين ليه الفلبين والهند رفضت إرسال شغالات

لا تهمنا نظرتهم لنا ...

اخونا محمد ابراهيم

اصلو الشغل ما عيب ...
لكن ماذا قدمت الدولة لهم .. ما هي الاتفاقيات التي ابرمت؟
ما هي المرتبات؟ ماهي الضمانات للتعاقدات..
ما في زول عارف حاجة ..

من أراد أن يعمل فهو حر ...
على الدولة أن تحمى عمالتها ..

في دول كالخليج ... يجب أن تحتاط لعمالتك ..

Quote: دا مش الموضوع الموضوع أنك ما عارف كيف تعامل الشغالة في السعودية أنت ما عارف الضنك العايشات فيهو انت ما عارف العمل ل 20 ساعة إنت ما عارف يا امين ليه الفلبين والهند رفضت إرسال شغالات

هل نحن شعب افضل من شعب (اثيوبيا) وشعب (ارتيريا) ؟ .
على الطلاق بالتلاتة نحنا اكعب منهم بدرجات , بس عاين للخطوط الجوية الاثيوبية تهز وترز فى مطارات العالم , شوف فى العاب القوى الاثيوبيات ديل فى رياضة الجرى بمسافته المختلفة بيعملن فى انجازات عالمية مذهلة , وهسع ماشاء الله عليهم بيعملوا فى حاجة اسمها سد النهضة ده حـ يكون انجاز القرن الواحد وعشرين على مستوى بلدهم , وكارثة كبرى على مستوى بلدنا .
عادى زى الترتيب معظم البيوت السودانية فيها خادمات اثيوبيات , رغم انهم شعب حضارة وتاريخ ولهم فى حماية المسلمين الاوائل صفحات وصفحات .
دى هى الراسمالية يا أستاذ عبد العزيز , عرض وطلب , سوق العمل الداخلى والخارجى محتاج شنو , انا بخطط لسوق العمل ده , ما فى اى عيب , على الاطلاق , يعنى بدل ما تقوم الواحدة تدرس زراعة وتعمل فيها ماجستير ودكتوراه وبعدين تقعد فى البيت لا شغل لا مشغلة احسن تدرس حاجة فيها فايدة , معهد طباخة , كورسات فى التدبير المنزلى , خياطة الخ .
السودانيين ديل عـنظزة بدون اى مقومات للعنـظزة , زمان كان شغل الممرضة عيب , واى ممرضة انسانة مشبوهة فى اخلاقها , زمان كان شغل المضيفة الجوية عيب , والمضيفة انسانة مشبوهة فى اخلاقها , كانت الفنانة مشبوهة فى اخلاقها , التطور الراسمالى المحدود كسر نخرة هذه العنـظزة , وبقى التمريض دراسة جامعية او معهد على الاقل , الضيافة الجوية بقت فيها شروط اجادة اللغة الاجنبية , وكذلك الفن بقى موهبة واحيان كتيرة ودراسة .
فى بنات محتاجات لشغل ان تكون خادمة فى منزل , دى عمالة سودانية متاحة ومفروض تفتح ليها سوق العمل مش تقفل فى وشها الباب لصالح العمالة الاثيوبية والارترية والفلبينية , وفى النهاية ديل يجرن الشارع .
العمالة المنزلية ليست عيباً , لازم نفهم كده كويس جداً , ده عمل شريف , واحنا ما احسن من (الفلبين) , والسودانيات ما عندهم اخلاق وكرامة وشرف اكتر من الفلبينيات .
اها يا أستاذ عبد العزيز عايزنا نبقى فى احنا واحنا وثوابتنا السودانية , تعال شوف الحاصل هنا فى الخرطوم , تعال شوف الانحراف وجر الشارع عشان سندوتش .
انا مع عمل الفتاة السودانية فى مجال الاعمال المنزلية , هنا فى بلدها او فى الخليج او فى الدول الغربية .
حاجة (زينب) الزولة البتغسل هدوم بيتنا كل يوم ثلاثاء , انسانة سودانية اصيلة , بتربى فى اولاد وبنات زى الورد , اها حاجة (زينب) دى لو قلنا ليها الكلام ده عيب وانتى سودانية بت قبايل , طيب تشتغل شنو ؟ .

أعرف بعض السودانيين هنا عندم يصعب عليهم إستقدام

زوجاتهم بالطرق النظامية يلجأ لإستقدامها بمهنة

مدبرة منزلية / خياطة / .... الخ

ومن ثم يقوم بنقل كفالتها عليه ... لذلك لا أعتقد أن موضوع إستقدام شغالات من السودان

يحمل صدقية أو جدية في تنفيذه .

بالنسبة لعمل السودانيات كخادمات لا إعتراض على ذلك فالعمل ليس عيباً وهن يعملن الآن

وتشهد العديد من البيوت في السودان ... ولكن الإعتراض على عملهن في الخارج من واقع مشاهدتنا

ومعايشتنا لواقع عمل الخادمات في الخليج عموماً ... فالإعتراض لا على العمل في حد ذاته ولكن على

العمل في الخارج .

الشغل ما عيب

لكن وظيفه شغاله ولا خادمة فى السعودية ... مشاكلها كتيرة .. والناس كلها عارفه
طريقة تعامل السعودييين مع الشغالات
وضعف القوانييييييييييين وووووووووووووووووووو

فالحكاية مع نظرة السعودييين ولا انو الشغل عيب

الحاجه التانية .. معليش يا حبيب وين الخبر منشور ومن القالوا

لانو قبل اسبوع فى لقاء مع مسؤل الاستقدام فى وزارة العمل قال مافى اى استقدام من الدول العربية لشغالات

واضح من طرح الموضوع من اول بوست ان المشكلة في نظرة السعوديين لنا .... اذا استطعت ان تتجاوز هذا الحاجز فهو شئ جيد وببساطة يمكنك الاعتراف
بذلك اما الاحتماء بانك تخاف علي الشغالة من التعامل فهذا يرجع الي تربيتها وشخصيتها و بالعكس فالمراة السودانية تستطيع اضافة الكثير للبيت السعودي
وتربية الابناء باخلاص بالاضافة الي عامل اللغة ..الاطفال السعوديين ينظرون الي الخادمة بنظرة دونية لان امهم او ابيهم يعامل الخادمة بدونية ..حاجز اللغة
والشخصية يكسر هذة النظرة الدونية وربما يغيير ها خاصة اذا حدث تقارب بين الابناء والشغالة .... قابلت قبل فترة سعوديا شابا قابلني باحترام وغني لي
اغاني سودانية صعبة ولما راي دهشتي قال لي لقد رباني سوداني كان يعمل سائقا لدينا وماتزال العائلة تتمسك بة رغم سنة الطاعن ...

Quote: لانو قبل اسبوع فى لقاء مع مسؤل الاستقدام فى وزارة العمل قال مافى اى استقدام من الدول العربية لشغالات

اتمنى ذلك
ولكن المغرب لا تزال ترفد سوق العمل بالعاملات المنزليات

خلونا نشوف اشتراطات الفلبين ، وما قاله بعض الكتاب السعوديون

هنا

Quote: أعرف بعض السودانيين هنا عندم يصعب عليهم إستقدام زوجاتهم بالطرق النظامية يلجأ لإستقدامها بمهنة مدبرة منزلية / خياطة / .... الخ ومن ثم يقوم بنقل كفالتها عليه ... لذلك لا أعتقد أن موضوع إستقدام شغالات من السودان يحمل صدقية أو جدية في تنفيذه .

أتمنى أن يكون ذلك صحيحاً ، وصورة الإقامة الحايمة دي لأحدى هذه الحالات

تحياتي

تحية طيبة

زي ما قال الاعزاء الشغل ما عيب

وفي طبيبات ومهندسات ومعلمات في المملكة

المشكلة في تعامل السعودي في البيت مثلاً

مش هو نفس السعودي الذي يزامل الطبيبة او المهندسة

وبعدين

مش السودانية قاعدة تعمل بهذه المهنة في بلدها وعند الاسر السودانية

ونفس العيب الفي السعودي موجود في السوداني

وتستطيع هي أن تحافظ على حقوقها

والحوجة سيفها سنين كما غنى السقيد

والتحية

لست الشاي وست الكسرة ومربية الاطفال والطباخة

وللمراة العاملة على وجه الخصوص والمراة السودانية بصفة عامة


تحياتي

Quote: حاجة (زينب) الزولة البتغسل هدوم بيتنا كل يوم ثلاثاء , انسانة سودانية اصيلة , بتربى فى اولاد وبنات زى الورد , اها حاجة (زينب) دى لو قلنا ليها الكلام ده عيب وانتى سودانية بت قبايل , طيب تشتغل شنو ؟ .

شكرا شاهين
والتحية عبرك لحاجة ( زينب).. ولكل من يعمل بشرف .. والشغل أبدا ما عيب والله
ولو أنت ما عاملتها كويس ما كانت قعدت معاك الزمن دا كلو..

ولا نزال نقول أن الغرض من البوست هو حفظ الحقوق ,, ليس إلا

الذين يعشون في الرياض، يعلمون أن هنالك إدارة كاملة متكاملة ومقرات
للعاملات والخادمات الهاربات من كفلائهم
يا ربي كلهم سيئات

ابدا ...

شعورهن بالغبن هو من اجبرهن على الفرار والاحتماء بالدولة

Quote: وتستطيع هي أن تحافظ على حقوقها

اخونا الجنيد .. تحياتي

صعب والله،
من يحكم ساعات العمل اليومية والراحة الاسبوعية، وعدم الحسم من المرتبات
؟؟

من يؤيدون استقدام شغالات من السودان

لا يفهمون طبيعة العمل بالمملكة بهذه المهنة تحديدا

و يمكن ان نتسأل لماذا تمنع دولة مثل مصر فتح مثل هذه الوظائف

ونحن نعلم مدى الانفتاح المصري وكذلك الحوجة لديهم

ولماذا منعت الفلبين و الهند وبعض الدول الاسيوية عمالتها

اذا استبان الامر يمكن الحكم

Quote: واضح من طرح الموضوع من اول بوست ان المشكلة في نظرة السعوديين لنا .... اذا استطعت ان تتجاوز هذا الحاجز فهو شئ جيد وببساطة يمكنك الاعتراف

تحياتي اخونا محمد ابراهيم
ابدا.. البوست هو لحفظ الحقوق. ولم أتحدث عن نظرة السعوديين لنا
الشركة التي اعمل بها تربطني بها عقد عمل .. ليس إلا
من يجاورني في السكن .. تربطني به حقوق الجيرة .. ليس إلا ..

لا نبحث عن نظرتهم أو عدمها ...

لأننا وبكل بساطة نعلم أنهم - كسعوديين - فيما بعضهم لديهم تجاوزات اجتماعية وغيرها
وكل لا يعترف بالأخر ...

لذا خلينا في حدود عقد عملنا والسلام

تحياتي مجددا

اي زول بقول شغل المرأة السودانية ما عيب عليه ان يعيد النظر في امور كثيرة تخصه
كيف نقبل ان تسافر حرائرنا للعمل خارج الوطن للعمل كخادمة يهينها الصغير قبل الكبير
ان تعمل داخل وطنها فهو خير لها حيث يحترمها مستخدمها ويحن عليها
العمل في الخليج للخادمات ناااار لا تعلمونه انتم يا من تنظرون بأن العمل حلال وليس عيب
فليقس كل منكم ان من ستأتي للعمل في الخليج هي امه او اخته او زوجته فهل سيقبل هو بذلك

في السودان يعشن بكرامة حتى لو كن فقيرات

Quote: أعرف بعض السودانيين هنا عندم يصعب عليهم إستقدام زوجاتهم بالطرق النظامية يلجأ لإستقدامها بمهنة مدبرة منزلية / خياطة / .... الخ

تحياتي وسلامي
موجود بالمملكه منذ عشرين سنة عمل المراة ماعيب بس اختو لينا السعودية ايو بكان تاني فرو وشتتو السعودية نهييييييييي زندقيييييييييييييييي والاستثناء ده لي اسباب معروفه لي ايو زول

الى الذين قالون ويقولون (الشغل ليس عيبا ..هناك اسر فقيرة جدا وتحتاج الي المال حتي لاتنجرف الي مزالق اخري ..لايكفي ان تجلس في برجك العاجي وتعظ الناس
ويدك في موية باردة ...السودانين اطباء ومهنيون ياتون الي السعودية كرعاة اغنام ..فلماذا لا تسال عن السبب الذي يدفعهم الي ذلك ..)
عليهم وبدل ان يضعو ذهنهم في الثلاجة عليهم بالسؤال لماذ رفضت وترفض دول رائدة في تصدير الخادمات الى كل دول العالم لماذا امتنعت هذه الدول ارسال مواطنيها كخدم لبعض الدول .
الانقاذ على استعداد لبيع الشعب السوداني مقابل اسمتراراهم في الحكم والتحكم في مصادر سرقة اموالنا وعرابهم الانتهازي كرار لن يتواني لحظة في في تسويق حرائرنا كخدم بيوت للعروب
لماذا كنا نتمنع ارسال السودانيات كخادمات للعروب ولماذ يبرر هولاء هذا الفعل الان بل ويشرعون في اتخاذ الخطوات اللازمة لترحيل بناتنا للدول العمل كخدمات
عليه وعلى الجميع ان يدركو مالات ان تعمل اي فتاة في وظيفة خادمة منزلية مستحصبين تجارب الاخرين الرواد مع الخليج في استخدام مواطنيها للعمل كخدمات منازل
لا احد يرفض عمل الفتاة في اي عمل شريف لكن ان تفتح حكومة السودان الباب لاستخدام بناتتنا واخواتنا كخادمات في الخليج فلا والف ولا
حري بنا ان نطالب اهل المشروع الحضاري بتوفير الحياة الكريمة لحرائرنا في الداخل وكذلك لنا حتى لايخرجن ونعود معززين مكرمين الى اوطاننا لا ان نبرر للصوص
القتلة تجارتهم حتى في الانسان السوداني .
على العموم ليس بغريب على الانقاذ ومن والهم من اللصوص والمؤلفة قلوبهم ان يبررو هذا بل وسيضعون هذا في سفر انجازات المشورع الحضاري مثلها مثل الاتصالات
واختفاء الصفوف وتوفير كل السلع بغض النظر عن ثمنها و وفرية ثورة التعليم والسلام

السودانيات لهن الحرية الكاملة في اختيار نوع عملهن حسب مؤهلاتهن ، خلوهن يجربن كان ما عجبهم الشغل يجوا راجعات

وكانما السودانيات لا يعملن خادمات !!!
هسع وكت ما حا يشتغلن في بيوتكم بقى شغل السودانيات عييييب !!!

اغلب المتداخلين هنا ، ستجد انه كانت لهم ( خدامة ) في وقت من الاوقات تقش الحوش وتغسل العدة وتغسل الهدوم وتاكل فضلات الاكل ... الخ

الخدمات السودانيات شغالات في بيوتكم انتم السودانيين من زمن بعيد .. ما شفنا زول فيكم فتح خشمو وقال يا بغم


المتوقع يعملوا ابو فعهد : اغلبكم عملوه

معلوم للجميع ان هنالك قبائل سودانية اعوزتها الحاجة فامتهنت الخدمة في بيوت قبائل سودانية اخرى قسرا بسبب الضنك
وملوم للجميع انو بدوهم ملاليم قصاد الشغل المضني ده

الان كان اشتغلن في السعودية سيكون المقابل افضل من الذي تعطوهن اياه

الان الشغل في البيوت اصبح عيب !!!
عشان البيوت الحا يشتغلن فيها ما بيوتكم ؟

يشتغلن في السعودية خدامات ، لانو الشغل ده ما جديد على السودانيات ، قاعدين يشتغلنه في السودان مع اسر سودانية ..

هسع شن الجدَّ ... المرتبة ولا كيس المخدة ؟!

الشايف انو شغل السودانيات عيب
يبدا من بيتو .. من حلتو .. من حارتو ثم مدينو

حتين بعد داك شوفوا السعودية

الصادق صديق
أيمن محمود ابو المهاب
حامد بدري
علاء صلا
محمد علي عثمان
وليد محمد المبارك

شكرا كثيرا على المداخلات المهمة

نتفق أن العمل ليس عيباً. ... ما يدور في الأوساط السعودية هو فتح الباب للشغالات السودانية
لم تنف الحكومة أو السفارة هذا الشيء .. وهذا أضعف الإيمان

هل وافقت حكومتنا؟؟؟ هل وضعت شروط كما تفعل الدول

ولا الحكاية بس تأشيرة ورسوم وضرائب ..

دا المحور الأهم ...

نعم ونعم
ثم
نعم ونعم
للسماح للسودانيات للعمل كشغالات في المملكة

وسؤال بسيط للمقيم هنا:
هل يعاملك السعودي اياً كان، صاحب عمل، مدير، زميل، جار
هل يعاملك مثل تعامله لبقية الجنسيات؟
انت وانا نعلم ان الاجابة هي لا
ولو سألنا: لماذا؟
لاننا نحنا والناس السبقونا ثبتوا طريقة معاملة محددة مقبولة لنا
وخط احمر لا يمكن لاجعص سعودي ان يتجاوزه

وبنفس المنطق والطريقة، اخواتنا الشغالات ح يقدروا يثبتوا طرق تعاملهم ويفرضوها عليهم
ده يا جماعة الخير باب رزق كبير
ح ينقذ الاف الاسر ويصلح اوضاعهم ويختصر ليهم زمن طويييل
استفادت منه جنسيات افريقية كتيرة

كانت معانا شغالة صومالية
طالبة جامعية
مثقفة مهذبة ومتدينة
تشتغل وتدرس
محددة برنامجها بكل وضوح
تلم قروش وتهاجر
وهسه هي في امريكا

حسب علمي الى هذا اليوم لم تتم الموافقة على السماح للسودانيات للعمل كشغالات في المملكة
واعلم ان الموضوع فتح للنقاش منذ وقت ليس بالقريب من قبل الجهات المعنية بالبلدين
وليس له علاقة بالعمالة الاثيوبية
واظن ما يعوقه هو نفس ما اعاق العمالة الفلبينية

Quote: و يمكن ان نتسأل لماذا تمنع دولة مثل مصر فتح مثل هذه الوظائف

ليست مصر وحدها
ولكن جميع جمهوريات السوفيت السابقة من كازخستان وازبكستان
فضلا عن الدول الأفقر منا ... وهي افغانستان وباكستان

لقد علموا ذلك إما مبكرا أو لاحقاً وتفادوهو

واهلنا قالوا .. الجرب المجرب .. مالو ؟؟

نستأذن الأخت مريم الحسين والأخ وليد الشفت لإيراد مداخلة بت الحسين هنا

Quote: شايلك الحماس يا وليد، معليش اسمح لي... انت ما عارف الوضع بي جاي للشغالات كيف,,, الشغالة دي ما عندها اي لحظة في اليوم حقتها، الدوامه دي بتستمر لمدة سنتين... وتعمل المطلوب منها ولا على كيفها ليل نهار صبح ظهر ما شغلتهم, الشي ده ما بحتملو بشر واحنا بدل نستفيد من تجارب التانين، حكومتنا السمحة ماشه لي ورا.. اندويسيا محيّرة السعوديين ليها قريب تلاته سنين بسبب المهانات الحصلت، وفي النهاية أملت شروطها عليهم... رغم انه الاندويسيات اثبتوا انهن صبورات وما ارتكبوا جرايم كتيرة... الاثيوبيات فشلوا فشل ذريع والكينيات برضه لانه حقارة السعوديين ما احتملوها فعملوا كمية من الجرايم وبقت وصمة في الشعب الاثيوبي كله انه شعب مجرم... طبعا مافي زول بقول البغلة في الابريق... السيناريو نفسه اتوقعه للسودانيات... واعتقد انه لو كان جهة العمل اي مكان غير السعودية الوضع ما بكون زي ده... في نقطة تانية مهمة جداً، النظافة بتاعت السودانيات في السودان ما ليها اي علاقة بي البعملوه السعوديات في بيتوهن هنا... الشغاله هناك بتغسل العدة وتنظف البيت وتمشي... هنا مطلوب منها تكون أم عديل... بكل تفاصيل المسؤولية... من تربية وطبيخ ومتابعة ولعّيب... وده دور بكون مستمر 24 ساعة لأطفال ما مؤدبين.. عشان كده الاثيوبية لما في النهاية يفيض بيها بتمسك الشافع وجخخخخ تضبحه وترتاح منّه.... الخدامة في السودان لو زهجت من ست البيت وحست انها ضايقتها بالحكحكة والنظافة بتشاكلها وتلبس سفنجتها وتمرق، هنا تمرق تمشي وين زاتو!! سجن لمدة سنتين ده... الخدامة في السودان عندها يومها حقّها، تستحمى وتغير وتتمسح وتقشر وتمرق تعيش آدميتها وتغيّر جو وتتفسح وتشوف اولادها او اهلها وتجي راجعة وتشيل قروش المواصلات، هنا ممكن تقعد السنتين، المرتب العاجبك ده زاتو ما يدوهو ليها... حياة الخدامة في السعودية مأساة.. ولو احنا كمطلعين عليها وسمعنا بالخبر ده وما عملنا اضعف الايمان (الاعتراض)، ما اعتقد انه فينا خير زاتو... عشان كده اسمح لي اقول ليك انك ما عارف حاجه والله... وانت زاتك كان جيت وسمعته البنسمعه ونشوفه عن الخدامات ما بترضى اي واحده تجي البلد دي.. والله تقضي يومك ضبح! حقارة الكفيل كوم وحقارة مرة الكفيل واولاده حاجه تانية خالص!

ولحين العودة، أهديكم – أخي شاهين شاهين shaheen shaheen – وأنت تتحدث عن النظام الاقتصادي الرأسمالي السائد ، وعن فضائله على الإناث
هذا الرابط:

http://www.aljazeera.net/home/print/7dcab3c3-3422-4c8b-b091-...32-b87c-cf780a815c41


...
..
.
الرابط لمقال للناشط الحقوقي (هيثم مناع) نشره بموقع الجزيرة نت.

ومعذرة فقد جاطت الأشياء في ذهني وأنزلت بالخطأ هذه المشاركة في بوست الأخ (وليد المبارك) ، فمعذرة أخي شاهين، ومعذرة أخي عبدالعزيز، ومعذرة أخي وليد، وتحياتي للمتداخلين هنا وهناك.

سلمت يداك

Quote: الخدامات الانت مستعر منهم ديل بكونو فاتحين بيوت في السودان... ساترين ناس و معلمين ناس و معالجين ناس في بلد سلام الله بقى بقروش !! المؤلم في موضوعك ده إنو كل الهاميك نظرة السعوديين ليكم !!

بعدين الفرق شنو بين رعاة الابل والغنم من الرجال السودانين ومن هذه المهنة الحلال !؟

لو شايفنها ما بتشبهنا ده كان زمان لكن اسه وما خفي اعظم . والحمد لله علي الصحة ورزق الحلال .

ولي قدام ...

مساء الخير

انا شايف في لبس كبير في هذا الوست ومعظم البوستات التي تحدثت عن موضوع ايفاد سودانيات للعمل كعاملات منزليات في دولة السعودية

واللبس تحديدا هو في محاولة الجدل حول مهنة العمالة المنزلية بانها مهنة شريفة او لا
وهذا بصراحة ليس لب الموضوع ، فمهنة العمالة المنزلية ليست مجالا للجدل -حسب راي- فهى مهنة شريفة مثلها ومثل كل عمل شريف بغرض كسب الرزق طالما انها تحفظ للانسان كرامته واحترامه وانسانيته

والشرط الآخير دا أساسي وهو السبب في اعتراض البعض وانا منهم على ايفاد سودانيات للعمل بالسعودية او الخليج عموماً ، وليس الاعتراض حول المهنة نفسها فكثير من السودانيات يعملن بها داخل السودان

وهو اعتراض ليس اعتباطي او انطباعي وذلك لسوابق و واقع حال لهذه المهنة بالسعودية والتي عملت بها جنسيات آسيوية وافريقية لعدة سنوات التي شابتها الكثير من الانتهاكات الانسانية والحقوقية لهذه العمالة الضعيفة ارغمت كثير من الجهات الرسمية والمنظمات المدنية بالدول المعنية على ايقاف ايفاد العمالة المنزلية للسعودية وبعضها سن شروط صارمة وضمانات قوية للسماح باستئنافها

وعلى ضوء هذه التجارب يجب عدم التسرع بايفاد سودانيات للعمل بهذه المهنة مالم تضع ضمانات وقوانين كافية تردع اي انتهاك محتمل لحقوقهن

غريبة جدا والله الجماعة القاعدين يبرروا عمل السودانية كخادمة برغم ما قيل ومازال يقال من
إنتهاكات بدعوي إنو نحن ما احسن من الشعب العلاني والفرتكاني ..
طيب ياخ لو فرضنا إنو نحن أسوأ من الشعوب دي فهل دا مبرر إنو الناس ترمي بنفسها في التهلكة ؟؟؟؟؟؟؟
لماذا لا يكون لنا قرارنا وحاجاتنا الخاصة بينا سواء كنا أحسن أو أسوأ ؟ لماذا نمشي وعيونا مغمضة خلف
الباقين ؟؟ لماذا كل ما قلنا نريد هذا أو لا نريد ذلك ينبري لنا عاشقي المقارنات الساذجة ليضعوا قراراتنا
في كفتي الميزان والقياسات مع الآخرين ؟؟ متي تكون لنا إرادتنا وشخصيتنا القوية المستقلة ونبتعد عن النزعة القردية
المسيطرة على عقولنا وعواطفنا ؟
عموما ومن الآخر كدا ..
بعد كل الذي قيل وتم شرحه بخصوص الانتهاكات التى تحدث للخادمات في البيوت إذا أرادت أية سودانية
أن تعمل في هذه المهنة فهذا شأنها وكل شاة معلقة من عرقوبا .. أو بصيغة أخري .. سيد الحق راضي شن
دخل القاضي .

Quote: حسب علمي الى هذا اليوم لم تتم الموافقة على السماح للسودانيات للعمل كشغالات في المملكة

ود وراق

إيرادك لكلمة ( لم ) تعنى أن هنالك احتمالية للموافقة

وأتمنى ألا يحدث هذا ...

السؤال
هل بناتنا ديل عندهن قوة تحمل للعمل 20 ساعة؟؟؟
عندهن صبر على الإهانات من الصغير و الكبير؟؟؟؟
تحمل سخافات المراهقين و تحرش الشواذ

هى ستة شهور بس و تلاقى عناويين الأخبار الرئيسية

شغالة سودانية تدخل كفيلتها فى الفرن و تقضى عليها
شغالة سودانية تفتح رأس مكفولتها بأنبوبة البوتجاز
شغالة سودانية تلكم طفل و تسبب له ارتجاج فى المخ
شغالة سودانية تحرق فيلا مخدميهابعد ان نام الجميع

انتو فاكرين القلب الحار دا عند الرجال بس

كدي يا ناس السعودية
وقعوا لينا السالفة
نحن الما شفنا السعودية
هل السعوديين (عرب ومسلمين) بهذا السؤ؟؟؟؟؟؟؟
ولا البلد ما فيها قانون؟؟؟؟
ولا الأجانب ما عندهم حقوق؟؟؟؟
ولا السالفة شنو بالضبط؟؟؟؟

Quote: والسودانيات ما عندهم اخلاق وكرامة وشرف اكتر من الفلبينيات .

أخي شــاهين
ســلام
أرجــو مراجعة ما خطه كيبوردك في الاقتباس
اختلف مع كل ما ورد بمداخلتك و لكن اندهشــت بشـكل خاص لهـذه المقارنة
التي تحمـل في طياتها انتقاص و اجحـاف في حـق امهاتنا و اخواتنا و بناتنا
فلهـن من الكرامة و الاعتداد بالنفس و الشــرف ما لا يقـارن
مهما جـار عليهن الزمن و الانقـاذ

و يا ولـيد
ســلام
انا عاوز اقارن ليك بين عمـل السـودانية ( شـغالة ) في بلده و خارج بلدها

في بلدها تشــعر بأنها عـزيزة برغـم قســـوةالحياة و مرارة الواقع فهـي
من تختـار نـوع عملها ( هنا اتحـدث عن عاملات اليومية لأنهـن الأغلب ) , تحـدد
ما يناســبها حتى وهي مجـبرة على أن تعمـل ( غسـيل , نظافة , دق ويكـة .....
........ الخ القائمة ) و تحـدد اجرهـا و يتـم الاتفاق و في نهاية يومها تعـود
لبيتها و اسـرتها , تجـد من تحـادثه و إن مرضت تجـد من يرعاها ( من اسـرتها
أو من الجـيران ) ,

اما عاملة الشــهر فمن اول يـوم تعـرف واجباتهـا المطلوب منها انجازها
بوصـف مفصــل وتعـرف حقـوقها( المرتب , يـوم اجازتها و حـق المواصلات )
في اتفاق كامل بين الطرفين و بعـد أن تنجـز عملها لا يسـتطيع ايا كان
أن يجبرها لعمـل آخـر و لها الحـق في إجازة الأعـياد , خلصت عمله ممكن تخلد
للنوم دون أن يمنعها أحـد ,

أما خارج بلدهـا لا حـدود للعمــل لا في نـوع العمـل ولا في وقتــه , فهـي دائما
تحـت الطلب في أي لحظـة و لي عمـل , يصـاحب ذلك الاتهـام المتكرر بالتقصـير
والشــك الدائـم و لا يخــلو الأمـر من الضــرب أو التهـديد باللجـؤ للشـرطة
في أي صـغيرة و كبيرة , دائما مرعوبة و مهددة و متهمة , لا يحـق لها أن تأخذ
قســط من الراحـة و لا تجـد من تحادثه فلا زيارات لأهـل او معارف حتى الاتصـال
الهاتفي يكون خفية و هـي طول اليـوم تحـت المراقبـة اللصيقـة معـزولة
أما إن مرضــت فلا تجـد من يرعاهااو يخـفف عنها ( الأ من رحم ربك ) و لا يسـمح
لقريب /ة أو صـديق/ة بزيارتهـا ,ليس لها الخيـار في أي شـيء لو الأســرة ماشـة
السـوق عليها أن تتبعـهم و تعـتل ما يشـترون , إن ذهـبوا لحديقـة ليس من حقها
أن ترفض الذهاب لترتاح بل عليها الذهاب و مراقبة و مطاردة الشــفع اينما ذهبوا
إن ذهـبوا لزيارة عليها أن تكون معهـم , غير مسـموح لها بالنـوم و في زول صاحي
فهـي آخـر من يذهب للنـوم و أول من يصحـــو


بالله رفقـا بأهـلنا فعـندما يعترض الناس فليس لانتزاع حقهن في العمـل و لكن
رفقـا بهــن من عمــل في مثـل هـذا الجــو وعائـــد غـير مضمـون
فبعضهن أخـذن للترحيل دون أن يعرف الى أين يؤخـذن , يخبرونها بانها في مشـوار
ثـم تجـد نفســها في المطـار و تســلم للخـروج النهائي دون أن تأخذ اشـياءها
و احيانا بدون حقـوقها
ودعـونا من أنه لا فـرق بين العمـل في الداخـل و الخارج فالمثل بيقول
( الليك لو كتلك بجـرك للضــل )

أدناه بعض تعليقات السعوديين أنفسهم بعد إشاعة موافقة تركيا توريد شغالات
وطبعا دي كانت أكبر اشاعة الاسبوع الماضي وبإمكان الجميع معرفة رد الفعل التركي
الرسمي والشعبي عن طريق العم المبجل ( قوقل)..

هنا فقط بعض ردود الفعل السعودية
كلها من تويتر والواتساب

Quote: يعتقد السعوديون أن كل إمرأة جميلة في العالم مسئولة عن إسعادهم.. وتعتقد كل إمرأة سعودية أن كل إمرأة فقيرة في العالم مسئولة عن خدمتها

Quote: لماذا لا تجرؤ وزارة العمل السعودية على مصارحة شعبها برفض الشيشان وأوزبكستان والبوسنة والهرسك وأذربيجان ملفها المقدم لطلب الخادمات عام 2011 رفضاً شديد اللهجة من هذه الحكومات. هل يخافون على مشاعر طفلهم المدلل أن تنكسر، بينما في المقابل لم تتجرأ وترفع الطلب لتركيا أفغانستان وباكستان يعيشون تحت خط الفقر وبلا مأوى ، ولم تقبل منذ ثلاثون عاماً هذا الطلب. فهل سيعي السعوديون بحجمهم ؟ وهل يعلمون أن الريال السعودي لن يشتري الكرامة التركية؟

Quote: على الحكومة السعودية أن تكف عن تدليل شعبها المعاق فكريا وبدلا من أن تجلب له الخادمات فعليها أن تعلمه احترام الذات الانسانية.

Quote: ومعذرة فقد جاطت الأشياء في ذهني وأنزلت بالخطأ هذه المشاركة في بوست الأخ (وليد المبارك) ، فمعذرة أخي شاهين، ومعذرة أخي عبدالعزيز، ومعذرة أخي وليد، وتحياتي للمتداخلين هنا وهناك.

ولا يهمك يا صادق

الغرض من كل البوستات توسيع قاعدة المناقشة وطرح افكار جديدة
وتسليط الضوء على نقاط تكون خافية على آخرين


مودتي

Quote: بعدين الفرق شنو بين رعاة الابل والغنم من الرجال السودانين ومن هذه المهنة الحلال !؟

تحياتي منى

لا فرق ...
الخيط الذي افترعناه ها هنا فهو للكشف عن المخاطر المحتملة ,,

ورعاتنا يعرفون كيف يهربون عبر صحاري تيماء وتبوك والجوف
ويخبرون وديان القصيم وتضاريس نجد ... إن وقع الضيم عليهم

في زيارة لي لسويسرا في منتصف الثمانينات
تلقينا دعوة انا وشقيقتي وزوجها لوليمة غداء من اسرة مدير الخطوط السودانية بجنيف
كانت دهشتي< آنذاك > كبيرة وانا اشاهد خادمة انجليزية وهي تقوم بترتيب مائدة الغداء
والهرولة بين السفرة والمطبخ
كانت شابة صغيرة وتبدو من ملامحها انها انجليزية <اصلية >وليست مهاجرة
ولاحظ رب الاسرة ملامح الدهشة بادية على وجهي
فقال لي باسما ومداعبا : ها نحن نرد للانجليز الدين . استعمرونا لسنين طويلة .... واليوم أتينا بنسائهم لخدمتنا
ثم استدرك قائلا: حقيقة احترم هذه الفتاة فهي طالبة وتدرس اللغة الفرنسية بجنيف للالتحاق بجامعة جنيف
وتعمل في البيوت لساعات حتى توفر مصاريف دراستها
وأضاف : فهي اانجليزية حقا : تأتي في الموعد وتكمل الثمانية ساعات المقررة لها فتنصرف بعدها دون زيادة دقيقة واحدة
اعتقد ان سودانية اوغيرها لو توفرت لها ظروف عمل مشابهة < مقننة ومحمية بقانون الشغل الدولي المعروف >
لاأرى فرقا بين خادمة منزل او مديرة بنك

سلام مرة تانية لعبدالعزيز و باقي الناس الهنا ...
كتبت رايي و مفادو إني ما شايف مشكلة إنو السودانيات يشتغلو خدامات ؟! و إنو الشغل الشريف عمرو ما كان منقصة ... و انتقدت صاحب البوست باعتبار إنو كل الهاميهو نظرة السعوديين ليهم ...

جاني الايميل التالي ...استأذنت من صاحبو في نشرو بعد حذف الاسم :

Quote: الاستاذ/ أمين محمد سليمان المحترم السلام عليكم ورحمة الله وبركاته،،، أنا متابع لموقع سودانيز اولاين منذ العام 2002م وحصلت على العضوية فيه منذ العام 2003 ولكني زاهد في المشاركة فيه لأسباب كثيرة، وأنت ممن أتلمس كتاباتهم وأبحث عنها بالمنقاش يا بروف، حتى صدمني اليوم ما خطته يداك في البوست الخاص باستقدام خادمات للعمل في المملكة العربية السعودية، التي أعمل فيها منذ العام 1999م، وأعرف الكثير عن ما يحدث خلف الأسوار المغلقة بحكم عملي كمستشار قانوني، نعلم ان عمل المرأة ليس عيباً، ولكن المرأة في السعودية لا تعمل كخادمة فقط وإنما تعمل (سرية) أيضاً ـ وأنت تعلم معنى المصطلح ـ فهي بخلاف أنها تعمل أكثر من 18 ساعة في اليوم، فهي أيضا وسيلة ترفيه لمراهقي البيت وربما لرب البيت المراهق الكبير، إضافة إلى ما تلاقيه من عنت الإهانة ومشقة الإذلال، وهذا الأمر ليس استثناءً يا أخ أمين وإنما هو القاعدة وما شذ فهو الاستثناء، ما تتعرض له الخادمة في البيت السعودي من ضغوط جسدية ونفسية يدفعها في كثير من الأحيان إلى أن تقتل الطفل أو الطفلة الذي تقوم بالعناية به، أو في حالة أن تكون قوية نوعاً ما فهي تنتحر، وصدقني يا أمين ما يحدث للخادمات هنا لا يصدقه عقل ولا يقبله المنطق ولا الشرع، ربما أنت في مكان يحترم الإنسان ولديه عدد معين لساعات العمل في اليوم، إلا أنه فقط عليك أن تعرف يا أمين أن قانون العمل في السعودية لا يشمل خدم المنازل ومن في حكمهن، إذا فهي ليس لها قانون يحمي حقوقها وقد تتعرض للإذلال والإهانة وغالباً الاغتصاب ثم يتم ترحيلها بليل وهي حتى لا تعلم إلا في المطار... عليه أرجو صادقاً منك أن لا تقف هذا الموقف الذي آلمني جداً، نحن لا يهمنا نظرة السعوديين لنا، ولا يربط بيننا وبينهم إلا عقد عمل. ولكن ما يهمنا هو كرامة السودانية يا أمين، أما رأيت إلى المصريين ورفضهم المطلق لمجرد مناقشة الأمر؟ والأثيوبيين أوقفوا إيفاد الخادمات إلى المملكة منذ أكثر من عشرة أشهر، كما أن استقدام الخادمات ايضاً موقوف من الجانب الإندونيسي والفلبيني، وهذا ليس من فراغ يا أمين، فالخادمة ليس لها حقوق ولا تستطيع أن تطالب بما هو لها، إلا على اضيق نطاق، وهناك من الخادمات في السعودية لها أكثر من سنتين ولم تقبض راتباً واحداً ولا تستطيع أن تتصل على أهلها (لأن الهاتف الجوال ممنوع على الخادمات في السعودية "إلا باستثناءات ضيقة جداً لا تخرق القاعدة" ) فلك أن تتخيل خادمة تعمل 18 ساعة في اليوم وليس لديها هاتف لتطمئن على طفلها الصغير مثلاً الموجود في السودان ـ لأن الخادمة وبموجب القانون لا يحق لها استقدام عائلتها أو أطفالها فعليها أن تأتي منفردة ـ وليس لديها راتب لمدة سنتين أو تزيد ، وأحكي لك هذه القصة المختصرة يا أمين " عملت لدي خادمة اندونيسية في المنزل ـ لفترة مؤقتة لظروف ولادة زوجتي ـ عرفت منها أنها هاربة من كفيلها الذي ظلت تعمل عنده لمدة ست سنوات لم تقبض فيها راتباً واحداً بل ولم تر فيها الشارع منذ مجيئها من المطار حتى استطاعت الهرب، وهي الآن لا تستطيع العودة لأهلها إلا أن تسلم نفسها للشرطة والتي ستضعها في السجن حتى حضور كفيلها والذي ربما يماطل في الحضور لفترة يقدرها هو. شاكراً لك صبرك على قراءة مكتوبي، إلا أنني ولثقتي في رجاحة عقلك واعجابي الفائق بمجمل آرائك، لم يرضني أن يكون هذا رأيك في قضية استقدام خادمات من السودان. تقبل فائق احترامي وتقديري أخوك مستشار قانوني

قريت الكلام ده كذا مره و رجعت قريت البوست ده و باقي البوستات البتتكلم عن نفس الموضوع و لقيت إنو الأغلبية الغالبة من السودانيين في السعودية ضد مسألة إستجلاب خادمات سودانيات ... و بالتأكيد الاعتراض ده ما ناتج من فراغ ... كمقيمين هم يعلمون ما لا نعلم ... لكن عناوين و طريقة نقاش الاخوان الفتحو البوستات دي - و ما تزعلو مني بالله - كانت سطحية جدا في مناقشة الامر !!
البوست ده عنوانو أبو الفهد ... عشان كدا قلنا ليكم انتو هامكم نظرة السعوديين ... بوست حبيبنا صبري عنوانو لو بترضى لاختك ... و كانما الشغلات خدامات في البيوت ديل كان عندهم خيارات تانية .
طريقة نقاشكم و الحته المسكتوها من الموضوع ضيعت لب الموضوع الكتبو حبيبنا الرسل لي الايميل ده و خلتنا نفهم - نحن الما مقيمين في المملكة - إنو الموضوع ما (عن(.........)ة السودانيين الفارغة ) زي ما قال حبيبنا شاهين...انما هناك محاذير و مخاوف حقيقية !!
نحن بنقبل اخواتنا و زوجاتنا و أمهاتنا ذاتهم يشتغلو خدامات في البيوت لانو الشغل ما عيب و لا منقصة ... العكس تماما ... الشغل عبادة و شرف .... و النسوان ديل كانو دايرين العيب ... ما كانو إشتغلو خدامات أساسا !! أما و المسألة انها خدمة و معاها تحرشات جنسية و حقوق مهضومة و تجارب قبيحة مرت بيها مئات بل الاف من عملو بهذه المهنة من قبل لدرجة إنو دول عديدة منعت إستجلاب خادمات من بلدانهم ... فيجب إنو كلنا نقيف ضد المسألة دي... لاننا لا نرضى لاخواتنا و زوجاتنا و أمهاتنا إنو يتختو في الوضع المهين و المشين ده !!

Quote: نحن بنقبل اخواتنا و زوجاتنا و أمهاتنا ذاتهم يشتغلو خدامات في البيوت لانو الشغل ما عيب و لا منقصة ... العكس تماما ... الشغل عبادة و شرف .... و النسوان ديل كانو دايرين العيب ... ما كانو إشتغلو خدامات أساسا !! أما و المسألة انها خدمة و معاها تحرشات جنسية و حقوق مهضومة و تجارب قبيحة مرت بيها مئات بل الاف من عملو بهذه المهنة من قبل لدرجة إنو دول عديدة منعت إستجلاب خادمات من بلدانهم ... فيجب إنو كلنا نقيف ضد المسألة دي... لاننا لا نرضى لاخواتنا و زوجاتنا و أمهاتنا إنو يتختو في الوضع المهين و المشين ده !!

انت عارف يابروف خطبة الجمعه القبل الفاتت فى الحرم المكى
الخطيب كان بتكلم عن نقاش المواضيع الحساسة فى مواقع التواصل والانترنت ووسائل الاعلام عموما
وكان بقول ما معناهو :


هل الزول مفروض يفتى ويقول رأيو فى كل شئ ؟ فى كل قضية وفى كل حادثة ؟ ولا الواحد ينضم فيما يعرف .. ويقرأ ويتابع ما لايعرف

طبعا كلامو كان من وحى موضوع الاثيوبيين والقتل .. لانو فى سعودييين كتبو عن الكلام ده وفديوهات تعتبر نوعا ما ادانة للسعودية


المهم قلت شوف الراجل ده ما داير الحقيقه تطلع للناس

بعد بوستات الشغالات فى السعودية رجعت تانى لكلام مولانا ده وبديت انظر ليهو بى نظرة تانية واتفهم جزء منو

فى ناس هنا ( وبى موقفك الاخير طلعت منهم هههههههه) عاوزين يفتوا فى البعرفوه والما بعرفوه
والواحد ما بكلف نفسو شوية قراية وسؤال عشان يعرف الحاصل .. قبل ما يكتب

اى واحد يعرف 5% فقط من اوضاع الشغالات فى السعودية حا يقيف ضد الموضوع ده
وموش يقيف بس هنا فى المنتدى بالكتابة
لا .. بالفعل .... والفعل القاسى والعنيف .. ضد اى قرار بالشكل ده



تحياتى

سلام يا وضاح و لعلك بخير ياخي ...
ما أظن في زول بصر على رايو إذا تبين ليه إنو رايو ما سليم ... أو في معلومات ناقصة خلتو يتبنى رأي معين ..
في مداخلتي الاولى ...كلامي كلو كان منصب على إنو الشغل ما عيب - اللي هو راي حتى الان - و انتقدت حبيبنا عبدالعزيز صاحب البوست إستنادا على العنوان إنو موضوعو نظرة ناس ابوفهد ... لكن بعد الايميل و بعد ردود الناس بما فيها رد عبدالعزيز ذاتو ... إتضح إنو المسألة مافي نظرة السعوديين و لا في شغل الخادمات في عضمو ...انما في ما يحدث للخادمات من تحرشات و انهن بلا قانون يحمي... و باقى ما أتى به المقيمين بالسعوديه ... عشان كده يا وضاح أنا لمت صاحب البوست و حبيبنا صبري بهناك إنو الطريقة الفتحو بيها الموضوع كانت مضللة... خلتنا كلنا نعتقد إنو الاعتراض نابع من الخوف من نظرة السعوديين و من الاعتراض على شغل الخادمات في عضمو ....

Quote: سلام يا وضاح و لعلك بخير ياخي ... ما أظن في زول بصر على رايو إذا تبين ليه إنو رايو ما سليم ... أو في معلومات ناقصة خلتو يتبنى رأي معين .. في مداخلتي الاولى ...كلامي كلو كان منصب على إنو الشغل ما عيب - اللي هو راي حتى الان - و انتقدت حبيبنا عبدالعزيز صاحب البوست إستنادا على العنوان إنو موضوعو نظرة ناس ابوفهد ... لكن بعد الايميل و بعد ردود الناس بما فيها رد عبدالعزيز ذاتو ... إتضح إنو المسألة مافي نظرة السعوديين و لا في شغل الخادمات في عضمو ...انما في ما يحدث للخادمات من تحرشات و انهن بلا قانون يحمي... و باقى ما أتى به المقيمين بالسعوديه ... عشان كده يا وضاح أنا لمت صاحب البوست و حبيبنا صبري بهناك إنو الطريقة الفتحو بيها الموضوع كانت مضللة... خلتنا كلنا نعتقد إنو الاعتراض نابع من الخوف من نظرة السعوديين و من الاعتراض على شغل الخادمات في عضمو ....

كلامك واضح يا حبيب يديك العافية

والله انني ارغب في خير لنساء بلادي

فرجاء لا تخرجوا هذا البوست عن موضوعه.

التحيه لك يا صاحب البوست انك قرعت اجراس الخطر عن هذا البؤس و الملطشه القادمه.

وربنا يعين نساء بلادنا خصوصا وكل شعبنا عموما:

بدل(خادمات في السعوديه) لماذا لا تذهب السودانيات(خادمات في جنوب السودان)؟!

صباح الخير أو مساء الخير على الجميع
كل حسب مواقيته
وخلوني ارد على البروف أمين اولا
بالنسبة للعنوان ، أكيد هو جزء رئيس من أي موضوع ... ومهم جداً للأنتباه
العنوان هو جزء من ثقافتهم تجاه الوافد .. هكذا تدار أحاديثهم ... وهكذا
يتم التناصح بينهم في كل شي .. أي شيء... من الزواج وشراء السيارة وحتى البندول مرورا بالعمال
هذه هي جلساتهم ..
لقد قمت بتصوير - أبو فهد ,, وأم فهد - كما هم .. من واقع معايشتنا لهم ..
يعني عملت مشهد درامي

يديك العافية يا بروف .. وجميل جدا كونك ادركت موخرا ما نرمي إليه
بعد ردي الأول عليكم وبعد إيميل الأستاذ وجميع المداخلات هنا

أدناه اقتباس المداخلة الأولي لي في هذا البوست.. لمزيد من التوضيح والتصوير

Quote: هكذا ستكون أحاديثهم وونساتهم في استراحاتهم عما قريب وأبو فهد الذي يتكوم عند مدفأته يحتسي الشاي مع رفاقه ويدخن المارلبورو، يوصيهم بالتقديم على ( شغالة، خدامة ) سودانية.. فهي أزين ... وأنظف.. وأكثر طاعة ... وأرخص سعرا

Quote: وهذا بصراحة ليس لب الموضوع ، فمهنة العمالة المنزلية ليست مجالا للجدل -حسب راي- فهى مهنة شريفة مثلها ومثل كل عمل شريف بغرض كسب الرزق طالما انها تحفظ للانسان كرامته واحترامه وانسانيته والشرط الآخير دا أساسي وهو السبب في اعتراض البعض وانا منهم على ايفاد سودانيات للعمل بالسعودية او الخليج عموماً ، وليس الاعتراض حول المهنة نفسها فكثير من السودانيات يعملن بها داخل السودان

تحياتي هواري
وحمدا لله على سلامة عودة الفيل

العمل ليس عيبا ... إن كان محمياً بقوانين محددة

وحتى لا نجني على شعب كامل ، وهو الشعب السعودي، تعالوا هنا نشوف سيدة البيت عملت لخادمتها
الاندونيسية شنو عندما علمت بأنها مرضع
نخش الرابط دا ونشوف




والنادر .. لا حكم له

Quote: بعد كل الذي قيل وتم شرحه بخصوص الانتهاكات التى تحدث للخادمات في البيوت إذا أرادت أية سودانية أن تعمل في هذه المهنة فهذا شأنها وكل شاة معلقة من عرقوبا .. أو بصيغة أخري .. سيد الحق راضي شن دخل القاضي .

تحياتي طلحة
طيب وين حق الرعية على الراعي؟؟ ما لازم يمهد الطريق ويحمي التعاقدات؟؟؟
من حق المواطن على الدولة فتح فرص عمل آمنة ...ومجزية.

مودتي