مــرقــنــي الــنِــســوان ... والله صـحـي ...

هسّع أهلي كان عِرفوا،
يقولوا شنو ؟؟؟







غايتو جِنِس مِحن !!!...

أُعلنت حالة الطوارئ في جميع أنحاء المدينة، والجماعة البجرو العربات قفلوا
تلفوناتُم وقالوا، ايّ زول يركب الطريق السريع ويمرق من البلد ياكُل ناروا،
وحلفوا زول يوحل ما يمرقوهو. تمّ الإعلآن عن عاصفة جليدية سوف يصل
عُمق الجليد فيها لـ45 سنتيميتر. بدأت العاصفة وانفتحت السماء بماءٍ منهمر.
وحات خوتكم كان ماني مصروم فرِد ختوة ما بمرق علي الشارع، لكن الله غالب.

الشوارع زحلقة جد، وعشان انفُض الجليد من العربية كرعي غتسن للركبة
في الجليد الصابي في الوآطة. أها، نفضت العربية وبديت الشغل. ماني مصروم عاد.
الشغل رآآآآآآآآقد والتكاسي عدم، لكن عشان تسويلك فرِد مشوار رويحتك دي
تمرق نعمنها الشوارع زي الزِفِت، والجليد كابي من السما الفاتح فوقنا دا.

أها، ادوني مشوار مشيت لقيت لي أربعة نسوان من نسوان الهنود الحُمُر مانعات،
ماهِن معفصات زي (الكاو قيل) بنوت الكايبويات. قالن كدي إندفسن في العربية
لآمن شعرتبا غتست في الجليد. أها، دورنا علي بيتهن و وآحدة فيهن قالت لي وقف المنشة.
قتلها يا مرا هوي، الشي دي أنا عارفا محشية تلج ومع حكها للقزاز دا أنا براي ضارساني
لكن ما بوقفا، أكان وقفتها بتلصق في القزاز وأنا ما بقدر انزل اعافرا في الصقط دا.
أها، وكت جينا عِن لفة بيتِن الراكبة قدام قالت لي لِف بجاي.
قتلها، يا مرا الجليد دا هنا غريق واكان لفيت بوحل.
قالت لي، ما بتوحل.
قتلها، بوحل.
قالت لي، أكان وِحِلت بنمرقك.
أها، أنا ما كضبت ونهرت العربية، كان تطمس لي نُص اللساتك في الجليد، وحلفت ما تمرق.
قالن كدي النسوان الماهن خمج إتحزمن ونزلن عليها، وهاك يا دفر، وأنا مرّة أوديها قدآم،
وتاني أوديها ورا، وأرازي فيها، وهِن وحاتكم بس تقول رجال جزيرة متحزمات وواقفات لها الفاً أحمر.
وكت ابت تمرق وآحدة قالت لي، خلني اللسوق أنا.
قتلها، بالحيل، وقلت اخير أنزل ابقى مِحِل الدفر ما يجي زول يشوفني مِتحكِر في العربية والنسوان يدِفرن فوقي.
أها، نزلت ودفرناها بجاي، بجاي، والمرا قالت كدي فت مرقتا.
قتلهن، كتّر خيركن.
وآحدة قالت لي، هوووووي نحن نسوان الحِلة دي وعارفين شوارعا، ما قلنالك بنمرقك.
إتذكرت نسوانا، وقلت، سبحان الله !!!...

السويتها رقدت يا ود المدير

ووووووووووووووووووووب علينا
فضيحت السواد والرماد
جعلى يمرقن نسوان يا عيب الشؤم

مسعول من الخير ياعمدة،،حلتكم دي ياتا في الحلال..
اعمل حسابك،،الصقت السنة جائ بي وليداتو.

عــشــان كـدة يـا ود الـمـديـر ،
مـا كـنـت ،
بـتـرد عـلـي في الـواتـسـاب ،
لـمـن أنـا كـنـت الأسـبـوع الـمـاضـي ،
فـي الـهـنـد ،
أتــــاريـــك وحــــلان ،

***
نـــوع الـسـيـارة شـنـو ؟؟؟؟؟
ـحـاجـة وضـــاحـــة ،
ســـلام ،
،،،
...


.




عزالدين عباس الفحل
ابوظبي
...

Quote: السويتها رقدت يا ود المدير ووووووووووووووووووووب علينا فضيحت السواد والرماد جعلى يمرقن نسوان يا عيب الشؤم

هِن مرقن ابونا آدم من الجنّة،
ما يمرقني أنا من الجليد ؟؟؟.



كيدهُنّ عظيم ...

(إتذكرت نسوانا، وقلت، سبحان الله !!!.)

ود المدير اخوي , سلامين ,

نان نحنا حيببة الويكي الفطرنابها يا دابها تخلينا نقدر نلز الركشة !
وباقي المروة مودرنها في المساككا مع ك ل ا ب الأمن !
أها قصرنا ؟!

حكي جميل , واصل.

ست البنات.

Quote: . قالن كدي إندفسن في العربية لآمن شعرتبا غتست في الجليد.

جِييد ليهن جِييد ليهن ..
غتسنها ومرقنها .. والله صحي ..!



نحن الليلة نقطت مطيــرة شوية كدي والشمس غيمت رحت المكتب الصباح لقيت نص الكراسي فاضية .. تاني براي لحقت الناس وجيت خزنت في البيت .. تقول لي 45 سم ؟؟!
غايتو تاني وقت تجي هناك مو كضاب اليشوفك لافي في عز طوبة بالعراقي .. عِلا خايف اهلك يقولوا الزول دا بقى سحار ..

في إجازة المتوسطة كنا شغاليــن طُلب مونة مع واحداً قريبن لينا في الحلة .. يقولنا تعالوا قبال الشرقة القي الملطم دا مطرى والطوب مقرب .. الزول دا يجي في عز البرد لابس عراقيهو على اللحمية وشيل مسطرينو ويطلع السقالة..
لا في يوم قال أحح لا برد لا ونحن متزملين ومتدمدمين ونرجف وهو شغال فينا صبيان اخر زمن يا تعبانيين .. انتو صبيان انتو .. انا في سنكم كنت في عز طوبة بقطع البحر ضهر .. وعييك
أنقر ..
يوم بنبحبت ما لقيناهو ليك ملبد قزازة العرقي مع عدتو يجغم ويطلع السقالة .. ود اللذينا متدفي سيوتر نوبة وهارينا بالبرد ..والله صحي ..:)


ـــــــــــــــــــــــــــــــ..
اسمعني الفحل دا اوعك تقوم توريهو نوع عربيتك شنو .. عشان ما يسترخصها ويقوم يرسل ليك " همر " ويحرجك .. كفاية العشرة تالالاف دولار البعزقتها وانصرمت لمن مرقت في التلج ههههههههههه

Quote: هِن مرقن ابونا آدم من الجنّة،

هسى الغلط منها ولا من أبونا آدم السمع كلامها...؟؟

ودا المدير السلام عليكم......كلام حلو وطاعم..

تقديرى وإحترامى.

Quote: مسعول من الخير ياعمدة،،حلتكم دي ياتا في الحلال.. اعمل حسابك،،الصقت السنة جائ بي وليداتو.

عبد العزيز يا قريبي.
تصدق الحِلة أنا زاتي ساكن فيها، ويا حليل السيالة.
ناس الغربة ما بيعرفوا بعضُن يا عبد العزيز.

عندي خالآتن لي الله يرحمن، من الباوقة جن عطبرة،
وقالن ياخدلهن تكسي لبيتنا. أها، قالن كدي إتحكرن في
التكسي وواحدة فيهن قالت للسواق، دوّر.
قال لها، يا حاجة ماشات وين ؟؟؟.
قالتلو، ودنا بيت ناس المدير .
قالها، يا حاجة بيت ناس المدير دا وين ؟؟؟
قالتلو، ما بتعرفوا !!!؟؟؟، الغبا ليكُن يا ناس البندر
المابتعرفوا بعضكُم...

Quote: *** نـــوع الـسـيـارة شـنـو ؟؟؟؟؟

داير تمشي تسويني مسخرة مع الملياردير صاحبك،
مُو كدي ؟؟؟.
قلنالك عربية يا ود الفحل، مِي سيارة ...

كلام حلو يا ودالمدير
بالمناسبه اليومين ديل وين صاحبى الرجل الطيب بتاع العنكوليب ؟

يـا ود الـمـديـر ،
كـيـف إنـت تـرضـي ،
تـركـب لـيـك نـــســـوان ،
مـن غــيـر مُــحـــرم فـي سـيـارتـك ؟
***
وآحدة فيهن قالت لي وقف المنشة.؟؟؟؟؟
ـحـاجـة وضـــاحـــة ،
ســـلام ،
،،،
...


.




عزالدين عباس الفحل
ابوظبي
...

هلا هلا
ياقول عمي عابدين :" معايشن قوت(كسر القاف وفتح الواو)"
دي حالة دي؟ بدل ماتكون راكب حمارتك البيضا ومتبلم بي عمتك ومخلايتك مليانة خدار ولحم من سوق الجمعة ومتجه من السوق علي الشريفاب
ولا على الأقل راكب البولمان بتاع السيالةوشايل رغيفك وطماطمك
ياود خالي تبقى في جنس دي الحالة؟

الله يكون في عونكم ياخي
على العموم انا جايي من البلد يادووب والأهل كلهم بخير وعافية
لكن اخوك اصيب ب"الحزام الناري" بعيد عنكم ولكن متعافي الحمد لله
اخدت لي وحلة زي حقتك دي لمدة تلات ساعات في خور "الجول" والحر يظلط علا مرقوني ناس السليمانية -اظنو دا الجاب لي الحزام الناري

Quote: ود المدير اخوي , سلامين , نان نحنا حيببة الويكي الفطرنابها يا دابها تخلينا نقدر نلز الركشة ! وباقي المروة مودرنها في المساككا مع ك ل ا ب الأمن ! أها قصرنا ؟!

سِتهِن لحدهن،
إنت حاشاكِ التقصير، والسلآم
يغشاكِ مِحِل تقبلي.
إن شاء الله ربنا يديكن الصحة والعافية، والبلد ترجع زي زمان
ونرجع تاني لي تمُرنا وجروفنا، ونكرف ريحة القراع ونوار
المنقة والبُرتُكان، ونغني حِس طمبورنا يسافر مع عِرق النيل...

Quote: جِييد ليهن جِييد ليهن .. غتسنها ومرقنها .. والله صحي ..!

بالحيل،
زي ما مرقن أبونا آدم من الجنّة،
ودخّلن سيدنا يوسف السجن.



بتاعات هوايل.
والله صحي...

Quote: هسى الغلط منها ولا من أبونا آدم السمع كلامها...؟؟ ودا المدير السلام عليكم......كلام حلو وطاعم.. تقديرى وإحترامى.

وعليكم السلآم صديقنا الهلالآبي الكبير
إسماعين. لك كامل مودتي وإحترامي.

صدقني يا إسماعين تمرقوا وتغلطو وتقنع اجعص
زول بغلطو.
في القرآن كيد الشيطان ضعيف، بينما كيدهُنّ عظيم.
شُفت كيف !!!؟؟؟...

جليد تصور حريم ما تصور !!!!


الختيتها رقدت

عزيزنا معاوية
سلامات
ياخ نسوان الهنود الحمر ديل يمرقن بنطون الباوقة زاتو لو غتس .
ياخ ديل في بعض الاوكات بتاعات تفحيط . و يازول الحمد الله الما ختفوا منك العربية .
ربنا يا معاوية بريدك رماك في هنديات بنات حلال .

Quote: كلام حلو يا ودالمدير بالمناسبه اليومين ديل وين صاحبى الرجل الطيب بتاع العنكوليب ؟

سلآمات يا عبد الله.

قريبي ود شيقوق قلع وغتس، وليهو زمن يغتس ويقلع
زي أُم خِنيجِر.

أُم خِنيجِر بتعرفا ؟؟؟.


تحلالك العافية وشكراً علي طلتك البهيّة...

Quote: Haider Hassan · الأكثر تعليقا · Zagazig University أه يادنيا .. من قعاد الضللة في السوق والسينما الجمهورية بقى يتكلم في الجليد،

اصبر ساااااااااكت لآمن نفضالك.
إنت قايل الحكاية طلقيت، تمشي علي كيفك،
وتجي علي كيفك ؟؟؟.
عان ها السينما والضللة !!!...

Quote: يـا ود الـمـديـر ، كـيـف إنـت تـرضـي ، تـركـب لـيـك نـــســـوان ، مـن غــيـر مُــحـــرم فـي سـيـارتـك ؟

هههههههههههههههههههههه.

يا ود الفحل إنت قايلني عماد موسى ؟؟؟، بعدين نوع
النسوان ديا الوآحدة فيهن براها تجيبلها تلاتة محرم.

يا اخي الشي دي عربية ما سيارة...

ود المدير وضيوفو سلام جاكم
مخير الله ! يعني الخواجات ديل عندهم عوين زينا وجاي
واحدن عمن لينا ,, قليلوني وكملان من لحم الدنيا ,, ومرتو ما شا الله تبارك الله ,, اوضه وصاله بي منافعها ,, القصر منو كلو شالتو هي
اها مرة جاهم حرامي ,, وعليمك الله عمنا ده صاحي وعمل نايم ولا فعلا نايم ,, سردب ساي ,, والحرامي يلوس في البيت ,, المرة سمعتو ,, وطفرت فيهو عريانه جنل ,,, ومسكتو ليك بي وراء ,, تثبيتة جون سنا بس ,, كربون ,,, وكوركت لي راجلا
جيب لي الفركة دي واربطو فوقي ,,, ما دايره زول يشوفها عريانة ,, والحرامي بجيب الجيران ,, ودايره تنجض مسكتا
عمنا قال ليها
فركة شنو يامرة ,, زحي لي انا بمسكو
مرتو ما عارفاهو ومجربا قوتو
يا راجل ما بتقدر عليهو ,, يا ناولني فركتي يا اربطا لي
قال ليها
لا حرم كان تزحي
اها مسك بدلها ,, وهي زحت تربط فركتا
الحرامي شعر بالقبضة ما ياها
ونخج ليك عمنا وقام وقعد بيها ,, هيق ,,, تجاهو علي صلبو في الواطة وشرد
مرتو قالت ليهو
انا ما كلمتك ما بتقدر عليهو
راقد قريب كم يوم عندو قطيعة في صلبو و ضهرو

Quote: ـحـاجـة وضـــاحـــة ، ســـلام ،

عزالدين الفحل

كان ردت عليك

شنبي ده بحلقو


قال حاجة قال

garjah ،

ســلام

وضــاحـة دي أدت فـريـضـة الـحـج ،
عـشـان كـدا قـلـنـا لـيـه حـاجـة ،
حـسـة ح تخــش الـبـوسـت ،
شــــوف ،
،،،،،

،،،
...


.




عزالدين عباس الفحل
ابوظبي
...

Quote: عزالدين الفحل كان ردت عليك شنبي ده بحلقو قال حاجة قال

العزيز قرجة سلامات

فعلا انا حجيت الحمد لله مع اهلى وكانت الحجة جمعة ربنا يتقبلها ان شاء الله


ما فهمت سالفة حلاقة الشنب

انا غايتوا قبل كده حلف لو عز الدين الفحل طلع من جيبوا عشرة الف دولار ورسلها لى ود المدير بحلق شعرى وارسلوا لى ود المدير
لكن الحمد لله كنت واثقة ما راح يعملها
ود المدير شعري يشموا قدحة

Quote: انا غايتوا قبل كده حلف لو عز الدين الفحل طلع من جيبوا عشرة الف دولار ورسلها لى ود المدير بحلق شعرى وارسلوا لى ود المدير

ها ء .. ركزي يا حاجة الموضوع هسع عن حلاقة شنب..
صلعتك ديك اتسلفقنا فيها ساي :)




ـــــــــــــ
اها يا ود المدير تقول لي ما عندو علاقة بالموضوع..
دردقنالك شنب جااااهز . سنن مقصك بس :)

garjah ،

ســلام

وضــاحـة ردت ،
يـلـة هـيـا أحـلـق شـنـبـك ،
مـع الـصـورة ،

،،،،،

،،،
...


.




عزالدين عباس الفحل
ابوظبي
...

الحبيب معاوية ود المدير
لك كثير الشوق و عاطر التحايا
رغم أن الموقف حار على أي جعلي و لكن أقول لك لا تبتئس يا أخي الكريم فعندما تستحضر في ذهنك تراث أجداد لك مثل المهاب مختار ود رحمة عليه الرحمة تحس بإذلال الدنيا لك و لكن أيام و تتعدى و الله يجازي الكانوا السبب في غربتنا وكما قال الشاعر
الدنيا بتهينك و الزمان بوريك
و قل المال يفرقك من بنات واديك
الجنس الفسل ما تجعلو دخريك
وقعدة براك أخير من لمة المابيك

Quote: ها ء .. ركزي يا حاجة الموضوع هسع عن حلاقة شنب.. صلعتك ديك اتسلفقنا فيها ساي :)

حرام عليكم عاوزين تحلقوا للراجل شنبو


ههههههههههههههههههههههههه

garjah ،

ســلام

شــنـــو يـا قــرجــة ،
كـبـيـت الـزوغـــة ،
،،،،،

،،،
...


.




عزالدين عباس الفحل
ابوظبي
...

الأخ الفاضل / ود المدير
عفارم عليهن بنات الهنود الحمر
ياخ ضيعت الفرصة، كان تتزوج ليك واحدة منهن إنت ما عارف عندنا بقن النسوان هن الشغالات والرجال آخر عطالة
ياخ ما كان تقول عوك
حكي ظريف وطاعم

Quote: و يازول الحمد الله الما ختفوا منك العربية . ربنا يا معاوية بريدك رماك في هنديات بنات حلال .

يا عثمان موسي وقت يسون دي لباس الطاقية ليهو شنوووو تاني
الحمدلله البقن بنات حلال كان حا يحرمننا من شوفتو في الايام القليلة المقبلة
واحد جاتو شعرة واخد الشبال والعريس هوشو بالسوط فت
اتمولص وقال ينجلد .... السوط اللول التاني طلّع ريح مسموعة
لملم هدوموا وقبال الحفلة تنتهي مرق من البلد كم وعشرين سنة اشتهي امو واخياتو قال يخفس يسلم عليهن ويبل شوقوا
في المشرع لاقاهو الأطرش قالووو :- (هاااا اووو تظظظظظظ ) صاحبك رجع إنتا قايل الخته الزي دي يتتنسي
أحمد ربك يا قريبي الجات سلامة عشااان نشوفك
:
:
:
:
:
:
مع التحيات لله الزاكيات

Quote: هلا هلا ياقول عمي عابدين :" معايشن قوت(كسر القاف وفتح الواو)" دي حالة دي؟ بدل ماتكون راكب حمارتك البيضا ومتبلم بي عمتك ومخلايتك مليانة خدار ولحم من سوق الجمعة ومتجه من السوق علي الشريفاب ولا على الأقل راكب البولمان بتاع السيالةوشايل رغيفك وطماطمك ياود خالي تبقى في جنس دي الحالة؟ الله يكون في عونكم ياخي على العموم انا جايي من البلد يادووب والأهل كلهم بخير وعافية لكن اخوك اصيب ب"الحزام الناري" بعيد عنكم ولكن متعافي الحمد لله اخدت لي وحلة زي حقتك دي لمدة تلات ساعات في خور "الجول" والحر يظلط علا مرقوني ناس السليمانية -اظنو دا الجاب لي الحزام الناري

حِمدِلآلك بالسلآمة يا ود عمتي.
ناس السليمانية ديل هنود حُمُر واللآ شنو ؟؟؟.

عارف، أنا كان تميت التلآت ساعات اكان جاني حزام جليدي،
عِلآ بارك الله فيهِن مشهدني تب...

Quote: جليد تصور حريم ما تصور !!!! الختيتها رقدت

فاتت علي يا ديقول.
والله صحي.

هسّع كان تشوفوا القوم الذين جابوا الصخر بالوآد...

Quote: عزيزنا معاوية سلامات ياخ نسوان الهنود الحمر ديل يمرقن بنطون الباوقة زاتو لو غتس . ياخ ديل في بعض الاوكات بتاعات تفحيط . و يازول الحمد الله الما ختفوا منك العربية . ربنا يا معاوية بريدك رماك في هنديات بنات حلال .

عثمان يا حبيب،
يا اخي ماك ماشي السودان في شهر وآحد الجاي دا ؟؟؟.

انقُر ما فحّطت ؟؟؟، وحات خوتنا يا عثمان فحّطت
تفحيط عرب الخليج، والخوفة الدخلتا في قلبي لي الليلة
ما مرقت.
ربّك ستر...

Quote: انا ما كلمتك ما بتقدر عليهو راقد قريب كم يوم عندو قطيعة في صلبو و ضهرو

هههههههههههههههههههههههههه،

إنت بالعافية التخصك في المصارين يا عبد الحفيض.

عارف، عندنا وآحدة زي اللتكم دي كلتت في الحرامي، والحرامي
زين لتيت ومالك الوآطة. أها، وكت غلبا تهجروا راجلا جا مسكو
من دلآديلو وجراهو، عليك امان الله الزول تب برك في بطن الوآطة...

Quote: الحبيب معاوية ود المدير لك كثير الشوق و عاطر التحايا رغم أن الموقف حار على أي جعلي و لكن أقول لك لا تبتئس يا أخي الكريم فعندما تستحضر في ذهنك تراث أجداد لك مثل المهاب مختار ود رحمة عليه الرحمة تحس بإذلال الدنيا لك و لكن أيام و تتعدى و الله يجازي الكانوا السبب في غربتنا وكما قال الشاعر الدنيا بتهينك و الزمان بوريك و قل المال يفرقك من بنات واديك الجنس الفسل ما تجعلو دخريك وقعدة براك أخير من لمة المابيك

حباب الوليد الشيخ،
الشوق من هنا لعندك.
نسأل الله أن يرحم أجدادنا ويجعل الفردوس الأعلى مثوىً لهم.
قعدة براك والله امانة ماها كعبة، لكن كمان المكجنك دا قالوا،
في الضُلُمّة يحدرلك.
نسأل الله ان يردنا للبلد سالمين غانمين، ويا الوليد الكايبويات
ديل والهنود الحمر ناس فيهم مروة، وترانا قدُر ما نوحل في
الجليد يمرقونا.

مودتي...

Quote: الأخ الفاضل / ود المدير عفارم عليهن بنات الهنود الحمر ياخ ضيعت الفرصة، كان تتزوج ليك واحدة منهن إنت ما عارف عندنا بقن النسوان هن الشغالات والرجال آخر عطالة ياخ ما كان تقول عوك حكي ظريف وطاعم

إسحق بلة الأمين،
يا أعزّ الناس.
طلتك بالدنيا كوووولها.
يا زول ديل ما تشوفِن كدي، وحاتك ما بيتعاشرن،
الوآحدة فيهِن كلو يوم دايرالآ طشت مريسة، وانا
ما بقدر علي النفر دا.
والله صحي...

Quote: يا عثمان موسي وقت يسون دي لباس الطاقية ليهو شنوووو تاني الحمدلله البقن بنات حلال كان حا يحرمننا من شوفتو في الايام القليلة المقبلة

اصبر ساااااااكت يا العفن اللغلــ............،
لآمن اصلك...