Post: #1
Title: مقاهي ام درمان ... هل من عودة تاني ؟؟!!
Author: صلاح غريبة
Date: 11-11-2013, 07:24 PM
Parent: #0
في حديثه خلال منتدى أبناء أم درمان وبحضور المعتمد، بشر والي الخرطوم د. عبد الرحمن الخضر بعودة المقاهي من جديد كما كان سائدا قبل عقود خلت، وقال الوالي :" إننا ندعم رؤية المنتدى بإعادة الحياة لألق ام درمان القديم، بعودة المقاهي والمنتديات الأدبية والفنية وكل ما يحقق أشواق أبناء المدينة ".
فهل من عودة تاني ... يا مقاهي أم درمان ؟؟!!
- نواصل -
الخبير الوطني /م. صلاح غريبة - اعلامي وكاتب صحفي . مدون
|
Post: #2
Title: Re: مقاهي ام درمان ... هل من عودة تاني ؟؟!!
Author: محمد علي عثمان
Date: 11-11-2013, 07:40 PM
Parent: #1
و هو عبد الرحمن الخضر بيعرف ايه عن مقاهي ام درمان؟
|
Post: #3
Title: Re: مقاهي ام درمان ... هل من عودة تاني ؟؟!!
Author: عبد الوهاب المليك
Date: 11-11-2013, 08:41 PM
Parent: #2
كان يا ما كان .. كان في أواخر السبعينات وفي نادي الخريجين بامدرمان ( ليلة الأربعاء) .. وليلة الأربعاء كانت ليلة أدبية (شعرية) تضم الأستاذة الأجلاء مبارك المغربي ، اسماعيل حسن ، محمد بشير عتيق ، مصطفى طيب الاسماء ، محمد علي أبو قطاطي
وغيرهم وغيرهم وكنا نستمتع بتلك الليالي .. وشهدت ليلة الأربعاء ميلاد الشاعر مختار دفع الله وكان وقتها طالب بالثانوي ..
آآآخ من تلك الليالي .. والمضى لا يعود وإن عاد فلن يكون كما المضى .. كانت امدرمان حكاية ... تعيدوا ليها شنو ؟ لا شنو ؟
يا مثبت العقل والدين ..
|
Post: #14
Title: صلاح غريبة - ام درمان
Author: صلاح غريبة
Date: 11-13-2013, 06:16 PM
Parent: #3
عبد الوهاب المليك:
إن شاء الله ليالي أم درمان تعود أحسن من ما كانت واهو البشريات بدات بتشييد كورنيش النيل على احسن مايكون على شاطئ طويل حتى الحقنة في الريف الشمالي لام درمان وقبلها كان مهجورا طوال الوقت ... نفس الشئ المقاهي موعودة بعودة متألقة أحسن من الماضي.
- نواصل -
الخبير الوطني / م. صلاح غريبة - اعلامي وكاتب صحفي . مدون
|
Post: #12
Title: ام درمان - المقاهي
Author: صلاح غريبة
Date: 11-12-2013, 08:32 PM
Parent: #2
محمد على عثمان ... لكن ناس منتدى أبناء أم درمان يعرفوها ...!!
- نواصل -
الخبير الوطني / م. صلاح غريبة - اعلامي وكاتب صحفي . مدون
|
Post: #4
Title: صلاح غريبة - ام درمان
Author: صلاح غريبة
Date: 11-12-2013, 06:41 AM
Parent: #1
الزيبق،يوسف الفكي،جورج مشرقي،ود الاغا... وغيرها، كانت مقاهي ذائعة الصيت، يرتادها الساسة والمثقفين والفنانين والرياضيين وكانت متنفس حقيقي لكل مبدع .
بحديث والي الخرطوم مؤخرا ووعده بعودة هذه المقاهي يعود لام درمان روحها تبث فيها الحيوية من جديد .
فكم خرجت درر ابداعية من تلكم المقاهي ... أثرت وجدان الشعب السوداني .
لم تكن المقاهي مجرد أمكنة للتسلية وتزجية الوقت وإنما كانت بمثابة أندية ومنتديات تؤمها النخب وتضم بين ثناياها كافة ألوان الطيف السودانية.
- نواصل -
الخبير الوطني / م. صلاح غريبة - اعلامي وكاتب صحفي . مدون
|
Post: #5
Title: Re: صلاح غريبة - ام درمان
Author: يحي قباني
Date: 11-12-2013, 06:47 AM
Parent: #4
الزيبق الشالها من ابجنزير و وداها امدرمان منو يا غريبه ؟
|
Post: #6
Title: Re: صلاح غريبة - ام درمان
Author: Ayman Khalifa
Date: 11-12-2013, 06:53 AM
Parent: #4
| Quote: ة للتسلية وتزجية الوقت وإنما كانت بمثابة أندية ومنتديات تؤمها النخب وتضم بين ثناياها كافة ألوان الطيف السودانية. |
ياخى هو المنبر الالكترونى دة قفلو لما الناس بقى نضما كتير .. الزول المقطع دة يفتح مقاهى ......كلام للإستهلاك الاعلامى والضحك على الدقون وهو بعرف شنو عن امدرمان كان ما مجانية التعليم السكة حديد الجابتو (وفى قطر بضاعة )
|
Post: #8
Title: Re: صلاح غريبة - ام درمان
Author: عبد الوهاب المليك
Date: 11-12-2013, 07:06 AM
Parent: #6
فهوة ود الأغا ( ود اللغا)
كانت فيها تربيزة يجلس عليها فطاحله خالد ابو الروس ، محمود سراج أبو قبورة ، أحمد الجابري وغيرهم .. كانت المواصلات فاااضيه .. والخير كتيييير .. يتجمعوا في الفهوة في طريقهم من وإلى الاذاعة والمسرح القومي .. تسمع ضحكاتهم وونستهم وتعليقاتهم الساخرة بالمجان ..
وكانت امدرمان حكاية آآآآه .. وكان غنى امدرمان محنة ... آآآه
ليت المضى يعود .. وأهلنا قالوا .. البروح ما برجع ..
يا صلاح يا خوي حتى كان فتحوها تفتكر القعدة فيها بتكون نفس القعدة الكانت زمان ؟؟ ولا الغاية أنهم يفتحوها وبس ؟؟
يا مثبت العقل والدين ..
|
Post: #7
Title: Re: مقاهي ام درمان ... هل من عودة تاني ؟؟!!
Author: النذير بيرو
Date: 11-12-2013, 07:04 AM
Parent: #1
الاخ صلاح
تحيات عطرة
حاليا توجد قهوة العمال والنجارين والبناين
جنوب البوستة مازالت محافظة علي طرازها القديم
تسلم
|
Post: #9
Title: Re: مقاهي ام درمان ... هل من عودة تاني ؟؟!!
Author: ياسر منصور عثمان
Date: 11-12-2013, 08:00 AM
Parent: #7
لماذا لا يتكرم السيد الوالي المحترم بمنح اصحاب القهاوي التاريخية (او ورثتهم) مساحات على شارع النيل في امدرمان لكي يعيدوا فتح تلك القهاوي بمسمياتها القديمة لأن اعادتها في نفس اماكنها يعتبر ضرب من ضروب العبط؟؟؟
|
Post: #10
Title: Re: مقاهي ام درمان ... هل من عودة تاني ؟؟!!
Author: عبدالكريم أحمد الامين
Date: 11-12-2013, 08:17 AM
** ياخبير ياوطنى:-
** ســـلام..
** القهاوى دى أصحابا ربنا بيحبهم لأنهم إنتقلوا من هذه الفانيه بعد سنــــــ1989ـــــة **
** بدل ترجعوا القهاوى ,, رجعونا نحنا الشعب الفضل محل مالقيتونا فى سنة 1989 وحلوا عن سماءنا وبكدا تكونوا أنقذتونا **
|
Post: #11
Title: Re: مقاهي ام درمان ... هل من عودة تاني ؟؟!!
Author: محمد مختار جعفر
Date: 11-12-2013, 06:02 PM
Parent: #10
أخونا الخبير الوطني كما يحلو له / صلاح غريبه
هل القهاوى يراد لها العمل على طريقتين ..؟؟ واللا كيف ..؟!!
قهاوي الحريم ستات الشاي ، منتشرة في كل ركن وزاوية .. حتى أصبح
لايخلو منها مكان في مدن العاصمة المثلثة حين ترفع بنابرها وجركاناتها
عند المغرب ...!!!
ليبدأ غيرهن العمل الليلي في الساحات والميادين لدى السمار ..
أها الدباره كيف ، مع المنوال ده ..!؟
أم يريد السيد والي الخرطوم ، الخضر ، قهاوي زمان بنمط الإنقاذ الحالي ،
فيها منظرين كيزان جدد وحكاوي ممغنطة وكده .. وتنفض عند ساعة محددة ،
يا أخي .. كدى حلونا من مناظر قهاوي بنابر البرندات وانتشارها الغميء
وغير الصحي والحضاري ...
قالو عاصمة حضارية ..!! قالو ..
تحيتي ..
|
Post: #13
Title: صلاح غريبة - ام درمان
Author: صلاح غريبة
Date: 11-12-2013, 08:43 PM
Parent: #1
بعودة المقاهي لولاية الخرطوم ستختفي المظاهر السالبة وتتواري خجلا، ولن نرى بعدها تكدس للشباب حول ( ستات الشاي ) تحت ظلال الأشجار ومواقف المواصلات في هيئات مرزية عشوائية لا تسر الناظرين.
- نواصل -
الخبير الوطني / م. صلاح غريبة - اعلامي وكاتب صحفي . مدون
|
Post: #15
Title: Re: صلاح غريبة - ام درمان
Author: عبد الوهاب المليك
Date: 11-13-2013, 07:07 PM
Parent: #13
| Quote: بعودة المقاهي لولاية الخرطوم ستختفي المظاهر السالبة وتتواري خجلا، ولن نرى بعدها تكدس للشباب حول ( ستات الشاي ) تحت ظلال الأشجار ومواقف المواصلات في هيئات مرزية عشوائية لا تسر الناظرين. |
هل الغرض من عودة المقاهي محاربة المظاهر السالبة والحد من تكدس الشباب حول ستات الشاي ؟؟ المقاهي لن تعود كما كانت زمان إلا بعودة أيام زمان .. أيام الشاي بقرش والقرش كان ليه قيمة ..
يا مثبت العقل الدين ..
|
Post: #16
Title: صلاح غريبة - مقاهي ام درمان
Author: صلاح غريبة
Date: 11-13-2013, 07:30 PM
Parent: #1
المقاهي في البلاد العربية هي من جواذب السياحة وتمثل عراقة البلد وتاريخها ... في كل مكان.
في كل مكان، للمقاهي عبق خاص وجلسات تنسى رهق الحياة ... فهل تفعلها ولاية الخرطوم وتعيد تلكم المنارات الاجتماعية ؟
هذا لايعني تشريد العاملين الآن في مجال البوفيهات و " ست الشاي " الذين يتكسبون من بيع المشروبات الساخنة ولكنه تقنين لهذه المهنة وعرض بضاعتها في قالب سياحي يعكس ثقافة السودان وتراثه وكذلك جعلها منتديات اجتماعية لأهل السودان الذين عرفوها منذ أمد ولكنها إندثرت بوعد والي الخرطوم هذا،يعتبر إحياءا لها... نتمنى السرعة في انجاز الوعد .
- نواصل -
الخبير الوطني / م. صلاح غريبة - اعلامي وكاتب صحفي . مدون
|
Post: #17
Title: Re: صلاح غريبة - مقاهي ام درمان
Author: عبد الوهاب المليك
Date: 11-13-2013, 08:51 PM
Parent: #16
| Quote: وكذلك جعلها منتديات اجتماعية لأهل السودان الذين عرفوها منذ أمد ولكنها إندثرت |
السبب في اندثاره شنو ؟ مش انت كاتب وصحفي ومدون و ... و ... ؟
اندثرت يا أخ صلاح لأنو المكان بقى ما زي بقية الأمكنة والزمان ما زي بقية الأزمنة ..
يا مثبت العقل والدين ..
|
|