حجيتك ما بجيتك
ريدا جانى وجاكى
طريت اللقيا طريتك
وسادر كايسك وبترجاكى
حجيتك ما بجيتك
كان يا ما كان
فى وليد من ناس الحله
بالريده مستفه روحو
وقلبو رهيف بالحب مليان
واقف خايف
يغطى جروحو
يعاند الشوق
ويضحك حزنان
جارى ورا الفرح الممحوق
يزعل فرحان
وشوقو مدفق غامر سوحو
مشتت فى بطن الأزمان
حجيتك ما بجيتك
فرحا جانى وجاكى
وتانى كمان
كان ياما كان
قالو فى زول
ذات فى يوم
تاوق وشافك
شال عينيهو اداهن ليكى
دخل الفجة الفيها سماحك
فج المعنى الفيهو عفافك
وخت حمالته على عينيكى
خلا عميرو ينور منك
نسى آلامو وجا مباريكى
قفل الروح الشالك فيها
وخلا الباب تالاك متاكى
حجيتك ما بجيتك
ريدا جانى وجاكى
تتذكرى يوم خسمتك ؟
قت ليكى عليك الريد
عليكى الشوق الهد الحيل
ابقى المطره
واروى نشافنا
ابقى القمرا
افتحى لينا دروب الليل
بلى ترابنا وابقى النيل
وبى موجاتك اطفى عذابنا
وساعة نضهب وسط الوحشة
ابقى النمه
وكونى دليل
سعدا مارق منك عم رباكى
حجيتك ما بجيتك
ريدا جانى وجاكى