هوذا وطنك المُستنكِح يا زول ....!

صباح كسول آخر تمدد هنا ناعياً السودانيين والسودانيات عن بكرة آبائهم ، نظرت للصحف قرأتها علي عجل ، إذ لا جديد فيها ، فماذا تتوقع أن تحمل الصحف ؟
ملهوفون نحن لقراءة شئ يخصنا شئ يهبط علينا عبر ماكينات الطباعة شئ لطالما حلمنا به . وأنا في منظري ذاك نشبت معركة في غيرما معترك
فقد أحدهم في هذا الصباح المرتبك نظارته الطبية ـ وبدأ يشتم ، يشتم كل من حوله ـ شتمنا .... ياحرامية يا عيال الايه ، شعب واطي ـ يا لصوص ويا ويا الله ياخ .
دفعاً لتبرئتي عالجت الموقف بإبتسامة عريضة ـ الذي يجاورني لم يتحمل الأمر ـ صفع الرجل في خده الأيمن ثم ولكأنه لم يسمع أنشودة المسيح أردف صفعته بصفعة أخري .

كانت النظارة في ذات اللحظة تجلس القرفصاء في جيب المصفوع ، إكتشفنا ذلك حال تمدد المعركة ودخول الأجاويد والمارة وستات الشاي والتسالي والزول بتاع الطربيزة
البقعد جمب المكتبة وببيع شاي بي لقيمات داك .
مررت بعد ذلك تتلقفني أمواج عدة .... كان الرغيف ووصايا والدتي بضرورة الإستعداد للمجاعة القادمة .... المواصلات .... الزيت ..... لبن البودرة ... شاي الغزالتين
... البصل .... السودان الذي لا اله الا الله .

الذي يجب أن يعيه الناس في بلاد الأسافير أن السودان يدخل الآن في عضم أبنائه وبناته يدخله هكذا يأكل من طعامهم ويشرب من شرابهم ويركب معهم مواصلاتهم يقاسمهم
السودان كل شئ يقاسمهم صفوف الرغيف .... يقاسمهم ويرتوي من دمائهم ... يلعق عرقهم .... ثم يجلس السودان يعاين فاغراً فاه للعق جديد .

ها هو الوطن أمامك بقضه وقضيضه هوذا وطنك يازول الذي تداري محبته بدمع القلب يجلس أمامك كأكبر وطن مستنكح هو ذا وطن الاستباحات العظيمة يمد لك لسانه عبر
عشرات المانشيستات الهزائم .

قال عثمان : والله دي بلد فضيحة
قال عثمان : فضيحة شنو ياخ دي بلد طيطة
قال عثمان : طيطة شنو والله دي بلد ............................... استغفر الله العظيم

وأنا وغيري من الناس والشارع الذي يمشي والذي يمشي والذي يمشي والذي ... والذي يمشي ..... نمشي .

ومن هذا المنطلق :


يا بكري سلمي الشيخ سلامي ما قادرة تخش المنبر فمدها بكلمة مرور جديدة لا فيها شق ولا طق والسلامو عليكو .

ــــــــــــــ
عملت ليكي مناشدة يا سلووم يا أخي الكريم

قبل شوية وعبر قناة النيل الأزرق الممثل محمد شريف علي كان مستضيف المواطن عابدين درمة والذي طالب المسؤلين بإنارة المقابر .

ثم لا أحد يحدثنا عن الرغيف نوهائي كده .

وأقول قولي هذا وإستغفر الله لي ولكم والسلامو عليكو

يا خضر،،انيروها لهم،،نعم فهم يستحقون..
فهم الاجيال التي كافحت لوطن حر..
ومنهم الجيل الذي قاوم الدكتاتورية الاولي
بل منهم عبود دكتاتورنا الطيب الاول،،الذي كان دكتاتورا معقولا،،
هذا ان كانت للديكتاتورية عقل...
ولكنه علي الاقل سلم البلد غير منقوص...
ثم منهم الازهري،،الذي يستلف ليكرم ضيوفه
ومات ليكمل له الشعب بناء بيته..
ومنهم السيد عبدالرحمن،،والشريف الهندي
وزير المالية ونصصير الفلاحين
وفي كل عهودهم ظل مشروع الجزيرة يعمل كساعة سويسرية
وينتج قمحا وقطنا وفولا ووعدا وتمني
ومنه عبدالخالق الذي اعطي الشعب وعيا
وروح محمود فكرا وشموخا
وكل الرائعين الذين صنعوا لنا وطنا اسما ومجدا
ضيعه مغامرين حمقي بهوس وغباء
اليس من حق من رحلوا عظاما ان نحتفي بهم في دار البقاء..
كل دول العالم تحتفي براحليها،،وتصنع لهم عالم من بهاء،،حدائق وتذاكير،،فلماذا استكثرناها نحن.
ام لان القبح صار الشعار
والظلام هو السايد..
ويا احبابي الموتي سلاما..
فعلي الاقل،،قد كان لنا وطن،،من حلفا لنمولي
نغني له،،،،عازة في هواك..
ولكم فلينر الشرفاء لا اللصوص،،الفضاء.
ثم مالذي يمنعنا ان نخرج كما خرج ابائنا
نطالب بحقنا في الرغيف والحرية
نطارد اللصوص والجلادين
من احرق الحقول واشعل الثارات
لماذا نعجز عن الانتصار للحياة
ونصبر علي قياصرة ربع قرن.
اليس ابائنا جديرون بالاحتفاء
رجالا شرفاء صناديد
سلاااام يا خضر،وكل احترام.

هسع البلد لا رغيف ولا هوت دوق ؟
والله جد السلام ليك والمعاك جملة .

يا عثمان
ياعثمان وقد ضاع لسان
وينك ياخ

المسائل بتاعت الرغيف والهوت دوق والبيتزا دي بقت تجيب لي اخوك الحساسية (جيوب انفية ممكن تقول)
يا رجل ها نحن نمضي لخواتيم البلاد في أمن وأمان


مشتاقين يازول

العزيز عبدالعزيز عثمان
تحياتي وامتناني لحضورك هنا
واسفي للتأخير ياها مشاغل الدنيا الكتيرة يا عبدو
قريت كلامك وتجدني ماعارف ابدأ من وين ولا من وين
هالني يا عبد العزيز أن نطالب بإنارة المقابر في بلد مظلم بمواصفات هادا البلد
مقابر شنو الينيروها يا عبد العزيز والأحياء في الأحياء السودانية يعيشون الظلام
غايتو حليلو بلد بس
مودتي