تار بابكر الصديق !

التحية للزميلة مها عبدالمنعم
فقد ألهمتني هذا البوست

يعتقد السودانيون جازمين ( ولقولهم صحته من السيرة النوبية ) ان سيدنا ابوبكر الصديق توفي من اثر لسعة التعبان إد هو في الغار مع رسول الله (ص) ثاني أثنين إذ هما في الغار
ويقولون بابكر الصديق

وللسودانين قناعة
أنو الدبيب بجيب تارو , يعني لو كتلت ليك دبيب , تأكد انو مرتو بتجيب تار راجلها او الراجل بجيب تار مرتو ولا الاخو او الولد ,,, هكذا يحكون عن قناعة شديدة , ولهم في ذلك حكاوي وقصص
والدبيب عندهم كائن مخيف حقا ,, وميتاقزيقيا ! فهم لا يقتلون دبيب بالليل اصلا ,, وكلما كان ضخما كلما إزداد الخوف منهم ,, ولهم حكاوي في ذلك تخليك ما تكتل ليك صارقيلا زاتو
ولاحظ لامن تكون راكب عربية سفرية , السواق بزوغ من الدبايب تقول بني آدم ولهم في ذلك حكاوي وقصص

أها لو كتلت دبيب ! كيف تتخارج من قصة التار دي !?
الحل بسيط وساهل !
تمصلها في تار سيدنا ابوبكر الصديق
لو كتلتو تقول بي صوت عالي
كتلك شريف اهلو في الريف ,,, تار بابكر الصديق
ولأنو الدبيب يتبع ثقافة الثأر فبكون متفهم لدوافعك وما حيطاردوك لي تارهم

وأكيد جدا جدا
أنو الحكاوي الزي دي بترسخ في عقلنا الطفولي ,, وتكون ابعد من قصة في تداعي تحليلها داخلنا , وتنمو القصة , وينمو معها فكرة تشكل نمط تفكيرنا وسلوكنا بشكل لا نعيه

قالو
واحد كتل ليهو دبيب ومعاهو اخوهو
اخوهو قال
كتلك شريف اهلو في الريف
فنط اخوهو صائحا
كتلتك اني دي
تتعضر لي الدابي
كتلتك اني

الشافع الصغير لامن يقع في الواطة وهو جاري ,, ولسه بتعلم المشي , ويبكي
ابوهو ولا امو بحاولو يسكتوهو ,,
خلاس ,,, خلاس ماتبكي
دي الواطه دي الرمتك
بب بب بب يدقو الواطه
تاني يا الواطة ترمي ولدي العسل ده

إلقاء اللوم علي الآخرين جراء فعلنا الواعي
اتهام غيرنا لما يصيبنا جراء عدم اجادتنا لأفعالنا

سلام يا ود أبو سن
تصريح مهدي إبراهيم للامانة انا ما قريتو إلاّ هنا وما في سياقه كامل و إنطبعي عن مهدي إبراهيم إنه أحد العقلاء في وسط جيوش حمقى الحكومة
عشان كدا غرابة التصريح دا مش في تفاصيله وألفاظه ومعناه بل كونه صادر عن مهدي ابراهيم تحديدا
لو نُقل عن نافع مثلا أو والي الخرطوم او كرم الله أو غيرهم من الحمقى الأمخاخهم في أذنيهم و السنتهم ما كنت استغربت

مرحبا ود الخضر
وحبابك
هذه السلطة تمر بمنعطف مفصلي لها ,, منعطف حاد ولا طريق امامها سوي الانعطاف ,, ان تكون مع السلطة يجب ان تثبت ذلك ,, وتعلنه بلغة واضحة وصريحة ومباشرة و فجة ,, فلو تخيلت ان رجلا صنع السلام بلغة اهل السلطة مثل علي عثمان ,, يقول في شأن الذين فاوضهم شوت تو كيل ,, لن تندهش من غيره ولن تستبعد ,, لم يجدي الاختباء وراء سمت العقل والحكمة ,, ثم انظر لحسين خوجلي الذين ينتقد السلطة ودون ان يدري مآلات قوله يتحدث عن هذه السلطة بنتها الصفوة الاسلامية بتجردها وعملها , مجردا كل الشعب من صناعة التاريخ ومجردا حتي عضوية الاخوان ,, بلغة اخري هي مؤامرة فقوله ينطبق عليها , وهي ذات الصفوة منذ 89 التي في السلطة والتي خرجت معارضة من لدن الترابي وحتي غازي
فالمصدر الذي ينهلون منه واحد
وهم كما يقولون
زي الدبيب الحارقو السم

وهكذا ننمو نحن اطفالا صغار مغذين بروح ان الآخرين هم من يضمرون لنا الشر حينا ,, وان سبب اخطاءنا هم لا نحن ,, يخرج من دائرة لوم الآخرين من ثقف نفسه ثقافة انسانية ومعرفة متطورة , فنمي عقلة ليخرج من إسار تلك الدائرة , يتقبل النقد وينقد نفسه نقدا ذاتيا دون ان يعتبر ان النقد هو إنتقاصا في حقه , فالشاهد ان معظمنا لا يقبل النقد , وبل يتعامل معه بحدة وعدائية ,ذلك اننا تربينا دون ان نشعر هكذا , فحتي في المدرسة نميل لظلم المعلم لنا وانو قاصدني
وفي العمل لم نترقي لذات السبب ,, وجد لي شخصا واحدا يتحمل خطأ عمله ,, طبيب ,,, محامي ,,استاذ ,,, موظف ,,

حكي مدير مدرسة بنات
من الحاجات البعاني منها لامن يستدعي ولي أمر بت في مشكلة أخلاقية , انو ولي الامر مابصدق وببرئ بتو ,, وبخلق مشكة معاهم ومرات بتكون حادثة وفيها شهود ومثبتة ,, وبي كدة ما بقدرة يعالج مشكلة بتو وبتتفاقم

وقمة الموظفين هم الحكام
وللأسف لم يمتلكوا فكرا انسانيا يجعلهم يروا بشريتهم
فالبشر خطاء ,,
فمن يعمل سيخطئ وأن لم يعترف بخطأه فلن يتطور ويجود عمله

فثقافة الإعتذار عندنا معدومة , ولو اعتذرنا فهو لا يشبه الإعتذار , فكأنه محاولة تسامي اخلاقي , وبه إشارات لتعظيم الذات , أقصد ان الاعتذار يجب أن يكون واضحا لا لبس فيه , ودون تبرير
محض إعتذار
ليه
لأنو اصلو نحن ما قاعدين نغلط ,
الشافع الصغير كسر الكباية , الأم سمعت صوت الكسر ,, وطوالي دعت وقالت
عدمتوني الكباية الواحده ,, الليلة الكسر الكباية ده ما يرجاني
قالو ليهو
ده فلان ,, الصغير طبعن
قالت
طيب الختاها ليهو في شارعو منو

رشحت الاخبار
ان السيد رئيس الجمهورية عمر البشير
قد
حمل الإستعمار انحطاط التعليم في السودان

قضية الضابط الشهير , والذي تحدث عن الفساد داخل وزارة الداخلية
وأظنها اول قضية يتحول فيها شاكي لي متهم
الزول بشتكي وبتتعمل محاكمة عادلة , وبعد داك إذا ثبت ان الامر ده ما صحيح , ممكن الناس الاشتكاهم يشتكوهو تحت اشانة سمعة ولا رد شرف
لكن من فتح البلاغ كشاكي يتحول لي متهم دي ياها زاتا دق الواطة

(*)

يا عبد الحفيظ لا يقتل دبيب وانما يمنح فرصه للخروج بسلام بعد تكرار الفرصه اذا لم ينسحب افعل ما تريد.

اما
كلام مهدي ابراهيم ومن لف لفه من حيث المحتوي الخطابي الذي راج هذه الايام فقد صدقوا انهم متعوا فئه من الشعب. كلنا سمعنا عن الرواتب ذات الاصفار السته في فتره ماضيه
ومن غير المنصف ان نقول ان جميع من وصل لتلك الرواتب العاليه هم كيزان. لان بذلك نعترف ان حجم الكيزان كبير جدا وغالب علي بقيه الوان الطيف السياسي وهذا غير صحيح. اقول كلامي هذا مستشهدا بعوده كثير من السودانيين في فتره الازدهار التي اشار اليها
تركوا الغربه وعادوا خصوصا اصحاب الاعمل الحره. كان سعر صر ف الدولار في تلك الفتره 2.5 (الفين وخمسمائه) واستمر الي عده سنوات مما جعل الغربه غير مجديه (ما بتخارج).

انتعاش الرواتب في الفتره بين 2003 الي 2010 بالتأكيد انعش السوق وقطاع الخدمات بصوره عامه.

ليك التحيه

متابعين

حبابك ود ابوزيد
ستندهش من كمية المستفيدين من الفساد الحكومي , ولعلمك ده بشمل حتي خفراء ابواب المستشفيات ,, وخفراء المخازن والسواقين الحكوميين ثم أصعد
هؤلاء هم الرصيد ,, رصيد الحكومة الحالية
‏ الدولار ثبت في 2500 ج وكان قبل عشرين عاما منها لا يتجاوز ال 4 ج فما بالك في نسبة زيادة للدولار 62400% في عشرين عام

حبابك ادريس
يا صاحب
شاكر ليك رفع البوست
تحية لأسرتك وعيالك

Quote: تحية لأسرتك وعيالك

طرفكم في كوستي خد صاحبك واديهم طلة

يحصل ان شاء الله
ولك التحية

فوق
لحين
ميسرة

حبل المهلة يربط ويفضل
مافي مثل اسئ فهمه زي المثل ده وصار مثلا للتباطوء

يعني حبل المهلة طويل ,, ودي دعوة للإهتمام وليس الكسل
يعني لو مقدر للعمل نص ساعة ابداهو قبل ساعة وادي نفسك فضلة زمن فما معروف قد لا تسير الامور كما تشتهي ,, مش اشتغل ببطء وتكاسل