الكرسي الساخن جداً :-

- مرحباً بالشعب السوداني الكريم في برنامج الكرسي الساخن جداً و نبدأ برنامجنا بالأسئلة التالية:
س/ أيها الشعب الكريم أنت متهم بتخلفك عن ركب الأمم المتطوّرة و الذي نتج عن ضعف الوعي الاجتماعي و التدنّي الفكري، فما رأيك في ذلك؟
س/ أنت متهم بأنك قد ساهمت في تفشّي أوئبة العنصرية و الجهوية و التفرقة بين أفرادك على أساس اللون و العرق و القبيلة و غيرها ، فما هو تعليقك؟


- السلام عليكم و شكراً ليكم على اتاحة الفرصة الكريمة و العظيمة دي عشان نثبت للعالم إننا أمة تستحق الفخر و الاعتزاز و الاجلال ووووو ------

- احم احم ،، عفواً عزيزي الشعب ، يرجى التقيّد بالأسئلة المذكورة اختصاراً للوقت و شكراً!

- كويس ، أولاً نحب نوضح للعالم كله إننا شعب متطوّر جداً و معلّم للشعوب و الأدلة على ذلك كتيرة جداً، و انحنا ما عنصريين خالس بس الناس بيسيئوا الفهم لعاداتنا و تقاليدنا و مفاهيمنا الاجتماعية..

- نرجو توضيح هذه النقطة أيها الشعب..

- آآي انحنا ما عنصريين ،، بس بتلقى ناس ما برضوا يعرسوا من بره قبيلتهم أو ما بيقبلوا يناسبوا قبايل معينة لانهم شايفين روحهم شريفيين و أصيلين أكتر من غيرهم ،، و طبعاً الناس بتختلف و دي سنّة الكون!!

انحنا ما عنصريين ،، بس الناس اللونهم أزرق شديييد بنسميهم "ع..." و "خ..." و اللونهم أبيض شديييد بنسميهم " ح ..." ،،

انحنا ما عنصريين بس عادي جداً لمن واحد من قبيلة أو منطقة معينة يبقى عنده سلطة أو منصب في هيئة حكومية أو خاصة يقوم يشغّل أولاد منطقته كلهم معاه و ما يشغّل غيرهم حتى لو كانوا مؤهلين أكتر منهم،، نظام تكافل اجتماعي و كده!!

انحنا ما عنصريين ،، بس لمن تحصل حرب و مصايب و موت في منطقة ما عندنا أهل فيها بنقول مالنا و مالم ان شاء الله يحرقوا كلهم !! طبعاً ده عادي جداً !!

انحنا ما عنصريين ،، بس أي زول شايف قبيلته أحسن و أشرف قبيلة و باقي القبايل مطلّع فيهم ستين عيب ، يعني مثلاً يقولوا ليك ناس القبيلة الفلانية بخلاء و القبيلة العلانية عينهم حارة و ديل شينيين شنات العدو و ديل مشهروين بالحماقة ،، و الواحد يقول ليك أنا أهلي ناس الشجاعة و المروة و الكرم و الأصل و الفصل ووووو

انحنا ما عنصريين ،، بس مرات لمن يكون في ناس بيتكلموا بى لغة محليّة و في نصهم واحد ما فاهم لغتهم، تلقاهم شغالين قطيعة فيهو بمزااااج ،، ما فيها حاجة ياخ!! الناس ما تتونس؟!!

انحنا
و انحنا
و انحنا
ووووووو
:
::
:::

الله؟!!!
يا اخوانا الحاصل شنو؟!!
وين المذيع؟ وييين المخرج و المصورين؟؟؟
يا ناس هوي!! مشيتو وين؟!!
و ده شنو كمان؟!! الكرسي وينو؟!!
النزلّنا من الكرسي للأرض شنو؟
انحنا الشعب العظيم المافي زيّنا ، ينزّلونا من الكرسي السمح ده و يقعدونا في الواطه؟!!


***** يا ربي هم العملوها فينا و لا انحنا العملناها في روحنا؟!!