نصيحة لوجه الله يا جماعة الخير

الناس ضاق بيها الحال
والحكومة ما قصرت معاهم تب زادتهم فقر على الفقر الهم فيهو
وديوان الزكاة شغال ببند العاملين عليها و ناس الرعاية الاجتماعية عاوزين البرعاهم

عادة بنزل اجازة كل سنتين السودان
لكن السنة دي كانت ماسي ومحن تقطع قلب الواحد
عامل يومية متزوج وعنده طفل وشغال بضراعه و رزق اليوم باليوم وتجيهو مصيبة في اصبعو توقفوا عن العمل لمدة شهرين واكتر
وبعد ده يصرف مستشفيات وعمليات بمبالغ اكلت الوراهو والقدامو....
زوجة وخمس اطفال يهرب ابوهم ويخليهم لاهل الخير لان وجوده قد يحرم اطفاله الاكل فتركهم لرب العباد
وواحد تاني عامل فيها درويش ولافي مع الجماعة بتاعين الدعوة وتارك اولاده وزوجته بلا معين غير ربنا
اسر لم يذهب اطفالها للمدرسة لضيق الحال
فقر على فقر وجوع على جوع
ربنا يعينهم

خلاصة الامر ونصيحتي ليكم ولكل من في قلبه خير
خلوا بالكم من اهلكم في السودان....ما قاصد الاهل الاسرة او الاقربون وانما الجيران حواليكم وحتى البعيدين منكم
يا ريت لو كل واحد مننا يطلع مبلغ ولو بسيط 100 ريال او 30 دولار مثلا شهرياً ويرسلها للسودان لاسر بعينها او حسب معرفة ناس بيتهم ويعطوها لاسرة محتاجة
المبلغ بسيط لكن بيعمل فرق للناس ديل وممكن يشتري بيها كيلتين تلاتة كيلات زرة و يسكت بيهم جوع اطفالهم
حاليا محتاجين للتكافل الاجتماعي وبشدة حتى ينفرج الحال

up

بارك الله فيك واثابك على النصيحة والتذكرة


اللهم اعطي منفقا خلفا

محمد ابراهيم سلام يا غالي
تعرف مبلغ 50 ريال يعمل فرق كبير للاسر دي
الناس محتاجة وبشدة

والله يا عبدالسلام كتر خيرك.
وهذه بلا شك نفسك السمحة ،الما قدر رقبتا.
واحقاقا للحق،، فان روح التكافل لم تنهزم يوما.
وانصافا للمغتربين فما يشيلوه تعجز عنه الخيل الناصحة..
بل ان دولاب الحياة لو لا نقاط البره لهوي صريعا..
فالحكومة ما بتعمل في شئ الا شائلة حق الناس،،
ولا علاج،ولا تعليم،،ولا بني اقتصاد،،بس
تبيع في الاراضي،وتشيل في الجمارك،،وتدين
ووين بتمش القروش!!
لذا اتفق معاك تماما...
الناس محتاجة،عدمانة وجيعانة وعيانة.
فلنعط بيد لاهلنا المغلوبين علي امرهم.
ونلوح بالاخري ضد الظلم والجوع.

من اجل الاف مثل بهنس موجودين بالسودان و حتى لا نبكي عليهم بعد موتهم
ربنا يرحمه ويرحم الشعب السوداني الواقع بين ظلم وفساد الحكومة وضعف المعارضة بشقيها

بهنس رحمه الله امتلكَ باسويرداً ...

كم بهنس لا يملكها ولا يعرف من البورداب أحداً

Quote: بهنس رحمه الله امتلكَ باسويرداً ... كم بهنس لا يملكها ولا يعرف من البورداب أحداً

والله نمت والنوم هضاريب وكنت ببكي مع الناس بكا حاار
لا اله الا اله.....ربنا يرحمه يا هاني

شكرا يا عبد السلام على التذكير
البيوت والشوارع فيها مآسي كتيرة !

عبد السلام تحياتي ،،،

صدقني هذا ليس بالحل ،، البلد ملانة خير بس ما في قيادة تدير بنزاهة حتى يعود على المواطن ،، وفي ظل هذا النظام هم فرحون لوصولنا لهذه المرحلة حتى يكون اقصى همنا وملازنا ان نوفر لقمة العيش ،، لا نريد منكم اي اعانة ولو عملتوا فايدة حتى تقللوا او تجمدوا معونتكم لزويكم واهاليكم لمدة شهرين ،، حتى نصل مرحلة لا نجد ما نأكله وساعتها سيرى هؤلاء الفقراء سبب افقارهم ليس الفقر بل هو سؤ الادارة وعليه تقوم ثورة الجياع التي تمي هذه الطغمة الفاسدة والمفسدة الى مــزبلة التاريخ والى غير رجعة ،،
يا اخي دونك المشاريع الزراعية والمنهجية الممارسة لتدميرها واخرها التقاوي الفاسدة ،والمشاريع الاخرى التي كانت كفيلة بمليء بطوننا الخاوية واولادنا المرضى و شبابنا العاطل ،
لا خيار امامنا لحل مشكلتنا الا بزوال السبب الرئيسي في تعاستنا هو هذا النظام العــاهر التــافه وبعده ايما نظام نظيف اليد ومبداؤه الشفافية وقابل للمحاسبة سنكون في خير ونعيم لأن الاصل الخير موجود ولكن المفسدون هم من اوصلنا الى هذا الدرك السحيق ،،
----------------
ستدعموهم شهر شهرين ثلاثة الى ما لانهاية ،، لا يفيد ابدا ونحن نعلم الطريق الامثل هو نهاية هذه الحقبة المقيتة ،،

تحياتي

اللهم أعطي منفقا خلفا وأعطي كل ممسك تلفا

الخير في وفي أمتي الي أن تقوم الساعة

التحية لصاحب البوست

ومازال الشعب السوداني الفضل بخير

Quote: اللهم أعطي منفقا خلفا وأعطي كل ممسك تلفا الخير في وفي أمتي الي أن تقوم الساعة التحية لصاحب البوست ومازال الشعب السوداني الفضل بخير

في المسجد جنب البيت مجموعة نساء كبار وصغار في السن بيتفقدوا الاسر المحتاجة وبيدوهم معينات مادية ومواد تمونية و ملابس يتبرع بها اشخاص غير معروفين
تجي عربية شايله شولات سكر 10كجم وشخص ما معروف للحي وينزل حمولته يوم الجمعة ويمشي
بناتنا واماتنا ديل بيعملوا عصيدة وعصير في المسجد يوم الجمعة الصباح بدري ويشيلوا يودوه المستشفى وحتى للمساجين في سجن مدني

وزي ما قلت مازال الشعب الفضل بخير

Quote: عبد السلام تحياتي ،،، صدقني هذا ليس بالحل ،، البلد ملانة خير بس ما في قيادة تدير بنزاهة حتى يعود على المواطن ،، وفي ظل هذا النظام هم فرحون لوصولنا لهذه المرحلة حتى يكون اقصى همنا وملازنا ان نوفر لقمة العيش ،، لا نريد منكم اي اعانة ولو عملتوا فايدة حتى تقللوا او تجمدوا معونتكم لزويكم واهاليكم لمدة شهرين ،، حتى نصل مرحلة لا نجد ما نأكله وساعتها سيرى هؤلاء الفقراء سبب افقارهم ليس الفقر بل هو سؤ الادارة وعليه تقوم ثورة الجياع التي تمي هذه الطغمة الفاسدة والمفسدة الى مــزبلة التاريخ والى غير رجعة ،، يا اخي دونك المشاريع الزراعية والمنهجية الممارسة لتدميرها واخرها التقاوي الفاسدة ،والمشاريع الاخرى التي كانت كفيلة بمليء بطوننا الخاوية واولادنا المرضى و شبابنا العاطل ، لا خيار امامنا لحل مشكلتنا الا بزوال السبب الرئيسي في تعاستنا هو هذا النظام العــاهر التــافه وبعده ايما نظام نظيف اليد ومبداؤه الشفافية وقابل للمحاسبة سنكون في خير ونعيم لأن الاصل الخير موجود ولكن المفسدون هم من اوصلنا الى هذا الدرك السحيق ،، ---------------- ستدعموهم شهر شهرين ثلاثة الى ما لانهاية ،، لا يفيد ابدا ونحن نعلم الطريق الامثل هو نهاية هذه الحقبة المقيتة ،،

معا لاسقاط عصابة اللصوص سارقي قوت الشعب
ما أتكلم عنه نقطة في بحر الاحتياجات للشعب السوداني

Quote: شكرا يا عبد السلام على التذكير البيوت والشوارع فيها مآسي كتيرة !

يا ريت لو تشوف فرحة طفل وانت بتديهو صندوق بسكويت بنص جنيه
والله فرحة تخليك مدمن على العطاء

عبد السلام عليك السلام
نصيحتاً تخدرك يا حبوب ونسأل الله ان تكون فى ميزان حسناتك..
ولكن ارجوا ان تستصحب معك كلام اخونا على دفع الله خصوصاً هو مقيم داخل السودان
وان لا ننسى القالة الصينىة: لاتعطنى سمكة ولكن علمنى كيف اصطاد سمكة،،،

الاخوة في الفيس
زيزو سودان واحمد و قرحطب فور برنقا
تشكروا وفي ميزان الحسنات