طفل يستفيق قبيل حرق جثمانه.

طفل يستفيق قبيل حرق جثمانه

أبوظبي - سكاي نيوز عربية

نجا رضيع صيني أعلن أحد المستشفيات وفاته من عملية إحراق "جثته" عندما أجهش بالبكاء في مكاتب شركة لدفن الموتى، على ما ذكرت وسائل الإعلام الصينية الخميس.

ووافق والدا الرضيع الذي يقل عمره عن الشهر والمريض جدا، على وقف علاجه الطبي في مستشفى للأطفال في مقاطعة أنهوي (شرق الصين)، حسب مصادر طبية لوكالة أنباء الصين الجديدة.

وصدرت وثيقة وفاة الطفل وتم تسليمه إلى شركة دفن الموتى إلا أن الموظفين هناك تنبهوا إلى صريخ الرضيع.

وأعيد الطفل فورا إلى المستشفى حيث لا يزال يخضع للعلاج على ما ذكرت عدة وسائل إعلام صينية.

واضحت وكالة الأنباء أن "الطفل ولد مصابا بتشوه خلقي في نظام التنفس".

وقد أوقف طبيب عن عمله وطردت ممرضة فيما فتح تحقيق إثر الحادث.

هسه دا لو كان فى السودان كانوا قالوا عليهو بعاتي .

أو بالعدم كانوا لقبوه ( بحي موت ) .

سلام يا أخ محمد

يا آمنة موش دكاترة السودان ديل أنا متأكد بيكونوا دفنوا آلاف الأحياء

شغالين بالبركة ساي بس

سلامات
الأخت العزيزة
آمنه مختار

هسه دا لو كان فى السودان كانوا قالوا عليهو بعاتي .


المسكين دا كان في السودان ناس الحكومة كان قالو ليهو نصدق تقرير الطبيب وما نصدق بكاءك. ودفنوهو
شكرآ لمرورك ونورتي البوست يا أميرة

يا آمنة موش دكاترة السودان ديل أنا متأكد بيكونوا دفنوا آلاف الأحياء


سلام
الهادي
زمان الطب مهنة إنسانية في السودان
أما الآن أصبحت( business)
ألله يكون في عونا

محمد سلامات

وانت الصادقه يا آمونه

Quote: هسه دا لو كان فى السودان كانوا قالوا عليهو بعاتي . أو بالعدم كانوا لقبوه ( بحي موت ) .

او بالكثير بعد يعيش برضو كانوا سموهوا ب(المبروك) و تبرك الناس فيه وروا البدع عن كراماته.

غايتو ....ربنا يعينا في سوداننا هذا.

خالي الخدر ود الشريف توفي لرحمة مولاه في مستشفي مدني،انا بقرا في مدرسة حنتوب،مات مع المغارب،اكان في امان الله الناس الزارو رجعو قالو طاب،العصير اتنازل،انلمو الدكاترة،مع المغرب اتشهد وادي الروح،الدكاترة عصروا،وجبدو ونفخو،،مافي فايدة،هبشو هنا،وهنا،باصابعينن،سماعتن،،،الفاتحة،،ابوكم اتوفي.
معاهو الضو ود الخدر،اللسع حي ده،والطيب ودالفكي ممارض زول،الكهربا قطعت والسحابة شايلة، كسرنا العينين وجهزنا ابونا ،لقينا لينا عربة ذي الكومر شال الجثمان،والسواق ساق معاهو رفيق.
انا والطيب،والضو،راكبين بي ورا مع الجثمان،والسواق ورفيقو بي قدام،،الليل اليل،والسحاب شال،والبروق اشالعن،ونحن من ترعة لي ترعة،،وفجاة شلع برق مخيف،اعقبته هدير رعد مهول،،طططططط،صممنا اذاننا،واغلقنا عيوننا،،ثم فجاة......
كان خالي الخدر مصنقرا في سطح العربة،،مصنقرا تماما،،وبصوته ذاك القوي،،،زمجر،،،ياساااتر.
انا،والطيب والضو،،بصرخة واحدة،،وقفزنا،،وخضنا الترعة العميقة وجريا علي القرية التي كنا قد اوشكنا وصولها،،وقفت العربة،،ناظر مرافق السايق مايحدث،فوجد ميتنا جالسا،فلحق بنا في صراخ عظيم.
كان سايق العربة،مشعشع شوية،،وله دربة يبدو مع الموتي والجثامين،،،ساق العربة حتي القرية،،كنا نحن موتي في القرية خوفا ورعبا،وكان خالي الخدر علي رجليه يستقبل حمدالله السلامة،ولكن علي ضوء الفوانيس والبطاطير لاحظ الناس عيونه المكسورة.
من ساعتها ولزمن طويل،حدث حكي وكلام يحتل كل المساحة،قرا لنا التحصين،،وعاش خالي الخدر عشرين عاما،،عشرين عاما لم يمرض لساعه،بعيون مكسرة.
حتي موته لم استطع ابدا ان اجلس معه لوحدي،ولا اغشي بيته ليلا ابدا..ومات في اتم عافيته ذات خريف في تمام اللحظة التي شلع فيها برق عظيم.
يعطيني الطب والعلم تفسيرا لما حدث،وموقن بذلك،،ولكن من يسكت خوفا في الدواخل،،ان خالي مات وحيا.
القصة ليست من نسج الخيال ابدا،مسجلة ومثبتة ومعلومة،،اها يالاطباء رايكم.

سلامات
الأخ
عبدالعزيز عثمان
ربنا يرحم خالك خدر
يعني لو ما البرق والرعد كان دفنتوهو قبل عشرين من مماته.

سلامات
أم حازم

ربنا يعينا في سوداننا هذا.

آمين يا رب العالمين

أسئلة للإخوة الدكاترة
كيف يحصل مثل هذه الحالات ؟
متي وكيف يعلن الدكتور وفاة الشخص ويصدرشهادة وفاة
مقارنة بحالة الطفل الصيني
وحالة خال الأخ عبد العزيز عثمان
أين الخلل هل من الطبيب ولا من الأجهزة ولا أشياء أخري

وبارك ألله فيكم